ಮಂಗಳೂರು: ಹಿಂದೂ ದೈವಸ್ಥಾನದ ಎದುರೇ ಮುಸ್ಲಿಂ ಖಬರಿಸ್ತಾನ ನಿರ್ಮಾಣ ವಿವಾದ; ಗ್ರಾಮಸ್ಥರಿಂದ ತೀವ್ರ ವಿರೋಧ

ಮಂಗಳೂರು, ಅಕ್ಟೋಬರ್ 10: ಮಂಗಳೂರಿನ ಮೂಡುಶೆಡ್ಡೆ ಗ್ರಾಮದಲ್ಲಿ ಹಿಂದೂ ದೈವಸ್ಥಾನದ ಎದುರಲ್ಲೇ ಮುಸ್ಲಿಂ ದಫನ್ ಭೂಮಿಗೆ (ಖಬರಿಸ್ತಾನ) ಜಾಗ ಮಂಜೂರು ಮಾಡಿರುವ ವಿಚಾರವು ಈಗ ಭಾರೀ ವಿವಾದದ ಕಿಡಿ ಎಬ್ಬಿಸಿದೆ. ಗ್ರಾಮದ ಸರ್ವೇ ನಂಬರ್ 74ರಲ್ಲಿ ಪಿಲಿಕುಳ ಅಭಿವೃದ್ಧಿ ಪ್ರಾಧಿಕಾರಕ್ಕೆ ಮೀಸಲಿಟ್ಟಿರುವ 300 ಎಕರೆ ಜಾಗದಲ್ಲಿ, ಹಯತುಲ್ ಇಸ್ಲಾಂ ಬದ್ರಿಯಾ ಜುಮ್ಮಾ ಮಸೀದಿ ಮತ್ತು ಮದರಸಕ್ಕೆ ಎರಡು ಎಕರೆ ಜಾಗವನ್ನು ಮಂಗಳೂರು ತಹಶೀಲ್ದಾರ್ ಆದೇಶದಂತೆ ಮಂಜೂರು ಮಾಡಲಾಗಿದೆ. ಸದ್ಯ ಈ ಸ್ಥಳದಲ್ಲಿ ಮಣ್ಣು ಅಗೆಯುವ ಕಾರ್ಯವೂ ಆರಂಭಗೊಂಡಿದೆ.

ದೈವಸ್ಥಾನ, ನಾಗಬನ ಸಮೀಪವೇ ಖಬರಿಸ್ತಾನ: ‘ಮೂಡುಶೆಡ್ಡೆ ಚಲೋ’ಗೆ ಕರೆ

ಆದರೆ, ಮಸೀದಿಯಿಂದ ಸುಮಾರು ಎರಡು ಕಿಲೋಮೀಟರ್ ದೂರದಲ್ಲಿರುವ ಈ ಜಾಗದ ಸುತ್ತಮುತ್ತ ಜಾರಂದಾಯ ದೈವದ ಧರ್ಮ ಚಾವಡಿ, ನಾಗಬನ ಹಾಗೂ ಜೈನ ಬಸದಿಗಳು ನೆಲೆಗೊಂಡಿವೆ. ಈ ಪವಿತ್ರ ಧಾರ್ಮಿಕ ಕೇಂದ್ರಗಳ ತೀರಾ ಸನಿಹದಲ್ಲೇ ಖಬರಿಸ್ತಾನ ನಿರ್ಮಿಸುತ್ತಿರುವುದು ಹಿಂದೂ ಧಾರ್ಮಿಕ ನಂಬಿಕೆಗಳಿಗೆ ಮತ್ತು ದೈವರಾಧನೆಗೆ ಮಾಡುವ ಅಪಚಾರ ಎಂದು ಗ್ರಾಮಸ್ಥರು ಹಾಗೂ ವಿವಿಧ ಹಿಂದೂ ಸಂಘಟನೆಗಳು ತೀವ್ರವಾಗಿ ಆಕ್ರೋಶ ವ್ಯಕ್ತಪಡಿಸಿವೆ. ಅತೀ ಹೆಚ್ಚು ಹಿಂದೂಗಳೇ ವಾಸವಿರುವ ಈ ಪ್ರದೇಶದಲ್ಲಿ ಉದ್ದೇಶಪೂರ್ವಕವಾಗಿ ದಫನ ಭೂಮಿ ನಿರ್ಮಿಸಲಾಗುತ್ತಿದೆ ಎಂದು ಆರೋಪಿಸಿರುವ ಸಂಘಟನೆಗಳು, ಸರ್ಕಾರದ ಈ ನಡೆ ಖಂಡಿಸಿ ‘ಮೂಡುಶೆಡ್ಡೆ ಚಲೋ’ಗೆ ಕರೆ ನೀಡಿವೆ.

ಆದೇಶ ವಾಪಸ್‌ಗೆ ಸ್ಥಳೀಯರ ಪಟ್ಟು: ತೀವ್ರ ಹೋರಾಟದ ಎಚ್ಚರಿಕೆ

ಈ ಕುರಿತು ಟಿವಿ9 ಜತೆ ಮಾತನಾಡಿರುವ ಮೂಡುಶೆಡ್ಡೆ ಗ್ರಾಮಸ್ಥರು, ಸ್ಥಳೀಯರ ನಿವೇಶನ ಬೇಡಿಕೆಗೆ ಸ್ಪಂದಿಸದ ಆಡಳಿತವು, ಪಂಚಾಯತ್ ಗಮನಕ್ಕೂ ತರದೆ ಈ ಆದೇಶ ಹೊರಡಿಸಿದೆ ಎಂದು ದೂರಿದ್ದಾರೆ. ಕೂಡಲೇ ಈ ಆದೇಶವನ್ನು ವಾಪಸ್ ಪಡೆದು ಆ ಭೂಮಿಯನ್ನು ಪಿಲಿಕುಳ ಪ್ರಾಧಿಕಾರಕ್ಕೇ ಮರುನೀಡಬೇಕು ಎಂದು ಆಗ್ರಹಿಸಿದ್ದಾರೆ. ಒಂದು ವೇಳೆ ಕಾಮಗಾರಿ ನಿಲ್ಲಿಸದಿದ್ದರೆ ಮುಂದಿನ ದಿನಗಳಲ್ಲಿ ಉಗ್ರ ಹೋರಾಟ ನಡೆಸುವುದಾಗಿ ಗ್ರಾಮಸ್ಥರು ಎಚ್ಚರಿಕೆ ನೀಡಿದ್ದು, ಮಂಗಳೂರಿನಲ್ಲಿ ಈ ದೈವಸ್ಥಾನ ವರ್ಸಸ್ ಖಬರಸ್ತಾನ ವಿವಾದ ತೀವ್ರ ಸ್ವರೂಪ ಪಡೆದುಕೊಂಡಿದೆ.

ಕರ್ನಾಟಕದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ