‘ನನ್ನ ಗೆಳತಿ ನನ್ನ ಗೆಳತಿ’ ಖ್ಯಾತಿಯ ವೀರ ಸೈನಿಕ ಮಂಜುನಾಥ ಗಡಿಯಲ್ಲಿ ಹುತಾತ್ಮ

ದೇಶದ ರಕ್ಷಣೆಗೆ ನಿಂತ ಯೋಧರು ತಮ್ಮದೆಲ್ಲವನ್ನೂ ತ್ಯಾಗ ಮಾಡಿ, ಗಡಿ ಕಾಯುತ್ತಾರೆ. ಗುಂಡಿಗೆ ಎದೆಯೊಡ್ಡಿ ನಮ್ಮನ್ನೆಲ್ಲಾ ರಕ್ಷಿಸುವ ಸೈನಿಕರು ಹುತಾತ್ಮರಾದಾಗ ಎದುರಾಗುವ ದುಃಖ ಅಂತಿಂತದ್ದಲ್ಲ. ಹೀಗೆ ನಮ್ಮ ನಾಡಿನ ಸೈನಿಕರೊಬ್ಬರು ಪಾಪಿ ಉಗ್ರರ ಜೊತೆ ಸೆಣೆಸಾಡುತ್ತಾ ಕಣಿವೆಯಲ್ಲಿ ಹುತಾತ್ಮರಾಗಿದ್ದಾರೆ.

ದೇಶಕ್ಕಾಗಿ ತಮ್ಮ ಸುಖ, ಸಂತೋಷವನ್ನೆಲ್ಲ ಮರೆತು ವೈರಿಗಳ ವಿರುದ್ಧ ಹೋರಾಡುವ ವೀರಯೋಧರು ತಮ್ಮ ಕೆಲಸದ ಬಿಡುವಿನಲ್ಲಿ ಕೊಂಚ ರಿಲ್ಯಾಕ್ಸ್ ಆಗುವುದಕ್ಕೆ ಹಾಡು ನೃತ್ಯದ ಮೂಲಕ ತಮ್ಮ ಟ್ಯಾಲೆಂಟ್​ನ ತೋರ್ಪಡಿಸುತ್ತಾರೆ. ಅದೇ ರೀತಿ ಕೆಲದಿನಗಳ ಹಿಂದೆ ಸಾಮಾಜಿಕ ತಾಣಗಳಲ್ಲಿ ಯೋಧರು ನನ್ನ ಗೆಳತಿ ನನ್ನ ಗೆಳತಿ ಎಂದು ಹಾಡಿದ ವೀಡಿಯೊ ವೈರಲ್ ಆಗಿತ್ತು. ಸೇನೆಯಲ್ಲಿರುವ ಕರ್ನಾಟಕದ ಯೋಧರು ಹಾಡಿದ ಈ ಜನಪದ ಗೀತೆಗೆ ಎಲ್ಲರೂ ಫಿದಾ ಆಗಿದ್ದರು. ಈ ಸಂತೋಷ ಎಲ್ಲೆಡೆ ಹಬ್ಬಿರುವಾಗಲೇ ದುರಂತದ ಸುದ್ದಿಯೊಂದು ಬರಸಿಡಿಲಿನಂತೆ ಬಂದು ಅಪ್ಪಳಿಸಿದೆ. ಅಂದು ಹಾಡಿಗೆ ದನಿಗೂಡಿಸಿದ್ದವರ ಪೈಕಿ ಯೋಧ ಮಂಜುನಾಥ ಹನುಮಂತಪ್ಪ ಓಲೇಕಾರ ಉಗ್ರರ ಜೊತೆಗಿನ ಗುಂಡಿನ ಕಾಳಗದಲ್ಲಿ ಹುತಾತ್ಮರಾಗಿದ್ದಾರೆ.

ಕಳೆದ 9ವರ್ಷಗಳಿಂದ ಸೇನೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದ ಧಾರವಾಡ ಜಿಲ್ಲೆಯ ಹುಬ್ಬಳ್ಳಿ ತಾಲೂಕಿನ ಇನಾಂ ವೀರಾಪುರ ಗ್ರಾಮದ ಮಂಜುನಾಥ್, ಉಗ್ರರ ಜೊತೆ ಸೆಣೆಸಾಡುತ್ತಾ ಹುತಾತ್ಮರಾಗಿದ್ದಾರೆ. ಜಮ್ಮು–ಕಾಶ್ಮೀರದ ಗಡಿಯಲ್ಲಿದ್ದ ಯೋಧ ಮಂಜುನಾಥ ಹನುಮಂತಪ್ಪ ಓಲೇಕಾರ ಸಾವಿನ ಸುದ್ದಿ ಕೇಳಿ ಇಡೀ ವೀರಾಪುರ ಶೋಕ ಸಾಗರದಲ್ಲಿ ಮುಳುಗಿದ್ದು, ಹುಬ್ಬಳ್ಳಿ ತಹಶೀಲ್ದಾರ್ ಸಂಗಪ್ಪ ಗ್ರಾಮಕ್ಕೆ ಭೇಟಿ ನೀಡಿದ್ದಾರೆ. ದೇಶ ಕಾಯಲು ಹೋದ ಯೋಧ ಪಾಪಿ ಉಗ್ರರ ಗುಂಡಿಗೆ ಎದೆಯೊಡ್ಡಿ ಹುತಾತ್ಮರಾಗಿದ್ದು ದುರಂತದ ಸಂಗತಿ. ಮಗನನ್ನು ಕಳೆದುಕೊಂಡಿರುವ ಮಂಜುನಾಥ್ ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದೆ.

Published On - 11:42 am, Thu, 3 October 19