Toll Collection: ಐದು ವರ್ಷದಲ್ಲಿ ಕರ್ನಾಟಕ ವಾಹನ ಸವಾರರು ಪಾವತಿಸಿದ ಟೋಲ್ ಮೊತ್ತ ಎಷ್ಟು?

ಬೆಂಗಳೂರು: ರಾಜ್ಯದ ವಿವಿಧ ಹೆದ್ದಾರಿಗಳಲ್ಲಿ ಲೆಕ್ಕವಿಲ್ಲದಷ್ಟು ಟೋಲ್ ಬೂತ್​ಗಳಿವೆ. ಇಲ್ಲೆಲ್ಲಾ ಅದೆಷ್ಟು ಟೋಲ್ ಸಂಗ್ರಹವಾಗಿರಬಹುದು (Toll Collection) ಎಂದನಿಸಬಹುದು. ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ (Union Road Transport and Highway Ministry) ಬಿಡುಗಡೆ ಮಾಡಿದ ಮಾಹಿತಿ ಪ್ರಕಾರ ಕರ್ನಾಟಕದಲ್ಲಿರುವ ಹೆದ್ದಾರಿ ಟೋಲ್ ಬೂತ್​ಗಳಿಂದ ಕಳೆದ ಐದು ವರ್ಷಗಳಲ್ಲಿ ಸಂಗ್ರಹವಾದ ಟೋಲ್ ಮೊತ್ತ ಬರೋಬ್ಬರಿ 10 ಸಾವಿರ ಕೋಟಿ ರೂ ಸಮೀಪ ಇದೆ. ಇದು 2018ರ ಏಪ್ರಿಲ್​ನಿಂದ 2022ರ ಡಿಸೆಂಬರ್​ವರೆಗಿನ ಅಂಕಿ ಅಂಶ.

ಇದು ಕರ್ನಾಟಕದದ್ದಾದರೆ ಭಾರತದಾದ್ಯಂತ ಇರುವ ಟೋಲ್ ಬೂತ್​ಗಳಲ್ಲಿ ಅದೆಷ್ಟು ಹಣ ಸಂಗ್ರಹವಾಗಿರಬಹುದು. ಕೇಂದ್ರ ಸಚಿವಾಲಯ ಬಿಡುಗಡೆ ಮಾಡಿದ ಈ ವರದಿ ಪ್ರಕಾರ ದೇಶಾದ್ಯಂತ ವಾಹನ ಸವಾರರಿಂದ ಐದು ವರ್ಷಗಳಲ್ಲಿ ಸಂಗ್ರಹವಾದ ಟೋಲ್ ಹಣ ಒಂದೂವರೆ ಲಕ್ಷ ಕೋಟಿ ರೂ ಅಂತೆ. ಉತ್ತರ ಪ್ರದೇಶ, ರಾಜಸ್ಥಾನ ಮತ್ತು ಗುಜರಾತ್ ರಾಜ್ಯಗಳಲ್ಲಿ ಅತಿ ಹೆಚ್ಚು ಟೋಲ್ ಸಂಗ್ರಹವಾಗಿರುವುದು ತಿಳಿದುಬಂದಿದೆ.

ಇದನ್ನೂ ಓದಿ: ಬೆಂಗಳೂರಿನಲ್ಲಿ ಹೆಚ್ಚಾದ ಹೊಟೇಲ್ ಕೊಠಡಿಗಳಿಗೆ ಬೇಡಿಕೆ, ಬಹುತೇಕ ಕೊಠಡಿಗಳು ಫುಲ್, ಬೆಲೆಯೂ ಏರಿಕೆ

ಫಾಸ್​ಟ್ಯಾಗ್ ಎಫೆಕ್ಟ್

ಎರಡು ವರ್ಷಗಳ ಹಿಂದೆ ಚಾಲನೆಗೆ ಬಂದ ಫಾಸ್​ಟ್ಯಾಗ್ (FASTag) ವ್ಯವಸ್ಥೆಯಿಂದಾಗಿ ಟೋಲ್ ಸಂಗ್ರಹ ಗಣನೀಯವಾಗಿ ಹೆಚ್ಚಳವಾಗಿದೆ. ವಾಹನಗಳಿಗೆ ಫಾಸ್​ಟ್ಯಾಗ್ ಅಳವಡಿಸುವುದರಿಂದ ಟೋಲ್ ಬೂತ್​ಗಳಲ್ಲಿ ಸ್ವಯಂಚಾಲಿತವಾಗಿ ಟೋಲ್ ಹಣ ಕಡಿತಗೊಳ್ಳುವುದಲ್ಲದೇ ಹೆಚ್ಚು ಹೊತ್ತು ಕ್ಯೂ ನಿಲ್ಲುವ ಪರಿಸ್ಥಿತಿಯೂ ನಿಯಂತ್ರಣಕ್ಕೆ ಬರುತ್ತದೆ. ಫಾಸ್​ಟ್ಯಾಗ್ ಬಂದ ಬಳಿಕ ಸಂಗ್ರಹವಾಗುತ್ತಿರುವ ಟೋಲ್ ಹಣ ಶೇ. 20ರಷ್ಟಾದರೂ ಹೆಚ್ಚಾಗಿರುವುದು ಅಂಕಿ ಅಂಶಗಳಿಂದಲೇ ಗೊತ್ತಾಗುತ್ತದೆ.

ಐದು ವರ್ಷದಲ್ಲಿ ಅತಿಹೆಚ್ಚು ಟೋಲ್ ಸಂಗ್ರಹವಾದ 5 ರಾಜ್ಯಗಳು

ಉತ್ತರಪ್ರದೇಶ: 17,242.9 ಕೋಟಿ ರೂ

ರಾಜಸ್ಥಾನ: 16,565.9 ಕೋಟಿ ರೂ

ಗುಜರಾತ್: 15,332.2 ಕೋಟಿ ರೂ

ಮಹಾರಾಷ್ಟ್ರ: 13,043.5 ಕೋಟಿ ರೂ

ತಮಿಳುನಾಡು: 12,738 ಕೋಟಿ ರೂ

ಕರ್ನಾಟಕ: 9,982.6 ಕೋಟಿ ರೂ

ಕರ್ನಾಟಕದಲ್ಲಿ 5 ವರ್ಷದಲ್ಲಿ ಸಂಗ್ರಹವಾದ ಟೋಲ್ ಹಣ

2018-19: 1,830.1 ಕೋಟಿ ರೂ

2019-20: 1,814.3 ಕೋಟಿ ರೂ

2020-21; 1,800.1 ಕೋಟಿ ರೂ

2021-22: 2,269.2 ಕೋಟಿ ರೂ

2022-23: 2,268.9 ಕೋಟಿ ರೂ

ಇದನ್ನೂ ಓದಿ: ದೆಹಲಿ ಏರ್​​ಪೋರ್ಟ್​ನಲ್ಲಿ 5.66 ಕೋಟಿ ಮೌಲ್ಯದ ಚಿನ್ನದ ಬಿಸ್ಕೆಟ್​​ ಪತ್ತೆ

ಪ್ರಸಕ್ತ ಹಣಕಾಸು ವರ್ಷದಲ್ಲಿ ಮೊದಲ 9 ತಿಂಗಳಲ್ಲಿ ಸಂಗ್ರಹವಾಗಿರುವ ಮೊತ್ತವು ಹಿಂದಿನ ಇಡೀ ಹಣಕಾಸು ವರ್ಷದ ಕಲೆಕ್ಷನ್​ನ ಮಟ್ಟಕ್ಕೆ ಬಂದಿದೆ. ಇದು ಇನ್ನೂ ಹೆಚ್ಚಾಗುವ ನಿರೀಕ್ಷೆ ಇದೆ.

Published On - 7:50 am, Tue, 7 February 23