ಕೋಚಿಂಗ್ ಇಲ್ಲದೆ ನೀಟ್ ರ್ಯಾಂಕ್ ಪಡೆದ ಕೊಪ್ಪಳದ ವಿದ್ಯಾರ್ಥಿ ಪ್ರಶಾಂತ್; ಅಡ್ಮಿಷನ್ಗೆ ಬೇಕಾಗಿದೆ ಹಣದ ಅಗತ್ಯ
ಪ್ರಶಾಂತ್ ಅವರದ್ದು ಕಡು ಬಡತನದ ಕುಟುಂಬವಾಗಿರುವುದರಿಂದ ಎಂಬಿಬಿಎಸ್ ಅಡ್ಮಿಶನ್ ಮಾಡಿಸಲು ದುಡ್ಡಿಲ್ಲದೆ ಸಂಕಷ್ಟಕ್ಕೆ ಸಿಲುಕಿದ್ದಾನೆ. ಹೀಗಾಗಿ, ನನಗೆ ಅಡ್ಮಿಶನ್ ಮಾಡಿಸಲು ದಾನಿಗಳು ದುಡ್ಡು ನೀಡಿ ಎಂದು ಪ್ರಶಾಂತ್ ಮನವಿ ಮಾಡಿದ್ದಾನೆ.
Updated on: Nov 15, 2022 | 2:12 PM
ಕೊಪ್ಪಳ: ವರ್ಷಾನುಗಟ್ಟಲೆ ಕೋಚಿಂಗ್ ಕ್ಲಾಸ್ಗೆ ಹೋದರೂ ನೀಟ್ (NEET) ಪಾಸ್ ಆಗಿ ಮೆಡಿಕಲ್ ಸೀಟ್ ಸಿಗುವುದು ಕಷ್ಟ. ಆದರೆ, ಇಲ್ಲೊಬ್ಬ ವಿದ್ಯಾರ್ಥಿ ಯಾವುದೇ ಕೋಚಿಂಗ್ (Coaching Class) ಇಲ್ಲದೆ ನೀಟ್ನಲ್ಲಿ ರ್ಯಾಂಕ್ ಪಡೆದು ಸರ್ಕಾರಿ ಕಾಲೇಜಿನಲ್ಲಿ ಮೆಡಿಕಲ್ ಸೀಟ್ ಸಹ ಪಡೆದಿದ್ದಾನೆ. ಆದರೂ ಆತ ಕಾಲೇಜಿಗೆ ಅಡ್ಮಿಷನ್ ಆಗಲು ದುಡ್ಡಿಲ್ಲದೆ ಪರದಾಡುತ್ತಿದ್ದು, ಹಣಕ್ಕಾಗಿ ದಾನಿಗಳ ನೆರವು ಕೇಳುತ್ತಿದ್ದಾನೆ. ಆತ ಬಾಲ್ಯದಲ್ಲಿದ್ದಾಗ ಆತನ ತಂದೆ-ತಾಯಿ ಅನಾರೋಗ್ಯದಿಂದ ವೈದ್ಯರ ಬಳಿ ಅಲೆದಾಡಿದ್ದನ್ನು ನೋಡಿದ್ದ. ಹೀಗಾಗಿ, ತಾನು ಮೆಡಿಕಲ್ ಓದಿ, ಬಡಜನರಿಗೆ, ಅಸಹಾಯಕರಿಗೆ ಸಹಾಯ ಮಾಡಬೇಕೆಂಬ ಕನಸು ಹೊತ್ತಿದ್ದ. ಆ ಕನಸು ನನಸಾಗಿಸಿಕೊಳ್ಳಲು ಆತನಿಗೆ ಹಣದ ಸಮಸ್ಯೆ ಎದುರಾಗಿದೆ.
ಬಡ ಕುಟುಂಬದ ವಿದ್ಯಾರ್ಥಿಯಾಗಿರುವ ಕೊಪ್ಪಳ ತಾಲೂಕಿನ ಜಿನ್ನಾಪೂರ ಗ್ರಾಮದ ಪ್ರಶಾಂತ್ ಚಂಡೂರ್ ನೀಟ್ ಪರೀಕ್ಷೆಯಲ್ಲಿ 68039ನೇ ರ್ಯಾಂಕ್ ಪಡೆದಿದ್ದು, ಕೊಡಗು ಇನ್ಸ್ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸ್ (ಕೊಡಗು ಸರ್ಕಾರಿ ಮೆಡಿಕಲ್ ಕಾಲೇಜಿನಲ್ಲಿ) ಸೀಟ್ ಸಿಕ್ಕಿದೆ. ಆದರೆ, ಇದೀಗ ಎಂಬಿಬಿಎಸ್ ಅಡ್ಮಿಷನ್ಗೆ 1 ಲಕ್ಷಕ್ಕೂ ಹೆಚ್ಚು ಹಣ ಬೇಕಾಗಿದೆ. ಪ್ರಶಾಂತ್ ಅವರದ್ದು ಕಡು ಬಡತನದ ಕುಟುಂಬವಾಗಿರುವುದರಿಂದ ಎಂಬಿಬಿಎಸ್ ಅಡ್ಮಿಶನ್ ಮಾಡಿಸಲು ದುಡ್ಡಿಲ್ಲದೆ ಸಂಕಷ್ಟಕ್ಕೆ ಸಿಲುಕಿದ್ದಾನೆ. ಹೀಗಾಗಿ, ನನಗೆ ದಾನಿಗಳು ಅಡ್ಮಿಶನ್ ಮಾಡಿಸಲು ದುಡ್ಡು ನೀಡಿ ಎಂದು ಪ್ರಶಾಂತ್ ಮನವಿ ಮಾಡಿದ್ದಾನೆ.
ಇದನ್ನೂ ಓದಿ: NEET UG 2022 Result: ನೀಟ್ ಫಲಿತಾಂಶ ಪ್ರಕಟ, ಟಾಪ್-10 ಟಾಪರ್ಸ್ ಲಿಸ್ಟ್ನಲ್ಲಿ ಕರ್ನಾಟಕದ ಮೂವರು
ಪ್ರಶಾಂತ್ ಅವರ ತಂದೆ ಶರಣಪ್ಪ 4 ವರ್ಷಗಳ ಹಿಂದೆ ಮೃತಪಟ್ಟಿದ್ದಾರೆ. ಹೀಗಾಗಿ, ಇಡೀ ಮನೆಯ ಜವಾಬ್ದಾರಿಯನ್ನು ತಾಯಿಯೇ ನಿಭಾಯಿಸುತ್ತಿದ್ದಾರೆ. ಜೊತೆಗೆ, ಪ್ರಶಾಂತ್ ಕೂಡ ಕಾರ್ಖಾನೆಯೊಂದಕ್ಕೆ ಗಾರೆ ಕೆಲಸಕ್ಕೆ ಹೋಗುತ್ತಿದ್ದಾನೆ. ಇದರಿಂದ ಬಂದ ಹಣದಲ್ಲಿ ಪುಸ್ತಕಗಳನ್ನ ಖರೀದಿ ಮಾಡಿ, ಯಾವುದೇ ಕೋಚಿಂಗ್ಗೆ ಹೋಗದೆ ನೀಟ್ ಪರೀಕ್ಷೆಯಲ್ಲಿ ಉತ್ತಮ ರ್ಯಾಂಕ್ ಪಡೆದಿದ್ದಾನೆ.
ಮಗನನ್ನು ನನ್ನ ಕೈಲಾದಷ್ಟು ಓದಿಸಿದ್ದೇನೆ. ಬಡತನದ ಕಾರಣದಿಂದ ಇನ್ನು ನಮ್ಮಿಂದ ಆತನನ್ನು ಎಂಬಿಬಿಎಸ್ ಓದಿಸಲು ಸಾಧ್ಯವಿಲ್ಲ. ಹೀಗಾಗಿ ಯಾರಾದರೂ ನನ್ನ ಮಗನಿಗೆ ಓದಲು ಸಹಾಯ ಮಾಡಿ ಎಂದು ಪ್ರಶಾಂತ್ನ ತಾಯಿ ಮನವಿ ಮಾಡಿದ್ದಾರೆ. ಪ್ರಶಾಂತ್ನ ಶಿಕ್ಷಕರು ಸಹ ಪ್ರಶಾಂತ್ಗೆ ಸಹಾಯ ಮಾಡಿ ಎಂದು ಮನವಿ ಮಾಡಿದ್ದಾರೆ.
ಇದನ್ನೂ ಓದಿ: Karnataka NEET UG 2022: ಇಂದು ಅಣಕು ಸೀಟು ಹಂಚಿಕೆಯ ಫಲಿತಾಂಶ ಪ್ರಕಟ
ವಿದ್ಯಾಭ್ಯಾಸಕ್ಕಾಗಿ ಪ್ರಶಾಂತ್ ಕಂಡ-ಕಂಡವರ ಬಳಿ ಹಣಕ್ಕಾಗಿ ಅಂಗಲಾಚಿದ್ದು, ಯಾರೂ ಅಷ್ಟೊಂದು ಮೊತ್ತದ ಹಣ ಕೊಡಲು ಮುಂದಾಗುತ್ತಿಲ್ಲ. ಈ ಸುದ್ದಿ ಓದಿದವರು ಈ ಬಡ ವಿದ್ಯಾರ್ಥಿ ಪ್ರಶಾಂತ್ಗೆ ಸಹಾಯ ಮಾಡಲು ಇಚ್ಛಿಸುವವರು ಈ ಬಡ ಪ್ರತಿಭಾವಂತ ವಿದ್ಯಾರ್ಥಿಗೆ ನೆರವು ನೀಡಲು ಬಯಸುವವರು ಪ್ರಶಾಂತ ಶರಣಪ್ಪ ಚಂಡೂರು ಈತನ ಕೊಪ್ಪಳದ ಎಸ್‌ಬಿಐ ಬ್ಯಾಂಕ್‌ ಖಾತೆಗೆ ಹಣ ಹಾಕಬಹುದು.
ಗಮನಕ್ಕೆ: ಪ್ರಶಾಂತ ಶರಣಪ್ಪ ಚಂಡೂರು ಖಾತೆ ಸಂಖ್ಯೆ: 34985653322 IFSC ಕೋಡ್: SBIN0004277 ಮೊಬೈಲ್‌ ನಂಬರ್: 6361808300
(ವರದಿ: ದತ್ತಾತ್ರೇಯ ಪಾಟೀಲ್‌, ಕೊಪ್ಪಳ)
