ತೋಟದಲ್ಲಿ ಗಾಂಜಾ ಗಿಡ ಬೆಳೆದು ಸಿಕ್ಕಿಬಿದ್ದ ಪೊಲೀಸಪ್ಪನ ಪುತ್ರ: ಅತ್ತ ತಂದೆಯಿಂದ ಜಾಗೃತಿ, ಇತ್ತ ಮಗನಿಂದ ಕುಕೃತ್ಯ!

ತುಮಕೂರು, ಸೆಪ್​ಟೆಂಬರ್​​ 21: ಡ್ರಗ್ಸ್​​ ಮುಕ್ತ ಸಮಾಜ ನಿರ್ಮಾಣದ ನಿಟ್ಟಿನಲ್ಲಿ ಸರ್ಕಾರ ಅದರಲ್ಲೂ ಪೊಲೀಸ್​​ ಇಲಾಖೆ ಸಾಕಷ್ಟು ಪ್ರಯತ್ನಗಳನ್ನು ನಡೆಸುತ್ತಿದೆ. ಮಾದಕ ವಸ್ತು ಜಾಲದ ಮೇಲೆ ಹದ್ದಿನ ಕಣ್ಣಿಟ್ಟು ಪೆಡ್ಲರ್​​ಗಳ ಹೆಡೆಮುರಿ ಕಟ್ಟುವ ಕೆಲಸ ಮಾಡುತ್ತಿದೆ. ಆದರೆ ದುರ್ದೈವ ಎಂಬಂತೆ ಇಂತಹುದ್ದೇ ಕೆಲಸ ನಿರ್ವಹಿಸುತ್ತಿದ್ದ ಪೊಲೀಸ್​​ ಸಿಬ್ಬಂದಿಯ ಪುತ್ರನೇ ಗಾಂಜಾ ಕೃಷಿ ಮಾಡಿರೋದು ತುಮಕೂರು ಜಿಲ್ಲೆಯ ಗುಬ್ಬಿ ತಾಲೂಕಿನ ಗುಡ್ಡದಹಳ್ಳಿ ಹಟ್ಟಿ ಗ್ರಾಮದಲ್ಲಿ ನಡೆದಿದೆ. ಪೊಲೀಸಪ್ಪನ ಪುತ್ರ ತೋಟದಲ್ಲಿ ಗಾಂಜಾ ಗಿಡ ಬೆಳೆದಿದ್ದು ಕಂಡು ಸ್ಥಳೀಯರಿಗೂ ಶಾಕ್​​ ಆಗಿದೆ.

950 ಗ್ರಾಂಗಳಷ್ಟು ತೂಕದ ಗಾಂಜಾ ಗಿಡ ವಶಕ್ಕೆ

ಹೌದು, ಹಿತೇಂದ್ರ (28) ಬಂಧಿತ ಆರೋಪಿಯಾಗಿದ್ದು, ಈತನ ತಂದೆ ತುಮಕೂರಿನ ಪೊಲೀಸ್ ಠಾಣೆಯೊಂದರ ಸಿಬ್ಬಂದಿ. ಅತ್ತ ಮಾದಕ ವಸ್ತುವಿನಿಂದ ದೂರು ಇರುವಂತೆ ತಂದೆಯಿಂದ ಜಾಗೃತಿ ಮೂಡಿಸುವ ಕೆಲಸ ನಡೆಯುತ್ತಿದ್ದರೆ, ಇತ್ತ ಅವರ ಪುತ್ರ ಮಾತ್ರ ಮಾಡಬಾರದ ಕೆಲಸ ಮಾಡಿರೋದು ಪೊಲೀಸರ ದಾಳಿ ವೇಳೆ ಬಯಲಾಗಿದೆ. ಖಚಿತ ಮಾಹಿತಿ ಆಧರಿಸಿ ತನಿಖೆ ಕೈಗೊಂಡ ಚೇಳೂರು ಪೊಲೀಸರು, ತೋಟದಲ್ಲಿ ಗೊಬ್ಬರ ಹಾಕಿ ಸೊಗಸಾಗಿ ಬೆಳೆಸಿದ್ದ 8.2 ಅಡಿ ಎತ್ತರ ಬೆಳೆದಿದ್ದ ಗಾಂಜಾ ಗಿಡ ಪತ್ತೆ ಮಾಡಿದ್ದಾರೆ. ಬರೋಬ್ಬರಿ 950 ಗ್ರಾಂಗಳಷ್ಟು ತೂಕವಿದ್ದ ಗಿಡವನ್ನು ಪೊಲೀಸರು ವಶಕ್ಕೆ ಪಡೆದಿದ್ದು, ಆರೋಪಿಯ ವಿಚಾರಣೆ ಮುಂದುವರಿಸಿದ್ದಾರೆ.

ಇದನ್ನೂ ಓದಿ: ಮದುವೆಯಾಗುವುದಾಗಿ ನಂಬಿಸಿ ಲೈಂಗಿಕ ದೌರ್ಜನ್ಯ: ಯುವಕ ಸೇರಿ ಆತನ ಕುಟುಂಬಸ್ಥರ ವಿರುದ್ಧ ಯುವತಿ ದೂರು

ಗಾಂಜಾ ಗಿಡ ಬೆಳೆದಿದ್ದು ದೇವರ ಪೂಜೆಗೆ!

ಇನ್ನು ಗಾಂಜಾ ಕೃಷಿ ಸಂಬಂಧ ಆರೋಪಿ ಹಿತೇಂದ್ರನ ವಿಚಾರಣೆ ವೇಳೆ ಆತ ನೀಡಿದ ಉತ್ತರ ಕೇಳಿ ಪೊಲೀಸರು ಹೌಹಾರಿದ್ದಾರೆ. ದೇವರ ಪೂಜೆಗೆಂದು ತಾನು ಗಾಂಜಾ ಗಿಡ ಬೆಳೆಸಿದ್ದೆ ಎಂದು ಪೊಲೀಸರ ಬಳಿ ಆರೋಪಿ ಹೇಳಿದ್ದಾನೆ ಎನ್ನಲಾಗಿದ್ದು, ಹೂ ಬಿಡುವ ಮುನ್ನವೇ ಗಿಡವನ್ನು ಪೊಲೀಸರು ಪತ್ತೆ ಮಾಡಿದ್ದಾರೆ. ಅದೇನೇ ಇದ್ದರೂ ಆರೋಪಿ ಈಗ ತನ್ನ ತಂದೆ ಕರ್ತವ್ಯ ನಿರ್ವಹಿಸುತ್ತಿರುವ ಪೊಲೀಸ್​​ ಠಾಣೆಯಲ್ಲಿಯೇ ಕಂಬಿ ಎಣಿಸುವಂತಾಗಿದ್ದು, ಇನ್ನಷ್ಟು ಮಾಹಿತಿ ಸಂಪೂರ್ಣ ವಿಚಾರಣೆಯ ಬಳಿಕವೇ ಬಹಿರಂಗವಾಗಬೇಕಿದೆ.

ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್​​ ಮಾಡಿ.