ದಂಡ ಕಟ್ಟಲ್ಲ ಅಂದಿದ್ದಕ್ಕೆ.. ಬೈಕ್ ಸವಾರನ ಮೇಲೆ ರಕ್ತ ಬರುವ ಹಾಗೆ ಪೊಲೀಸರಿಂದ ಹಲ್ಲೆ?

ಚಾಮರಾಜನಗರ: ಜಿಲ್ಲೆಯ ಕೊಳ್ಳೇಗಾಲ ಪಟ್ಟಣದಲ್ಲಿ ಹೆಲ್ಮೆಟ್​ ಧರಿಸದ ಬೈಕ್ ಸವಾರನ ಮೇಲೆ ಪೊಲೀಸರು ಹಲ್ಲೆ ನಡೆಸಿದ್ದಾರೆ ಎಂಬ ಆರೋಪ ಕೇಳಬಂದಿದೆ. ಹಲ್ಲೆಗೊಳಗಾದ ಬೈಕ್​ ಸವಾರ ಮಲ್ಲೇಶ್​ನನ್ನು ಕೊಳ್ಳೇಗಾಲದ ಉಪವಿಭಾಗ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ.

ಹೆಲ್ಮೆಟ್ ಧರಿಸದ ಮಲ್ಲೇಶ್​ನನ್ನು ಹಿಡಿದ ಕೊಳ್ಳೇಗಾಲ ಪಟ್ಟಣದ ಪೊಲೀಸರು ದಂಡ ಕಟ್ಟಲು ಹೇಳಿದ್ದರಂತೆ. ದಂಡ ಕಟ್ಟಲು ಮಲ್ಲೇಶ್​ ಒಪ್ಪದಿದ್ದಕ್ಕೆ ಪೊಲೀಸರು ಮತ್ತು ಯುವಕನ ನಡುವೆ ಮಾತಿನ ಚಕಮಕಿ ನಡೆದಿದೆಯಂತೆ. ಈ ವೇಳೆ ಪೊಲೀಸರು ಯುವಕನ ಮುಖಕ್ಕೆ ಗುದ್ದಿ ರಕ್ತ ಬರುವ ಹಾಗೆ ಹಲ್ಲೆ ಮಾಡಿದ್ದಾರೆ ಎಂದು ಹೇಳಲಾಗಿದೆ.

ಇನ್ನು ಹಲ್ಲೆಗೊಳಗಾಗಿದ್ದ ಮಲ್ಲೇಶ್​ನನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಜೊತೆಗೆ, ಆತನ ಮೇಲೆ ಹಲ್ಲೆಯನ್ನು ಖಂಡಿಸಿದ ಸಾರ್ವಜನಿಕರು ಪಟ್ಟಣ ಠಾಣೆ ಎದುರು ಪ್ರತಿಭಟಿಸಿದರು.