ಪಂತ್ ವಿಶ್ವದಲ್ಲೇ ಅತಿಹೆಚ್ಚು ಕ್ಯಾಚ್ಗಳನ್ನು ಡ್ರಾಪ್ ಮಾಡಿರುವ ವಿಕೆಟ್ ಕೀಪರ್: ರಿಕ್ಕಿ ಪಾಂಟಿಂಗ್

ಈವರೆಗೆ ಆಡಿರುವ 14 ಟೆಸ್ಟ್ಗಳಲ್ಲಿ ಪಂತ್ 65 ಆಹುತಿಗಳನ್ನು ಪಡೆದಿದ್ದರೂ ರಿಷಭ್ ಪಂತ್ ವಿಕೆಟ್ ಕೀಪಿಂಗ್ ಬಹಳ ಸುಧಾರಿಸಬೇಕಿದೆ, ಅವರ ಬ್ಯಾಟಿಂಗ್ ಕುರಿತು ಕಾಮೆಂಟ್ ಮಾಡಲಾರೆ ಆದರೆ ಗ್ಲೋವ್ ವರ್ಕ್ ಬಹಳಷ್ಟು ಉತ್ತಮಗೊಳ್ಳಬೇಕಿದೆ ಎಂದು ಪಾಂಟಿಂಗ್ ಹೇಳುತ್ತಾರೆ.

ಕ್ಯಾಚ್ ನೆಲಸಮಗೊಳಿಸುತ್ತಿರುವ ಪಂತ್

ಅರುಣ್ ಕುಮಾರ್ ಬೆಳ್ಳಿ | Edited By: ರಾಜೇಶ್ ದುಗ್ಗುಮನೆ|
Updated on: Jan 07, 2021 | 7:41 PM

ಸಿಡ್ನಿ ಟೆಸ್ಟ್ ಪಂದ್ಯದ ಮೊದಲ ದಿನ ಎರಡು ಕ್ಯಾಚ್ಗಳನ್ನು ಡ್ರಾಪ್ ಮಾಡಿದ ರಿಷಭ್ ಪಂತ್ ಅವರನ್ನು ಭಾರತೀಯರಂತೆ ಆಸ್ಟ್ರೇಲಿಯಾದ ಮಾಜಿ ನಾಯಕ ಮತ್ತು ಇಂಡಿಯನ್ ಪ್ರಿಮೀಯರ್ ಲೀಗ್ನಲ್ಲಾಡುವ ಡೆಲ್ಲಿ ಕ್ಯಾಪಿಟಲ್ಸ್ ಟೀಮಿನ ಮೆಂಟರ್ ರಿಕ್ಕಿ ಪಾಂಟಿಂಗ್ ಸಹ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಪಂತ್ ಕ್ಯಾಚಿಂಗ್ ಪ್ರಯತ್ನಗಳ ಬಗ್ಗೆ ಖಾರವಾಗಿ ಪ್ರತಿಕ್ರಿಯಿಸಿರುವ ಪಾಂಟಿಂಗ್, ವಿಶ್ವದಲ್ಲೇ ಅತಿಹೆಚ್ಚು ಕ್ಯಾಚ್ಗಳನ್ನು ಡ್ರಾಪ್ ಮಾಡಿರುವ ವಿಕೆಟ್ಕೀಪರ್ ಅಂದರೆ ಪಂತ್ ಎಂದು ಹೇಳಿದ್ದಾರೆ.

ಸಿಡ್ನಿ ಕ್ರಿಕೆಟ್ ಮೈದಾನದಲ್ಲಿ ಇಂದು ಆರಂಭಗೊಂಡ ಮೂರನೆ ಟೆಸ್ಟ್ನಲ್ಲಿ ಪಂತ್, ಕೇವಲ ಮೂರು ಓವರ್ಗಳ ಅಂತರದಲ್ಲಿ ಎರಡು ಬಾರಿ ಆಸ್ಟ್ರೇಲಿಯಾದ ಆರಂಭ ಆಟಗಾರ ಮತ್ತು ಟೆಸ್ಟ್ ಕ್ರಿಕೆಟ್ಗೆ ಪಾದಾರ್ಪಣೆ ಮಾಡಿದ ವಿಲ್ ಪುಕೊವ್ಸ್ಕಿ ನೀಡಿದ ಕ್ಯಾಚ್ಗಳನ್ನು ಕೈಚೆಲ್ಲಿದರು. ಮೊದಲಿಗೆ, ರವಿಚಂದ್ರನ್ ಓವರ್ನಲ್ಲಿ ಪುಕೊವ್ಸ್ಕಿ ಬ್ಯಾಟಿನ ಅಂಚು ಸವರಿ ತಮ್ಮ ಕೈಗೆ ಬಂದ ಚೆಂಡನ್ನು ಪಂತ್ ನೆಲಕ್ಕೆ ಬೀಳಿಸಿದರು. ಆದಾದ ನಂತರ ಮೊಹಮ್ಮದ್ ಸಿರಾಜ್ ಎಸೆತವೊಂದನ್ನು ಪುಕೊವ್ಸ್ಕಿ ಪುಲ್ ಮಾಡುವ ಪ್ರಯತ್ನ ಮಾಡಿದಾಗ ಬಾಲು ಅವರ ಬ್ಯಾಟಿಗೆ ಸಿಗದೆ ಗ್ಲೌವ್ಗೆ ತಗುಲಿ ಮೇಲಕ್ಕೆ ಹಾರಿತು. ಹಿಂದೆ ಓಡಿ ಅದನ್ನು ಪಂತ್ ಹಿಡಿದರಾದರೂ ಕ್ಯಾಚ್ ಸಂಪೂರ್ಣಗೊಳ್ಳುವ ಮೊದಲೇ ನೆಲಕ್ಕೆ ಹಾಕಿದರು.

‘ಸರಳವಾದ ಪದಗಳಲ್ಲಿ ಹೇಳಬೇಕೆಂದರೆ, ಪಂತ್ ಎರಡು ಕ್ಯಾಚ್ಗಳನ್ನು ನೆಲಸಮಗೊಳಿಸಿದರು. ಅವರು ಬಿಟ್ಟ ಕ್ಯಾಚ್ಗಳು ಹಿಡಿಯಲಾಗದಷ್ಟು ಕಠಿಣವೇನೂ ಆಗಿರಲಿಲ್ಲ. ಪಂತ್ರ ಅದೃಷ್ಟವೆಂದರೆ, ಪುಕೊವ್ಸ್ಕಿ ದೊಡ್ಡ ಸ್ಕೋರ್ ಗಳಿಸಲಿಲ್ಲ. ಒಂದು ಪಕ್ಷ ಅವರು ಶತಕವೋ, ದ್ವಿಶತಕವೋ ಬಾರಿಸಿದ್ದರೆ, ಪಂತ್ ತಮ್ಮನ್ನು ತಾವು ಹಳಿದುಕೊಳ್ಳಬೇಕಾಗುತಿತ್ತು. ನನಗೆ ಸಿಡ್ನಿ ಮೈದಾನ ಬ್ಯಾಟಿಂಗ್ಗೆ ಅನುಕೂಲಕರವಾಗಿ ಕಾಣುತ್ತಿದೆ,’ ಎಂದು ಕ್ರಿಕೆಟ್ ವೆಬ್ಸೈಟಿನೊಂದಿಗೆ ಮಾತಾಡುವಾಗ ಪಾಂಟಿಂಗ್ ಹೇಳಿದರು.

ರಿಕ್ಕಿ ಪಾಂಟಿಂಗ್ ಮತ್ತು ರಿಷಭ್ ಪಂತ್

ಈವರೆಗೆ ಆಡಿರುವ 14 ಟೆಸ್ಟ್ಗಳಲ್ಲಿ ಪಂತ್ 65 ಆಹುತಿಗಳನ್ನು ಪಡೆದಿದ್ದರೂ ಅವರ ವಿಕೆಟ್ ಕೀಪಿಂಗ್ ಬಹಳ ಸುಧಾರಿಸಬೇಕಿದೆ ಎಂದು ಪಾಂಟಿಂಗ್ ಹೇಳುತ್ತಾರೆ. ಮೆಲ್ಬರ್ನ್ ಟೆಸ್ಟ್ನಲ್ಲೂ ಅವರು ಪ್ಯಾಟ್ ಕಮ್ಮಿನ್ಸ್ ನೀಡಿದ ಕ್ಯಾಚನ್ನು ಬಿಟ್ಟಿದ್ದರು.

‘ಕ್ಯಾಚ್ಗಳನ್ನು ಡ್ರಾಪ್ ಮಾಡಿದ ನಂತರ ಇವು ನನಗೆ ಬಹಳ ದುಬಾರಿಯಾಗಲಿವೆ ಮತ್ತು ಪುಕೊವ್ಸ್ಕಿ ಅದಕ್ಕಾಗಿ ನಾನು ಪರಿತಪಿಸುವಂತೆ ಮಾಡುತ್ತಾರೆ ಅಂತ ಪಂತ್ ಖಂಡಿತವಾಗಿಯೂ ಅಂದುಕೊಂಡಿರುತ್ತಾರೆ. ನಾನಂದುಕೊಳ್ಳುವ ಹಾಗೆ ಟೆಸ್ಟ್ ಕ್ರಿಕೆಟ್ಗೆ ಪಾದಾರ್ಪಣೆ ಮಾಡಿದ ನಂತರ ಅವರು ವಿಶ್ವದಲ್ಲೇ ಅತಿಹೆಚ್ಚು ಕ್ಯಾಚ್ಗಳನ್ನು ನೆಲಸಮಗೊಳಿಸಿರುವ ವಿಕೆಟ್ಕೀಪರ್ ಆಗಿದ್ದಾರೆ. ಅವರ ಬ್ಯಾಟಿಂಗ್ ಕುರಿತು ನಾನು ಮಾತಾಡುವುದಿಲ್ಲ ಆದರೆ ಗ್ಲೋವ್ ವರ್ಕ್ ಬಹಳ ಸುಧಾರಿಸಬೇಕಿದೆ,’ ಎಂದು ಹೇಳಿದರು.

ಗ್ಲೋವ್ ವರ್ಕ್ ಒಂದರೆಡು ದಿನಗಳಲ್ಲಿ ಸುಧಾರಿಸುವಂಥ ಕೆಲಸವಲ್ಲ. ಅದಕ್ಕೆ ಕಠಿಣ ಪರಿಶ್ರಮ ಬೇಕಾಗುತ್ತದೆ. ಹಾಗಾಗಿ, ನಾಳೆಯಿಂದಲೇ ವಿಕೆಟ್ಗಳ ಹಿಂದೆ ಪಂತ್ರಿಂದ ಸುಧಾರಿತ ಪ್ರದರ್ಶನ ಬಂದೀತು ಎನ್ನುವ ನಿರೀಕ್ಷೆ ಸುಳ್ಳು.