‘ಮಾಸ್ಟರ್’ ಸಿನಿಮಾಗೆ ಬಿಗ್ ಗಿಫ್ಟ್ ನೀಡಿದ ಟ್ವಿಟರ್: ಅಭಿಮಾನಿಗಳು ಫುಲ್ ಖುಷ್

ನಟ ವಿಜಯ್ ಅಭಿನಯದ ತಮಿಳು ಸಿನಿಮಾ ‘ಮಾಸ್ಟರ್’  ಕೆಲವೇ ದಿನಗಳಲ್ಲಿ ಬಿಡುಗಡೆಯಾಗಲಿದೆ. ಆದರೆ ಅದಕ್ಕೂ ಮುನ್ನವೇ ಮಾಸ್ಟರ್ ಸಿನಿಮಾ ತಂಡಕ್ಕೆ ಮತ್ತು ವಿಜಯ್ ಅಭಿಮಾನಿಗಳಿಗೆ ಟ್ವಿಟರ್ ಕಡೆಯಿಂದ ಒಂದು ಗಿಫ್ಟ್ ಸಿಕ್ಕಿದೆ.

ಮಾಸ್ಟರ್ ಸಿನಿಮಾಕ್ಕಾಗಿ ಟ್ವಿಟರ್ ಒಂದು ಎಮೋಜಿಯನ್ನು ಬಿಡುಗಡೆ ಮಾಡಿದ್ದು, ಈ ಸಿನಿಮಾಕ್ಕೆ ಸಂಬಂಧಪಟ್ಟಂತೆ ಯಾರೇ ಟ್ವೀಟ್ ಮಾಡಿ #Masterfilm ಎಂಬ ಹ್ಯಾಷ್​ ಟ್ಯಾಗ್ ಬಳಸಿದರೂ, ಅದರ ಮುಂದೆ ವಿಜಯ್​ರವರ ಪುಟ್ಟ ಚಿತ್ರ ಎಮೋಜಿ ರೂಪದಲ್ಲಿ ಕಾಣಿಸಿಕೊಳ್ಳಲಿದೆ. ಮಾಸ್ಟರ್ ಸಿನಿಮಾ ಪೋಸ್ಟರ್​ನಲ್ಲಿ ಇರುವ ವಿಜಯ್ ಫೋಟೋವೊಂದನ್ನೇ ಎಮೋಜಿ ರೂಪದಲ್ಲಿ ಟ್ವಿಟರ್ ಬಿಡುಗಡೆ ಮಾಡಿದ್ದು ವಿಶೇಷ.

ಈ ಚಿತ್ರ ಜನವರಿ 13 ರಂದು ತೆರೆಗೆ ಬರಲಿದ್ದು, ತಮಿಳು, ತೆಲುಗು ಹಾಗೂ ಹಿಂದಿ ಭಾಷೆಯಲ್ಲಿ ಬಿಡುಗಡೆಯಾಗಲಿದೆ. ವಿಜಯ್ ಅಭಿಮಾನಿಗಳು ಟ್ವಿಟರ್ ಎಮೋಜಿಯನ್ನು ಬಳಸಲು ಉತ್ಸುಕರಾಗಿದ್ದು, ಹ್ಯಾಷ್​​ಟ್ಯಾಗ್​ಗಳನ್ನು ಪದೇಪದೇ ಬಳಸುತ್ತಿದ್ದಾರೆ. ಎಮೋಜಿ ಬಿಡುಗಡೆಯಾದ ಕೆಲವೇ ನಿಮಿಷಗಳಲ್ಲಿ ‘ಮಾಸ್ಟರ್ ಫಿಲ್ಮ್’, ‘ಮಾಸ್ಟರ್ ಪೊಂಗಲ್’, ‘ವಿಜಯ್ ದಿ ಮಾಸ್ಟರ್’ ಎಂಬ ಹ್ಯಾಷ್​ಟ್ಯಾಗ್​​ಗಳು ಭರ್ಜರಿ ಟ್ರೆಂಡ್ ಆಗಿವೆ. ಈ ಸಿನಿಮಾ ಬಗ್ಗೆ ಸುಮಾರು 2 ಲಕ್ಷ ಟ್ವೀಟ್​ಗಳು ಬಂದಿವೆ.

ಸಾಮಾಜಿಕ ಜಾಲತಾಣವು ಚಲನಚಿತ್ರಕ್ಕಾಗಿ ಎಮೋಜಿಯನ್ನು ಬಿಡುಗಡೆಗೊಳಿಸಿದ್ದು ಇದೇ ಮೊದಲಲ್ಲ. ವಿಜಯ್ ಅಭಿನಯದ ಮರ್ಸೆಲ್ ಸಿನಿಮಾದಿಂದ ತಮಿಳು ಚಿತ್ರರಂಗದಲ್ಲಿ ಎಮೋಜಿ ಪ್ರವೃತ್ತಿ ಪ್ರಾರಂಭವಾಯಿತು. ನಂತರ ಸೂಪರ್ ಸ್ಟಾರ್ ರಜನಿಕಾಂತ್​ರ ಕಾಲಾ 2.0 ಚಿತ್ರ, ವಿಜಯ್​ ಅಭಿಯನದ ಬಿಗಿಲ್ ಮತ್ತು ಸೂರ್ಯ ನಾಯಕರಾಗಿದ್ದ ಎನ್​ಜಿಕೆ ಸಿನಿಮಾಗಳಿಗೂ  ಎಮೋಜಿಗಳು ಬಿಡುಗಡೆಯಾಗಿದ್ದವು.

ಕಾಲೇಜು ಜೀವನವನ್ನೇ ಪ್ರಧಾನವಾಗಿ ಬಿಂಬಿಸುವ ಮಾಸ್ಟರ್ ಸಿನಿಮಾದಲ್ಲಿ ಪ್ರಾಧ್ಯಾಪಕನ ಪಾತ್ರದಲ್ಲಿ ವಿಜಯ್ ನಟಿಸುತ್ತಿದ್ದು, ಲೋಕೇಶ್ ಕನಗರಾಜ್ ನಿರ್ದೇಶಿಸಿದ್ದಾರೆ. ವಿಜಯ್ ಸೇತುಪತಿ, ಮಾಳವಿಕಾ ಮೋಹನನ್, ಶಾಂತನು ಭಾಗ್ಯರಾಜ್ ಮತ್ತು ಆಂಡ್ರಿಯಾ ಜೆರೆಮಿಯ ಸೇರಿದಂತೆ ಹಲವರು ಈ ಚಿತ್ರದಲ್ಲಿ ನಟಿಸಿದ್ದಾರೆ. ಅನಿರುದ್ಧ್ ರವಿಚಂದರ್ ಸಂಗೀತ ಸಂಯೋಜಿಸಿದ್ದಾರೆ.

ನಟ ವಿಜಯ್ ಕೊನೆಯ ಬಾರಿಗೆ ತೆರೆಯ ಮೇಲೆ ಕಾಣಿಸಿಕೊಂಡಿದ್ದು ಅಟ್ಲೀ ನಿರ್ದೇಶನದ ‘ಬಿಗಿಲ್’ ಚಿತ್ರದಲ್ಲಿ. ಈ ಚಿತ್ರದಲ್ಲಿ ವಿಜಯ್ ದ್ವಿಪಾತ್ರದಲ್ಲಿದ್ದರು. ತಂದೆ ಮತ್ತು ಮಗನ ಪಾತ್ರದಲ್ಲಿ ಕಾಣಿಸಿಕೊಂಡ ಎರಡೂ ಪಾತ್ರಗಳು ಹೆಚ್ಚು ಜನಪ್ರಿಯತೆ ಪಡೆದುಕೊಂಡಿದ್ದವು. ಜಾಕಿ ಶ್ರಾಫ್ ಮತ್ತು ನಯನತಾರಾ ನಟಿಸಿದ್ದ ಬಿಗಿಲ್ ₹ 300 ಕೋಟಿ ಗಳಿಸುವ ಮೂಲಕ 2019ರ ಅತಿ ಹೆಚ್ಚು ಗಳಿಕೆಯ ತಮಿಳು ಚಿತ್ರವೆಂಬ ಹೆಗ್ಗಳಿಕೆ ಪಡೆದುಕೊಂಡಿತು.

ದಾದಾ ಸಾಹೇಬ್​ ಫಾಲ್ಕೆ ಸೌತ್​ 2020 ಪ್ರಶಸ್ತಿ: ರಕ್ಷಿತ್​-ರಶ್ಮಿಕಾಗೆ ಅವಾರ್ಡ್​