Varamahalakshmi Vrata 2024 : ವರಮಹಾಲಕ್ಷ್ಮಿ ಹಬ್ಬಕ್ಕೆ ಮನೆಯಲ್ಲೇ ಮಾಡಿ ರುಚಿ ರುಚಿಯಾದ ಹಾಲು ಹೋಳಿಗೆ
ಶ್ರಾವಣ ಮಾಸದಲ್ಲಿ ಹಬ್ಬಗಳು ಬಂತೆಂದರೆ ಸಾಕು, ಮನೆಯಲ್ಲಿ ಹಬ್ಬದ ಅಡುಗೆಗಳು ರೆಡಿಯಾಗುತ್ತದೆ. ಹಬ್ಬ ಹರಿ ದಿನಗಳಲ್ಲಿ ವೈವಿದ್ಯಮಯ ಸಿಹಿ ತಿನಿಸುಗಳನ್ನು ಮಾಡಿದರೆ ಕುಟುಂಬದ ಸದಸ್ಯರೊಂದಿಗೆ ಸೇವಿಸುತ್ತಾರೆ. ಈ ವರ ಮಹಾಲಕ್ಷ್ಮಿ ಹಬ್ಬಕ್ಕೆ ಸಿಹಿತಿಂಡಿ ಮಾಡಿ ದೇವರಿಗೆ ಇಟ್ಟು ಪೂಜೆ ಸಲ್ಲಿಸುತ್ತಾರೆ. ವರವನ್ನು ನೀಡುವ ಲಕ್ಷ್ಮಿ ದೇವಿಗೆ ನೈವೇದ್ಯವಿಡಲು ಕೆಲವೇ ಕೆಲವು ನಿಮಿಷದಲ್ಲಿ ಹಾಲು ಹೋಳಿಗೆ ಮಾಡಬಹುದು. ಹಾಗಾದ್ರೆ ರುಚಿಕರವಾದ ಹಾಲು ಹೋಳಿಗೆ ರೆಸಿಪಿಯ ಬಗೆಗಿನ ಮಾಹಿತಿಯೂ ಇಲ್ಲಿದೆ.
Updated on: Aug 15, 2024 | 5:37 PM
ಹಬ್ಬವೆಂದ ಮೇಲೆ ಪೂಜೆ, ಅಲಂಕಾರ ಮಾತ್ರವಲ್ಲದೆ ಹಬ್ಬದ ಅಡುಗೆಯೂ ವಿಶೇಷವಾಗಿರುತ್ತದೆ. ವರಮಹಾಲಕ್ಷ್ಮಿ ವ್ರತದಂದು ಮೊದಲು ಲಕ್ಷ್ಮಿಗೆ ನೈವೇದ್ಯ ಇಡಬೇಕಾಗುತ್ತದೆ. ಅದಲ್ಲದೇ, ಈ ಹಬ್ಬಕ್ಕೆ ಅರಿಶಿನ ಕುಂಕುಮಕ್ಕಾಗಿ ಮನೆಗೆ ಬರುವವರಿಗೆ ವಿವಿಧ ಅಡುಗೆ ತಯಾರಿಸಿ ಬಡಿಸುವ ಖುಷಿಯೇ ಬೇರೆಯಾಗಿರುತ್ತದೆ. ದೇವಿಗೆ ನೈವೇದ್ಯವಾಗಿ ಇಡಲು ಮನೆಯಲ್ಲಿಯೇ ಫಟಾಫಟ್ ಎಂದು ಹಾಲು ಹೋಳಿಗೆ ಸಿಹಿ ತಿನಿಸನ್ನು ಮಾಡಬಹುದು.
ಹಾಲು ಹೋಳಿಗೆ ಬೇಕಾಗುವ ಪದಾರ್ಥಗಳು
* ಒಂದು ಕಪ್ ಗೋಧಿ ಹಿಟ್ಟು
* ಒಂದು ಕಪ್ ಮೈದಾ
* ಒಂದು ಕಪ್ ಚಿರೋಟಿ ರವೆ
* ರುಚಿಗೆ ತಕ್ಕಷ್ಟು ಉಪ್ಪು
* ಎರಡು ಚಮಚ ಎಣ್ಣೆ
* ಬೆಲ್ಲ ಒಂದು ಕಪ್
* ಒಂದು ಕಪ್ ಕಾಯಿತುರಿ
* ಒಂದು ಚಮಚ ಹುರಿದ ಗಸಗಸೆ
* ಒಂದು ಚಮಚ ಹುರಿಗಡಲೆ
* ಏಲಕ್ಕಿ ಪುಡಿ
* ಒಣದ್ರಾಕ್ಷಿ ಮತ್ತು ಗೋಡಂಬಿ
ಇದನ್ನೂ ಓದಿ: ವರಮಹಾಲಕ್ಷ್ಮೀ ಹಬ್ಬಕ್ಕೆ ಮನೆಯ ಅಲಂಕಾರ ಹೇಗೆ ಮಾಡಬೇಕು? ಇಲ್ಲಿದೆ ಸಿಂಪಲ್ ಟಿಪ್ಸ್
ಹಾಲು ಹೋಳಿಗೆ ಮಾಡುವ ವಿಧಾನ
* ಮೊದಲಿಗೆ ಒಂದು ಕಪ್ ಗೋದಿ ಹಿಟ್ಟು, ಒಂದು ಕಪ್ ಮೈದಾ , ಒಂದು ಕಪ್ ಚಿರೋಟಿ ರವೆ , ಎರಡು ಚಮಚ ಎಣ್ಣೆ ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು ಹಾಗೂ ನೀರು ಸೇರಿಸಿ ಗಟ್ಟಿಯಾಗಿ ಕಲೆಸಿಟ್ಟು ಅರ್ಧ ಗಂಟೆ ನೆನೆಯಲು ಬಿಡಬೇಕು.
* ಆ ನಂತರದಲ್ಲಿ ಬೆಲ್ಲ , ಕಾಯಿತುರಿ, ಹುರಿದ ಗಸಗಸೆ, ಹುರಿಗಡಲೆ ಹಾಗೂ ಏಲಕ್ಕಿ ಪುಡಿಯನ್ನು ಸೇರಿಸಿ ಸಣ್ಣಗೆ ರುಬ್ಬಿಟ್ಟುಕೊಳ್ಳಿ.
* ಒಂದು ಪಾತ್ರೆಗೆ ನೀರು ಹಾಕಿ ರುಬ್ಬಿಟ್ಟ ಈ ಮಿಶ್ರಣವನ್ನು ಸೇರಿಸಿ ಪಾಯಸದ ಹದ ಬರುವಂತೆ ಕುದಿಸಿಕೊಳ್ಳಿ. * ಒಣದ್ರಾಕ್ಷಿ ಮತ್ತು ಗೋಡಂಬಿಯನ್ನು ತುಪ್ಪದಲ್ಲಿ ಹುರಿದಿಟ್ಟುಕೊಳ್ಳಿ.
* ಕಲೆಸಿಟ್ಟುಕೊಂಡ ಹಿಟ್ಟನ್ನು ಪೂರಿಯಂತೆ ಲಟ್ಟಿಸಿಕೊಂಡು ಎಣ್ಣೆಯಲ್ಲಿ ಗರಿ ಗರಿಯಾಗಿ ಕರಿದು ಕುದಿಸಿಟ್ಟುಕೊಂಡ ಮಿಶ್ರಣಕ್ಕೆ ಹಾಕಿ ತಕ್ಷಣ ತೆಗೆಯಿರಿ.
* ಅದರ ಮೇಲೆ ಹುರಿದಿಟ್ಟ ಗೋಡಂಬಿ ಹಾಗೂ ಒಣದ್ರಾಕ್ಷಿ ಯನ್ನು ಹಾಕಿದರೆ ಹಾಲು ಹೋಳಿಗೆ ಸವಿಯಲು ಸಿದ್ಧ.
ಹೆಚ್ಚಿನ ಜೀವನಶೈಲಿ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
