ವಾಹನ ಮಾಲೀಕರು, ತಯಾರಕರು ಗಮನಿಸಬೇಕಾದ ವಿಚಾರ ಇದು; 8 ಜನ ಪ್ರಯಾಣಿಸಬಹುದಾದ ಕಾರಿನಲ್ಲಿ ಇನ್ಮುಂದೆ 6 ಏರ್​​ಬ್ಯಾಗ್​ಗಳು ಕಡ್ಡಾಯ

ವಾಹನ ಚಾಲಕರ ಸುರಕ್ಷತೆಗಾಗಿ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ಈಗೊಂದು ಮಹತ್ವದ ಘೋಷಣೆ ಮಾಡಿದೆ. ಇನ್ನು ಮುಂದೆ 8 ಮಂದಿ ಕುಳಿತುಕೊಳ್ಳಬಹುದಾದ ಎಲ್ಲ ವಾಹನಗಳಿಗೆ ಆರು ಏರ್​ಬ್ಯಾಗ್​ ಕಡ್ಡಾಯಗೊಳಿಸುವ ಕರಡು ಶಾಸನಬದ್ಧ ನಿಯಮಗಳ ಅಧಿಸೂಚನೆಗೆ ಅನುಮೋದನೆ ನೀಡಿದ್ದಾಗಿ ಜನವರಿ 14ರಂದು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್​ ಗಡ್ಕರಿ ಟ್ವೀಟ್ ಮಾಡಿ ತಿಳಿಸಿದ್ದಾರೆ. ಸರಣಿ ಟ್ವೀಟ್ ಮಾಡಿರುವ ನಿತಿನ್​ ಗಡ್ಕರಿ, 8 ಮಂದಿ ಪ್ರಯಾಣ ಮಾಡಬಹುದಾದ ವಾಹನಗಳಲ್ಲಿ ಕನಿಷ್ಠ 6 ಏರ್​ಬ್ಯಾಗ್​​ಗಳನ್ನು ಇಡುವುದು ಕಡ್ಡಾಯ ಎಂಬ ಕರಡು ಜಿಎಸ್​ಆರ್​ ಅಧಿಸೂಚನೆಗೆ ಇಂದು ಅನುಮೋದನೆ ನೀಡಿದ್ದೇನೆ. ಪ್ರಯಾಣ ಮಾಡುತ್ತಿರುವ ಎಲ್ಲ ಎಂಟು ಜನರ ಸುರಕ್ಷತೆ ದೃಷ್ಟಿಯಿಂದ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಹೇಳಿದ್ದಾರೆ. ಅಷ್ಟೇ ಅಲ್ಲ,  ವಾಹನದಲ್ಲಿ ಎಲ್ಲ ಕಡೆಯಿಂದಲೂ ಕವರ್ ಆಗುವಂತೆ ಏರ್​ಬ್ಯಾಗ್​ಗಳು ಇರುವುದರಿಂದ ತುಂಬ ಅನುಕೂಲವಾಗಲಿದೆ, ಎಷ್ಟೇ ವೆಚ್ಚದ, ಯಾವುದೇ ಕಂಪನಿ, ಮಾದರಿಯ ವಾಹನವೇ ಇರಲಿ. 8 ಜನರು ಪ್ರಯಾಣಿಸುವಷ್ಟು ದೊಡ್ಡದಿದೆ ಎಂದರೆ ಅದಕ್ಕಿನ್ನು 6 ಏರ್​ಬ್ಯಾಗ್​ಗಳು ಕಡ್ಡಾಯ ಎಂದು ಹೇಳಿದ್ದಾರೆ.

The Ministry had already mandated the implementation of fitment of the driver airbag w.e.f 01st July 2019 and front co-passenger airbag w.e.f 01st January 2022. #RoadSafety #SadakSurakshaJeevanRaksha

— Nitin Gadkari (@nitin_gadkari) January 14, 2022

ರಸ್ತೆ ಅಪಘಾತ ತಡೆ ಹಾಗೂ ಚಾಲಕರ ಸುರಕ್ಷತೆಗಾಗಿ ಕೇಂದ್ರ ಬಿಜೆಪಿ ಸರ್ಕಾರ ಈಗಾಗಲೇ ಹಲವು ಘೋಷಣೆಗಳನ್ನು ಮಾಡಿದೆ. ಯಾವುದೇ ಮಾದರಿಯ ಕಾರು ಇದ್ದರೂ, ಚಾಲಕ ಮತ್ತು ಆತನ ಪಕ್ಕದ ಸೀಟ್​ಗೆ ಏರ್​ಬ್ಯಾಗ್​ ಕಡ್ಡಾಯ ಎಂಬ ನಿಯಮವನ್ನು 2019ರ ಜುಲೈ 1ರಂದು ಕೇಂದ್ರ ಸರ್ಕಾರ ಆದೇಶ ಹೊರಡಿಸಿತ್ತು. ಹಾಗೇ, 2022ರ ಜನವರಿ 1ರಿಂದ ಈ ನಿಯಮ ಕಡ್ಡಾಯವಾಗಿ ಅನ್ವಯ ಆಗಲಿದೆ ಎಂದೂ ಹೇಳಿತ್ತು. ಆದರೀಗ ನಿಯಮ ಬದಲಿಸಲಾಗಿದೆ.  ಕಾರು ಹಿಂಬದಿ ಅಥವಾ ಮುಂಬದಿಯಿಂದ ಅಪಘಾತಕ್ಕೀಡಾದಾಗ, ಅದರ ಮುಂದಿನ ಮತ್ತು ಹಿಂದಿನ ಸೀಟ್​​ಗಳಲ್ಲಿ ಕುಳಿತಿರುವ ಪ್ರಯಾಣಿಕರಿಗೆ ಉಂಟಾಗುವ ಅಪಾಯವನ್ನು ತಪ್ಪಿಸಲು ಮುಂದಿನ ಎರಡು ಸೀಟ್​ಗಳಿಗೆ ಏರ್​​ಬ್ಯಾಗ್​ ಅಳವಡಿಸುವ ಜತೆ, ಹಿಂದಿನ ಸೀಟ್​​ಗಳಿಗೂ ಅಗತ್ಯವಾಗಿ ನಾಲ್ಕು ಹೆಚ್ಚುವರಿ ಏರ್​ಬ್ಯಾಗ್​ ಅಳವಡಿಸುವುದು ಇನ್ನುಮುಂದೆ ಕಡ್ಡಾಯವಾಗಲಿದೆ ಎಂದು ನಿತಿನ್​ ಗಡ್ಕರಿ ಹೇಳಿದ್ದಾರೆ. ಇದು ಎಂ 1 ವರ್ಗದ ವಾಹನಗಳಿಗೆ, ಅಂದರೆ 8 ಅಥವಾ ಅದಕ್ಕಿಂತ ಹೆಚ್ಚು ಜನರು ಪ್ರಯಾಣ ಮಾಡಬಹುದಾದ ಕಾರುಗಳಿಗೆ ಮಾತ್ರ ಅನ್ವಯ. ಅದರ ಅನ್ವಯ ಇನ್ನು ವಾಹನ ತಯಾರಕರು ಆರು ಏರ್​ಬ್ಯಾಗ್​​ಗಳನ್ನು ಇಡಬೇಕು. ಹಾಗೇ, ವಾಹನ ಮಾಲೀಕರೂ ಕೂಡ ಈ ಬಗ್ಗೆ ಎಚ್ಚರ ವಹಿಸಬೇಕು.

ಕಾರುಗಳ ಬೆಲೆಯಲ್ಲಿ ಹೆಚ್ಚಳ !:  ಇದೀಗ 8 ಜನ ಪ್ರಯಾಣ ಮಾಡಬಹುದಾದ ದೊಡ್ಡ ಕಾರುಗಳ ಬೆಲೆ ಇನ್ನೂ ಏರುವ ಸಾಧ್ಯತೆ ಹೆಚ್ಚಾಗಿದೆ. ಕಾರುಗಳ ಮುಂಭಾಗ ಏರ್​ಬ್ಯಾಗ್​ ಅಳವಡಿಸಲು ಕನಿಷ್ಠ 5-8 ಸಾವಿರ ರೂ.ವೆಚ್ಚ ಆಗಲಿದೆ. ಹಾಗೇ, ಇದೀಗ ಹಿಂಬದಿಗೆ ಮತ್ತೆ ಹೆಚ್ಚವರಿ ಕರ್ಟನ್​ ಏರ್​ಬ್ಯಾಗ್​ ಹಾಕಲು ಇನ್ನೂ ಸ್ವಲ್ಪ ಹಣ ವ್ಯಯ ಆಗುತ್ತದೆ.  ಹೀಗಾಗಿ ಇನ್ನು ಮುಂದೆ ಸಣ್ಣ ಮತ್ತು ಮಧ್ಯಮ ಹಂತದ ವಿಭಾಗಗಳಲ್ಲಿ ಮಾರಾಟವಾಗುವ ಕಾರುಗಳ ಬೆಲೆ ಅಂದಾಜು 30 ಸಾವಿರ ರೂ.ದಿಂದ 50 ಸಾವಿರ ರೂ. ಹೆಚ್ಚಳವಾಗುತ್ತದೆ.

ಇದನ್ನೂ ಓದಿ: ಸ್ಯಾಮ್ಸಂಗ್ ಗೆಲಾಕ್ಸಿ ಟ್ಯಾಬ್ ಎ8 ಭಾರತದಲ್ಲಿ ಲಾಂಚ್ ಆಗಿದೆ; ವೈಶಿಷ್ಟ್ಯತೆ, ಬೆಲೆ ಮತ್ತು ಇತರ ವಿವರಗಳು ಇಲ್ಲಿವೆ

Published On - 8:00 am, Sat, 15 January 22