ಅರುಣಾಚಲ ಭಾರತದ್ದಲ್ಲ, ನಿಮ್ಮ ಪಾಸ್​ಪೋರ್ಟ್ ಅಸಿಂಧು: ಭಾರತೀಯ ಮಹಿಳೆಗೆ ಚೀನೀ ಅಧಿಕಾರಿಗಳ ಕಿರಿಕ್

ನವದೆಹಲಿ, ನವೆಂಬರ್ 24: ಭಾರತದ ಪಾಸ್​ಪೋರ್ಟ್ ಹೊಂದಿದ್ದ ಅರುಣಾಚಲಪ್ರದೇಶ ಮೂಲದ ಮಹಿಳೆಯೊಬ್ಬರನ್ನು ಚೀನಾದ ಶಾಂಘೈ ಏರ್ಪೋರ್ಟ್ ಅಧಿಕಾರಿಗಳು ವಶಕ್ಕೆ ತೆಗೆದುಕೊಂಡ ಘಟನೆ ಬೆಳಕಿಗೆ ಬಂದಿದೆ. ಬ್ರಿಟನ್​ನಲ್ಲಿ ವಾಸಿಸುತ್ತಿರುವ ಪೆಮ್ ವ್ಯಾಂಗ್ ತೋಂಗ್​ಡೋಕ್ (Pem Wang Thongdok) ಎಂಬಾಕೆ ತಮ್ಮ ಎಕ್ಸ್ ಅಕೌಂಟ್​ನಿಂದ ಸರಣಿ ಪೋಸ್ಟ್​ಗಳನ್ನು ಹಾಕಿ ತಮ್ಮ ಅನುಭವ ಹಂಚಿಕೊಂಡಿದ್ದಾರೆ. ತಾನು ಅರುಣಾಚಲಪ್ರದೇಶದಲ್ಲಿ ಜನಿಸಿದ್ದರಿಂದ ತಮ್ಮ ಭಾರತೀಯ ಪಾಸ್​ಪೋರ್ಟ್ ಅಸಿಂಧು ಎಂದು ಚೀನೀ ಅಧಿಕಾರಿಗಳು ಪರಿಗಣಿಸಿದ್ದರು ಎಂದು ಈ ಮಹಿಳೆ ಆರೋಪಿಸಿದ್ದಾರೆ.

ಶಾಂಘೈನ ಪುಡೋಂಗ್ ಇಂಟರ್ನ್ಯಾಷನಲ್ ಏರ್ಪೋರ್ಟ್​ನಲ್ಲಿ ನವೆಂಬರ್ 21ರಂದು ಈ ಘಟನೆ ನಡೆದಿದ್ದಾಗಿ ತೋಂಗ್​ಡೋಕ್ ಹೇಳಿದ್ದಾರೆ. ಆಕೆ ಲಂಡನ್​ನಿಂದ ಜಪಾನ್​ಗೆ ವಿಮಾನದಲ್ಲಿ ಪ್ರಯಾಣಿಸುವ ಸಂದರ್ಭದಲ್ಲಿ ಈ ಬೆಳವಣಿಗೆ ನಡೆದಿದೆ. ಶಾಂಘೈ ಏರ್​ಪೋರ್ಟ್​ನಲ್ಲಿ 18 ಗಂಟೆ ಕಾಲ ತನ್ನನ್ನು ತಡೆದು ನಿಲ್ಲಿಸಲಾಗಿತ್ತು ಎಂದು ಈಕೆ ಹೇಳಿದ್ದಾರೆ.

ಅರುಣಾಚಲ ಪ್ರದೇಶ ಚೀನಾಗೆ ಸೇರಿದ್ದು ಎಂದು ವಾದಿಸುತ್ತಿದ್ದ ಚೀನೀ ಅಧಿಕಾರಿಗಳು…

ಈ ಮಹಿಳೆ ಪ್ರಸಕ್ತ ಯುಕೆ ದೇಶದಲ್ಲಿ ವಾಸಿಸುತ್ತಿದ್ದಾರೆ. ಈಕೆ ಹುಟ್ಟಿದ್ದು ಅರುಣಾಚಲಪ್ರದೇಶದಲ್ಲಿ. ಭಾರತೀಯ ಪಾಸ್​ಪೋರ್ಟ್ ಹೊಂದಿದ್ದಾರೆ. ಆದರೆ, ಚೀನೀ ಅಧಿಕಾರಿಗಳ ಪ್ರಕಾರ ಅರುಣಾಚಲಪ್ರದೇಶವು ಚೀನಾಗೆ ಸೇರಿದ್ದು. ಹೀಗಾಗಿ, ಈ ಮಹಿಳೆ ಹೊಂದಿರುವ ಭಾರತೀಯ ಪಾಸ್​ಪೋರ್ಟ್ ಅಸಿಂಧು ಎಂದು ಇವರು ಪರಿಗಣಿಸಿದ್ದಾರೆ. ಆ ಘಟನೆಯನ್ನು ಸ್ಮರಿಸಿರುವ ಪೆಮ್ ವಾಂಗ್ ತೋಂಗ್​ಡುಕ್, ಅರುಣಾಚಲವು ಚೀನಾಗೆ ಸೇರಿದ್ದಾ ಎಂದು ಪ್ರಶ್ನೆ ಮಾಡಿದ್ದಾರೆ.

ಇದನ್ನೂ ಓದಿ: ತಮಿಳುನಾಡಿನಲ್ಲಿ 2 ಬಸ್ಸುಗಳು ಮುಖಾಮುಖಿ ಡಿಕ್ಕಿ; 6 ಸಾವು, 28 ಮಂದಿಗೆ ಗಾಯ

‘ಚೈನಾ ಈಸ್ಟರ್ನ್ ಏರ್​ಲೈನ್ಸ್ ಮತ್ತು ಚೀನಾ ಇಮ್ಮೈಗ್ರೇಶನ್​ನಿಂದಾಗಿ ನ. 21ರಂದು ಶಾಂಘೈ ಏರ್​ಪೋರ್ಟ್​ನಲ್ಲಿ ನನ್ನನ್ನು 18 ಗಂಟೆ ಕಾಲ ತಡೆದು ನಿಲ್ಲಿಸಿದರು. ನನ್ನ ಜನ್ಮಸ್ಥಳ ಅರುಣಾಚಲಪ್ರದೇಶವಾದ್ದರಿಂದ ಭಾರತೀಯ ಪಾಸ್​ಪೋರ್ಟ್ ಅನ್ನು ಅಸಿಂಧು ಎಂದು ಪರಿಗಣಿಸಿದ್ದಾರೆ. ಅವರ ಪ್ರಕಾರ ಅರುಣಾಚಲವು ಚೀನಾದ ಭಾಗವಂತೆ. ಇದು ನಿಜವಾ?’ ಎಂದು ಪೆಮ್ ವಾಂಗ್ ತೋಂಗ್​ಡುಕ್ ಅವರು ಅರುಣಾಚಲ ಸಿಎಂ ಪ್ರೇಮ್ ಖಂಡು, ಕೇಂದ್ರ ಸಚಿವ ಕಿರಣ್ ರಿಜಿಜು ಮತ್ತು ಪ್ರಧಾನಿ ಕಚೇರಿಗಳ ಎಕ್ಸ್ ಅಕೌಂಟ್​ಗಳನ್ನು ಟ್ಯಾಗ್ ಮಾಡಿ ಕೇಳಿದ್ದಾರೆ.

ಪೆಮ್ ವಾಂಗ್ ಅವರ ಒಂದು ಎಕ್ಸ್ ಪೋಸ್ಟ್

ಪೆಮ್ ವಾಂಗ್ ತೋಂಗ್​ಡೋಕ್ ಅವರು ಸುದ್ದಿ ಮಾಧ್ಯಮಗಳೊಂದಿಗೆ ಮಾತನಾಡುತ್ತಾ ಆ ಘಟನೆ ಬಗ್ಗೆ ಇನ್ನಷ್ಟು ವಿವರ ಹಂಚಿಕೊಂಡಿದ್ದಾರೆ. ಅದರಂತೆ, ಶಾಂಘೈ ಏರ್ಪೋರ್ಟ್​ನಲ್ಲಿ ವಲಸೆ ಪ್ರಕ್ರಿಯೆ ಬಳಿಕ ಈಕೆಯ ಪಾಸ್​ಪೋರ್ಟ್ ಅನ್ನು ಅಧಿಕಾರಿಗಳು ಪಡೆದಿದ್ದರು. ಈಕೆ ಸೆಕ್ಯೂರಿಟಿ ಬಳಿ ಕಾಯುತ್ತಿದ್ದಾಗ ಒಬ್ಬ ಅಧಿಕಾರಿ ಬಂದು ಈಕೆಯ ಹೆಸರು ಮತ್ತು ಇಂಡಿಯಾ ಹೆಸರನ್ನು ಕಿರುಚಿ ಕರೆಯತೊಗಿದಳು.

ಬಳಿಕ ಅರುಣಾಚಲ ಮಹಿಳೆಯನ್ನು ವಲಸೆ ವಿಭಾಗಕ್ಕೆ ಕರೆದೊಯ್ದು, ‘ಅರುಣಾಚಲವು ಚೀನಾದ ಭಾಗವಾಗಿದೆ. ನಿಮ್ಮ ಪಾಸ್​ಪೋರ್ಟ್ ಅಸಿಂಧುವಾಗಿದೆ’ ಎಂದು ಹೇಳಿದ್ದಾಳೆ. ಜಪಾನ್​ಗೆ ಫ್ಲೈಟ್ ಹತ್ತಬೇಕಿದ್ದ ಪೆಮ್ ವಾಂಗ್ ಅವರನ್ನು ತಡೆಯಲಾಯಿತು.

ಇದನ್ನೂ ಓದಿ: ಜಿ20 ಆತಿಥ್ಯ ಇಷ್ಟು ಕಷ್ಟ ಅಂತ ಗೊತ್ತಿದ್ದರೆ ಓಡಿ ಹೋಗುತ್ತಿದ್ದೆ: ಪ್ರಧಾನಿ ಮೋದಿಗೆ ತಮಾಷೆ ಮಾಡಿದ ಸೌತ್ ಆಫ್ರಿಕಾ ಅಧ್ಯಕ್ಷ

ಹೊಸದಾಗಿ ಟಿಕೆಟ್ ಖರೀದಿಸಿದರೆ ಹೋಗಲು ಬಿಡುವುದಾಗಿ ಹೇಳುತ್ತಾರೆ. ನಂತರ ತೋಂಗ್​ಡೋಕ್ ಅವರು ತಮ್ಮ ಸ್ನೇಹಿತರೊಬ್ಬರ ಮೂಲಕ ಶಾಂಘೈನಲ್ಲಿರುವ ಭಾರತೀಯ ರಾಯಭಾರಿ ಅಧಿಕಾರಿಯನ್ನು ಸಂಪರ್ಕಿಸಿ ವಿಷಯ ತಿಳಿಸುತ್ತಾರೆ. ಭಾರತೀಯ ಅಧಿಕಾರಿಗಳು ಬಂದು ಈಕೆಯನ್ನು ಚೀನಾದಿಂದ ಹೊರಗೆ ಕಳುಹಿಸಲು ಸಹಾಯ ಮಾಡುತ್ತಾರೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ