ಸುದ್ದಿ ತಾಣವೊಂದರ ವಿರುದ್ಧ 100 ಕೋಟಿ ರೂ.ಮಾನನಷ್ಟ ಮೊಕದ್ದಮೆ ಹೂಡಿದ ಭಾರತ್ ಬಯೋಟೆಕ್​; ತೆಲಂಗಾಣ ಕೋರ್ಟ್ ಹೇಳಿದ್ದೇನು?

ದಿ ವೈರ್​ ಸುದ್ದಿ ಮಾಧ್ಯಮದ ಪ್ರಕಾಶಕರು, ಸಂಪಾದಕರು ಮತ್ತು ಅಲ್ಲಿರುವ ಕೆಲವು ಬರಹಗಾರರ ವಿರುದ್ಧ ತೆಲಂಗಾಣ ಕೋರ್ಟ್​​ವೊಂದರಲ್ಲಿ ಭಾರತ್ ಬಯೋಟೆಕ್​​ ಔಷಧೀಯ ಕಂಪನಿ 100 ಕೋಟಿ ರೂಪಾಯಿ ಮಾನನಷ್ಟ ಮೊಕದ್ದಮೆ ಹೂಡಿದೆ. ಭಾರತ್​ ಬಯೋಟೆಕ್​ (Bharat Biotech) ಅಭಿವೃದ್ಧಿ ಪಡಿಸಿದ ಕೊವ್ಯಾಕ್ಸಿನ್​ ಕೊವಿಡ್​ 19 ಲಸಿಕೆ (covaxin)  ಬಗ್ಗೆ ಅವಹೇಳನಕಾರಿ ಸುದ್ದಿಗಳನ್ನು ಬರೆದು, ಪ್ರಕಟಿಸಿದ ಆರೋಪದಡಿ ಈ ಮಾನನಷ್ಟ ಮೊಕದ್ದಮೆಯನ್ನು ಹಾಕಿದ್ದಾಗಿ ಕಂಪನಿ ಹೇಳಿಕೊಂಡಿದೆ. ತೆಲಂಗಾಣದ ರಂಗಾರೆಡ್ಡಿ ಕೋರ್ಟ್​​ನಲ್ಲಿ ಕೇಸ್​ ದಾಖಲಾಗಿದ್ದು, XVI ನೇ ಹೆಚ್ಚುವರಿ ನ್ಯಾಯಾಧೀಶರು ವಿಚಾರಣೆ  ನಡೆಸಿದ್ದು, ಭಾರತ್​ ಬಯೋಟೆಕ್​ ವಿರುದ್ಧ ಪ್ರಕಟಿಸಿದ್ದ 14 ಲೇಖನಗಳನ್ನೂ  ತೆಗೆದುಹಾಕಲು ದಿ ವೈರ್​ ಸುದ್ದಿ ತಾಣಕ್ಕೆ ಸೂಚನೆ ನೀಡಿದ್ದಾರೆ.

ಭಾರತ್​ ಬಯೋಟೆಕ್​ ಪರ ವಾದ ಮಂಡಿಸಿದ್ದ ಹಿರಿಯ ವಕೀಲ ಕೆ.ವಿವೇಕ್​ ರೆಡ್ಡಿ, ದಿ ವೈರ್ ಸುದ್ದಿ ಮಾಧ್ಯಮ ಸರಿಯಾಗಿ ಪರಿಶೀಲನೆ ಮಾಡದೆ, ಸತ್ಯವನ್ನು ಅರ್ಥ ಮಾಡಿಕೊಳ್ಳದೆ ಭಾರತ್​ ಬಯೋಟೆಕ್​ ಮತ್ತು ಕೊವ್ಯಾಕ್ಸಿನ್​ ವಿರುದ್ಧ ವೃಥಾ ಆರೋಪ ಮಾಡಿ ಲೇಖನಗಳನ್ನು ಪ್ರಕಟಿಸಿದೆ. ಇದು ಔಷಧ ಕಂಪನಿಯ ಗೌರವವನ್ನು ಹಾಳು ಮಾಡಿದೆ ಎಂದು ವಾದ ಮಂಡನೆ ಮಾಡಿದ್ದರು.  ಅರ್ಜಿ ಕೂಲಂಕಷವಾಗಿ ವಿಚಾರಣೆ ನಡೆಸಿದ ನ್ಯಾಯಾಧೀಶರು, 14 ಲೇಖನಗಳನ್ನೂ ತತ್​ಕ್ಷಣ ತೆಗೆದುಹಾಕಬೇಕು ಮತ್ತು ಮುಂದಿನ ದಿನಗಳಲ್ಲಿ ಭಾರತ್​ ಬಯೋಟೆಕ್​ ಬಗ್ಗೆಯಾಗಲೀ, ಲಸಿಕೆಯ ಕುರಿತಾಗಲೀ ಯಾವುದೇ ಅವಹೇಳನಕಾರಿ ಲೇಖನಗಳನ್ನು ಪ್ರಕಟಿಸಬಾರದು ಎಂದು ಸೂಚನೆ ನೀಡಿದ್ದಾರೆ ಎಂದು ಬಾರ್ ಆ್ಯಂಡ್ ಬೆಂಚ್​ ವರದಿ ಮಾಡಿದೆ. ಅಂದಹಾಗೇ, ಇದು ಸದ್ಯ ಮಧ್ಯಂತರ ಆದೇಶವಾಗಿದೆ ಎಂದೂ ಹೇಳಲಾಗಿದೆ.

ಭಾರತ್​ ಬಯೋಟೆಕ್​ ಹಾಕಿರುವ ಮಾನನಷ್ಟ ಮೊಕದ್ದಮೆಯಲ್ಲಿ ದಿ ವೈರ್​​ನ ಸಂಪಾದಕರು,  ಆರ್ಟಿಕಲ್​ಗಳನ್ನು ಬರೆದವರ ಹೆಸರೂ ಇದೆ. ತೆಲಂಗಾಣ ಕೋರ್ಟ್​ ಆದೇಶ ಹೊರಡಿಸಿದ ಬೆನ್ನಲ್ಲೇ ದಿ ವೈರ್ ಪ್ರಕಟಣೆ ಬಿಡುಗಡೆ ಮಾಡಿದ್ದು, ನಮಗೆ ಬಾರ್ ಆ್ಯಂಡ್ ಬೆಂಚ್​ ವರದಿಯಿಂದಲೇ ಕೋರ್ಟ್ ತೀರ್ಪು ನೀಡಿದ್ದು ಗೊತ್ತಾಯಿತು. ಇದಕ್ಕೂ ಮೊದಲು ನಮಗೆ ಯಾವುದೇ ನೋಟಿಸ್​ ಕೂಡ ನೀಡಿಲ್ಲ. ಭಾರತ್​ ಬಯೋಟೆಕ್​ ಪರ ವಕೀಲರೂ ನಮ್ಮನ್ನು ಸಂಪರ್ಕಿಸಿಲ್ಲ ಎಂದು ಹೇಳಿದೆ. ಅಷ್ಟೇ ಅಲ್ಲ, ಮಾಧ್ಯಮ ಸ್ವಾತಂತ್ರ್ಯವನ್ನು ನಮ್ಮ ಸಂವಿಧಾನ ಕೊಟ್ಟಿದೆ. ಹಾಗೇ, ಉಳಿದ ಸುದ್ದಿ ಮಾಧ್ಯಮಗಳಂತೆ ನಾವೂ ಭಾರತ್​ ಬಯೋಟೆಕ್​ ಬಗ್ಗೆ ಹಲವು ಆರ್ಟಿಕಲ್​ಗಳನ್ನು ಪ್ರಕಟಿಸಿದ್ದೆವು. ಆದರೆ ಇದು ಮಾಧ್ಯಮ ಸ್ವಾತಂತ್ರ್ಯ ಹರಣ ಮಾಡಿದಂತೆ ಭಾಸವಾಗುತ್ತಿದೆ ಎಂದು ಹೇಳಿದೆ.

ಇದನ್ನೂ ಓದಿ: ಕರ್ನಾಟಕದ ಮುಖಂಡರೊಂದಿಗೆ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಸಭೆ, ಸಿದ್ದರಾಮಯ್ಯ ಭಾಗಿ