7ವರ್ಷಗಳ ನಂತರ ಸೆರೆಯಾಯ್ತು ಹುಲಿಯ ಫೋಟೋ; ಕಣ್ಣಿಗೆ ಸ್ವಲ್ಪ ಕೆಲಸಕೊಟ್ಟು ಈ ಫೋಟೋದಲ್ಲಿ ಹುಲಿಯೆಲ್ಲಿದೆ ಹುಡುಕಿ!

ಇನ್ನು ಈ ಕ್ಯಾಮರಾವನ್ನು ಇಟ್ಟಿದ್ದು ಅರಣ್ಯ ರಕ್ಷಕ ಜುಖುಮಾ ಡಾನ್ ಎಂದು Sanctuary Asia ತಿಳಿಸಿದೆ. ಇವರು ಹಿರಿಯ ಅರಣ್ಯ ಸಂರಕ್ಷಣಾ ಸಿಬ್ಬಂದಿಯಾಗಿದ್ದು, ಡಂಪಾದ ಅರಣ್ಯಗಳಲ್ಲಿ ಹಲವು ವರ್ಷಗಳಿಂದಲೂ ಗಸ್ತು ತಿರುಗುವ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ.

ಈ ಚಿತ್ರದಲ್ಲಿರುವ ಹುಲಿಯನ್ನು ಹುಡುಕಿ

TV9 Web | Edited By: Digi Tech Desk|
Updated on:Jun 16, 2021 | 8:50 PM

ಈ ಫೋಟೋವನ್ನು ಸುಮ್ಮನೆ ನೋಡಿ..ಬಿಡಬೇಡಿ. ಅಯ್ಯೋ..ಇದರಲ್ಲೇನಿದೆ? ಕಪ್ಪು-ಬಿಳುಪು ಫೋಟೊ ಎಂದುಕೊಳ್ಳಬೇಡಿ. ಇದೊಂದು ಐತಿಹಾಸಿಕ ಚಿತ್ರ ಮತ್ತು ತಾಳ್ಮೆಯಿಂದ, ಸೂಕ್ಷ್ಮವಾಗಿ ಗಮನಿಸಿದರೆ ಫೋಟೋದಲ್ಲಿ ಹುಲಿಯೊಂದು ನಿಮಗೆ ಕಾಣಿಸುತ್ತದೆ. ಹಾಗಂತ ಇದು ಬುದ್ದಿಗೆ ಕಸರತ್ತು ನೀಡುವ ಪೇಂಟಿಂಗ್ ಅಲ್ಲ. ಮಿಜೋರಾಂನ ಡಂಪಾ ಹುಲಿ ಸಂರಕ್ಷಿತ ಪ್ರದೇಶದಲ್ಲಿ ಸೆರೆ ಹಿಡಿದ ಫೋಟೋ. ಹಾಗೂ ಬರೋಬ್ಬರಿ 7 ವರ್ಷಗಳ ಬಳಿಕ ಇಲ್ಲೊಂದು ಹುಲಿಯ ಫೋಟೋ ಸೆರೆಯಾಗಿದ್ದು ಇನ್ನಷ್ಟು ವಿಶೇಷವಾಗಿದೆ.

2014ರಲ್ಲಿ ಈ ಹುಲಿ ಸಂರಕ್ಷಿತ ಪ್ರದೇಶದಲ್ಲಿ ಹುಲಿಯೊಂದು ಫೋಟೋಕ್ಕೆ ಸಿಕ್ಕಿತ್ತು. ಅದಾದ ನಂತರ ಇಲ್ಲಿ ಒಂದೇ ಒಂದು ಹುಲಿಯ ಚಿತ್ರವನ್ನೂ ಸೆರೆ ಹಿಡಿಯಲು ಸಾಧ್ಯವಾಗಿರಲಿಲ್ಲ. ಏಳುವರ್ಷಗಳ ಬಳಿಕ ಇದೇ ಮೊದಲಬಾರಿಗೆ ಈಗೊಂದು ಹುಲಿ ಫೋಟೋದಲ್ಲಿ ಸೆರೆಸಿಕ್ಕಿದೆ. ಹಾಗೇ ಚಿತ್ರವನ್ನು Sanctuary Asia ತನ್ನ ಇನ್ಸ್ಟಾಗ್ರಾಂ ಪೇಜ್ನಲ್ಲಿ ಪೋಸ್ಟ್ ಮಾಡಿದೆ. ಇದನ್ನೊಂದು ಐತಿಹಾಸಿಕ ಚಿತ್ರ ಎಂದು ಉಲ್ಲೇಖಿಸಿರುವ Sanctuary Asia, ನಿಮಗೆ ಇದರಲ್ಲಿ ಹುಲಿ ಕಾಣಿಸದೆ ಇದ್ದರೆ, ಇನ್ನಷ್ಟು ಹತ್ತಿರ ಹಿಡಿದು ನೋಡಿ ಎಂದೂ ಹೇಳಿದೆ. ಈ ಕಪ್ಪು-ಬಿಳುಪಿನ ಫೋಟೋದಲ್ಲಿ ನೀವು ಮರಗಿಡ, ಪೊದೆಗಳನ್ನು ಕಾಣಬಹುದು. ಆದರೆ ಹತ್ತಿರದಲ್ಲಿ ಹಿಡಿದು ನೋಡಿದಾಗ ಎಡಭಾಗದ ಮೂಲೆಯಲ್ಲಿ ಎರಡು ಕಣ್ಣುಗಳು ಹೊಳೆಯುತ್ತಿರುವುದು ಕಾಣುತ್ತದೆ.

ಮಂಗಳವಾರ ಫೋಟೋವನ್ನು ಪೋಸ್ಟ್ ಮಾಡಲಾಗಿದ್ದು, 5 ಸಾವಿರಕ್ಕೂ ಹೆಚ್ಚು ಲೈಕ್ಸ್ ಪಡೆದುಕೊಂಡಿದೆ. ನೂರಾರು ಜನರು ಕಾಮೆಂಟ್ ಮಾಡಿದ್ದಾರೆ. ಕೆಲವರು ನಮಗೆ ಪತ್ತೆಯಾಯಿತು ಎಂದು ಕಾಮೆಂಟ್ ಬರೆದಿದ್ದರೆ, ಇನ್ನೂ ಕೆಲವರು..ನಮಗೇನೂ ಕಾಣಿಸುತ್ತಿಲ್ಲ ಎಂದಿದ್ದಾರೆ. ಮತ್ತೊಬ್ಬರು ಕಾಮೆಂಟ್ ಮಾಡಿ, ನನಗೆ 20-25 ಸೆಕೆಂಡ್ ಬೇಕಾಯಿತು ಹುಲಿಯನ್ನು ಪತ್ತೆ ಹಚ್ಚಲು ಎಂದಿದ್ದಾರೆ. ಏಳುವರ್ಷಗಳ ಬಳಿಕ ಹುಲಿಯ ಫೋಟೋ ಸೆರೆಯಾಗಿದ್ದಕ್ಕೆ, ಕ್ಯಾಮರಾವನ್ನು ಅಲ್ಲಿಟ್ಟಿದ್ದ ಅರಣ್ಯ ಸಿಬ್ಬಂದಿಗೆ ಹಲವರು ಶುಭಕೋರಿದ್ದಾರೆ.

ಇನ್ನು ಈ ಕ್ಯಾಮರಾವನ್ನು ಇಟ್ಟಿದ್ದು ಅರಣ್ಯ ರಕ್ಷಕ ಜುಖುಮಾ ಡಾನ್ ಎಂದು Sanctuary Asia ತಿಳಿಸಿದೆ. ಇವರು ಹಿರಿಯ ಅರಣ್ಯ ಸಂರಕ್ಷಣಾ ಸಿಬ್ಬಂದಿಯಾಗಿದ್ದು, ಡಂಪಾದ ಅರಣ್ಯಗಳಲ್ಲಿ ಹಲವು ವರ್ಷಗಳಿಂದಲೂ ಗಸ್ತು ತಿರುಗುವ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಇವರು ಫೆಬ್ರುವರಿಯಲ್ಲಿ ಕ್ಯಾಮರಾವನ್ನು ನಿಗದಿತ ಸ್ಥಳದಲ್ಲಿ ಇಟ್ಟಿದ್ದರು. ನಂತರ ಮೇ ತಿಂಗಳಲ್ಲಿ ಅದನ್ನು ತೆಗೆದಿದ್ದರು. ಮೂರು ತಿಂಗಳಲ್ಲಿ ಕ್ಯಾಮರಾದಲ್ಲಿ ಸೆರೆಯಾದ ಫೋಟೋವನ್ನು ನೋಡುತ್ತಿದ್ದ ಅವರಿಗೆ ಈ ಪೋಟೋದಲ್ಲಿ ಹುಲಿ ಕಾಣಿಸಿತು. ಆದರೆ ಅದನ್ನು ದೃಢಪಡಿಸುವುದಕ್ಕೋಸ್ಕ ಮೇಲಧಿಕಾರಿಗಳಿಗೆ ಕಳಿಸಿದ್ದರು. ಇದೀಗ ಭಾರತದ ಅಳಿವನಂಚಿನಲ್ಲಿರುವ ಪ್ರಭೇದಗಳ ನಿರ್ವಹಣಾ ಇಲಾಖೆಯ ವನ್ಯಜೀವಿ ಇನ್ಸ್ಟಿಟ್ಯೂಶನ್ ಪ್ರಸ್ತುತ ಫೋಟೋದಲ್ಲಿ ಇರುವುದು ಹುಲಿ ಎಂಬುದನ್ನು ದೃಢಪಡಿಸಿದೆ. ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟೆ ವೈರಲ್ ಆಗುತ್ತಿದೆ.