ಇಂದು ವಿಜಯವಾಡಕ್ಕೆ ತಮಿಳುನಾಡು ಸಿಎಂ ವಿಜಯ್: ಸಿಎಂ ಚಂದ್ರಬಾಬು ಜೊತೆ ಮಹತ್ವದ ಸಭೆ, ಕೃಷ್ಣಾ ನೀರು ಹಂಚಿಕೆ ಪ್ರಮುಖ ಅಜೆಂಡಾ
ತಮಿಳುನಾಡು ಸಿಎಂ ವಿಜಯ್ ವಿಜಯವಾಡಕ್ಕೆ ಭೇಟಿ ನೀಡಿ ಆಂಧ್ರಪ್ರದೇಶ ಸಿಎಂ ಚಂದ್ರಬಾಬು ನಾಯ್ಡು ಅವರನ್ನು ಭೇಟಿಯಾಗಲಿದ್ದಾರೆ. ಕೃಷ್ಣಾ ನದಿ ನೀರಿನ ಹಂಚಿಕೆ, ಚೆನ್ನೈ ಕುಡಿಯುವ ನೀರು ಹಾಗೂ ನದಿ ಜೋಡಣೆ ಯೋಜನೆಗಳು ಪ್ರಮುಖ ಅಜೆಂಡಾ. ಚೆಕ್‌ಡ್ಯಾಂ ನಿರ್ಮಾಣ ವಿವಾದಗಳು, ತೆಲುಗು ಗಂಗಾ ಯೋಜನೆಯಡಿ ನೀರಿನ ಕೊರತೆಯ ಕುರಿತು ಚರ್ಚಿಸಲಿದ್ದಾರೆ. ಉಪಮುಖ್ಯಮಂತ್ರಿ ಪವನ್ ಕಲ್ಯಾಣ್ ಅವರನ್ನೂ ವಿಜಯ್ ಭೇಟಿಯಾಗುವ ನಿರೀಕ್ಷೆಯಿದೆ, ರಾಜಕೀಯ ವಲಯದಲ್ಲಿ ಕುತೂಹಲ ಹೆಚ್ಚಿಸಿದೆ.
ಆಂಧ್ರಪ್ರದೇಶ, ಅಕ್ಟೋಬರ್ 13: ತಮಿಳುನಾಡು ಮುಖ್ಯಮಂತ್ರಿಯಾಗಿ ಅಧಿಕಾರ ಸ್ವೀಕರಿಸಿದ ಬಳಿಕ ನಟ-ರಾಜಕಾರಣಿ ಸಿ. ಜೋಸೆಫ್ ವಿಜಯ್ ಅವರು ಮೊದಲ ಬಾರಿಗೆ ಇಂದು ಆಂಧ್ರಪ್ರದೇಶದ ವಿಜಯವಾಡಕ್ಕೆ ಭೇಟಿ ನೀಡುತ್ತಿದ್ದಾರೆ. ಈ ಮಹತ್ವದ ಭೇಟಿಯಲ್ಲಿ ಅವರು ಆಂಧ್ರಪ್ರದೇಶ ಮುಖ್ಯಮಂತ್ರಿ ಎನ್. ಚಂದ್ರಬಾಬು ನಾಯ್ಡು ಅವರೊಂದಿಗೆ ದ್ವಿಪಕ್ಷೀಯ ಮಾತುಕತೆ ನಡೆಸಲಿದ್ದಾರೆ. ಕೃಷ್ಣಾ ನದಿ ನೀರಿನ ಹಂಚಿಕೆ, ಚೆನ್ನೈ ಮಹಾನಗರದ ಕುಡಿಯುವ ನೀರಿನ ಸಮಸ್ಯೆ ಹಾಗೂ ಗೋದಾವರಿ-ಕೃಷ್ಣಾ-ಕಾವೇರಿ ನದಿ ಜೋಡಣೆ ಯೋಜನೆಗಳು ಈ ಸಭೆಯ ಪ್ರಮುಖ ಕಾರ್ಯಸೂಚಿಯಾಗಿವೆ.
ತೆಲುಗು ಗಂಗಾ ಯೋಜನೆಯ ಕೃಷ್ಣಾ ನೀರು:ತೆಲುಗು ಗಂಗಾ ಯೋಜನೆಯ ಒಪ್ಪಂದದ ಪ್ರಕಾರ ಚೆನ್ನೈನ ಕುಡಿಯುವ ನೀರಿನ ಅಗತ್ಯಗಳಿಗಾಗಿ ಆಂಧ್ರಪ್ರದೇಶದಿಂದ ವಾರ್ಷಿಕ 12 ಟಿಎಂಸಿ ನೀರು ಸರಬರಾಜಾಗಬೇಕಿದೆ. ಪ್ರಸ್ತುತ ಪೂರೈಕೆಯಲ್ಲಿ ಎದುರಾಗುತ್ತಿರುವ ಕೊರತೆ ಹಾಗೂ ತಾಂತ್ರಿಕ ಅಡೆತಡೆಗಳ ನಿವಾರಣೆಗೆ ವಿಜಯ್ ಒತ್ತಾಯಿಸಲಿದ್ದಾರೆ.
ಗೋದಾವರಿ–ಕೃಷ್ಣಾ–ಕಾವೇರಿ ನದಿ ಜೋಡಣೆ:ಕೇಂದ್ರ ಸರ್ಕಾರದ ಮಹತ್ವಾಕಾಂಕ್ಷೆಯ ನದಿ ಜೋಡಣೆ ಯೋಜನೆಯಲ್ಲಿ ಉಭಯ ರಾಜ್ಯಗಳ ಪಾಲುದಾರಿಕೆ ಹಾಗೂ ಜಂಟಿ ನಿಲುವು ರೂಪಿಸುವ ಬಗ್ಗೆ ಚರ್ಚೆ ನಡೆಯಲಿದೆ.
ಅಣೆಕಟ್ಟು ನಿರ್ಮಾಣ ವಿವಾದಗಳು:ಆಂಧ್ರಪ್ರದೇಶ ಸರ್ಕಾರವು ಗಡಿ ಭಾಗದಲ್ಲಿ ಯೋಜಿಸಿರುವ ಕೆಲವು ಚೆಕ್‌ಡ್ಯಾಂ ಹಾಗೂ ಜಲಾಶಯಗಳ ನಿರ್ಮಾಣದಿಂದ ತಮಿಳುನಾಡಿಗೆ ನೀರಿನ ಹರಿವು ತಗ್ಗುವ ಆತಂಕವಿದ್ದು, ಈ ಬಗ್ಗೆ ಸೌಹಾರ್ದಯುತ ಪರಿಹಾರ ಕಂಡುಕೊಳ್ಳುವ ನಿರೀಕ್ಷೆಯಿದೆ.
ಮತ್ತಷ್ಟು ಓದಿ: ತಮಿಳುನಾಡು ಉಪಚುನಾವಣೆ ಫಲಿತಾಂಶ; ಧಾರಾಪುರಂ, ಮಧುರಾಂತಕಂ ಕ್ಷೇತ್ರಗಳಲ್ಲಿ ಟಿವಿಕೆಗೆ ಭರ್ಜರಿ ಗೆಲುವು
ಪವನ್ ಕಲ್ಯಾಣ್–ವಿಜಯ್ ಮುಖಾಮುಖಿ ನಿರೀಕ್ಷೆ
ದಕ್ಷಿಣ ಭಾರತದ ಚಿತ್ರರಂಗದ ಇಬ್ಬರು ಸೂಪರ್‌ಸ್ಟಾರ್‌ಗಳು ಈಗ ರಾಜಕೀಯದ ಉನ್ನತ ಹುದ್ದೆಯಲ್ಲಿದ್ದಾರೆ .ಈ ಭೇಟಿಯ ವೇಳೆ ಉಪಮುಖ್ಯಮಂತ್ರಿ ಪವನ್ ಕಲ್ಯಾಣ್ ಅವರೊಂದಿಗೂ ವಿಜಯ್ ಸೌಹಾರ್ದ ಮಾತುಕತೆ ನಡೆಸುವ ಸಾಧ್ಯತೆಯಿದ್ದು, ರಾಜಕೀಯ ವಲಯದಲ್ಲಿ ತೀವ್ರ ಕುತೂಹಲ ಮೂಡಿಸಿದೆ.
ದಸರಾ ಮಹೋತ್ಸವದ ಅಂಗವಾಗಿ ಅಕ್ಟೋಬರ್ 11 ರಿಂದ 20 ರವರೆಗೆ ನಡೆಯುತ್ತಿರುವ ‘ವಿಜಯವಾಡ ಉತ್ಸವ 2.0’ದಲ್ಲಿ ರಾಜ್ಯದ ಕಲೆ, ಸಂಸ್ಕೃತಿ ಮತ್ತು ಜಾನಪದ ನೃತ್ಯಗಳ ಪ್ರದರ್ಶನ ನಡೆಯುತ್ತಿದೆ. ಪುನ್ನಮಿ ಘಾಟ್‌ನಲ್ಲಿ ಆಯೋಜಿಸಲಾದ ವಿಶೇಷ ಲೈವ್ ಮ್ಯೂಸಿಕ್ ಮತ್ತು ಗೋಲ್ಡನ್ ಗರ್ಲ್ಸ್ ತಂಡದ ಪ್ರದರ್ಶನವನ್ನು ಮುಖ್ಯಮಂತ್ರಿಗಳು ವೀಕ್ಷಿಸಲಿದ್ದಾರೆ.
ಕಳೆದ ವಾರಾಂತ್ಯದಲ್ಲಷ್ಟೇ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರೊಂದಿಗೆ ಕೆಫೆ ಸಭೆ ಮತ್ತು ಪ್ರಧಾನಿ ಮೋದಿ ಜೊತೆ ಮೆಟ್ರೋ ಪ್ರಯಾಣ ಹಂಚಿಕೊಂಡಿದ್ದ ಸಿಎಂ ವಿಜಯ್, ಈಗ ಎನ್‌ಡಿಎ ಪಾಲುದಾರ ಚಂದ್ರಬಾಬು ನಾಯ್ಡು ಅವರೊಂದಿಗೆ ನೀರಿನ ಸಮಸ್ಯೆಗೆ ಮಾತುಕತೆಯ ಮೂಲಕ ಪರಿಹಾರ ಕಂಡುಕೊಳ್ಳಲು ಮುಂದಾಗಿರುವುದು ಅವರ ರಾಜತಾಂತ್ರಿಕ ಪ್ರಬುದ್ಧತೆಯ ಪರೀಕ್ಷೆಯಾಗಿದೆ.
ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ