Dense Fog: ದೆಹಲಿಯಲ್ಲಿ ದಟ್ಟ ಹೊಂಜು; 100ಕ್ಕೂ ಹೆಚ್ಚು ವಿಮಾನಗಳು ತಡ, 2 ವಿಮಾನಗಳ ಮಾರ್ಗ ಬದಲಾವಣೆ
ರಾತ್ರಿ 11:45ಕ್ಕೆ ಬರಬೇಕಿದ್ದ ಸ್ಪೈಸ್ಜೆಟ್ ಮತ್ತು ನಸುಕಿನ 2:15ಕ್ಕೆ ಇಳಿಯಬೇಕಿದ್ದ ಇಂಡಿಗೋ ವಿಮಾನಗಳನ್ನು ಜೈಪುರಕ್ಕೆ ಕಳುಹಿಸಲಾಯಿತು. ಈ ವರ್ಷ ಹೊಂಜಿನ ಕಾರಣಕ್ಕೆ ಮಾರ್ಗ ಬದಲಾವಣೆಯಾದ ಮೊದಲ ಎರಡು ವಿಮಾನಗಳಿವು.
Updated on: Dec 28, 2022 | 7:50 AM
ದೆಹಲಿ: ರಾಷ್ಟ್ರ ರಾಜಧಾನಿಯಲ್ಲಿ ದಟ್ಟ ಹೊಂಜು (Flights Diverted) ನೀರಿನ ಕಣಗಳೊಂದಿಗೆ ಹೊಗೆ ಬೆರೆತ ಮಂಜು – Dense Fog) ಸೃಷ್ಟಿಯಾದ ಹಿನ್ನೆಲೆಯಲ್ಲಿ ಮಂಗಳವಾರ 100ಕ್ಕೂ ಹೆಚ್ಚು ವಿಮಾನಗಳ ವೇಳೆ ಬದಲಾವಣೆ ಮಾಡಲಾಗಿತ್ತು. ದೃಷ್ಟಿ ಸಾಮರ್ಥ್ಯವು ಕೇವಲ 200 ಮೀಟರ್ಗಳಿಗೆ ಕುಸಿದಿತ್ತು. ರಾತ್ರಿ 11:45ಕ್ಕೆ ಬರಬೇಕಿದ್ದ ಸ್ಪೈಸ್ಜೆಟ್ ಮತ್ತು ನಸುಕಿನ 2:15ಕ್ಕೆ ಇಳಿಯಬೇಕಿದ್ದ ಇಂಡಿಗೋ ವಿಮಾನಗಳನ್ನು ಜೈಪುರಕ್ಕೆ ಕಳುಹಿಸಲಾಯಿತು. ಈ ವರ್ಷ ಹೊಂಜಿನ ಕಾರಣಕ್ಕೆ ಮಾರ್ಗ ಬದಲಾವಣೆಯಾದ ಮೊದಲ ಎರಡು ವಿಮಾನಗಳಿವು.
ಎರಡೂ ಪ್ರಕರಣಗಳಲ್ಲಿ ಪೈಲಟ್ಗಳು ರನ್ವೇ ಸರಿಯಾಗಿ ಗುರುತಿಸಲು ಆಗುತ್ತಿಲ್ಲ ಎಂದು ನಿಲ್ದಾಣ ನಿಯಂತ್ರಕರಿಗೆ ತಿಳಿಸಿದ್ದರು. 50 ಮೀಟರ್ಗಳಷ್ಟು ದೂರದಿಂದಲೂ ರನ್ವೇ ಗುರುತಿಸಲು ವಿಫಲರಾದ ಹಿನ್ನೆಲೆಯಲ್ಲಿ ಎಟಿಸಿ (Air Traffic Controller – ATC) ಕೇಂದ್ರವು ಎರಡೂ ವಿಮಾನಗಳನ್ನು ಸಮೀಪದ ನಿಲ್ದಾಣಕ್ಕೆ ತೆರಳುವಂತೆ ಸೂಚಿಸಿತು. ಹತ್ತಿರದ ವಿಮಾನ ನಿಲ್ದಾಣ ಜೈಪುರವಾಗಿತ್ತು ಎಂದು ವಿಮಾನ ನಿಲ್ದಾಣದ ಅಧಿಕಾರಿಗಳು ಹೇಳಿದ್ದಾರೆ. 50 ಮೀಟರ್ಗಳಿಗೂ ಕಡಿಮೆ ಅಂತರದಲ್ಲಿ ರನ್ವೇ ಕಾಣಿಸುವ ಪರಿಸ್ಥಿತಿ (Runway Visibility Range – RVR) ಇದ್ದಾಗಲೂ ವಿಮಾನಗಳನ್ನು ಇಳಿಸಲು ಅನುಮತಿ ನೀಡಲಾಗುತ್ತದೆ. ಆದರೆ ವಿಮಾನಗಳು ಹಾರಲು ಕನಿಷ್ಠ 125 ಮೀಟರ್ಗಳ ವಿಸಿಬಿಲಿಟಿ ಇರಬೇಕು ಎನ್ನುವ ನಿಯಮವಿದೆ. ಹೀಗಾಗಿ ಹಲವು ವಿಮಾನಗಳು ನಿಲ್ದಾಣದಿಂದ ಹಾರುವುದು ಸಹ ತಡವಾಯಿತು.
ಮಂಗಳವಾರ ನಸುಕಿನ 3.30ರಿಂದ 7.30ರ ಅವಧಿಯಲ್ಲಿ 50 ಮೀಟರ್ಗೂ ಕಡಿಮೆ ದೂರಕ್ಕೆ ವಿಸಿಬಲಿಟಿ ಕುಸಿದಿತ್ತು. 7.30ರ ನಂತರ ಪರಿಸ್ಥಿತಿ ಸುಧಾರಿಸಿತು. ಈ ನಾಲ್ಕು ಗಂಟೆಗಳ ಅವಧಿಯಲ್ಲಿ ಪಾಲಮ್ ಮತ್ತು ಸಫ್ತಾರ್ಜಂಗ್ ಪ್ರದೇಶದಲ್ಲಿ ವಿಸಿಬಲಿಟಿ ಕುಸಿದಿದ್ದ ಕಾರಣ CAT-III B ಪ್ರಕ್ರಿಯೆಗಳನ್ನು ಜಾರಿಗೊಳಿಸಲಾಯಿತು. CAT-III B ಪ್ರಕ್ರಿಯೆಗಳು ಜಾರಿಯಲ್ಲಿದ್ದಾಗ ಪೈಲಟ್ಗಳನ್ನು ರನ್ವೇಯನ್ನು ನಿಖರವಾಗಿ ಗುರುತಿಸಿದ್ದು ಮನವರಿಕೆಯಾದರೆ ಮಾದರೆ ಎಟಿಸಿ ಕೇಂದ್ರವು ವಿಮಾನ ಇಳಿಸಲು ಅನುಮತಿ ನೀಡುತ್ತದೆ.
ಮುಂದಿನ ಎರಡು ದಿನಗಳ ಅವಧಿಗೂ ದೆಹಲಿಯಲ್ಲಿ ಸಾಧಾರಣದಿಂದ ಭಾರೀ ಹೊಂಜು ಆವರಿಸಬಹುದು. ರಾಷ್ಟ್ರ ರಾಜಧಾನಿಯ ವಿವಿಧೆಡೆ ವಿಸಿಬಲಿಟಿ ಪ್ರಮಾಣವು 200 ಮೀಟರ್ಗೂ ಕಡಿಮೆ ವಿಸ್ತೀರ್ಣಕ್ಕೆ ಕುಸಿಯಬಹುದು ಎಂದು ಹವಾಮಾನ ಇಲಾಖೆಯು ತಿಳಿಸಿದೆ.
