ಗಾಜಾ ಕದನ ವಿರಾಮವನ್ನು ಕೋರಿ ವಿಶ್ವಸಂಸ್ಥೆಯ ನಿರ್ಣಯದಿಂದ ಹೊರಗುಳಿದ ಭಾರತ; ಕಾರಣವೇನು?

ದೆಹಲಿ ಅಕ್ಟೋಬರ್ 28: ಇಸ್ರೇಲ್-ಹಮಾಸ್ ಯುದ್ಧದಲ್ಲಿ (Israel-Hamas war) ತಕ್ಷಣದ ಮಾನವೀಯ ಕದನ ವಿರಾಮಕ್ಕೆ(Gaza Ceasefire) ಕರೆ ನೀಡಿದ ವಿಶ್ವಸಂಸ್ಥೆಯ ಮಹಾಸಭೆಯ ನಿರ್ಣಯದಲ್ಲಿ (UN General Assembly resolution) ಭಾರತ ಮತ ಚಲಾಯಿಸಲಿಲ್ಲ. ಗೈರಾಗುವ ನಿರ್ಧಾರವನ್ನು ವಿವರಿಸಿದ ಭಾರತ, ನಿರ್ಣಯವು ಹಮಾಸ್ ಅನ್ನು ಉಲ್ಲೇಖಿಸಿಲ್ಲ ಮತ್ತು ಭಯೋತ್ಪಾದನೆಯ ವಿರುದ್ಧ ಯುಎನ್ ಸ್ಪಷ್ಟ ಸಂದೇಶವನ್ನು ಕಳುಹಿಸಬೇಕಾಗಿದೆ ಎಂದು ಹೇಳಿದೆ. ಈ ಸಭೆಯ ಚರ್ಚೆಗಳು ಭಯೋತ್ಪಾದನೆ ಮತ್ತು ಹಿಂಸಾಚಾರದ ವಿರುದ್ಧ ಸ್ಪಷ್ಟ ಸಂದೇಶವನ್ನು ಕಳುಹಿಸುತ್ತದೆ. ನಮ್ಮನ್ನು ಎದುರಿಸುತ್ತಿರುವ ಮಾನವೀಯ ಬಿಕ್ಕಟ್ಟನ್ನು ಪರಿಹರಿಸುವಾಗ ರಾಜತಾಂತ್ರಿಕತೆ ಮತ್ತು ಮಾತುಕತೆಯ ನಿರೀಕ್ಷೆಗಳನ್ನು ವಿಸ್ತರಿಸುತ್ತದೆ ಎಂದು ನಾವು ಭಾವಿಸುತ್ತೇವೆ” ಎಂದು ವಿಶ್ವಸಂಸ್ಥೆಯ ಭಾರತದ ಉಪ ಖಾಯಂ ಪ್ರತಿನಿಧಿ ಯೋಜ್ನಾ ಪಟೇಲ್ ಹೇಳಿದ್ದಾರೆ.

ಕರಡು ನಿರ್ಣಯವು ಇಸ್ರೇಲ್‌ನ ವೈಮಾನಿಕ ದಾಳಿಗೆ ಗುರಿಯಾಗಿರುವ ಗಾಜಾ ಪಟ್ಟಿಯಲ್ಲಿ ಸಂಘರ್ಷದಲ್ಲಿ ತಕ್ಷಣದ ಒಪ್ಪಂದ ಮತ್ತು ಅಡೆತಡೆಯಿಲ್ಲದ ಮಾನವೀಯ ಪ್ರವೇಶಕ್ಕೆ ಕರೆ ನೀಡಿತ್ತು. ಅಕ್ಟೋಬರ್ 7 ರಂದು ಹಮಾಸ್ ನಡೆಸಿದ ಹಠಾತ್ ದಾಳಿಯಲ್ಲಿ 1,400 ಜನರು ಸಾವಿಗೀಡಾದ ನಂತರ ಇಸ್ರೇಲ್ ಭಾರಿ ಪ್ರತಿದಾಳಿ ನಡೆಸಿತು. ದಾಳಿಯನ್ನು ಖಂಡಿಸಿರುವ ಭಾರತ, ಅವರು ಖಂಡನೆಗೆ ಅರ್ಹರು ಎಂದು ಹೇಳಿದ್ದು, ನಿರ್ಣಯದಿಂದ “ಹಮಾಸ್” ಪದವನ್ನು ಕೈಬಿಟ್ಟಿರುವ ಬಗ್ಗೆ ಸುಳಿವು ನೀಡಿದೆ.

ಅಕ್ಟೋಬರ್ 7 ರಂದು ಇಸ್ರೇಲ್‌ನಲ್ಲಿ ನಡೆದ ಭಯೋತ್ಪಾದಕ ದಾಳಿಗಳು ಆಘಾತಕಾರಿ ಮತ್ತು ಖಂಡನೆಗೆ ಅರ್ಹವಾಗಿವೆ. ನಮ್ಮ ಪ್ರಾರ್ಥನೆ ಒತ್ತೆಯಾಳುಗಳ ಜೊತೆಯಲ್ಲಿವೆ. ನಾವು ಅವರನ್ನು ತಕ್ಷಣ ಮತ್ತು ಬೇಷರತ್ತಾಗಿ ಬಿಡುಗಡೆ ಮಾಡಬೇಕೆಂದು ನಾವು ಕರೆ ನೀಡುತ್ತೇವೆ. ಭಯೋತ್ಪಾದನೆ ಒಂದು ಪಿಡುಗು. ಅದಕ್ಕೆ ಯಾವುದೇ ಗಡಿ, ರಾಷ್ಟ್ರೀಯತೆ ಅಥವಾ ಜನಾಂಗ ಎಂಬುದಿಲ್ಲ. ಭಯೋತ್ಪಾದಕ ಕೃತ್ಯಗಳನ್ನು ಜಗತ್ತು ಸಮರ್ಥಿಸಬಾರದು. ನಾವು ಭಿನ್ನಾಭಿಪ್ರಾಯಗಳನ್ನು ಬದಿಗಿಟ್ಟು, ಒಂದಾಗೋಣ ಮತ್ತು ಭಯೋತ್ಪಾದನೆಗೆ ಶೂನ್ಯ ಸಹಿಷ್ಣುತೆಯ ವಿಧಾನವನ್ನು ಅಳವಡಿಸಿಕೊಳ್ಳೋಣ ಎಂದು ಪಟೇಲ್ ಹೇಳಿದ್ದಾರೆ.

ಈ ಪ್ರದೇಶದಲ್ಲಿ ಹದಗೆಡುತ್ತಿರುವ ಭದ್ರತಾ ಪರಿಸ್ಥಿತಿಯ ಬಗ್ಗೆ ಭಾರತವು ತೀವ್ರ ಕಳವಳ ವ್ಯಕ್ತಪಡಿಸಿದ್ದು ಎಲ್ಲಾ ಪಕ್ಷಗಳು ಈ ಸಂಘರ್ಷ ತಗ್ಗಿಸಬೇಕು ಎಂದು ಹೇಳಿದ್ದಾರೆ.

“ಭಾರತವು ಹದಗೆಡುತ್ತಿರುವ ಭದ್ರತಾ ಪರಿಸ್ಥಿತಿ ಮತ್ತು ನಡೆಯುತ್ತಿರುವ ಸಂಘರ್ಷದಲ್ಲಿ ನಾಗರಿಕ ಜೀವಗಳ ವ ನಷ್ಟದ ಬಗ್ಗೆ ತೀವ್ರ ಕಳವಳ ವ್ಯಕ್ತಪಡಿಸಿದೆ. ಈ ಪ್ರದೇಶದಲ್ಲಿ ಹಗೆತನದ ಉಲ್ಬಣವು ಮಾನವೀಯ ಬಿಕ್ಕಟ್ಟನ್ನು ಉಲ್ಬಣಗೊಳಿಸುತ್ತದೆ. ಎಲ್ಲಾ ಪಕ್ಷಗಳು ಅತ್ಯಂತ ಜವಾಬ್ದಾರಿಯನ್ನು ಪ್ರದರ್ಶಿಸಬೇಕಾಗಿದೆ” ಪಟೇಲ್ ಹೇಳಿದ್ದು, ಭಾರತವು ಯಾವಾಗಲೂ “ಇಸ್ರೇಲ್-ಪ್ಯಾಲೆಸ್ತೀನ್‌ಗೆ ಸಂಧಾನದ ದ್ವಿ-ರಾಜ್ಯ ಪರಿಹಾರವನ್ನು” ಬೆಂಬಲಿಸುತ್ತದೆ ಎಂದಿದ್ದಾರೆ.

ಭಾರತವು ಸಂಘರ್ಷ ತಗ್ಗಿಸುವಂತೆ ಒತ್ತಾಯಿಸುತ್ತದೆ, ಹಿಂಸಾಚಾರವನ್ನು ತ್ಯಜಿಸಬೇಕು ಮತ್ತು ನೇರ ಶಾಂತಿ ಮಾತುಕತೆಗಳನ್ನು ಶೀಘ್ರವಾಗಿ ಪುನರಾರಂಭಿಸಲು ಪರಿಸ್ಥಿತಿಗಳನ್ನು ಸೃಷ್ಟಿಸಲು ಕೆಲಸ ಮಾಡುತ್ತದೆ ಪಟೇಲ್ ಹೇಳಿದ್ದಾರೆ.

ಜೋರ್ಡಾನ್ ಸಲ್ಲಿಸಿದ ಕರಡು ನಿರ್ಣಯದ ಮೇಲೆ ಮತ ಚಲಾಯಿಸಲು ತುರ್ತು UNGA ಅಧಿವೇಶನದಲ್ಲಿ ಈ ಹೇಳಿಕೆ ಬಂದವು. 120 ರಾಷ್ಟ್ರಗಳು ಅದರ ಪರವಾಗಿ ಮತ ಚಲಾಯಿಸುವುದರೊಂದಿಗೆ ನಿರ್ಣಯವನ್ನು ಅಂಗೀಕರಿಸಲಾಯಿತು. ನಿರ್ಣಯ ವಿರುದ್ಧ 14 ಮತ ಚಲಾವಣೆ ಆಗಿದ್ದು 45 ಜನರು ದೂರವುಳಿದಿದ್ದಾರೆ. ಭಾರತ ಸೇರಿದಂತೆ, ಆಸ್ಟ್ರೇಲಿಯಾ, ಕೆನಡಾ, ಜರ್ಮನಿ, ಜಪಾನ್, ಉಕ್ರೇನ್ ಮತ್ತು ಯುಕೆ ಗೈರುಹಾಜರಾಗಿದೆ.

ಇದನ್ನೂ ಓದಿ: ಸ್ಪಾಂಜ್ ಬಾಂಬ್ಸ್ ಪ್ರಯೋಗಕ್ಕೆ ಮುಂದಾದ ಇಸ್ರೇಲ್​​​, ಹಮಾಸ್ ಸುರಂಗಗಳ ನಾಶಕ್ಕೆ ಹೊಸ ಪ್ಲಾನ್​ ​​

ಹಮಾಸ್ ಮತ್ತು ಇಸ್ರೇಲ್‌ನಲ್ಲಿ ನಡೆಸಿದ ಭಯೋತ್ಪಾದಕ ದಾಳಿಯನ್ನು ಖಂಡಿಸಲು ಕೆನಡಾ ಪ್ರಸ್ತಾಪಿಸಿದ ತಿದ್ದುಪಡಿಗೆ ಭಾರತ ಬೆಂಬಲ ನೀಡಿದೆ.

ಹಮಾಸ್ ಅನ್ನು ಹೆಸರಿಸದ ನಿರ್ಣಯದ ಬಗ್ಗೆ ಯುಎಸ್ ಆಕ್ರೋಶ ವ್ಯಕ್ತಪಡಿಸಿದ್ದು, ಅದನ್ನು “ಕೆಟ್ಟದ್ದು” ಎಂದು ಕರೆದಿದೆ. ಮತದಾನದ ಮೊದಲು, “ಒತ್ತೆಯಾಳು” ಎಂಬ ಪದವು ನಿರ್ಣಯದ ಭಾಗವಾಗದಿರುವ ಬಗ್ಗೆ ಅಮೆರಿಕ ತನ್ನ ಅಸಮಾಧಾನವನ್ನು ವ್ಯಕ್ತಪಡಿಸಿತು.

ಹಮಾಸ್ ಮತ್ತು ಇತರ ಭಯೋತ್ಪಾದಕ ಗುಂಪುಗಳಿಂದ ಒತ್ತೆಯಾಳುಗಳಾಗಿರುವ ನಾಗರಿಕರನ್ನು ಹೊಂದಿರುವ ನಿಮ್ಮಲ್ಲಿ ಹೆಚ್ಚಿನವರು ಇಂದು ಈ ಕೊಠಡಿಯಲ್ಲಿರುವ ನಿಮ್ಮಲ್ಲಿ ಅನೇಕ ನಾಗರಿಕರನ್ನು ಒಳಗೊಂಡಂತೆ ಮುಗ್ಧ ಜನರ ಬಗ್ಗೆ ಈ ನಿರ್ಣಯವು ಯಾವುದೇ ಉಲ್ಲೇಖವನ್ನು ಮಾಡುವುದಿಲ್ಲ ಎಂದು ಯುಎನ್‌ಗೆ ಯುಎಸ್ ರಾಯಭಾರಿ ಲಿಂಡಾ ಥಾಮಸ್ ಗ್ರೀನ್ಫೀಲ್ಡ್ ಹೇಳಿದ್ದಾರೆ.

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ