ಪಾಕಿಸ್ತಾನದ ವಾಯುಪ್ರದೇಶ ನಿರ್ಬಂಧಕ್ಕೆ ಭಾರತದ ಪ್ರತಿತಂತ್ರ: ಚೀನಾದ ಷಿನ್‌ಜಿಯಾಂಗ್-ಹೋಟನ್ ಮಾರ್ಗ ಬಳಕೆಗೆ ಮಾತುಕತೆ ಚುರುಕು

ನವದೆಹಲಿ, ಸೆಪ್ಟೆಂಬರ್ 30:ಭಾರತೀಯ ವಿಮಾನಯಾನ ಸಂಸ್ಥೆಗಳಿಗೆ ಪಾಕಿಸ್ತಾನವು ತನ್ನ ವಾಯುಪ್ರದೇಶವನ್ನು ನಿರ್ಬಂಧಿಸಿರುವ ಹಿನ್ನೆಲೆಯಲ್ಲಿ, ಭಾರತ ಸರ್ಕಾರವು ಪರ್ಯಾಯ ಮಾರ್ಗವಾಗಿ ಚೀನಾದ ಷಿನ್‌ಜಿಯಾಂಗ್ ಪ್ರಾಂತ್ಯದ ವಾಯುಮಾರ್ಗವನ್ನು ಬಳಸಿಕೊಳ್ಳಲು ಬೀಜಿಂಗ್ ಜೊತೆ ಉನ್ನತ ಮಟ್ಟದ ಮಾತುಕತೆ ನಡೆಸುತ್ತಿದೆ. ಕಳೆದ ಒಂದು ವರ್ಷಕ್ಕೂ ಹೆಚ್ಚು ಸಮಯದಿಂದ ಭಾರತದ ವಿದೇಶಾಂಗ ವ್ಯವಹಾರಗಳ ಸಚಿವಾಲಯವು (MEA) ಚೀನಾದ ವಿದೇಶಾಂಗ ಇಲಾಖೆಯೊಂದಿಗೆ ಚರ್ಚೆ ನಡೆಸುತ್ತಿದ್ದು, ಷಿನ್‌ಜಿಯಾಂಗ್‌ನ ಹೋಟನ್ ಮಾರ್ಗದ ಮೂಲಕ ಭಾರತೀಯ ನಾಗರಿಕ ವಿಮಾನಗಳ ಹಾರಾಟಕ್ಕೆ ಅನುಮತಿ ಪಡೆಯುವ ಪ್ರಕ್ರಿಯೆ ಪ್ರಗತಿಯಲ್ಲಿದೆ.

ಪಾಕಿಸ್ತಾನದಿಂದ ನಿಷೇಧ ವಿಸ್ತರಣೆ:
ಪಾಕಿಸ್ತಾನ ವಿಮಾನ ನಿಲ್ದಾಣ ಪ್ರಾಧಿಕಾರವು (PAA) ಭಾರತೀಯ ನೋಂದಾಯಿತ, ಮಾಲೀಕತ್ವದ ಹಾಗೂ ಗುತ್ತಿಗೆ ಪಡೆದ ಎಲ್ಲಾ ನಾಗರಿಕ ಮತ್ತು ಮಿಲಿಟರಿ ವಿಮಾನಗಳಿಗೆ ತನ್ನ ವಾಯುಪ್ರದೇಶ ನಿಷೇಧವನ್ನು ಅಕ್ಟೋಬರ್ 24, 2026 ರವರೆಗೆ ವಿಸ್ತರಿಸಿ ಹೊಸ ನೋಟಿಸ್ ಹೊರಡಿಸಿದೆ. ಕರಾಚಿ ಮತ್ತು ಲಾಹೋರ್ ವಿಮಾನ ಮಾಹಿತಿ ಪ್ರದೇಶಗಳು (FIR) ಎರಡರಲ್ಲೂ ಭಾರತೀಯ ವಿಮಾನಗಳ ಸಂಚಾರವನ್ನು ಸಂಪೂರ್ಣವಾಗಿ ನಿರ್ಬಂಧಿಸಲಾಗಿದೆ.

ಪಹಲ್ಗಾಮ್ ದಾಳಿ ಮತ್ತು ಬಿಕ್ಕಟ್ಟಿನ ಹಿನ್ನೆಲೆ

2025ರ ಏಪ್ರಿಲ್ 22 ರಂದು ಜಮ್ಮು-ಕಾಶ್ಮೀರದ ಪಹಲ್ಗಾಮ್‌ನಲ್ಲಿ ಪಾಕಿಸ್ತಾನ ಬೆಂಬಲಿತ ಉಗ್ರರು ನಡೆಸಿದ ಭೀಕರ ದಾಳಿಯಲ್ಲಿ 26 ಮಂದಿ ನಾಗರಿಕರು ಮೃತಪಟ್ಟಿದ್ದರು. ಇದಕ್ಕೆ ಪ್ರತಿಯಾಗಿ ಭಾರತವು ಗಡಿ ನಿಯಂತ್ರಣ ರೇಖೆಯಾಚೆಗಿನ ಉಗ್ರರ ನೆಲೆಗಳನ್ನು ಧ್ವಂಸಗೊಳಿಸಲು ‘ಆಪರೇಷನ್ ಸಿಂಧೂರ್’ ಮತ್ತು ನಂತರ ದಾಳಿಕೋರ ಉಗ್ರರನ್ನು ಹೊಡೆದುರುಳಿಸಲು ‘ಆಪರೇಷನ್ ಮಹಾದೇವ್’ ಕಾರ್ಯಾಚರಣೆಗಳನ್ನು ನಡೆಸಿತ್ತು. ಇದೇ ಸಂಘರ್ಷದ ಭಾಗವಾಗಿ ಭಾರತವು ಪಾಕ್ ವಿಮಾನಗಳಿಗೆ ತನ್ನ ವಾಯುಪ್ರದೇಶ ಬಂದ್ ಮಾಡಿತ್ತು. ಇದಕ್ಕೆ ಪ್ರತಿಯಾಗಿ ಪಾಕಿಸ್ತಾನವೂ ಭಾರತೀಯ ವಿಮಾನಗಳಿಗೆ ತನ್ನ ಗಡಿಯನ್ನು ಮುಚ್ಚಿತ್ತು.

ಮತ್ತಷ್ಟು ಓದಿ: ಬಾಂಗ್ಲಾದೇಶಕ್ಕೆ ಅಣು ಇಂಧನ ಸಾಗಿಸುತ್ತಿದ್ದ ರಷ್ಯಾ ವಿಮಾನಕ್ಕೆ ವಾಯುಮಾರ್ಗ ಬಂದ್ ಮಾಡಿದ ಪಾಕಿಸ್ತಾನ!

ಭಾರತೀಯ ಏರ್‌ಲೈನ್ಸ್‌‌ಗಳ ಮೇಲಿನ ಆರ್ಥಿಕ ಹೊರೆ: ಪಾಕಿಸ್ತಾನದ ವಾಯುಪ್ರದೇಶ ಮುಚ್ಚಿರುವುದರಿಂದ ನವದೆಹಲಿ ಮತ್ತು ಮುಂಬೈನಿಂದ ಯುರೋಪ್, ಅಮೆರಿಕ, ರಷ್ಯಾ ಹಾಗೂ ಮಧ್ಯ ಏಷ್ಯಾ ದೇಶಗಳಿಗೆ ತೆರಳುವ ವಿಮಾನಗಳು ಅರಬ್ಬಿ ಸಮುದ್ರದ ಮೂಲಕ ಸುತ್ತು ಬಳಸಿ ಹಾರಾಟ ನಡೆಸಬೇಕಾಗಿದೆ. ಇದರಿಂದ ಪ್ರತಿ ವಿಮಾನದ ಹಾರಾಟ ಸಮಯ ಸುಮಾರು 60 ರಿಂದ 90 ನಿಮಿಷ ಹೆಚ್ಚಾಗಿದ್ದು, ವಿಮಾನಯಾನ ಸಂಸ್ಥೆಗಳಿಗೆ ಕೋಟ್ಯಂತರ ರೂಪಾಯಿ ಹೆಚ್ಚುವರಿ ಇಂಧನ ವೆಚ್ಚ ತಗಲುತ್ತಿದೆ.

ಚೀನಾದ ಹೋಟನ್ ಮಾರ್ಗದ ಮಹತ್ವ: ಚೀನಾದ ದಕ್ಷಿಣ ಷಿನ್‌ಜಿಯಾಂಗ್‌ನಲ್ಲಿರುವ ಹೋಟನ್ ಮಾರ್ಗವು ಭಾರತದ ಉತ್ತರ ಭಾಗದಿಂದ ನೇರವಾಗಿ ಮಧ್ಯ ಏಷ್ಯಾ, ಚೀನಾ ಮತ್ತು ರಷ್ಯಾದ ವಾಯುಮಾರ್ಗಗಳಿಗೆ ಸುಲಭ ಸಂಪರ್ಕ ಕಲ್ಪಿಸುತ್ತದೆ. ಚೀನಾ ಈ ಮಾರ್ಗಕ್ಕೆ ಹಸಿರು ನಿಶಾನೆ ತೋರಿದರೆ ಭಾರತೀಯ ವಿಮಾನಗಳ ಹಾರಾಟದ ಸಮಯ ಗಣನೀಯವಾಗಿ ಉಳಿತಾಯವಾಗಲಿದೆ.

ಪಾಕಿಸ್ತಾನಕ್ಕೆ ಓವರ್‌ಫ್ಲೈಯಿಂಗ್ ಶುಲ್ಕದ ನಷ್ಟ: ಪಾಕಿಸ್ತಾನವು ಭಾರತಕ್ಕೆ ನಿರ್ಬಂಧ ಹೇರಿದ್ದರೂ, ಇದರಿಂದ ಸ್ವತಃ ಪಾಕಿಸ್ತಾನ ನಾಗರಿಕ ವಿಮಾನಯಾನ ಪ್ರಾಧಿಕಾರವೇ (PCAA) ನೂರಾರು ಕೋಟಿ ರೂಪಾಯಿಗಳ ಓವರ್‌ಫ್ಲೈಯಿಂಗ್ ಚಾರ್ಜಸ್ ಕಳೆದುಕೊಳ್ಳುತ್ತಿದೆ. ಭಾರತೀಯ ವಿಮಾನಗಳು ಚೀನಾ ಮಾರ್ಗವನ್ನು ಶಾಶ್ವತವಾಗಿ ಅಳವಡಿಸಿಕೊಂಡರೆ ಪಾಕಿಸ್ತಾನಕ್ಕೆ ಭಾರಿ ಆರ್ಥಿಕ ಹೊಡೆತ ಬೀಳಲಿದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ