ಭಾರತಕ್ಕೆ ಪಾರ್ಟ್ನರ್ಸ್ ಬೇಕು, ನೀತಿಪಾಠ ಹೇಳೋರಲ್ಲ: ಯೂರೋಪ್ ದೇಶಗಳಿಗೆ ಜೈಶಂಕರ್ ಸ್ಪಷ್ಟ ಸಂದೇಶ

ನವದೆಹಲಿ, ಮೇ 4: ಇದ್ದದ್ದನ್ನು ಇದ್ದಂತೆ ಯಾವ ಮುಲಾಜಿಲ್ಲದೆ ಹೇಳುವ ಭಾರತದ ವಿದೇಶಾಂಗ ಸಚಿವ ಎಸ್ ಜೈಶಂಕರ್ (S Jaishankar) ಅವರು ಐರೋಪ್ಯ ದೇಶಗಳ ಇಬ್ಬಗೆ ನೀತಿಯನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ಜಾಗತಿಕ ವಿಚಾರಗಳಲ್ಲಿ ವಾಸ್ತವವನ್ನು ಆ ದೇಶಗಳು ಅರಿತುಕೊಳ್ಳುವ ಸಂದರ್ಭ ಇದು ಎಂದು ಜೈಶಂಕರ್ ಹೇಳಿದ್ದಾರೆ. ಇನ್ನೂ ಮುಂದುವರಿದ ಅವರು, ಭಾರತಕ್ಕೆ ನೀತಿ ಪಾಠ ಹೇಳುವವರು ಬೇಕಾಗಿಲ್ಲ, ಸಹವರ್ತಿಗಳು ಬೇಕು ಎಂದಿದ್ದಾರೆ.

‘ನಾವು ಜಗತ್ತಿನತ್ತ ನೋಡುತ್ತಿದ್ದೇವೆ ಎಂದರೆ ಅದು ಪಾರ್ಟ್ನರ್​​ಗಳನ್ನು ಎದುರು ನೋಡುತ್ತಿದ್ದೇವೆ ಎಂದರ್ಥ. ನಮಗೆ ಬೋಧಕರು ಬೇಕಾಗಿಲ್ಲ. ಅದರಲ್ಲೂ, ಹೊರಗೆ ಹೇಳೋದು ಒಂದು ಮನೆಯೊಳಗೆ ಮಾಡೋದು ಒಂದು ಎಂದಿರುವ ಬೋಧಕರಂತೂ ಬೇಕಾಗಿಲ್ಲ. ಕೆಲ ಯೂರೋಪ್ ಭಾಗವು ಈ ಸಮಸ್ಯೆ ಹೊಂದಿದೆ ಎಂದನಿಸುತ್ತೆ. ಕೆಲ ದೇಶಗಳು ಬದಲಾಗುತ್ತಿವೆ’ ಎಂದು ಭಾರತದ ವಿದೇಶಾಂಗ ವ್ಯವಹಾರಗಳ ಸಚಿವರಾದ ಅವರು ಅಭಿಪ್ರಾಯಪಟ್ಟಿದ್ದಾರೆ.

ಇದನ್ನೂ ಓದಿ: ಪಾಕಿಸ್ತಾನದ ವಿರುದ್ಧ ಕ್ರಮಕ್ಕೆ ಸಿದ್ಧತೆ? ವಾಯುಪಡೆ ಮುಖ್ಯಸ್ಥರನ್ನು ಭೇಟಿಯಾದ ಪ್ರಧಾನಿ ಮೋದಿ

ಪಾಶ್ಚಿಮಾತ್ಯ ರಾಷ್ಟ್ರಗಳನ್ನು ಎ ಜೈಶಂಕರ್ ತರಾಟೆಗೆ ತೆಗೆದುಕೊಳ್ಳುತ್ತಿರುವುದು ಇದೇ ಮೊದಲಲ್ಲ. ಅನೇಕ ವಿಚಾರದಲ್ಲಿ ಭಾರತದ ಮೇಲೆ ಒತ್ತಡ ಹಾಕಲು ಬಂದಾಗೆಲ್ಲಾ ಆ ದೇಶಗಳಿಗೆ ಅವರು ಖಡಕ್ ತಿರುಗೇಟು ನೀಡಿದ್ದಿದೆ. ಯೂರೋಪಿಯನ್ ಯೂನಿಯನ್ ವಿರುದ್ಧವೂ ಅನೇಕ ಬಾರಿ ಕಾಠಿಣ್ಯವಾಗಿ ಮಾತನಾಡಿದ್ದಿದೆ.

ತನ್ನ ಸಮಸ್ಯೆಗಳು ಜಗತ್ತಿನ ಸಮಸ್ಯೆ. ಜಗತ್ತಿನ ಸಮಸ್ಯೆಗಳು ಯೂರೋಪ್​​ನ ಸಮಸ್ಯೆಗಳಲ್ಲ ಎನ್ನುವ ಮನಸ್ಥಿತಿಯಲ್ಲಿ ಯೂರೋಪ್ ಇದೆ ಎಂದು ಜೈಶಂಕರ್ ಅವರು ಉಕ್ರೇನ್ ವಿಚಾರದಲ್ಲಿ ಕುಟುಕಿದ್ದರು.

ಉಕ್ರೇನ್ ವಿಚಾರದಲ್ಲಿ ಭಾರತ ರಷ್ಯಾ ವಿರುದ್ಧವಾದ ನಿಲುವು ತಳೆದಿಲ್ಲ ಎಂಬುದು ಪಾಶ್ಚಿಮಾತ್ಯ ದೇಶಗಳ ತಕರಾರು. ಚೀನಾ ಜೊತೆ ಸಮಸ್ಯೆ ಹೆಚ್ಚಾದಾಗ ಭಾರತಕ್ಕೆ ಜಾಗತಿಕ ಬೆಂಬಲ ಸಿಗದೇ ಹೋಗಬಹುದು ಎನ್ನುವ ಪರೋಕ್ಷ ಎಚ್ಚರಿಕೆಯನ್ನು ಐರೋಪ್ಯ ದೇಶಗಳು ಮಾಡುತ್ತಿವೆ.

ಇದನ್ನೂ ಓದಿ: ಪೂರ್ಣಪ್ರಮಾಣದ ಯುದ್ಧವಾದ್ರೆ ಪಾಕಿಸ್ತಾನದ ಬಳಿ ಇರೋ ಮದ್ದುಗುಂಡು 4ನೇ ದಿನದಲ್ಲಿ ಖತಂ

ಚೀನಾ ಜೊತೆಗಿನ ನಮ್ಮ ಸಮಸ್ಯೆಗಳಿಗೂ ಉಕ್ರೇನ್​ಗೂ ಸಂಬಂಧ ಇಲ್ಲ, ರಷ್ಯಾಗೂ ಸಂಬಂಧ ಇಲ್ಲ. ಮೊದಲ ಬಿಕ್ಕಟ್ಟು ದಾಟಿದರೆ ಎರಡನೇ ಬಿಕ್ಕಟ್ಟಿಗೆ ಸಹಾಯವಾಗುತ್ತದೆ ಎನ್ನುವ ತರ್ಕ ಕೆಲಸ ಮಾಡೋದಿಲ್ಲ. ಯೂರೋಪ್ ಆತ್ಮಾವಲೋಕನ ಮಾಡಿಕೊಳ್ಳಬೇಕು ಎಂದು ವಿದೇಶಾಂಗ ಸಚಿವರು ಹೇಳಿದ್ದಾರೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ