ಮುಂಜಾನೆ ಬಂತು ಹಿ ಈಸ್​ ನೋ ಮೋರ್​ ಎಂಬ ಸಂದೇಶ; ಉಕ್ರೇನ್​​ ಬಂಕರ್​​ನಿಂದ ಅಳುತ್ತಲೇ ವಿವರಿಸಿದ ನವೀನ್​ ಸ್ನೇಹಿತ

ಮುಂಜಾನೆ ಬಂತು ಹಿ ಈಸ್​ ನೋ ಮೋರ್​ ಎಂಬ ಸಂದೇಶ; ಉಕ್ರೇನ್​​ ಬಂಕರ್​​ನಿಂದ ಅಳುತ್ತಲೇ ವಿವರಿಸಿದ ನವೀನ್​ ಸ್ನೇಹಿತ
ಟಿವಿ 9ಗೆ ಘಟನೆ ಬಗ್ಗೆ ವಿವರಣೆ ನೀಡಿದ ಅಮಿತ್

ನಾವು ಸುಮಾರು 25 ಮಂದಿ ಈ ಬಂಕರ್​​ನಲ್ಲಿದ್ದು 6 ದಿನ ಕಳೆದಿದೆ. ನಾಳೆಯಷ್ಟರಲ್ಲಿ ನಾವೂ ಹೇಗಾದರೂ ಸರಿ ಅಲ್ಲಿಂದ ಹೊರಡಬೇಕು. ರಿಸ್ಕ್​ ತೆಗೆದುಕೊಳ್ಳದೆ ಇಲ್ಲಿಯೇ ಕುಳಿತಿದ್ದರೆ ಉಳಿಗಾಲವಿಲ್ಲ ಎಂಬುದನ್ನು ಮಾತನಾಡಿಕೊಂಡಿದ್ದೆವು.

TV9kannada Web Team

| Edited By: Lakshmi Hegde

Mar 01, 2022 | 5:40 PM

ಸುಮಾರು 20-25 ಜನರ ಸಹಪಾಠಿಗಳು, ಸೀನಿಯರ್ಸ್​​​ಗಳೊಂದಿಗೆ ಖಾರ್ಕೀವ್​​ನ ಬಂಕರ್​ವೊಂದರಲ್ಲಿ ಇದ್ದ ಹಾವೇರಿ ಮೂಲದ ನವೀನ್​ ಇಂದು ಹಸಿವು ತಡೆಯಲಾರದೆ ಅಲ್ಲಿಂದ ಹೊರಬಿದ್ದು, ರಷ್ಯಾ ದಾಳಿಗೆ ಜೀವತೆತ್ತಿದ್ದಾರೆ. ಉಕ್ರೇನ್​ನಲ್ಲಿ ಎಂಬಿಬಿಎಸ್​ 4ನೇ ವರ್ಷದಲ್ಲಿ ಓದುತ್ತಿದ್ದ ನವೀನ್​​ ಇನ್ನೊಂದು ವರ್ಷ ಓದಿದ್ದರೆ ಕೋರ್ಸ್​ ಮುಗಿಯುತ್ತಿತ್ತು. ಹಾವೇರಿ ಜಿಲ್ಲೆಯ ಚಳಗೇರಿ ನಿವಾಸಿಯಾದ ನವೀನ್​​​, ಅವರ ಅಪ್ಪ-ಅಮ್ಮನಿಗೆ ಎರಡನೇ ಮಗ. ಇವರ ಅಣ್ಣ ಹರ್ಷ ಬೆಂಗಳೂರಿನಲ್ಲಿಯೇ ಪಿಎಚ್​ಡಿ ಮಾಡುತ್ತಿದ್ದಾರೆ. ಕಡಿಮೆ ಖರ್ಚಿನಲ್ಲಿ ವೈದ್ಯಕೀಯ ವ್ಯಾಸಂಗ ಮಾಡಿ, ಭಾರತಕ್ಕೆ ಬಂದು ಒಳ್ಳೆಯ ವೈದ್ಯನಾಗಬೇಕು. ಅಪ್ಪ-ಅಮ್ಮನನ್ನು ಚೆನ್ನಾಗಿ ನೋಡಿಕೊಳ್ಳಬೇಕು ಎಂಬ ಕನಸು ಹೊತ್ತಿದ್ದ ನವೀನ್​, ರಷ್ಯಾದ ಆಕ್ರಮಣಕ್ಕೆ ಕಣ್ಮುಚ್ಚುವಂತಾಗಿದ್ದು ನಿಜಕ್ಕೂ ದುರಂತ. ಇಲ್ಲಿ ಕುಟುಂಬದಲ್ಲಿ ದುಃಖ ಮಡುಗಟ್ಟಿದೆ.

ಮುಂಜಾನೆ ಏನಾಯ್ತು? ಇಂದು ಮುಂಜಾನೆ ಏನೆಲ್ಲ ಆಯ್ತು. ನವೀನ್​ ಬಂಕರ್​​ನಿಂದ ಹೊರಹೋಗಿದ್ದು, ಎಷ್ಟೊತ್ತಿಗೆ ಮತ್ತು ಯಾಕೆ ಎಂಬ ಬಗ್ಗೆ ಅವರೊಂದಿಗೆ ಅದೇ ಬಂಕರ್​ನಲ್ಲಿದ್ದ ಅಮಿತ್ ಎಂಬುವರು ಟಿವಿ 9 ಕನ್ನಡ ಸುದ್ದಿ ಮಾಧ್ಯಮಕ್ಕೆ ತಿಳಿಸಿದ್ದಾರೆ. ಈ ಅಮಿತ್​ ಕೂಡ ಹಾವೇರಿಯವರೇ ಆಗಿದ್ದು ಉಕ್ರೇನ್​ನಲ್ಲಿ ಎಂಬಿಬಿಎಸ್​ 5ನೇ ವರ್ಷದಲ್ಲಿ ಓದುತ್ತಿದ್ದಾರೆ. ನವೀನ್​ ನಿಧನಕ್ಕೆ ಕಣ್ಣೀರು ಹಾಕುತ್ತಿರುವ ಅವರು ಎಲ್ಲ ಮಾಹಿತಿ ಹಂಚಿಕೊಂಡಿದ್ದಾರೆ.

‘ನಾನು ನಿನ್ನ ರಾತ್ರಿ ಮಲಗುವುದು 3 ಗಂಟೆ ಮೇಲಾಯಿತು. ಹಾಗಾಗಿ ಬೆಳಗ್ಗೆ ಏಳುವುದು 8ಗಂಟೆ ಮೇಲಾಯಿತು. ಆದರೆ ನವೀನ್​ 6ಗಂಟೆಗೇ ಎದ್ದಿದ್ದ. ಹಾಗೇ ಎದ್ದವನು ತಿನ್ನಲು ಏನಾದರೂ ತರಲು ನಮ್ಮ ಬಂಕರ್​​ನಿಂದ 50 ಮೀಟರ್​ ದೂರದಲ್ಲಿರುವ ಒಂದು ಸೂಪರ್​ ಮಾರ್ಕೆಟ್​ಗೆ ಹೋಗಿದ್ದ. ಅಲ್ಲಿ ತುಂಬ ಜನಸಂದಣಿ ಇದ್ದಿದ್ದರಿಂದ ಅವನೂ ಕಾಯಬೇಕಿತ್ತು. ಸುಮಾರು 7.58ರ ಹೊತ್ತಿಗೆ ನಮ್ಮೊಂದಿಗೇ ಇದ್ದ ಶ್ರೀಕಾಂತ್​ ಎಂಬುವನಿಗೆ ನವೀನ್​ ಮೆಸೇಜ್​ ಕಳಿಸಿ, ಅಕೌಂಟ್​​ನಲ್ಲಿ ಹಣ ಕಡಿಮೆ ಇದೆ. ಸ್ವಲ್ಪ ದುಡ್ಡು ಕಳಿಸು ಎಂದ. ಹಾಗೇ ಈತ ಕಳಿಸಿದ. ಸುಮಾರು 8.10ರ ಹೊತ್ತಿಗೆ ಶ್ರೀಕಾಂತ್​ ತಿರುಗಿ ನವೀನ್​ ಮೊಬೈಲ್​ಗೆ ಕರೆ ಮಾಡಿದರೆ ಅವನು ಪಿಕ್​ ಮಾಡಲಿಲ್ಲ. ಆದರೆ ಕೆಲವೇ ಕ್ಷಣದಲ್ಲಿ ಅಲ್ಲಿಯೇ ಇದ್ದ, ಇನ್ಯಾರೋ ಹಿ ಈಸ್ ನೋ ಮೋರ್​ ಎಂಬ ಮೆಸೇಜ್​ ಕಳಿಸಿದರು. ಅವರು ಉಕ್ರೇನ್​ವರಾಗಿದ್ದು ರಷ್ಯನ್ ಭಾಷೆ ಮಾತನಾಡುವವರು. ಇಂಗ್ಲಿಷ್​​ನಲ್ಲಿ ಮೆಸೇಜ್​ ಕಳಿಸಿದ್ದರು’ ಎಂದು ಗದ್ಗದಿತ ಧ್ವನಿಯಲ್ಲಿ ಅಮಿತ್​ ವಿವರಣೆ ನೀಡಿದ್ದಾರೆ.

ಅಮಿತ್​, ನವೀನ್​ ಮತ್ತಿತರ 25 ಮಂದಿ ಆ ಬಂಕರ್​​ನಲ್ಲಿದ್ದು 6 ದಿನ ಕಳೆದಿದೆ. ನಾಳೆಯಷ್ಟರಲ್ಲಿ ನಾವೂ ಹೇಗಾದರೂ ಸರಿ ಅಲ್ಲಿಂದ ಹೊರಡಬೇಕು. ರಿಸ್ಕ್​ ತೆಗೆದುಕೊಳ್ಳದೆ ಇಲ್ಲಿಯೇ ಕುಳಿತಿದ್ದರೆ ಉಳಿಗಾಲವಿಲ್ಲ ಎಂಬುದನ್ನು ಮಾತನಾಡಿಕೊಂಡಿದ್ದೆವು. ಮೊದಮೊದಲು ತಿನ್ನಲು ಏನಾದರೂ ಸಿಗುತ್ತಿತ್ತು. ಈಗಂತೂ ಸ್ನಿಕ್ಕರ್ಸ್, ಚಾಕಲೇಟ್​, ಬಿಸ್ಕಟ್​ಗಳನ್ನು ತಿನ್ನುತ್ತಿದ್ದೇವೆ. ಇಲ್ಲಿ ಅನೇಕ ಜ್ಯೂನಿಯರ್ಸ್​ಗಳಿದ್ದಾರೆ. ಅವರಿಗೆ ಪಾಪ ಭಾಷೆಯೂ ಬರುವುದಿಲ್ಲ. ಈಗ ನೋಡಿದರೆ ನವೀನ್​ ಮೃತಪಟ್ಟಿದ್ದಾನೆ. ಏನು ಮಾಡಬೇಕು ಎಂದೇ ತಿಳಿಯುತ್ತಿಲ್ಲ. ಇಲ್ಲಿಂದ ಹೊರಬಿದ್ದರೆ ಬದುಕುತ್ತೇವಾ ಎಂಬ ಭಯವನ್ನು ವ್ಯಕ್ತಪಡಿಸಿದ್ದಾರೆ. ಅಷ್ಟೇ ಅಲ್ಲ, ನವೀನ್​ ತುಂಬ ಒಳ್ಳೆಯ ಹುಡುಗನಾಗಿದ್ದ, ಓದಿನಲ್ಲೂ ಚುರುಕಾಗಿದ್ದು, ಟಾಪರ್ ಆಗಿದ್ದ ಎಂದೂ ತಿಳಿಸಿದ್ದಾರೆ.

ಇದನ್ನೂ ಓದಿ: Ukraine-Russia War: ಹಿಟ್ಲರ್ ಆಕ್ರಮಣದ​ ಬಳಿಕ ಇದೇ ಮೊದಲ ಬಾರಿ ಭೀಕರ ಬಾಂಬ್​ ದಾಳಿಗೆ ತುತ್ತಾದ ಕೀವ್​, ಕಾರ್ಖಿವ್​ ನಗರಗಳು

Follow us on

Related Stories

Most Read Stories

Click on your DTH Provider to Add TV9 Kannada