ಮಹಿಳೆಯರ ವಿವಾಹ ವಯಸ್ಸು ಹೆಚ್ಚಿಸುವ ಕಾನೂನು, ಪರಿಶೀಲನೆಗೆ ಮುಕ್ತವಾಗಿದೆ ಎಂದ ಕೇಂದ್ರ

ದೆಹಲಿ: ಮಹಿಳೆಯರ ವಿವಾಹ ವಯಸ್ಸನ್ನು (marriage age) 18 ರಿಂದ 21 ಕ್ಕೆ ಏರಿಸುವ ಉದ್ದೇಶಿತ ಕಾನೂನಿನ ಮೇಲೆ ಸಂಸದರ ಸಮಿತಿಯ ಪರಿಶೀಲನೆಗೆ ಸರ್ಕಾರವು ಒಪ್ಪಬಹುದು. ರಾಜಕೀಯ ಪಕ್ಷಗಳು, ಕಾರ್ಯಕರ್ತರು ಮತ್ತು ಇತರರಿಂದ ಮಿಶ್ರ ಪ್ರತಿಕ್ರಿಯೆಗಳನ್ನು ಪಡೆದಿರುವ ಈ ಕ್ರಮಕ್ಕೆ ಸರ್ಕಾರವು ಆತುರಪಡಲು ಬಯಸುವುದಿಲ್ಲ ಎಂದು ಮೂಲಗಳು ಹೇಳಿವೆ. ಮಸೂದೆಯ ಬಗ್ಗೆ ಸಂಸತ್​​ನ ಪರಿಶೀಲನೆಯನ್ನು ಸರ್ಕಾರ ವಿರೋಧಿಸುವುದಿಲ್ಲ ಎಂದು ಮೂಲಗಳು ತಿಳಿಸಿವೆ. ಆಯ್ಕೆ ಸಮಿತಿಯು ಮಸೂದೆಯ ನಿಬಂಧನೆಗಳ ಮೂಲಕ ಹೋಗಬಹುದು ಎಂದು ಹಿರಿಯ ಸಚಿವರು ಹೇಳಿರುವುದಾಗಿ ಎನ್​​ಡಿಟಿವಿ ವರದಿ ಮಾಡಿದೆ. “ವಿರೋಧ ಪಕ್ಷಗಳು (opposition parties) ಸದನದಲ್ಲಿ ಏನು ಒತ್ತಾಯಿಸುತ್ತವೆ ಎಂಬುದರ ಮೇಲೆ ಮಸೂದೆಯ ಮುಂದಿನ ಕ್ರಮವು ಅವಲಂಬಿತವಾಗಿರುತ್ತದೆ” ಎಂದು ಸಚಿವರು ಹೇಳಿದರು. ಕಾಂಗ್ರೆಸ್, ಸಿಪಿಎಂ ಮತ್ತು ಇತರ ಕೆಲವು ಪಕ್ಷಗಳು ಮಸೂದೆಯನ್ನು ವಿರೋಧಿಸಲು ನಿರ್ಧರಿಸಿವೆ. ಸಮಾಜವಾದಿ ಪಕ್ಷ ಮತ್ತು ಎಐಎಂಐಎಂ ಮುಂತಾದ ಪಕ್ಷಗಳು ಕೂಡ ಈ ಕ್ರಮವನ್ನು ವಿರೋಧಿಸಿವೆ. ಈ ಅಧಿವೇಶನದಲ್ಲಿ ಮಸೂದೆಯನ್ನು ತರಲು ಮತ್ತು ಅದನ್ನು ಅಂಗೀಕರಿಸಲು ಸರ್ಕಾರ ಯೋಚಿಸುತ್ತಿರುವಾಗ ಈ ಕ್ರಮವು ಸ್ಥಗಿತಗೊಳ್ಳಬಹುದು. ಪ್ರಸ್ತುತ ಅಧಿವೇಶನಕ್ಕೆ ನಾಲ್ಕು ದಿನಗಳು ಉಳಿದಿವೆ ಮತ್ತು 12 ಪ್ರತಿಪಕ್ಷಗಳ ಸಂಸದರ ಅಮಾನತು ಮತ್ತು ಸಚಿವ ಅಜಯ್ ಮಿಶ್ರಾ ಟೆನಿಯನ್ನು ವಜಾ ಮಾಡಬೇಕೆಂಬ ಬೇಡಿಕೆಯಿಂದ ಉಭಯ ಸದನಗಳು ಸ್ತಬ್ಧವಾಗಿವೆ.

ಪ್ರಧಾನಮಂತ್ರಿ ನರೇಂದ್ರ ಮೋದಿಯವರ ಸಚಿವ ಸಂಪುಟ ಕಳೆದ ವಾರ “ಬಾಲ್ಯ ವಿವಾಹ ನಿಷೇಧ (ತಿದ್ದುಪಡಿ) ಮಸೂದೆ, 2021ಗೆ (Prohibition of Child Marriage (Amendment) Bill, 2021)ಪುರುಷರಿಗೆ ಸಮಾನವಾಗಿ ಮಹಿಳೆಯರ ವಿವಾಹದ ವಯಸ್ಸನ್ನು 21 ವರ್ಷಕ್ಕೆ ಹೆಚ್ಚಿಸಲು ಅನುಮೋದನೆ ನೀಡಿದೆ. ಇದನ್ನು ಕೊನೆಯದಾಗಿ 1978 ರಲ್ಲಿ 15 ರಿಂದ 18 ವರ್ಷಗಳವರೆಗೆ ಹೆಚ್ಚಿಸಲಾಯಿತು. ಮಸೂದೆಯ ಉದ್ದೇಶವು “ಅತ್ಯಂತ ಸಂಶಯಾಸ್ಪದವಾಗಿದೆ ಮತ್ತು ಪ್ರೇರೇಪಿತವಾಗಿದೆ” ಎಂದು ಕಾಂಗ್ರೆಸ್ ಆರೋಪಿಸಿದೆ.ಅದನ್ನು ಪರಿಶೀಲನೆಗಾಗಿ ಸ್ಥಾಯಿ ಸಮಿತಿಗೆ ಉಲ್ಲೇಖಿಸಲು ಕರೆ ನೀಡಿದೆ.

ಹೆಣ್ಣುಮಕ್ಕಳ ಶಿಕ್ಷಣ ಮತ್ತು ಪೋಷಣೆಗೆ ಸರಕಾರ ಹೆಚ್ಚಿನ ಗಮನ ನೀಡಬೇಕು ಎಂದು ಸಿಪಿಎಂ ಹೇಳಿದೆ.

“18 ವರ್ಷ ವಯಸ್ಸಿನ ಮಹಿಳೆ ಕಾನೂನುಬದ್ಧವಾಗಿ ವಯಸ್ಕಳಾಗಿದ್ದಾಳೆ. ಮದುವೆಯ ಉದ್ದೇಶಕ್ಕಾಗಿ ಅವಳನ್ನು ಯೌವನದವಳು ಎಂದು ಪರಿಗಣಿಸುವುದು ಸ್ವಯಂ-ವಿರೋಧಾಭಾಸವಾಗಿದೆ ಮತ್ತು ಪ್ರಸ್ತಾಪವು ತನ್ನ ಸಂಗಾತಿಯ ವೈಯಕ್ತಿಕ ಆಯ್ಕೆಗಳನ್ನು ಮಾಡುವ ವಯಸ್ಕರ ಹಕ್ಕನ್ನು ಉಲ್ಲಂಘಿಸುತ್ತದೆ. ಈ ಪ್ರಸ್ತಾಪವುಈ ಪ್ರಸ್ತಾಪವು ಮಹಿಳೆ ತನ್ನ ಜೀವನದ ಹಾದಿಯನ್ನು ನಿರ್ಧರಿಸುವುದನ್ನು ಕಸಿಯುತ್ತದೆ ಎಂದು ಸಿಪಿಎಂನ ಹಿರಿಯ ನಾಯಕ ಸೀತಾರಾಂ ಯೆಚೂರಿ ಹೇಳಿದ್ದಾರೆ.

ಪ್ರಧಾನಿ ಮೋದಿಯವರು ಕಳೆದ ವರ್ಷದ ಸ್ವಾತಂತ್ರ್ಯ ದಿನದ ಭಾಷಣದಲ್ಲಿ ಮಹಿಳೆಯರು ಸರಿಯಾದ ವಯಸ್ಸಿನಲ್ಲಿ ಮದುವೆಯಾಗುವ ಬಗ್ಗೆ ಮಾತನಾಡಿದ್ದರು. “ಈ ಸರ್ಕಾರವು ಹೆಣ್ಣುಮಕ್ಕಳು ಮತ್ತು ಸಹೋದರಿಯರ ಆರೋಗ್ಯದ ಬಗ್ಗೆ ನಿರಂತರವಾಗಿ ಕಾಳಜಿ ವಹಿಸುತ್ತದೆ. ಹೆಣ್ಣು ಮಕ್ಕಳನ್ನು ಅಪೌಷ್ಟಿಕತೆಯಿಂದ ರಕ್ಷಿಸಲು, ಅವರು ಸರಿಯಾದ ವಯಸ್ಸಿನಲ್ಲಿ ಮದುವೆಯಾಗುವುದು ಅವಶ್ಯಕ” ಎಂದು ಪ್ರಧಾನಿ ಹೇಳಿದ್ದರು.

ಇದನ್ನೂ ಓದಿ: ಮಹಿಳೆಯರ ವಿವಾಹ ವಯೋಮಿತಿ ಹೆಚ್ಚಿಸುವ ಕೇಂದ್ರದ ಕ್ರಮಕ್ಕೆ ಕೇರಳ ಮುಸ್ಲಿಂ ಸಂಘಟನೆಗಳ ವಿರೋಧ

Published On - 12:54 pm, Mon, 20 December 21