ಹೊಸ ವರ್ಷಕ್ಕೆ ಗೋವಾದಲ್ಲಿ ಪಾರ್ಟಿ ಮಾಡೋ ಪ್ಲಾನ್ ಇದೆಯಾ?; ಹೊಸ ಕೊವಿಡ್ ನಿಯಮಗಳು ಹೀಗಿವೆ

ಗೋವಾ: ಇನ್ನೇನು ಮೂರೇ ದಿನದಲ್ಲಿ 2021 ಮುಗಿದು ಹೊಸ ವರ್ಷಕ್ಕೆ ಕಾಲಿಡಲಿದ್ದೇವೆ. ಈ ಬಾರಿ ವೀಕೆಂಡ್​ನಲ್ಲೇ ಹೊಸ ವರ್ಷ ಬಂದಿರುವುದರಿಂದ ದೂರಕ್ಕೆ ಹೋಗಿ ಪಾರ್ಟಿ ಮಾಡಬೇಕೆಂದು ಅನೇಕರು ಪ್ಲಾನ್ ಮಾಡಿರುತ್ತಾರೆ. ನೀವೇನಾದರೂ ಈ ವರ್ಷದ ನ್ಯೂ ಇಯರ್​ಗೆ ಗೋವಾಗೆ ಹೋಗಿ ಪಾರ್ಟಿ ಮಾಡಬೇಕೆಂದು ಪ್ಲಾನ್ ಮಾಡಿದ್ದರೆ ಈ ನಿಯಮಗಳನ್ನು ಅನುಸರಿಸುವುದು ಕಡ್ಡಾಯ. ಹೊಸ ವರ್ಷಾಚರಣೆಗೆ ಬೇರೆ ರಾಜ್ಯಗಳಿಂದ ಗೋವಾಗೆ ಪಾರ್ಟಿ ಮಾಡಲು ಬರುವವರ ಸಂಖ್ಯೆ ಹೆಚ್ಚಾಗುವುದರಿಂದ ಗೋವಾ ಸರ್ಕಾರ ಹೊಸ ಕೊವಿಡ್ ಮಾರ್ಗಸೂಚಿಗಳನ್ನು ಜಾರಿಗೆ ತಂದಿದೆ.

ಗೋವಾ ರಾಜ್ಯದಲ್ಲಿ ಪಾರ್ಟಿಗಳಿಗೆ ಹಾಜರಾಗಲು ಅಥವಾ ರೆಸ್ಟೋರೆಂಟ್‌ಗಳಿಗೆ ಹೋಗಲು ಕೊವಿಡ್ ನೆಗೆಟಿವ್ ವರದಿ ಅಥವಾ ಎರಡು ಡೋಸ್​ಗಳ ಕೊವಿಡ್ ಲಸಿಕೆಯ ಪ್ರಮಾಣಪತ್ರವನ್ನು ನೀಡಬೇಕಾದುದು ಅತ್ಯಗತ್ಯ ಎಂದು ಗೋವಾ ಮುಖ್ಯಮಂತ್ರಿ ಪ್ರಮೋದ್ ಸಾವಂತ್ ಹೇಳಿದ್ದಾರೆ. ಇಂದು ಈ ಕುರಿತು ವಿವರವಾದ ಆದೇಶವನ್ನು ರಾಜ್ಯ ಸರ್ಕಾರ ಬಿಡುಗಡೆ ಮಾಡಲಿದೆ ಎಂದು ಸಾವಂತ್ ಸುದ್ದಿಗಾರರಿಗೆ ತಿಳಿಸಿದರು.

ಅನೇಕ ರಾಜ್ಯಗಳು ಒಮಿಕ್ರಾನ್ ಹರಡುವಿಕೆಯ ನಡುವೆ ರಾತ್ರಿ ಕರ್ಫ್ಯೂಗಳನ್ನು ಮರಳಿ ಜಾರಿಗೆ ತಂದಿದ್ದರೂ, ಕ್ರಿಸ್‌ಮಸ್-ಹೊಸ ವರ್ಷದ ಹಬ್ಬದ ಮಧ್ಯೆ ಜನರು ಪಾರ್ಟಿ ಮಾಡುವುದನ್ನು ನಿಯಂತ್ರಿಸುವುದು ಕಷ್ಟ. ಗೋವಾದಲ್ಲಿನ ಕೋವಿಡ್ -19 ಪರಿಸ್ಥಿತಿಯನ್ನು ತಮ್ಮ ಸರ್ಕಾರವು ಮೇಲ್ವಿಚಾರಣೆ ಮಾಡುತ್ತಿದೆ ಮತ್ತು ಅಗತ್ಯವಿದ್ದಲ್ಲಿ ಜನವರಿ 3ರಂದು ನಡೆಯಲಿರುವ ಕಾರ್ಯಪಡೆಯ ಸಭೆಯಲ್ಲಿ ಮುನ್ನೆಚ್ಚರಿಕೆ ಕ್ರಮಗಳನ್ನು ತೆಗೆದುಕೊಳ್ಳುತ್ತದೆ ಎಂದು ಸಾವಂತ್ ಭರವಸೆ ನೀಡಿದ್ದಾರೆ.

ಹೊಸ ವರ್ಷಾಚರಣೆಗೆ ಮುಂಚಿತವಾಗಿ, ಪ್ರಸ್ತುತ ರಾಜ್ಯದ ಹೋಟೆಲ್‌ಗಳಲ್ಲಿ ಶೇ. 90ರಷ್ಟು ಜನರು ಆಗಮಿಸಲು ಅನುಮತಿಯಿದೆ. ಆದರೆ ಬೀಚ್‌ಗಳು ಈಗಾಗಲೇ ಮೋಜುಗಾರರಿಂದ ತುಂಬಿ ತುಳುಕುತ್ತಿವೆ. ಇಯರ್ ಎಂಡ್​ನಲ್ಲಿ ಗೋವಾಗೆ ಬರುವ ಪ್ರವಾಸಿಗರ ಸಂಖ್ಯೆ ಭಾರೀ ಹೆಚ್ಚಳವಾಗುತ್ತದೆ. ಇಲ್ಲಿನ ಎಲ್ಲ ರೆಸಾರ್ಟ್, ರೆಸ್ಟೋರೆಂಟ್, ಹೋಟೆಲ್, ಲಾಡ್ಜ್​ಗಳೂ ಪೂರ್ತಿ ಬುಕ್ ಆಗುತ್ತವೆ. ಹೀಗಾಗಿ, ಕೆಲವು ನಿಯಮಗಳನ್ನು ಜಾರಿಗೊಳಿಸಲಾಗಿದೆ.

ಈ ವೀಕೆಂಡ್​ನಲ್ಲಿ ಗೋವಾದಲ್ಲಿ ನೈಟ್ ಕರ್ಫ್ಯೂ ಜಾರಿಗೊಳಿಸಲು ನಿರ್ಧರಿಸಲಾಗಿದ್ದು, ಇದರಿಂದ ಹೊಸ ವರ್ಷದ ಹಿಂದಿನ ರಾತ್ರಿ ಪಾರ್ಟಿ ಮಾಡುವವರಿಗೆ ನಿರಾಸೆಯಾಗಲಿದೆ. ಗೋವಾಗೆ ಬರುವವರು ಕೊವಿಡ್ ನೆಗೆಟಿವ್ ರಿಪೋರ್ಟ್​ ತೋರಿಸಬೇಕು ಅಥವಾ ಎರಡೂ ಡೋಸ್​ ವ್ಯಾಕ್ಸಿನ್ ಆದ ಸರ್ಟಿಫಿಕೆಟ್ ನೀಡಬೇಕು ಎಂದು ಗೋವಾ ಸರ್ಕಾರ ಆದೇಶಿಸಿದೆ.

ಇದನ್ನೂ ಓದಿ: ಹೊಸ ವರ್ಷಕ್ಕೆ ಸಮಂತಾ ಗೋವಾ ಟ್ರಿಪ್

ಹೊಸ ವರ್ಷಾಚರಣೆಗೆ ಮಾರ್ಗಸೂಚಿ ಪ್ರಕಟ; ಈ ಬಾರಿ ಎಂಜಿ ರೋಡ್, ಬ್ರಿಗೇಡ್ ರೋಡ್​ನಲ್ಲಿ ಹೇಗಿರಲಿದೆ ಸೆಲೆಬ್ರೆಷನ್

Published On - 3:32 pm, Wed, 29 December 21