ನುಂಗುವ ಔಷಧದ ರೂಪದಲ್ಲಿ ರೆಮ್​ಡೆಸಿವಿರ್​: ಔಷಧ ನಿಯಂತ್ರಕರ ಅನುಮತಿಗೆ ಅರ್ಜಿ

ದೆಹಲಿ: ಜುಬಿಲಿಯಿಂಟ್ ಫಾರ್ಮೊವಾ ಲಿಮಿಟೆಡ್​ನ ಅಂಗಸಂಸ್ಥೆಯಾದ ಜುಬಿಲಿಯಂಟ್ ಫಾರ್ಮಾ ಲಿಮಿಟೆಡ್ ಕಂಪನಿಯು ನುಂಗುವ ರೂಪದ (ಓರಲ್) ರೆಮ್​ಡೆಸಿವಿರ್ ಔಷಧವನ್ನು ಅಭಿವೃದ್ಧಿಪಡಿಸಿದೆ. ಈಗಾಗಲೇ ಪ್ರಾಥಮಿಕ ಹಂತದ ಸುರಕ್ಷಾ ಪ್ರಯೋಗಗಳು ಸಂಪೂರ್ಣಗೊಂಡಿದ್ದು, ಭಾರತ ಔಷಧ ಮಹಾ ನಿಯಂತ್ರಕರ ಬಳಿ (Drug Controller General of India – DCGI) ಉನ್ನತ ಹಂತದ ಪ್ರಯೋಗಗಳಿಗೆ ಅನುಮತಿ ಕೋರಿ ಸಂಸ್ಥೆಯು ಅರ್ಜಿ ಸಲ್ಲಿಸಿದೆ.

ಇಂಜೆಕ್ಷನ್​ಗೆ ಹೋಲಿಸಿದರೆ ಬಾಯಿಯ ಮೂಲಕ ತೆಗೆದುಕೊಳ್ಳುವ ಔಷಧದ ದರವೂ ಕಡಿಮೆ, ರೋಗಿಗಳಿಗೆ ನೀಡಲೂ ಸುಲಭ. ಕೋವಿಡ್​-19 ರೋಗಿಗಳನ್ನು ಉಪಚರಿಸಲು ಇದು ಉತ್ತಮ ಆಯ್ಕೆ ಆಗಬಹುದು. ನುಂಗುವ ರೂಪದ ಈ ಔಷಧವನ್ನು ಐದು ದಿನ ಕೊಡಬೇಕಾಗಬಹುದು. ಅಮೆರಿಕದ ಎಫ್​ಡಿಎ (Food and Drug Administration – FDA) ಸಂಪೂರ್ಣ ಅನುಮೋದನೆ ನೀಡಿರುವ ಮೊದಲ ಮತ್ತು ಏಕೈಕ ಔಷಧ ರೆಮ್​ಡೆಸಿವಿರ್.

ರೆಮ್​ಡಿಸಿವಿರ್​ನ ಈ ಹೊಸ ರೂಪಕ್ಕೆ ಅನುಮೋದನೆ ದೊರೆತರೆ ಇಂಜೆಕ್ಷನ್​ ಪೂರೈಕೆಗಾಗಿ ಫಾರ್ಮಾ ಕಂಪನಿಗಳ ಮೇಲಿರುವ ಒತ್ತಡವೂ ತುಸು ಕಡಿಮೆಯಾಗುತ್ತದೆ. ಕೋವಿಡ್-19 ರೋಗಿಗಳಿಗೆ ಔಷಧ ಸಿಗುವುದರಲ್ಲಿ ಇರುವ ತೊಂದರೆಯೂ ತಪ್ಪುತ್ತದೆ. ಈ ಔಷಧಕ್ಕೆ ಸಂಬಂಧಿಸಿದಂತೆ ಪ್ರಿಕ್ಲಿನಿಕಲ್ ಮತ್ತು ಸ್ವಯಂಸೇವಕರ ಮೇಲೆ ನಡೆಸಿದ ಅಧ್ಯಯನಗಳು ಪರಿಣಾಮಕಾರಿಯಾಗಿವೆ. ಇಂಜೆಕ್ಷನ್ ರೂಪಕ್ಕೆ ಹೋಲಿಸಿದರೆ ನುಂಗುವ ರೂಪದ ರೆಮ್​ಡೆಸಿವಿರ್​ನ ಅಡ್ಡಪರಿಣಾಮಗಳು ಕಡಿಮೆ ಎಂದು ಕಂಪನಿ ಹೇಳಿಕೊಂಡಿದೆ.

ಕಳೆದ ಮೇ 2020ರಲ್ಲಿ ಜ್ಯುಬಿಲಿಯಂಟ್​ ಕಂಪನಿಯು ರೆಮ್​ಡೆಸಿವಿರ್​ ಅಭಿವೃದ್ಧಿಪಡಿಸಿದ ಮಾತೃಸಂಸ್ಥೆ ಗಿಲಿಯಾಡ್ ಸೈನ್ಸಸ್​ ಜೊತೆಗೆ ಒಪ್ಪಂದ ಮಾಡಿಕೊಂಡಿತ್ತು. 127 ದೇಶಗಳಲ್ಲಿ ರೆಮ್​ಡೆಸಿವಿರ್ ಔಷಧವನ್ನು ಉತ್ಪಾದಿಸುವ, ಮಾರುವ ಮತ್ತು ನೋಂದಣಿ ಮಾಡುವ ಹಕ್ಕನ್ನೂ ಪಡೆದುಕೊಂಡಿತ್ತು. ಜುಲೈ 20, 2020ರಲ್ಲಿ ಜುಬಿಲಿಯಂಟ್ ಕಂಪನಿಗೆ ರೆಮ್​ಡೆಸಿವಿರ್ 100 ಎಂಜಿ ಮಾತ್ರೆ / ಇಂಜೆಕ್ಷನ್ ಬಾಟಲಿ ಮಾರಾಟಕ್ಕೆ ತುರ್ತು ಅನುಮತಿ ಸಿಕ್ಕಿತ್ತು.

‘ದೇಶದಲ್ಲಿ ಕೊರೊನಾ ಸೋಂಕು ಹೆಚ್ಚಾಗುತ್ತಿರುವ ಹೊತ್ತಿನಲ್ಲಿ ಒಂದು ಹೊಸ ಸುದ್ದಿ ಹಂಚಿಕೊಳ್ಳುತ್ತಿದ್ದೇವೆ. ನಮ್ಮ ಪ್ರಸ್ತಾವಕ್ಕೆ ಅನುಮತಿ ಸಿಕ್ಕರೆ ಕೊರೊನಾ ಸೋಂಕಿಗೆ ಚಿಕಿತ್ಸೆ ನೀಡುವ ಸುಲಭ ಮತ್ತು ಪರಿಣಾಮಕಾರಿ ಮಾರ್ಗವನ್ನು ಪರಿಚಯಿಸುವುದಷ್ಟೇ ಅಲ್ಲ, ಕೋವಿಡ್-19 ಚಿಕಿತ್ಸೆಗೆ ನಮ್ಮಿಂದಾದ ರೀತಿಯಲ್ಲಿ ಸಹಕರಿಸುತ್ತೇವೆ,’ ಎಂದು ಜುಬಿಲಿಯಂಟ್ ಫಾರ್ಮೊವಾ ಕಂಪನಿಯ ಅಧ್ಯಕ್ಷ ಶ್ಯಾಮ್ ಎಸ್.ಭಾರತೀಯ ತಿಳಿಸಿದ್ದಾರೆ.

ದೇಶದಲ್ಲಿ ಕೋವಿಡ್-19 ಪ್ರಕರಣಗಳು ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ರೆಮ್​ಡೆಸಿವಿರ್​ ಕೊರತೆ ಎಲ್ಲೆಲ್ಲೂ ಕಾಣಿಸುತ್ತಿದೆ. ಆ್ಯಂಟಿ ವೈರಲ್ ಔಷಧದ ಉತ್ಪಾದನೆ ಹೆಚ್ಚಿಸಲು ಕೇಂದ್ರ ಸರ್ಕಾರವು ಹಲವು ಕ್ರಮಗಳನ್ನು ತೆಗೆದುಕೊಂಡಿದೆ. ಔಷಧದ ಕೊರತೆ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರವು ಜುಬಿಲಿಯಂಟ್ ಕಂಪನಿಗೆ ಹೊರ ರೂಪದ ರೆಮ್​ಡೆಸಿವಿರ್ ಉತ್ಪಾದನೆಗೆ ತುರ್ತು ಅನುಮತಿ ನೀಡುವ ಸಾಧ್ಯತೆಗಳು ನಿಚ್ಚಳವಾಗಿವೆ.

(Remdesivir to come in oral formulation drug regulators nod awaited says Jubilant Pharma)

ಇದನ್ನೂ ಓದಿ: ರೆಮ್​ಡೆಸಿವಿರ್ ಚುಚ್ಚುಮದ್ದಿನ ಉತ್ಪಾದನೆ ಹೆಚ್ಚಳ; ಬೆಲೆ ಇಳಿಕೆಗೆ ಅನುಮತಿ ನೀಡಿದ ಕೇಂದ್ರ ಸರ್ಕಾರ

ಇದನ್ನೂ ಓದಿ: ರೆಮ್​ಡೆಸಿವರ್​​ಗೆ ಪರ್ಯಾಯ ದೇಸಿ ಆಯುಧ್​ ಅಡ್ವಾನ್ಸ್​! ಔಷಧಿ ಪಡೆದ ವಾರದೊಳಗೆ ಸೋಂಕಿತರು ಗುಣಮುಖ ಎಂದ ಅಧ್ಯಯನ

Published On - 4:56 pm, Mon, 19 April 21