‘ನಿನ್ನನ್ನೂ ಕೊಂದುಬಿಡುತ್ತಾರೆ!’; ಪ್ರಧಾನಿಯಾಗದಂತೆ ರಾಜೀವ್ ಗಾಂಧಿ ಬಳಿ ಬೇಡಿಕೊಂಡಿದ್ದ ಸೋನಿಯಾ ಗಾಂಧಿ

ನವದೆಹಲಿ, ನವೆಂಬರ್ 7: ಕಾಂಗ್ರೆಸ್ ನಾಯಕಿ ಸೋನಿಯಾ ಗಾಂಧಿಯವರ ಆತ್ಮಕತೆ ಬಿಲಾಂಗಿಂಗ್ ಬಿಡುಗಡೆಗೂ ಮುನ್ನವೇ ಭಾರೀ ಸದ್ದು ಮಾಡುತ್ತಿದೆ. ಸೋನಿಯಾ ಗಾಂಧಿಯವರ ಪುಸ್ತಕದ ಆಯ್ದ ಭಾಗಗಳು ಮತ್ತು ಸಂದರ್ಶನಗಳು ಪತ್ರಿಕೆಗಳಲ್ಲಿ ಪ್ರಕಟವಾಗುತ್ತಿರುವುದರಿಂದ ಆ ಬಗ್ಗೆ ಈಗಾಗಲೇ ಬಿಜೆಪಿ ಟೀಕಾಪ್ರಹಾರ ನಡೆಸಲಾರಂಭಿಸಿದೆ. ಆದರೆ, ಈ ಪುಸ್ತಕದಲ್ಲಿ ರಾಜಕೀಯದ ಹೊರತಾಗಿ ಸೋನಿಯಾ ಗಾಂಧಿ ತಮ್ಮ ಕುಟುಂಬದ ಅನೇಕ ವೈಯಕ್ತಿಕ ಸಂಗತಿಗಳನ್ನು ಕೂಡ ಹಂಚಿಕೊಂಡಿದ್ದಾರೆ. 1984ರ ಅಕ್ಟೋಬರ್ 31ರಂದು ಭಾರತದ ಮಾಜಿ ಪ್ರಧಾನಿ ಇಂದಿರಾ ಗಾಂಧಿ ತಮ್ಮ ಅಂಗರಕ್ಷಕರಿಂದಲೇ ಹತ್ಯೆಯಾದರು. ಈ ಘಟನೆಯ ಬಳಿಕ ತಮ್ಮ ಪತಿ ರಾಜೀವ್ ಗಾಂಧಿ ಅವರು ಪ್ರಧಾನಮಂತ್ರಿ ಹುದ್ದೆಯನ್ನು ವಹಿಸಿಕೊಳ್ಳದಂತೆ ಕೈಮುಗಿದು ಬೇಡಿಕೊಂಡಿದ್ದಾಗಿ ಕಾಂಗ್ರೆಸ್ ನಾಯಕಿ ಸೋನಿಯಾ ಗಾಂಧಿ ನೆನಪಿಸಿಕೊಂಡಿದ್ದಾರೆ.

‘ದಿ ಗಾರ್ಡಿಯನ್’ ಪತ್ರಿಕೆಯಲ್ಲಿ ಪ್ರಕಟವಾಗಿರುವ ಸೋನಿಯಾ ಗಾಂಧಿಯವರ ಆತ್ಮಕತೆಯ ಸಂಪಾದಿತ ಭಾಗದಲ್ಲಿ, ದೆಹಲಿಯ ಸಫ್ದರ್ ಜಂಗ್ ರಸ್ತೆಯ ನಿವಾಸದಲ್ಲಿ ಇಂದಿರಾ ಗಾಂಧಿಯವರ ಮೇಲೆ ಅವರ ಭದ್ರತಾ ಸಿಬ್ಬಂದಿಯೇ ಗುಂಡಿಕ್ಕಿ ಕೊಂದ ನಂತರದ ಅತ್ಯಂತ ಭಾವುಕ ಕ್ಷಣಗಳನ್ನು ಸೋನಿಯಾ ಗಾಂಧಿ ಹಂಚಿಕೊಂಡಿದ್ದಾರೆ.

ಇದನ್ನೂ ಓದಿ: ದೀಪಾವಳಿ ಖರೀದಿ ಸಮಯದಲ್ಲೇ ಕಾಂಗ್ರೆಸ್ ಪ್ರತಿಭಟನಾ ಮೆರವಣಿಗೆ: ವ್ಯಾಪಾರಿಗಳಿಗೆ ನಷ್ಟದ ಆತಂಕ, ಸೋನಿಯಾ ಗಾಂಧಿಗೆ ಪತ್ರ

ದೆಹಲಿಗೆ ಧಾವಿಸಿದ ರಾಜೀವ್ ಗಾಂಧಿ:

ಇಂದಿರಾ ಗಾಂಧಿ ಅವರ ಮೇಲೆ ದಾಳಿಯಾದಾಗ ರಾಜೀವ್ ಗಾಂಧಿ ಪಶ್ಚಿಮ ಬಂಗಾಳದಲ್ಲಿ ರಾಜಕೀಯ ರ‍್ಯಾಲಿಯಲ್ಲಿ ಭಾಗವಹಿಸಲು ತೆರಳಿದ್ದರು. ದೆಹಲಿಯಲ್ಲಿ ತನ್ನ ತಾಯಿಯ ಮೇಲೆ ಹಲ್ಲೆ ನಡೆದಿದೆ ಎಂಬ ಮಾಹಿತಿ ತಿಳಿದ ತಕ್ಷಣ ಅವರು ಮಧ್ಯಾಹ್ನ ಸುಮಾರು 3.30ರ ಸುಮಾರಿಗೆ ದೆಹಲಿಗೆ ಆಗಮಿಸಿ ನೇರವಾಗಿ ಆಸ್ಪತ್ರೆಗೆ ಧಾವಿಸಿದರು. ಆ ವೇಳಗಾಗಲೇ ಆಸ್ಪತ್ರೆಯಲ್ಲೇ ಇದ್ದ ಸೋನಿಯಾ ಗಾಂಧಿ ಆಸ್ಪತ್ರೆಯಲ್ಲಿ ತಮ್ಮ ಪತಿಯೊಂದಿಗೆ ಸ್ವಲ್ಪ ಹೊತ್ತು ಒಂಟಿಯಾಗಿ ಇರಲು ಬಯಸಿದ್ದರು. ತನ್ನ ಭಯವನ್ನು ಗಂಡನ ಬಳಿ ಹೇಳಿಕೊಳ್ಳಬೇಕು ಎನ್ನುವಷ್ಟರಲ್ಲಿ ಅವರನ್ನು ಅಪ್ಪಿಕೊಂಡ ರಾಜೀವ್ ಗಾಂಧಿ, ‘ನನ್ನನ್ನು ಪ್ರಧಾನಿಯಾಗಿ ಪ್ರಮಾಣವಚನ ಸ್ವೀಕರಿಸುವಂತೆ ಕೋರಿದ್ದಾರೆ’ ಎಂದು ಹೇಳಿದರು.

“ಆಸ್ಪತ್ರೆಯಲ್ಲಿ ರಾಜೀವ್ ಗಾಂಧಿ ಹೇಳಿದ ಮಾತು ನನ್ನ ಮನಸ್ಸಿನಲ್ಲಿ ಆತಂಕ ಮೂಡಿಸಿತು. ಅವರು ನಿನ್ನನ್ನೂ ಕೊಲ್ಲುತ್ತಾರೆ, ನಮಗೆ ಇದೆಲ್ಲ ಬೇಡ” ಎಂದು ಪ್ರಧಾನಿಯಾಗುವ ಆಫರ್ ಒಪ್ಪಿಕೊಳ್ಳದಂತೆ ಅಳುತ್ತಾ ಕೈ ಮುಗಿದು ಮನವಿ ಮಾಡಿದ್ದಾಗಿ ಸೋನಿಯಾ ಗಾಂಧಿ ಹೇಳಿಕೊಂಡಿದ್ದಾರೆ.

ಇದನ್ನೂ ಓದಿ: ಗೋಧಿ ಮೀಡಿಯಾಗೆ ಉದಾಹರಣೆ; ಸೋನಿಯಾ ಗಾಂಧಿ ಸಂದರ್ಶನಕ್ಕೆ ಬಿಜೆಪಿ ತಿರುಗೇಟು

ರಾಜೀವ್ ಗಾಂಧಿ ಪ್ರಧಾನಿ ಹುದ್ದೆ ವಹಿಸಿಕೊಳ್ಳಲಿದ್ದಾರೆ ಎಂಬ ಸತ್ಯ ತಿಳಿದಾಗ ನನ್ನ ಹೃದಯಕ್ಕೆ ಬಲವಾದ ಪೆಟ್ಟು ಬಿದ್ದಂತಾಯಿತು ಎಂದಿರುವ ಸೋನಿಯಾ ಗಾಂಧಿ, “ನನ್ನ ಎದೆಗೆ ಯಾರೋ ಚಾಕುವಿನಿಂದ ಇರಿದಂತಾಯಿತು. ನನ್ನ ಎದೆಬಡಿತ ತೀವ್ರಗೊಂಡು ಒಳಗಿನಿಂದ ಆಕ್ರೋಶ ಉಕ್ಕಿಬಂತು. ಅದನ್ನು ತಡೆದುಕೊಳ್ಳಲು ನಾನು ಹೆಣಗಾಡಿದೆ” ಎಂದು ನೆನಪಿಸಿಕೊಂಡಿದ್ದಾರೆ.

ಕೈಮುಗಿದು ಬೇಡಿಕೊಂಡ ಸೋನಿಯಾ:

ರಾಜೀವ್ ಅವರಿಗೆ ಪ್ರಧಾನಮಂತ್ರಿಯ ಜವಾಬ್ದಾರಿಯನ್ನು ಏಕೆ ನೀಡಲಾಗುತ್ತಿದೆ? ಎಂದು ಪ್ರಶ್ನಿಸಿದ ಅವರು, ಆ ಹುದ್ದೆಯನ್ನು ತಿರಸ್ಕರಿಸುವಂತೆ ಕೈಮುಗಿದು ಅತ್ತಿದ್ದರು. “ಇಲ್ಲ, ಇಲ್ಲ, ನೀನು ಪ್ರಧಾನಿಯಾಗುವ ಬಗ್ಗೆ ಯೋಚಿಸಲೂಬಾರದು. ಅವರ ಬಳಿ ಆಗೋದಿಲ್ಲ ಎಂದು ಹೇಳು. ಮಕ್ಕಳಿಗಾಗಿ, ನನಗಾಗಿ, ನಿನಗಾಗಿ ಈ ಒಂದು ನಿರ್ಧಾರ ತೆಗೆದುಕೊಳ್ಳಬೇಡ. ಅವರು ನಿನ್ನನ್ನೂ ಕೊಂದುಹಾಕುತ್ತಾರೆ, ನಿನ್ನನ್ನೂ ಬಿಡುವುದಿಲ್ಲ!” ಎಂದು ಬೇಡಿಕೊಂಡಿದ್ದಾಗಿ ಸೋನಿಯಾ ಗಾಂಧಿ ತಿಳಿಸಿದ್ದಾರೆ.

ಆದರೆ, ಸೋನಿಯಾ ಅವರ ಮನವಿಗೆ ಉತ್ತರಿಸಿದ್ದ ರಾಜೀವ್ ಗಾಂಧಿ, “ನಾನು ಪ್ರಧಾನಿಯಾದರೂ, ಆಗದೇ ಇದ್ದರೂ ಅವರು ಕೊಲ್ಲಬೇಕೆಂದುಕೊಂಡರೆ ನನ್ನನ್ನು ಕೊಂದೇ ಕೊಲ್ಲುತ್ತಾರೆ” ಎಂದು ಹೇಳಿದ್ದರು. ಆ ಮಾತು ಕೇಳಿ ನಾನು ಇನ್ನಷ್ಟು ಕಂಗಾಲಾಗಿದ್ದೆ ಎಂದು ಸೋನಿಯಾ ಗಾಂಧಿ ಹಳೆಯ ದಿನಗಳನ್ನು ಮೆಲುಕು ಹಾಕಿದ್ದಾರೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ