ಬದರಿನಾಥ ಧಾಮದಲ್ಲಿ ಪೂಜೆ ಸಲ್ಲಿಸಿದ ಸಿಎಂ ಪುಷ್ಕರ್ ಸಿಂಗ್ ಧಾಮಿ

ಬದರಿನಾಥ್, ಸೆಪ್ಟೆಂಬರ್ 20: ಉತ್ತರಾಖಂಡದ ಮುಖ್ಯಮಂತ್ರಿ ಪುಷ್ಕರ್ ಸಿಂಗ್ ಧಾಮಿ ಇಂದು ಬದರಿನಾಥ ಧಾಮಕ್ಕೆ ಭೇಟಿ ನೀಡಿ ವಿಶೇಷ ಪೂಜೆ ಹಾಗೂ ಪ್ರಾರ್ಥನೆ ಸಲ್ಲಿಸಿದರು. ಈ ವೇಳೆ ಅವರು ರಾಜ್ಯದ ಅಭಿವೃದ್ಧಿ, ಶ್ರೇಯಸ್ಸು ಹಾಗೂ ನಿವಾಸಿಗಳ ಕ್ಷೇಮಾಭ್ಯುದಯಕ್ಕಾಗಿ ಭಗವಂತನಲ್ಲಿ ಆಶೀರ್ವಾದ ಬೇಡಿದರು. ಮುಂದುವರಿಯುತ್ತಿರುವ ಚಾರ್ ಧಾಮ್ ಯಾತ್ರೆಯ ಕುರಿತು ಮಾತನಾಡಿದ ಸಿಎಂ ಪುಷ್ಕರ್ ಸಿಂಗ್ ಧಾಮಿ, ಮಳೆಗಾಲಕ್ಕೂ ಮುನ್ನ ನಡೆದ ಯಾತ್ರೆಯ ಮೊದಲ ಹಂತವು ಸುಮಾರು 51 ಲಕ್ಷಕ್ಕೂ ಹೆಚ್ಚು ಭಕ್ತಾದಿಗಳ ಆಗಮನದೊಂದಿಗೆ ಐತಿಹಾಸಿಕ ಹೊಸ ದಾಖಲೆಯನ್ನು ನಿರ್ಮಿಸಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

“ಬಾಬಾ ಕೇದಾರನಾಥ್ ಮತ್ತು ನಮ್ಮ ಎಲ್ಲಾ ಪವಿತ್ರ ಧಾಮಗಳ ಕೃಪೆಯಿಂದ, ಯಾತ್ರೆಯ ಮೊದಲ ಹಂತವು ಹೊಸ ದಾಖಲೆಯನ್ನು ಬರೆದಿದೆ. ಬರೋಬ್ಬರಿ 51 ಲಕ್ಷಕ್ಕೂ ಹೆಚ್ಚು ಭಕ್ತರು ಮತ್ತು ಯಾತ್ರಾರ್ಥಿಗಳು ಈಗಾಗಲೇ ಪುಣ್ಯಕ್ಷೇತ್ರಗಳ ದರ್ಶನ ಪಡೆದು ಪ್ರಾರ್ಥನೆ ಸಲ್ಲಿಸಿದ್ದಾರೆ. ಮಳೆಗಾಲದ ನಂತರ ಈಗ ಯಾತ್ರೆಯ ಎರಡನೇ ಹಂತವು ಸುಗಮವಾಗಿ ನಡೆಯುತ್ತಿದೆ” ಎಂದು ಮುಖ್ಯಮಂತ್ರಿ ಪುಷ್ಕರ್ ಸಿಂಗ್ ಧಾಮಿ ಹೇಳಿದರು.

ಇದನ್ನೂ ಓದಿ: ಬದರಿನಾಥ, ಕೇದಾರನಾಥ ದೇವಾಲಯಗಳ ಬಳಿ ಮೊಬೈಲ್ ಬಳಕೆ ನಿಷೇಧ; ಚಾರ್ ಧಾಮ್ ಯಾತ್ರೆ ವೇಳೆ ರೀಲ್ಸ್​ ಮಾಡುವಂತಿಲ್ಲ

ಎರಡನೇ ಹಂತದ ಯಾತ್ರೆಗೆ ವಿಸ್ತೃತ ಸಿದ್ಧತೆ:

ಮಳೆಗಾಲ ಮುಗಿದು ಆರಂಭವಾಗಿರುವ ಎರಡನೇ ಹಂತದಲ್ಲಿ ಆಗಮಿಸುವ ಭಕ್ತಾದಿಗಳಿಗೆ ಸುಲಭ ದರ್ಶನ, ಮಾರ್ಗಗಳ ದುರಸ್ತಿ ಹಾಗೂ ಸಂಚಾರ ನಿರ್ವಹಣೆಯನ್ನು ಸುಸಜ್ಜಿತಗೊಳಿಸಲು ಆಡಳಿತ ಮಂಡಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಲಾಗಿದೆ. ಬದರಿನಾಥ ಧಾಮದ ಮೂಲಸೌಕರ್ಯಗಳನ್ನು ಮೇಲ್ದರ್ಜೆಗೇರಿಸುವ ‘ಮಾಸ್ಟರ್ ಪ್ಲಾನ್’ ಕಾಮಗಾರಿಯನ್ನು ಸಿಎಂ ಪರಿಶೀಲಿಸಿದರು. ಹಿಮಾಲಯನ್ ವಾತಾವರಣದ ಸವಾಲುಗಳ ನಡುವೆಯೂ ಈ ಯೋಜನೆಯನ್ನು ಆದಷ್ಟು ಬೇಗ ಪೂರ್ಣಗೊಳಿಸಲು ಶ್ರಮಿಸಲಾಗುತ್ತಿದೆ ಎಂದು ಅವರು ಹೇಳಿದರು.

ಇದನ್ನೂ ಓದಿ: ಬದರಿನಾಥದಲ್ಲೂ ದೇಣಿಗೆ ಹಗರಣ, ಸಿಸಿಟಿವಿಯಲ್ಲಿ ಕಳ್ಳರ ಕೈಚಳಕ ಬಯಲು

ಚಾರ್ ಧಾಮ್ ಯಾತ್ರೆಯ ಧಾರ್ಮಿಕ ಮಹತ್ವ:

ಉತ್ತರಾಖಂಡದ ಪವಿತ್ರ ಚಾರ್ ಧಾಮ್ ಯಾತ್ರೆಯು ಹಿಂದೂ ಧರ್ಮದ ಪ್ರಮುಖ ಧಾರ್ಮಿಕ ಯಾತ್ರೆಗಳಲ್ಲಿ ಒಂದಾಗಿದ್ದು, ಗಡ್ವಾಲ್ ಹಿಮಾಲಯ ಭಾಗದಲ್ಲಿ ಹರಿಯುವ ಅಲಕನಂದಾ ನದಿಯ ದಂಡೆಯ ಮೇಲಿರುವ 4 ಪುಣ್ಯಕ್ಷೇತ್ರಗಳನ್ನು ಒಳಗೊಂಡಿದೆ. ಅವುಗಳೆಂದರೆ,

ಬದರಿನಾಥ ಧಾಮ: ಭಗವಾನ್ ವಿಷ್ಣುವಿನ ಪವಿತ್ರ ಕ್ಷೇತ್ರ

ಕೇದಾರನಾಥ ಧಾಮ: ಭಗವಾನ್ ಶಿವನ ಮಹತ್ವದ ಜ್ಯೋತಿರ್ಲಿಂಗ ಕ್ಷೇತ್ರ

ಗಂಗೋತ್ರಿ ಧಾಮ: ಗಂಗಾ ದೇವಿಗೆ ಅರ್ಪಿತವಾದ ಕ್ಷೇತ್ರ

ಯಮುನೋತ್ರಿ ಧಾಮ: ಯಮುನಾ ದೇವಿಗೆ ಅರ್ಪಿತವಾದ ಕ್ಷೇತ್ರ

ಪ್ರತಿ ವರ್ಷ ವಾರ್ಷಿಕ ಯಾತ್ರೆಯ ಅವಧಿಯಲ್ಲಿ ದೇಶ-ವಿದೇಶಗಳಿಂದ ಲಕ್ಷಾಂತರ ಭಕ್ತರು ಅಲಕನಂದಾ ನದಿಯ ತೀರದಲ್ಲಿರುವ ಈ ಪವಿತ್ರ ಧಾಮಕ್ಕೆ ಆಗಮಿಸುತ್ತಾರೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ