ಅಪ್ರೆಂಟಿಸ್​ಶಿಪ್ ಬದಲು ಗಿಗ್ ಕೆಲಸಕ್ಕೆ ಆದ್ಯತೆ ಕೊಡುವ ಯುವಜನರು; ನೈಜ ಉದ್ಯೋಗ ಪರಿಸ್ಥಿತಿ ಬಗ್ಗೆ ಚಿಂತಿಸಬೇಕಾದ ಸಂಗತಿ

ಆಗಷ್ಟೇ ಕಾಲೇಜು ಮುಗಿಸಿ, ಕೈಯಲ್ಲಿ ಒಂದು ಸರ್ಟಿಫಿಕೇಟ್, ಒಂದು ಬಯೋಡಾಟಾ (résumé) ಹಿಡಿದು ಮುಂದೇನು ಮಾಡಬೇಕು ಎಂದು ಗೊತ್ತಿಲ್ಲದೇ ಉಳಿದ ಯುವ ಪದವೀಧರರೊಬ್ಬರನ್ನು ಊಹಿಸಿಕೊಳ್ಳಿ. ತಾನು ಓದಿರುವುದಕ್ಕೆ ಸಂಬಂಧಿಸಿದ ಕೆಲಸವೊಂದು ಸಿಗುತ್ತದೆ ಎನ್ನುವ ನಿರೀಕ್ಷೆಯಲ್ಲೇ ಇವರು ಡೆಲಿವರಿ ಪಾರ್ಟ್ನರ್ ಕೆಲಸ ಮಾಡುತ್ತಾ ದಿನದೂಡುತ್ತಾ ಇರುತ್ತಾರೆ.

ಶಿಕ್ಷಣವನ್ನು ಮುಗಿಸುವುದಕ್ಕೂ ಮತ್ತು ನೈಜವಾದ ಉದ್ಯೋಗ ಪಡೆಯುವುದಕ್ಕೂ ಒಂದು ಅಂತರ ಇದೆ. ಯುವ ವ್ಯಕ್ತಿಯ ಜೀವನದ ಪ್ರಮುಖ ಘಟ್ಟಗಳಲ್ಲಿ ಇದೂ ಒಂದು. ಪ್ರತೀ ವರ್ಷ ಲಕ್ಷಾಂತರ ಯುವಕರು ಈ ಘಟ್ಟ ಮುಟ್ಟಿ ಹಾದು ಹೋಗುತ್ತಾರೆ. ಅದರೂ ಕೂಡ ಈ ಅಂತರದ ಬಗ್ಗೆ ಚರ್ಚೆಯಾಗುವುದು ಕಡಿಮೆ.

ಅನೇಕ ದೇಶಗಳಲ್ಲಿ, ಈ ಅಂತರಕ್ಕೆ ಒಂದು ಔಪಚಾರಿಕ ರಚನೆ ನೀಡಲಾಗುತ್ತದೆ. ಜರ್ಮನಿಯಲ್ಲಿ ಇದಕ್ಕಾಗಿ ಒಂದು ವ್ಯವಸ್ಥೆ ರೂಪಿಸಿದೆ. ಅದು ಡುಯಲ್ ಅಪ್ರೆಂಟಿಸ್​ಶಿಪ್ ಮಾಡಲ್. ಜರ್ಮನಿಯ ಯುವಜನರು ತಮ್ಮ ಕ್ಲಾಸ್​ರೂಮ್ ಜೊತೆಗೆ ಕೆಲಸಕ್ಕೂ ಸಮಯ ನೀಡುತ್ತಾರೆ. ಓದಿನ ಜೊತೆಗೆ ತರಬೇತಿ, ಜೊತೆಗೆ ಸಂಬಳವೂ ಸಿಗುತ್ತದೆ. ಇತ್ತೀಚಿನ ದಾಖಲೆಗಳ ಪ್ರಕಾರ ಸುಮಾರು 83 ಮಿಲಿಯನ್ ಜನಸಂಖ್ಯೆ ಹೊಂದಿರುವ ಜರ್ಮನಿಯಲ್ಲಿ ಸುಮಾರು 1.3 ಮಿಲಿಯನ್ ಜನರು ಅಪ್ರೆಂಟಿಸ್‌ಗಳಾಗಿ ದಾಖಲಾಗಿದ್ದಾರೆ. ಅಂದರೆ ಇಡೀ ಜನಸಂಖ್ಯೆಯ ಸುಮಾರು ಒಂದೂವರೆ ಪ್ರತಿಶತದಷ್ಟು ಜನರು ಅಪ್ರೆಂಟಿಸ್‌ಗಳಾಗಿದ್ದಾರೆ.

ಭಾರತದಲ್ಲೂ ಇದೇ ಕಲ್ಪನೆಯಲ್ಲಿ ‘ರಾಷ್ಟ್ರೀಯ ಅಪ್ರೆಂಟಿಸ್‌ಶಿಪ್ ಉತ್ತೇಜಕ ಯೋಜನೆ’ (National Apprenticeship Promotion Scheme) ಹೊಂದಿದೆ. ಆದರೆ ಅಂಕಿಅಂಶಗಳು ಸಂಪೂರ್ಣವಾಗಿ ಭಿನ್ನವಾದ ಕಥೆಯನ್ನು ಹೇಳುತ್ತವೆ. 2024-25 ನೇ ಹಣಕಾಸು ವರ್ಷದಲ್ಲಿ, 1.4 ಬಿಲಿಯನ್‌ಗಿಂತ ಅಧಿಕ ಜನಸಂಖ್ಯೆ ಹೊಂದಿರುವ ದೇಶದಲ್ಲಿ ಈ ಯೋಜನೆಯಡಿಯಲ್ಲಿ ಸುಮಾರು 9.85 ಲಕ್ಷ ಜನರು ಅಪ್ರೆಂಟಿಸ್‌ಗಳಾಗಿ ತೊಡಗಿಸಿಕೊಂಡಿದ್ದರು. ಭಾರತದ ಯುವ ಜನಸಂಖ್ಯೆಯನ್ನು ಗಮನಿಸಿದಾಗ, ಜರ್ಮನಿಯ ಅಪ್ರೆಂಟಿಸ್ ಸಂಖ್ಯೆಗಿಂತ ಸುಮಾರು ಇಪ್ಪತ್ತು ಪಟ್ಟು ಚಿಕ್ಕದಾಗಿದೆ.

ಇದನ್ನೂ ಓದಿ: ಮಹಿಳಾ ಕಾರ್ಮಿಕ ಶಕ್ತಿ ಏರಿಕೆ: ವೇತನವಿಲ್ಲದ ದುಡಿಮೆಯೆ, ನಿಜವಾದ ಪ್ರಗತಿಯೇ? ಇಲ್ಲಿದೆ ವಾಸ್ತವ

ಬಹುತೇಕ ಜನರನ್ನು ನಿಜಕ್ಕೂ ಆಶ್ಚರ್ಯಪಡಿಸಬೇಕಾದ ಸಂಗತಿ ಇಲ್ಲಿದೆ. ಇದು ಅವಕಾಶಗಳ ಕೊರತೆಯಿಂದಾದ ಸನ್ನಿವೇಶವಲ್ಲ. ಇತ್ತೀಚಿನ ವರದಿಗಳ ಪ್ರಕಾರ, ಭಾರತದ ಅಪ್ರೆಂಟಿಸ್ ಸ್ಕೀಮ್ ಅಡಿಯಲ್ಲೇ ಎಪ್ಪತ್ತು ಲಕ್ಷಕ್ಕೂ ಹೆಚ್ಚು ಅಪ್ರೆಂಟಿಸ್‌ಶಿಪ್ ಹುದ್ದೆಗಳು ಪ್ರಸ್ತುತ ಖಾಲಿ ಇವೆ ಮತ್ತು ಭರ್ತಿಯಾಗದೆ ಉಳಿದಿವೆ. ಸಮಸ್ಯೆ ಇರುವುದು ಹುದ್ದೆಗಳ ಕೊರತೆಯದ್ದಲ್ಲ. ಬಹಳ ಕಡಿಮೆ ಸಂಖ್ಯೆಯ ಯುವಕರು ಅವುಗಳಿಗೆ ಅರ್ಜಿ ಸಲ್ಲಿಸುತ್ತಿದ್ದಾರೆ. ಅರ್ಜಿಗಳ ಸಂಖ್ಯೆಯು 2022 ರಲ್ಲಿ 42.8 ಲಕ್ಷದಷ್ಟು ಇತ್ತು. 2025 ರಲ್ಲಿ ಅದರ ಸಂಖ್ಯೆ ಕೇವಲ 4 ಲಕ್ಷಕ್ಕೆ ಕುಸಿದಿದೆ. ಇದು ಬಹಳ ತೀವ್ರತರದ ಕುಸಿತ.

ಕಾಲೇಜು ಮತ್ತು ವೃತ್ತಿಜೀವನವನ್ನು ಬೆಸೆಯಲು ನಿರ್ದಿಷ್ಟವಾಗಿ ವಿನ್ಯಾಸಗೊಳಿಸಲಾದ ಲಕ್ಷಾಂತರ ಖಾಲಿ ಹುದ್ದೆಗಳನ್ನು ಯುವಕರು ಏಕೆ ಬಯಸುತ್ತಿಲ್ಲ?

ಉತ್ತರದ ಒಂದು ಭಾಗ ಸರಳ ಅರ್ಥಶಾಸ್ತ್ರದಲ್ಲಿದೆ. ಅಪ್ರೆಂಟಿಸ್‌ಶಿಪ್ ಸ್ಟೈಫಂಡ್‌ಗಳು ಸಾಮಾನ್ಯವಾಗಿ ತಿಂಗಳಿಗೆ ಹತ್ತು ಹದಿನೈದು ಸಾವಿರ ರೂ.ಗಳವರೆಗೆ ಇರುತ್ತವೆ. ಇದಕ್ಕೆ ಹೆಚ್ಚಾಗಿ ಬೇರೆ ನಗರಕ್ಕೆ ಸ್ಥಳಾಂತರಗೊಳ್ಳಬೇಕಾಗುತ್ತದೆ ಮತ್ತು ತರಬೇತಿ ಅವಧಿಯ ಕೊನೆಯಲ್ಲಿ ಯಾವುದೇ ಉದ್ಯೋಗ ಖಾತ್ರಿ ಇರುವುದಿಲ್ಲ. ಮತ್ತೊಂದೆಡೆ, ಗಿಗ್ ಕೆಲಸಗಳು — ಅಂದರೆ ಆಹಾರ ತಲುಪಿಸುವುದು, ಕ್ಯಾಬ್ ಓಡುವುದು, ಚಿಲ್ಲರೆ ಅಂಗಡಿಯಲ್ಲಿ ಕೆಲಸ ಮಾಡುವುದು — ಇವುಗಳು ಬೇಗನೆ ಹಣ ನೀಡುತ್ತವೆ. ಯಾವುದೇ ಸ್ಥಳಾಂತರದ ಅಗತ್ಯವಿರುವುದಿಲ್ಲ ಮತ್ತು ದೀರ್ಘಕಾಲದ ಬದ್ಧತೆಯನ್ನು ಬೇಡುವುದಿಲ್ಲ. ತಾವೇ ಸ್ವತಃ ಬದುಕಿಕೊಳ್ಳುವ ಅಥವಾ ಕುಟುಂಬದ ಆದಾಯಕ್ಕೆ ಸಹಾಯ ಮಾಡುವ ಯುವಕರಿಗೆ, ಅನಿಶ್ಚಿತವಾದರೂ ತಕ್ಷಣಕ್ಕೆ ಸಿಗುವ ಗಿಗ್ ಉದ್ಯೋಗವು ನಿಧಾನವಾಗಿ ಸಿಗುವ ವ್ಯವಸ್ಥಿತ ಅಪ್ರೆಂಟಿಸ್‌ಶಿಪ್‌ಗಿಂತ ಹೆಚ್ಚು ಆಕರ್ಷಕವಾಗಿ ಕಾಣುತ್ತದೆ.

ಇದು ಇಡೀ ದೇಶಕ್ಕೆ ಏನು ಅರ್ಥ ನೀಡುತ್ತದೆ ಎಂಬುದನ್ನು ಯೋಚಿಸಿ. ಗಿಗ್ ಕೆಲಸವು ಖಂಡಿತವಾಗಿಯೂ ಉಪಯುಕ್ತವಾದುದು, ನೈಜ ಆದಾಯ ಮೂಲವೂ ಆದುದಾಗಿದೆ. ಉಪಯುಕ್ತವಾಗಿದೆ, ಹೊಂದಿಕೊಳ್ಳುವಂತಿದೆ ಮತ್ತು ಅನೇಕರಿಗೆ ನಿಜವಾದ ಆದಾಯದ ಮೂಲವಾಗಿದೆ. ಆದರೆ ಇದು ಉನ್ನತ ವೇತನದ, ಹೆಚ್ಚು ಸ್ಥಿರವಾದ ವೃತ್ತಿಜೀವನಕ್ಕೆ ಕಾರಣವಾಗುವ ಪ್ರಮಾಣಿತ ಕೌಶಲ್ಯಗಳನ್ನು ನಿರ್ಮಿಸುವುದು ವಿರಳ. ಇದಕ್ಕೆ ವ್ಯತಿರಿಕ್ತವಾಗಿ, ವ್ಯವಸ್ಥಿತ ಅಪ್ರೆಂಟಿಸ್‌ಶಿಪ್ ಅನ್ನು ಈ ಅಂತರ ಮುಚ್ಚಲು ರೂಪಿಸಲಾಗಿದೆ. ತರಗತಿಯ ಕಲಿಕೆ ಮತ್ತು ನೈಜ ಕೆಲಸದ ಅನುಭವಕ್ಕೆ ಅದು ಕೊಂಡಿಯಾಗಿರುತ್ತದೆ. ಅನೌಪಚಾರಿಕ ಕೆಲಸಗಳಿಂದ ಇದು ಸಾಧ್ಯವಿಲ್ಲ.

ಇದನ್ನೂ ಓದಿ: ಭಾರತದ ಅಧಿಕೃತ ನಿರುದ್ಯೋಗ ದರಕ್ಕೂ ವಾಸ್ತವಿಕ ದರಕ್ಕೂ ಎಷ್ಟಿದೆ ಅಂತರ? ಈ ವಿಚಾರಗಳು ತಿಳಿದಿರಲಿ

ಆದ್ದರಿಂದ, ಹೆಚ್ಚಿನ ಭಾರತೀಯ ಯುವಜನರಿಗೆ ಕಾಲೇಜು ಮತ್ತು ಮೊದಲ ನೈಜ ಉದ್ಯೋಗದ ನಡುವಿನ ಅಂತರವು ಯಾವುದೇ ತರಬೇತಿಯಿಂದ ತುಂಬಲ್ಪಡುತ್ತಿಲ್ಲ. ಬೇಗ ಸಿಗುವ ಯಾವುದೇ ಕೆಲಸವನ್ನು ಇವರು ಒಪ್ಪಿಕೊಳ್ಳುತ್ತಾರೆ. ಆ ಕೆಲಸದಲ್ಲಿ ಎಲ್ಲಿಯವರೆಗೆ ಭವಿಷ್ಯ ಇದೆ ಎಂಬುದು ತಿಳಿಯುವ ಗೋಜಿಗೆ ಹೋಗುವುದಿಲ್ಲ.

ಇದ್ಯಾವುದೂ ಯುವಕರು ಕಳಪೆ ಆಯ್ಕೆಗಳನ್ನು ಮಾಡುತ್ತಿದ್ದಾರೆ ಎಂದರ್ಥವಲ್ಲ. ತಮ್ಮ ಸ್ವಂತ ನಗರದಲ್ಲಿ, ತಮ್ಮ ಜೀವನದ ಆ ಹಂತದಲ್ಲಿ ತಮಗೆ ಲಭ್ಯವಿರುವ ಆಯ್ಕೆಗಳನ್ನು ಗಮನಿಸಿ ಹೆಚ್ಚಿನವರು ಸಂಪೂರ್ಣವಾಗಿ ತಾರ್ಕಿಕ ನಿರ್ಧಾರಗಳನ್ನೇ ತೆಗೆದುಕೊಳ್ಳುತ್ತಾರೆ. ನಿಜವಾದ ಪ್ರಶ್ನೆಯೆಂದರೆ, ಲಕ್ಷಾಂತರ ಔಪಚಾರಿಕ ಹುದ್ದೆಗಳು ಖಾಲಿಯಾಗಿ ನಿಂತಿದ್ದರೂ, ಬೇರೆ ಯಾವುದನ್ನೋ ಆರಿಸಿಕೊಳ್ಳುತ್ತಿರುವ ಯುವಕರಿಗೆ ಈ ವ್ಯವಸ್ಥಿತ ಹಾದಿ ಯಾಕೆ ಆಕರ್ಷಕ ಎನಿಸುತ್ತಿಲ್ಲ?

ಮುಂದಿನ ಬಾರಿ ಮುಂದಿನ ಉದ್ಯೋಗ ಸಿಗುವವರೆಗೂ ಗಿಗ್ ಕೆಲಸ ಮಾಡುವ ಯುವಕನೊಬ್ಬನನ್ನು ನೀವು ಭೇಟಿಯಾದರೆ, ಮುಂದೇನು ಮಾಡುತ್ತೀಯಾ ಎನ್ನುವ ಬದಲು ಸ್ವಲ್ಪ ನಯವಾದ ಪ್ರಶ್ನೆ ಕೇಳಿ ನೋಡಿ. ಈ ಕೆಲಸದ ಬದಲು ವ್ಯವಸ್ಥಿತ ಹಾದಿಯನ್ನು ಆಯ್ದುಕೊಳ್ಳಲು ಏನಾಗಬೇಕಿತ್ತು ಎಂದು ಕೇಳಿ ನೋಡಿ.

(ಆಧಾರಗಳು: ರಾಷ್ಟ್ರೀಯ ಅಪ್ರೆಂಟಿಸ್‌ಶಿಪ್ ಪ್ರೋತ್ಸಾಹ ಯೋಜನೆ (NAPS), ಕೌಶಲ್ಯ ಅಭಿವೃದ್ಧಿ ಮತ್ತು ಉದ್ಯಮಶೀಲತೆ ಸಚಿವಾಲಯ, ಅರ್ಜಿ ಮತ್ತು ನಿಶ್ಚಿತಾರ್ಥದ ದತ್ತಾಂಶ, 2022–2025; ನೀತಿ ಆಯೋಗ (NITI Aayog), ಅಪ್ರೆಂಟಿಸ್‌ಶಿಪ್ ಯೋಜನೆ ಕುರಿತ ಅವಲೋಕನ; ಜರ್ಮನಿಯ ವೃತ್ತಿಪರ ಶಿಕ್ಷಣ ಮತ್ತು ತರಬೇತಿಗಾಗಿ ಫೆಡರಲ್ ಇನ್‌ಸ್ಟಿಟ್ಯೂಟ್ (BIBB), ಅಪ್ರೆಂಟಿಸ್‌ಶಿಪ್ ದಾಖಲಾತಿ ಅಂಕಿಅಂಶಗಳು.)

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ