ಆಟಗಾರರ ಕೈಸೇರದ ಕಿಟ್; ಜಪಾನ್​ಗೆ ತೆರಳದ ಟೀಂ ಇಂಡಿಯಾ

2026 ರ ಏಷ್ಯನ್ ಕ್ರೀಡಾಕೂಟಕ್ಕಾಗಿ ಭಾರತೀಯ ಕ್ರಿಕೆಟ್ ತಂಡ ಭಾನುವಾರ ಬೆಳಿಗ್ಗೆ ಜಪಾನ್‌ಗೆ ತೆರಳಬೇಕಾಗಿದೆ. ಆದರೆ ಇದೀಗ ಸಿಕ್ಕಿರುವ ಮಾಹಿತಿ ಪ್ರಕಾರ, ಟೀಂ ಇಂಡಿಯಾ, ಜಪಾನ್​ಗೆ ತೆರಳುವುದು ವಿಳಂಬವಾಗುವ ಸಾಧ್ಯತೆಗಳಿವೆ. ಅಷ್ಟಕ್ಕೂ ಟೀಂ ಇಂಡಿಯಾ ಸರಿಯಾದ ಸಮಯಕ್ಕೆ ಜಪಾನ್​ಗೆ ಪ್ರಯಾಣಿಸದಿರಲು ಕಾರಣ ಜೆರ್ಸಿಗಳಲ್ಲಿನ ಸಮಸ್ಯೆ. ತಂಡದ ಎಲ್ಲಾ ಆಟಗಾರರಿಗೆ ಇದುವರೆಗೆ ಅವರವರ ಅಳತೆಯ ಜೆರ್ಸಿ ಸಿಕ್ಕಿಲ್ಲ. ಇದರಿಂದಾಗಿ ಶ್ರೇಯಸ್ ಅಯ್ಯರ್ ನೇತೃತ್ವದ ತಂಡದ ನಿರ್ಗಮನ ವಿಳಂಬಗೊಳಿಸಬಹುದು ಎಂದು ವರದಿಯಾಗಿದೆ.

ಜೆರ್ಸಿ ಅಳತೆಯಲ್ಲಿ ಸಮಸ್ಯೆ

ಈ ಪ್ರವಾಸದಲ್ಲಿ ಟೀಂ ಇಂಡಿಯಾ ಆಟಗಾರರು ಎರಡು ವಿಭಿನ್ನ ಜೆರ್ಸಿಗಳನ್ನು ಧರಿಸಲಿದ್ದಾರೆ. ಟೀಂ ಇಂಡಿಯಾ ಸೆಪ್ಟೆಂಬರ್ 22 ರಂದು ಜಪಾನ್ ವಿರುದ್ಧ ಟಿ20 ಪಂದ್ಯವನ್ನು ಆಡಲಿದ್ದು, ಇದರಲ್ಲಿ ಆಟಗಾರರು ಬಿಸಿಸಿಐ ಜೆರ್ಸಿಯನ್ನು ಧರಿಸಲಿದ್ದಾರೆ. ಏಷ್ಯನ್ ಗೇಮ್ಸ್ ಕ್ರಿಕೆಟ್ ಪಂದ್ಯಾವಳಿ ಸೆಪ್ಟೆಂಬರ್ 28 ರಂದು ಪ್ರಾರಂಭವಾಗಲಿದ್ದು, ಇದರಲ್ಲಿ ಆಟಗಾರರು ಐಒಎ ಸೂಚಿಸಿದ ಅಧಿಕೃತ ಏಷ್ಯನ್ ಗೇಮ್ಸ್ ಕಿಟ್‌ಗಳನ್ನು ಧರಿಸುತ್ತಾರೆ. ಎರಡು ವಿಭಿನ್ನ ಕಿಟ್‌ಗಳಲ್ಲಿ ಕೆಲವು ಆಟಗಾರರ ಜೆರ್ಸಿ ಅಳತೆ ಸರಿಯಾಗಿಲ್ಲ. ಅದರಲ್ಲೂ ಕೆಲವು ಆಟಗಾರರಿಗೆ ಅವರ ಅಳತೆಯನ್ನು ಜೆರ್ಸಿಯನ್ನು ನೀಡಲಾಗಿದ್ದು, ಉಳಿದಿರುವ ಕೆಲವರಿಗೆ ಆದಷ್ಟು ಬೇಗ ಸರಿಯಾದ ಅಳತೆಯ ಜೆರ್ಸಿ ನೀಡಲಾಗುವುದು ಎಂದು ಪ್ರಾಯೋಜಕರು ತಿಳಿಸಿರುವುದಾಗಿ ವರದಿಯಾಗಿದೆ.

ಆಟಗಾರರಿಗೆ ಖಾಸಗಿ ಹೋಟೆಲ್ ಬುಕ್

ನಗೋಯಾದಲ್ಲಿ ಕ್ರೀಡಾ ಗ್ರಾಮ ಇಲ್ಲದ ಕಾರಣ, ಆಟಗಾರರಿಗೆ ಕ್ರೂಸ್ ಹಡಗುಗಳು, ಹೋಟೆಲ್‌ಗಳು ಮತ್ತು ಕಂಟೇನರ್ ವಸತಿಗಳಲ್ಲಿ ವಸತಿ ಕಲ್ಪಿಸಲಾಗುತ್ತಿದೆ. ಪುರುಷರ ತಂಡಕ್ಕೆ ನೀಡಲಾದ ಕೊಠಡಿಗಳಲ್ಲಿ ಕ್ರಿಕೆಟಿಗರ ಭಾರವಾದ ಕಿಟ್ ಬ್ಯಾಗ್‌ಗಳನ್ನು ಇಡಲು ಕಷ್ಟಸಾಧ್ಯ. ಹೀಗಾಗಿ ಬಿಸಿಸಿಐ, ಇಡೀ ತಂಡ ಜಪಾನ್‌ಗೆ ತೆರಳುವ ಮೊದಲೇ ಆಟಗಾರರ ವಿಶ್ರಾಂತಿ ಮತ್ತು ತರಬೇತಿಯ ಮೇಲೆ ಯಾವುದೇ ಪರಿಣಾಮ ಬೀರದಂತೆ ಖಾಸಗಿ ಹೋಟೆಲ್ ಕೊಠಡಿಗಳನ್ನು ವ್ಯವಸ್ಥೆ ಮಾಡಿದೆ.

ಟೀಂ ಇಂಡಿಯಾದ ವೇಳಾಪಟ್ಟಿ

• ಸೆಪ್ಟೆಂಬರ್ 22, 2026; ಭಾರತ vs ಜಪಾನ್
• 28 ಸೆಪ್ಟೆಂಬರ್ 2026; ಏಷ್ಯನ್ ಗೇಮ್ಸ್ ಕ್ವಾರ್ಟರ್-ಫೈನಲ್: ಭಾರತ vs ಗ್ರೂಪ್ ಎ ನ ರನ್ನರ್-ಅಪ್
• 1 ಅಕ್ಟೋಬರ್ 2026; ಏಷ್ಯನ್ ಗೇಮ್ಸ್ ಸೆಮಿಫೈನಲ್: (ಭಾರತ ಅರ್ಹತೆ ಪಡೆದರೆ)
• 3 ಅಕ್ಟೋಬರ್ 2026: ಕಂಚಿನ ಪದಕ / ಚಿನ್ನದ ಪದಕ ಪಂದ್ಯ: (ಭಾರತ ಅರ್ಹತೆ ಪಡೆದರೆ)

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ