ಹಳೆಯ ದಾಖಲೆ ಧೂಳೀಪಟ: ವಿದೇಶಿ ಟೆಸ್ಟ್​​ನಲ್ಲಿ ಗರಿಷ್ಠ ಮೊತ್ತ ಕಲೆಹಾಕಿದ ಭಾರತ

ವಿದೇಶಿ ಪಿಚ್‌ಗಳೆಂದರೆ ಭಾರತೀಯ ಬ್ಯಾಟರ್‌ಗಳ ಪಾಲಿಗೆ ಅಗ್ನಿಪರೀಕ್ಷೆ ಎಂಬ ಕಾಲವೊಂದಿತ್ತು. ಆದರೆ ಇಂದು ಕಾಲ ಬದಲಾಗಿದೆ. ಎದುರಾಳಿಗಳ ನಾಡಿನಲ್ಲೇ ಅವರ ಬೌಲಿಂಗ್ ದಾಳಿಯನ್ನು ಧೂಳೀಪಟ ಮಾಡಿ ರನ್ ರಾಶಿ ಪೇರಿಸುವ ಕಲೆ ಟೀಮ್ ಇಂಡಿಯಾಗೆ ಕರಗತವಾಗಿದೆ. 22 ವರ್ಷಗಳ ಸುದೀರ್ಘ ಕಾಯುವಿಕೆಯ ಬಳಿಕ ವೆಲ್ಲಿಂಗ್ಟನ್‌ನಲ್ಲಿ 720 ರನ್‌ಗಳ ಬೃಹತ್ ಮೊತ್ತ ಪೇರಿಸುವ ಮೂಲಕ ಭಾರತ ಹೊಸ ಇತಿಹಾಸ ಸೃಷ್ಟಿಸಿದೆ. 

ಹಳೆಯ ದಾಖಲೆ ಧೂಳೀಪಟ: ವಿದೇಶಿ ಟೆಸ್ಟ್​​ನಲ್ಲಿ ಗರಿಷ್ಠ ಮೊತ್ತ ಕಲೆಹಾಕಿದ ಭಾರತ
Ind Vs Nz
Image Credit source: GettyImages

Updated on: Nov 22, 2026 | 7:38 AM

ನ್ಯೂಝಿಲೆಂಡ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಭಾರತೀಯ ಬ್ಯಾಟರ್‌ಗಳು ಅಕ್ಷರಶಃ ಅಬ್ಬರಿಸಿದ್ದಾರೆ. ಮೊದಲ ಇನ್ನಿಂಗ್ಸ್‌ನಲ್ಲಿ 720 ರನ್‌ಗಳ ಬೃಹತ್ ಮೊತ್ತ ಪೇರಿಸಿ ಡಿಕ್ಲೇರ್ ಘೋಷಿಸುವ ಮೂಲಕ, ವಿದೇಶಿ ನೆಲದಲ್ಲಿ ಟೆಸ್ಟ್ ಇತಿಹಾಸದಲ್ಲೇ ತನ್ನ ಅತಿ ದೊಡ್ಡ ಮೊತ್ತವನ್ನು ದಾಖಲಿಸಿ ಟೀಮ್ ಇಂಡಿಯಾ ಹೊಸ ದಾಖಲೆ ನಿರ್ಮಿಸಿದೆ.

ಒಂದು ಕಾಲದಲ್ಲಿ ವಿದೇಶಿ ಪಿಚ್‌ಗಳಲ್ಲಿ ವೇಗ ಮತ್ತು ಸ್ವಿಂಗ್ ಬೌಲಿಂಗ್ ಎದುರು ತಡಬಡಾಯಿಸುತ್ತಿದ್ದ ಭಾರತ, ಇಂದು ಅದೇ ಪರಿಸ್ಥಿತಿಗಳಲ್ಲಿ ಎದುರಾಳಿ ಬೌಲರ್‌ಗಳ ಮೇಲೆ ಸವಾರಿ ಮಾಡುತ್ತಿದೆ. ಪಂದ್ಯದ ಮೊದಲ ಇನ್ನಿಂಗ್ಸ್‌ನಲ್ಲಿ ನ್ಯೂಝಿಲೆಂಡ್ ಗಳಿಸಿದ್ದ 368 ರನ್‌ಗಳಿಗೆ ಉತ್ತರವಾಗಿ ಕಣಕ್ಕಿಳಿದ ಭಾರತ, ಆರಂಭದಿಂದಲೇ ಆಕ್ರಮಣಕಾರಿ ಹಾಗೂ ತಾಳ್ಮೆಯ ಸಮ್ಮಿಶ್ರ ಆಟವಾಡಿತು. ಯಶಸ್ವಿ ಜೈಸ್ವಾಲ್ (85) ಸ್ಫೋಟಕ ಆರಂಭ ನೀಡಿದರೆ, ಕೆ.ಎಲ್. ರಾಹುಲ್ (136) ಕ್ಲಾಸಿಕ್ ಶತಕ ಬಾರಿಸಿ ಇನ್ನಿಂಗ್ಸ್ ಕಟ್ಟಿದರು.

Loading...

ಮಧ್ಯಮ ಕ್ರಮಾಂಕದಲ್ಲಿ ದೇವದತ್ ಪಡಿಕ್ಕಲ್ (80) ಮತ್ತು ನಾಯಕ ಶುಭ್​ಮನ್ ಗಿಲ್ (98) ಕಿವೀಸ್ ಬೌಲರ್‌ಗಳ ಬೆವರಿಳಿಸಿದರು. ಕೊನೆಯಲ್ಲಿ ರಿಷಭ್ ಪಂತ್ (128) ಸಿಡಿಸಿದ ಬಿರುಸಿನ ಶತಕ ಹಾಗೂ ಧ್ರುವ್ ಜುರೆಲ್ (78) ಅವರ ವೇಗದ ಬ್ಯಾಟಿಂಗ್ ನೆರವಿನಿಂದ ಭಾರತ 700ರ ಗಡಿ ದಾಟಿ ಹೊಸ ಮೈಲಿಗಲ್ಲು ಸ್ಥಾಪಿಸಿತು.

ಈ ಮೂಲಕ ಬರೋಬ್ಬರಿ 22 ವರ್ಷಗಳ ಸುದೀರ್ಘ ಕಾಯುವಿಕೆಯ ಬಳಿಕ ವಿದೇಶಿ ಟೆಸ್ಟ್‌ನಲ್ಲಿ ಟೀಮ್ ಇಂಡಿಯಾ ಮತ್ತೊಮ್ಮೆ 700 ರನ್‌ಗಳ ಗಡಿದಾಟಿತು. ಅಷ್ಟೇ ಅಲ್ಲದೆ, ವಿದೇಶಿ ನೆಲದ ಟೆಸ್ಟ್ ಇತಿಹಾಸದಲ್ಲೇ ತನ್ನ ಸಾರ್ವಕಾಲಿಕ ಗರಿಷ್ಠ ಮೊತ್ತವನ್ನು ಕಲೆಹಾಕಿ ಹೊಸ ಹೊಸ ಇತಿಹಾಸ ಬರೆಯಿತು.

ಹಳೆಯ ದಾಖಲೆ ಧೂಳೀಪಟ:

2004ರಲ್ಲಿ ಆಸ್ಟ್ರೇಲಿಯಾದ ಸಿಡ್ನಿಯಲ್ಲಿ ಸಚಿನ್ ತೆಂಡೂಲ್ಕರ್ (241*) ಮತ್ತು ವಿವಿಎಸ್ ಲಕ್ಷ್ಮಣ್ (178) ಅವರ ಅಮೋಘ ಬ್ಯಾಟಿಂಗ್ ನೆರವಿನಿಂದ ಭಾರತ 705/7 ಡಿಕ್ಲೇರ್ ರನ್ ಗಳಿಸಿತ್ತು. ಅಂದು ನಿರ್ಮಾಣವಾಗಿದ್ದ ಆ ಐತಿಹಾಸಿಕ ದಾಖಲೆ ಬರೋಬ್ಬರಿ ಎರಡು ದಶಕಗಳ ಕಾಲ ಅಜೇಯವಾಗಿ ಉಳಿದಿತ್ತು.

ಇದೀಗ ಶುಭ್​ಮನ್ ಗಿಲ್ ನೇತೃತ್ವದ ಯುವ ಭಾರತ ತಂಡ ವೆಲ್ಲಿಂಗ್ಟನ್‌ನ ಬೇಸಿನ್ ರಿಸರ್ವ್ ಮೈದಾನದಲ್ಲಿ 720/9 ರನ್ ಪೇರಿಸಿ ಡಿಕ್ಲೇರ್ ಘೋಷಿಸಿದೆ. ಈ  ಮೂಲಕ ಆ ಹಳೆಯ ದಾಖಲೆಯನ್ನು  ಧೂಳೀಪಟ ಮಾಡಿದೆ.

ವಿದೇಶಿ ಟೆಸ್ಟ್ ಇತಿಹಾಸದಲ್ಲಿ ಭಾರತ ಕಲೆಹಾಕಿದ ಟಾಪ್ 5 ಗರಿಷ್ಠ ಸ್ಕೋರ್​:

ಕ್ರಮಾಂಕ ರನ್  ಎದುರಾಳಿ ತಂಡ ಸ್ಥಳ ವರ್ಷ
1 720/9 ಡಿಕ್ಲೇರ್ ನ್ಯೂಜಿಲೆಂಡ್ ವೆಲ್ಲಿಂಗ್ಟನ್ 2026
2 705/7 ಡಿಕ್ಲೇರ್ ಆಸ್ಟ್ರೇಲಿಯಾ ಸಿಡ್ನಿ 2004
3 676 ಪಾಕಿಸ್ತಾನ ಫೈಸಲಾಬಾದ್ 2006
4 675/5 ಡಿಕ್ಲೇರ್ ಪಾಕಿಸ್ತಾನ ಮುಲ್ತಾನ್ 2004
5 664 ಇಂಗ್ಲೆಂಡ್ ಲಂಡನ್ 2007

ನ್ಯೂಝಿಲೆಂಡ್‌ನಲ್ಲಿಯೂ ಹೊಸ ದಾಖಲೆ:

ಕೇವಲ ಭಾರತದ ಮಟ್ಟಿಗೆ ಮಾತ್ರವಲ್ಲದೆ, ನ್ಯೂಝಿಲೆಂಡ್ ನೆಲದಲ್ಲಿ ಪ್ರವಾಸಿ ತಂಡವೊಂದು ಗಳಿಸಿದ ಅತಿ ದೊಡ್ಡ ಟೆಸ್ಟ್ ಮೊತ್ತ ಇದಾಗಿದೆ. 2009ರಲ್ಲಿ ಹ್ಯಾಮಿಲ್ಟನ್‌ನಲ್ಲಿ ಭಾರತವೇ ಗಳಿಸಿದ್ದ 520 ರನ್‌ಗಳ ದಾಖಲೆಯನ್ನು ಈಗ 200 ರನ್‌ಗಳ ಅಂತರದಿಂದ ಮೀರಿಸಲಾಗಿದೆ. ಅಲ್ಲದೆ, ವೆಲ್ಲಿಂಗ್ಟನ್‌ನ ಬೇಸಿನ್ ರಿಸರ್ವ್ ಮೈದಾನದ ಇತಿಹಾಸದಲ್ಲೇ ದಾಖಲಾದ ಗರಿಷ್ಠ ಸ್ಕೋರ್ ಎಂಬ ಹೆಗ್ಗಳಿಕೆಯೂ ಈ ಇನ್ನಿಂಗ್ಸ್‌ಗೆ ಸಂದಿದೆ.

ಸದ್ಯ ಮೊದಲ ಇನ್ನಿಂಗ್ಸ್‌ನಲ್ಲಿ 352 ರನ್‌ಗಳ ಬೃಹತ್ ಮುನ್ನಡೆ ಪಡೆದಿರುವ ಟೀಮ್ ಇಂಡಿಯಾ ನಾಲ್ಕನೇ ದಿನದಾಟದಲ್ಲಿ ಭರ್ಜರಿ ಬೌಲಿಂಗ್ ಪ್ರದರ್ಶಿಸಿ ಪಂದ್ಯದ ಮೇಲೆ ಸಂಪೂರ್ಣ ಹಿಡಿತ ಸಾಧಿಸುವ ವಿಶ್ವಾಸದಲ್ಲಿದೆ.

ನ್ಯೂಝಿಲೆಂಡ್ ಪ್ಲೇಯಿಂಗ್ 11: ಟಾಮ್ ಲ್ಯಾಥಮ್ (ನಾಯಕ) , ಡೆವೊನ್ ಕಾನ್ವೇ , ಹೆನ್ರಿ ನಿಕೋಲ್ಸ್ , ರಚಿನ್ ರವೀಂದ್ರ , ಡ್ಯಾರಿಲ್ ಮಿಚೆಲ್ , ಟಾಮ್ ಬ್ಲಂಡೆಲ್ (ವಿಕೆಟ್ ಕೀಪರ್) , ಗ್ಲೆನ್ ಫಿಲಿಪ್ಸ್ , ನಾಥನ್ ಸ್ಮಿತ್ , ಕೈಲ್ ಜೇಮಿಸನ್ , ಮ್ಯಾಟ್ ಹೆನ್ರಿ.

ಇದನ್ನೂ ಓದಿ: ಬಾಟಲಿ ಮುಚ್ಚಳದ ಕಳ್ಳಾಟ! ಅಖ್ತರ್ ಬಾಯ್ಬಿಟ್ಟ ಸ್ಫೋಟಕ ಸತ್ಯ!

ಭಾರತ ಪ್ಲೇಯಿಂಗ್ 11: ಕೆಎಲ್ ರಾಹುಲ್ , ಯಶಸ್ವಿ ಜೈಸ್ವಾಲ್ , ದೇವದತ್ ಪಡಿಕ್ಕಲ್ , ಶುಭ್​ಮನ್ ಗಿಲ್ (ನಾಯಕ) , ರಿಷಭ್ ಪಂತ್ (ವಿಕೆಟ್ ಕೀಪರ್) , ವಾಷಿಂಗ್ಟನ್ ಸುಂದರ್ , ಧ್ರುವ್ ಜುರೆಲ್ , ಆಕಾಶ್ ದೀಪ್ , ಅನ್ಶುಲ್ ಕಂಬೋಜ್ , ಜಸ್​ಪ್ರೀತ್ ಬುಮ್ರಾ , ಪ್ರಸಿದ್ಧ್ ಕೃಷ್ಣ.

 

ಝಾಹಿರ್ ಯೂಸುಫ್

ಟಿವಿ9 ಡಿಜಿಟಲ್ ಚೀಫ್ ಸಬ್ ಎಡಿಟರ್. 10 ವರ್ಷಗಳಿಂದ ಕನ್ನಡ ಡಿಜಿಟಲ್​ ಮಾಧ್ಯಮದಲ್ಲಿ ಪತ್ರಿಕಾ ವೃತ್ತಿ. ಕ್ರೀಡಾ ಸುದ್ದಿ, ದೀರ್ಘ ಲೇಖನ, ವಿಶ್ಲೇಷಣೆ, ಹೀಗೆ ಎಲ್ಲ ತರಹದ ಬರಹದಲ್ಲೂ ಅನುಭವ. ಪ್ರಸ್ತುತ ವಿದ್ಯಮಾನಗಳ ವ್ಯಾಖ್ಯಾನ, ಚರ್ಚೆಯಲ್ಲಿ ನೈಪುಣ್ಯ. ಈ ಹಿಂದೆ ಉದಯವಾಣಿ, ನ್ಯೂಸ್ 18 ಕನ್ನಡ ಡಿಜಿಟಲ್​​ನಲ್ಲಿ ಕೆಲಸ ಮಾಡಿದ ಅನುಭವ. ಆಸಕ್ತಿದಾಯಕ ವಿಷಯ ಕ್ರೀಡೆ, ಸಿನಿಮಾ ಮತ್ತು ರಾಜಕೀಯ.

Read More
Loading...
Unable to load recommendations.
Follow Us