IPL 2024: ಮೂವರು ಆಟಗಾರರ ಮೇಲಿನ ನಿರ್ಬಂಧ ತೆರವು: ಐಪಿಎಲ್​ನಲ್ಲಿ ಕಾಣಿಸಿಕೊಳ್ಳುವುದು ಖಚಿತ

ಅಫ್ಘಾನಿಸ್ತಾನ್ ಆಟಗಾರರಾದ ನವೀನ್ ಉಲ್ ಹಕ್ (Naveen-ul Haq) ಮುಜೀಬ್ ಉರ್ ರೆಹಮಾನ್ ಹಾಗೂ ಫಝಲ್​ಹಕ್ ಫಾರೂಖಿ ಮೇಲೆ ಹೇರಿದ್ದ ನಿರ್ಬಂಧಗಳನ್ನು ಅಫ್ಘಾನಿಸ್ತಾನ್ ಕ್ರಿಕೆಟ್ ಬೋರ್ಡ್​ ತೆರವುಗೊಳಿಸಿದೆ. ಇದರಿಂದಾಗಿ ಈ ಮೂವರು ಆಟಗಾರರು ಐಪಿಎಲ್ ಸೇರಿದಂತೆ ವಿಶ್ವದ ಪ್ರಮುಖ ಲೀಗ್​ ಭಾಗವಹಿಸಬಹುದು. ಇದಕ್ಕೂ ಮುನ್ನ ನವೀನ್ ಉಲ್ ಹಕ್, ಮುಜೀಬ್ ಉರ್ ರೆಹಮಾನ್ ಹಾಗೂ ಫಝಲ್​ಹಕ್ ಫಾರೂಖಿಗೆ ಫ್ರಾಂಚೈಸಿ ಲೀಗ್ ಆಡಲು ನಿರಾಕ್ಷೇಪಣಾ ಪತ್ರ ನೀಡಲು ಎಸಿಬಿ ನಿರಾಕರಿಸಿತ್ತು.

ಈ ಮೂವರು ಆಟಗಾರರು ಅಫ್ಘಾನ್ ತಂಡದ ಕೇಂದ್ರೀಯ ಒಪ್ಪಂದದಿಂದ ಬಿಡುಗಡೆಯಾಗಲು ಬಯಸಿದ್ದರು. ಅಲ್ಲದೆ ಫ್ರಾಂಚೈಸಿ ಲೀಗ್​ನಲ್ಲಿ ಭಾಗವಹಿಸಲು ಈ ನಿರ್ಧಾರಕ್ಕೆ ಬಂದಿದ್ದಾರೆ ಎಂಬ ಆರೋಪ ಕೇಳಿ ಬಂದಿತ್ತು. ಹೀಗಾಗಿ ಲೀಗ್ ಕ್ರಿಕೆಟ್ ಆಡಲು ಎನ್​ಒಸಿ ನೀಡದಿರಲು ಅಫ್ಘಾನಿಸ್ತಾನ್ ಕ್ರಿಕೆಟ್ ಬೋರ್ಡ್​ ನಿರ್ಧರಿಸಿತ್ತು.

ಅದರಂತೆ ನವೀನ್ ಉಲ್ ಹಕ್, ಫಝಲ್​ಹಕ್ ಫಾರೂಖಿ ಹಾಗೂ ಮುಜೀಬ್​ ಉರ್ ರೆಹಮಾನ್​ಗೆ ಮುಂದಿನ 2 ವರ್ಷಗಳ ಕಾಲ ಐಪಿಎಲ್​ ಸೇರಿದಂತೆ ಫ್ರಾಂಚೈಸಿ ಲೀಗ್ ಆಡಲು ಅನುಮತಿ ನೀಡುವುದಿಲ್ಲ ಎಂದು ಅಫ್ಘಾನಿಸ್ತಾನ್ ಕ್ರಿಕೆಟ್ ಬೋರ್ಡ್ ಸ್ಪಷ್ಟಪಡಿಸಿತ್ತು.

ಇದೀಗ ಮೂವರು ಆಟಗಾರರಿಂದ ಸ್ಪಷ್ಟನೆ ಪಡೆದಿರುವ ಅಫ್ಘಾನಿಸ್ತಾನ್ ಕ್ರಿಕೆಟ್ ಬೋರ್ಡ್​ ಈ ಹಿಂದೆ ವಿಧಿಸಿದ್ದ ನಿರ್ಬಂಧಗಳನ್ನು ಸಂಪೂರ್ಣ ಮಾರ್ಪಡಿಸಿದೆ. ಮಾರ್ಪಡಿಸಿದ ನಿರ್ಬಂಧಗಳಿಂದಾಗಿ ಈ ಆಟಗಾರರು ಕೇಂದ್ರೀಯ ಒಪ್ಪಂದಗಳನ್ನು ಸ್ವೀಕರಿಸಲು ಮತ್ತು ಫ್ರಾಂಚೈಸಿ ಲೀಗ್‌ಗಳಲ್ಲಿ ಭಾಗವಹಿಸಲು ಅನುವು ಮಾಡಿಕೊಡಲಿದೆ.

ಐಪಿಎಲ್​ನಲ್ಲಿ ಕಣಕ್ಕಿಳಿಯುವುದು ಖಚಿತ:

ನಿರ್ಬಂಧ ತೆರವಿನಿಂದಾಗಿ ಅಫ್ಘಾನಿಸ್ತಾನದ ಮೂವರು ಆಟಗಾರರು ಐಪಿಎಲ್​ನಲ್ಲಿ ಕಾಣಿಸಿಕೊಳ್ಳುವುದು ಖಚಿತ. ಅದರಂತೆ ನವೀನ್ ಉಲ್ ಹಕ್ ಲಕ್ನೋ ಸೂಪರ್ ಜೈಂಟ್ಸ್ ಪರ, ಫಝಲ್​ಹಕ್ ಫಾರೂಖಿ ಸನ್​ರೈಸರ್ಸ್ ಹೈದರಾಬಾದ್ ಪರ ಆಡಲಿದ್ದಾರೆ. ಹಾಗೆಯೇ ಮುಜೀಬ್ ಉರ್ ರೆಹಮಾನ್ ಕೊಲ್ಕತ್ತಾ ನೈಟ್ ರೈಡರ್ಸ್ ಪರ ಕಣಕ್ಕಿಳಿಯಲಿದ್ದಾರೆ.

ಇದನ್ನೂ ಓದಿ: IPL 2024: ಹಾರ್ದಿಕ್ ಪಾಂಡ್ಯಗಾಗಿ 100 ಕೋಟಿ ರೂ. ನೀಡಿದ ಮುಂಬೈ ಇಂಡಿಯನ್ಸ್..!

IPL 2024 ರಲ್ಲಿರುವ ಅಫ್ಘಾನಿಸ್ತಾನ್ ಆಟಗಾರರು:

1. ರಶೀದ್ ಖಾನ್ (ಗುಜರಾತ್ ಟೈಟಾನ್ಸ್​)
2. ಮೊಹಮ್ಮದ್ ನಬಿ (ಮುಂಬೈ ಇಂಡಿಯನ್ಸ್​)
3. ನೂರ್ ಅಹ್ಮದ್ (ಗುಜರಾತ್ ಟೈಟಾನ್ಸ್​)
4. ರಹಮಾನುಲ್ಲಾ ಗುರ್ಬಾಝ್ (ಕೊಲ್ಕತ್ತಾ ನೈಟ್ ರೈಡರ್ಸ್​)
5. ನವೀನ್ ಉಲ್ ಹಕ್ (ಲಕ್ನೋ ಸೂಪರ್ ಜೈಂಟ್ಸ್​)
6. ಫಝಲ್​ಹಕ್ ಫಾರೂಖಿ (ಸನ್​ರೈಸರ್ಸ್​ ಹೈದರಾಬಾದ್)
7. ಅಝ್ಮತುಲ್ಲಾ ಒಮರ್​ಝಾಹಿ (ಗುಜರಾತ್ ಟೈಟಾನ್ಸ್​)
8. ಮುಜೀಬ್ ಉರ್ ರೆಹಮಾನ್ (ಕೊಲ್ಕತ್ತಾ ನೈಟ್ ರೈಡರ್ಸ್​)