ಅರ್ಧಶತಕ ಬಾರಿಸಿದರೂ ಕಾನ್ವೆಗೆ ಬ್ಯಾಟಿಂಗ್​ ನಿಲ್ಲಿಸಿ ಬರುವಂತೆ ಸೂಚಿಸಿದ CSK 

IPL 2025: ಇಂಡಿಯನ್ ಪ್ರೀಮಿಯರ್ ಲೀಗ್ ಸೀಸನ್-18 ರಲ್ಲಿ ರಿಟೈರ್ಡ್​ ಔಟ್ ಹೊಸ ಕಾರ್ಯತಂತ್ರವಾಗಿ ಮಾರ್ಪಡುತ್ತಿದೆ. ಲಕ್ನೋ ಸೂಪರ್ ಜೈಂಟ್ಸ್ ವಿರುದ್ಧದ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ತಂಡವು ತಿಲಕ್ ವರ್ಮಾ (Tilak Varma) ಅವರನ್ನು ರಿಟೈರ್ಡ್ ಔಟ್ ಮಾಡಿತ್ತು. ಅಂದರೆ ಬ್ಯಾಟಿಂಗ್ ಮಾಡುತ್ತಿದ್ದ ವೇಳೆ ಮರಳುಂತೆ ಸೂಚಿಸುವುದು. ಇದೀಗ ಇದೇ ತಂತ್ರವನ್ನು ಚೆನ್ನೈ ಸೂಪರ್ ಕಿಂಗ್ಸ್ ಕೂಡ ಪ್ರಯೋಗಿಸಿದೆ. ಅದು ಸಹ ಅರ್ಧಶತಕ ಬಾರಿಸಿ ಕ್ರೀಸ್​ನಲ್ಲಿದ್ದ ಡೆವೊನ್ ಕಾನ್ವೆ (Devon Conway) ಮೇಲೆ.

ಚಂಡೀಗಢ್​ನ ಪಿಸಿಎ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಪಂಜಾಬ್ ಕಿಂಗ್ಸ್ ತಂಡವು ನಿಗದಿತ 20 ಓವರ್​ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 219 ರನ್ ಕಲೆಹಾಕಿತು. ಈ ಕಠಿಣ ಗುರಿ ಬೆನ್ನತ್ತಿದ ಚೆನ್ನೈ ಸೂಪರ್ ಕಿಂಗ್ಸ್ ತಂಡಕ್ಕೆ ರಚಿನ್ ರವೀಂದ್ರ ಹಾಗೂ ಡೆವೊನ್ ಕಾನ್ವೆ ಉತ್ತಮ ಆರಂಭ ಒದಗಿಸಿದ್ದರು.

ಪವರ್​ಪ್ಲೇನಲ್ಲಿ 59 ರನ್ ಬಾರಿಸಿದ ಈ ಜೋಡಿಯು ಬೃಹತ್ ಮೊತ್ತದ ಚೇಸಿಂಗ್​ಗೆ ಭದ್ರ ಬುನಾದಿ ಹಾಕಿದ್ದರು. ಆದರೆ ಆ ಬಳಿಕ ರಚಿನ್ ರವೀಂದ್ರ (36) ವಿಕೆಟ್ ಒಪ್ಪಿಸಿದರು. ಇದಾಗ್ಯೂ ಇನಿಂಗ್ಸ್ ಕಟ್ಟುವ ಕಾಯಕಕ್ಕೆ ಕೈಹಾಕಿದ ಡೆವೊನ್ ಕಾನ್ವೆ ಉತ್ತಮ ಹೊಡೆತಗಳ ಮೂಲಕ ಗಮನ ಸೆಳೆದರು.

ಅಲ್ಲದೆ 49 ಎಸೆತಗಳಲ್ಲಿ 2 ಸಿಕ್ಸ್ ಹಾಗೂ 6 ಫೋರ್​ಗಳೊಂದಿಗೆ 69 ರನ್ ಬಾರಿಸಿದ್ದಾರೆ.  ಆದರೆ ಅಂತಿಮ ಹಂತದ ವೇಳೆ ರನ್ ಗತಿಯನ್ನು ಹೆಚ್ಚಿಸುವಲ್ಲಿ ಕಾನ್ವೆ ವಿಫಲರಾಗಿದ್ದಾರೆ. ಹೀಗಾಗಿ 18ನೇ ಓವರ್​ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಕೋಚ್ ಡಗೌಟ್​ಗೆ ಮರಳುವಂತೆ ಸೂಚಿಸಿದ್ದರು. ಹೀಗಾಗಿ ಡೆವೊನ್ ಕಾನ್ವೆ ರಿಟೈರ್ಡ್ ಔಟ್ ಆಗಿ ಪೆವಿಲಿಯನ್​ಗೆ ಹಿಂತಿರುಗಿದ್ದಾರೆ.

ಡೆವೊನ್ ಕಾನ್ವೆ ಪೆವಿಲಿಯನ್​ಗೆ ಹಿಂತಿರುಗಿರುವುದು:

ಆ ಬಳಿಕ ಕ್ರೀಸ್​ಗೆ ಆಗಮಿಸಿದ ರವೀಂದ್ರ ಜಡೇಜಾ ಹಾಗೂ ಮಹೇಂದ್ರ ಸಿಂಗ್ ಧೋನಿ ತಂಡವನ್ನು ಗೆಲುವಿನತ್ತ ಕೊಂಡೊಯ್ಯಲು ಪ್ರಯತ್ನಿಸಿದರು. ಇದಾಗ್ಯೂ ಪಂಜಾಬ್ ಕಿಂಗ್ಸ್ ತಂಡದ ಅತ್ಯುತ್ತಮ ಬೌಲಿಂಗ್​ ಕಾರಣ ಚೆನ್ನೈ ಸೂಪರ್ ಕಿಂಗ್ಸ್ ತಂಡ 18 ರನ್​ಗಳಿಂದ ಸೋಲೊಪ್ಪಿಕೊಂಡಿತು.

ಇದನ್ನೂ ಓದಿ: IPL 2025: ಗೆಲುವಿನ ಬೆನ್ನಲ್ಲೇ RCB ನಾಯಕ ರಜತ್ ಪಾಟಿದಾರ್​ಗೆ ದಂಡ ವಿಧಿಸಿದ ಬಿಸಿಸಿಐ

ಇನ್ನು ಈ ರಿಟೈರ್ಡ್ ಔಟ್​ನೊಂದಿಗೆ ಐಪಿಎಲ್​ ಇತಿಹಾಸದಲ್ಲಿ ಔಟಾಗದೇ ಇನಿಂಗ್ಸ್ ಕೊನೆಗೊಳಿಸಿದ ಬ್ಯಾಟರ್​ಗಳ ಪಟ್ಟಿಯಲ್ಲಿ ಡೆವೊನ್ ಕಾನ್ವೆ ಹೆಸರು ಕೂಡ ಸೇರ್ಪಡೆಯಾಯಿತು. ಅದು ಸಹ 5ನೇ ಆಟಗಾರನಾಗಿ. ಅಂದರೆ ಇದಕ್ಕೂ ಮುನ್ನ ಐಪಿಎಲ್​ನಲ್ಲಿ ನಾಲ್ವರು ಬ್ಯಾಟರ್​ಗಳು ರಿಟೈರ್ಡ್ ಔಟ್ ಆಗಿ ಇನಿಂಗ್ಸ್ ಅಂತ್ಯಗೊಳಿಸಿದ್ದಾರೆ. ಅವರೆಂದರೆ…

1. ರವಿಚಂದ್ರನ್ ಅಶ್ವಿನ್ vs ಲಕ್ನೋ ಸೂಪರ್ ಜೈಂಟ್ಸ್, ಮುಂಬೈ, 2022
2. ಅಥರ್ವ್ ಥೈಡೆ vs ಡೆಲ್ಲಿ ಕ್ಯಾಪಿಟಲ್ಸ್, ಧರ್ಮಶಾಲಾ, 2023
3. ಸಾಯಿ ಸುದರ್ಶನ್ vs ಮುಂಬೈ ಇಂಡಿಯನ್ಸ್, ಅಹಮದಾಬಾದ್, 2023
4. ತಿಲಕ್ ವರ್ಮಾ vs ಲಕ್ನೋ ಲಕ್ನೋ ಸೂಪರ್ ಜೈಂಟ್ಸ್, ಲಕ್ನೋ, 2025
5. ಡೆವೊನ್ ಕಾನ್ವೇ vs ಪಂಜಾಬ್ ಕಿಂಗ್ಸ್, ಮುಲ್ಲನ್ಪುರ, 2025