T20 World Cup 2026: ಶ್ರೀಲಂಕಾ ವಿರುದ್ಧ ಗೆದ್ದ ಓಮನ್
T20 World Cup 2026 Warm-up: 2026ರ ಟಿ20 ವಿಶ್ವಕಪ್ ಆರಂಭಕ್ಕೂ ಮುನ್ನ ನಡೆದ ಅಭ್ಯಾಸ ಪಂದ್ಯದಲ್ಲಿ ಕ್ರಿಕೆಟ್ ಲೋಕದ ಶಿಶು ಎಂದೇ ಖ್ಯಾತವಾಗಿರುವ ಓಮನ್, ಶ್ರೀಲಂಕಾ ಎ ತಂಡವನ್ನು ಮಣಿಸಿ ಅಚ್ಚರಿ ಮೂಡಿಸಿದೆ. 44 ವರ್ಷದ ಆಮಿರ್ ಕಲೀಮ್ ಅವರ ಸ್ಫೋಟಕ 80 ರನ್ ನೆರವಿನಿಂದ ಓಮನ್ 5 ವಿಕೆಟ್ಗಳ ರೋಮಾಂಚಕ ಗೆಲುವು ಸಾಧಿಸಿತು. ಈ ಫಲಿತಾಂಶವು ಮುಂಬರುವ ವಿಶ್ವಕಪ್ಗೆ ಹೊಸ ರಂಗು ತುಂಬಿದೆ.
Updated on: Feb 03, 2026 | 8:13 PM
2026 ರ ಟಿ20 ವಿಶ್ವಕಪ್ (T20 World Cup 2026) ಆರಂಭಕ್ಕೆ ನಾಲ್ಕೈದು ದಿನ ಬಾಕಿ ಇದೆ. ಇದೇ ಫೆಬ್ರವರಿ 7 ರಿಂದ ಈ ಮಿನಿ ವಿಶ್ವಸಮರಕ್ಕೆ ಚಾಲನೆ ಸಿಗಲಿದೆ. ಆದರೆ ಅದಕ್ಕೂ ಮುನ್ನ ಎಲ್ಲಾ ತಂಡಗಳು ಅಭ್ಯಾಸ ಪಂದ್ಯಗಳನ್ನು ಆಡುತ್ತಿವೆ. ಅದರಂತೆ ಇಂದು ನಡೆದ ಶ್ರೀಲಂಕಾ (Oman vs Sri Lanka) ಹಾಗೂ ಓಮನ್ ನಡುವಿನ ಅಭ್ಯಾಸ ಪಂದ್ಯದಲ್ಲಿ ಅಚ್ಚರಿಯ ಫಲಿತಾಂಶ ಹೊರಬಿದ್ದಿದೆ. ಕ್ರಿಕೆಟ್ ಲೋಕದ ಶಿಶು ಎನಿಸಿಕೊಂಡಿರುವ ಓಮನ್, ಅನುಭವಿ ಶ್ರೀಲಂಕಾ ತಂಡವನ್ನು ಮಣಿಸಿ ಟಿ20 ವಿಶ್ವಕಪ್ನ ರಂಗು ಹೆಚ್ಚಿಸಿದೆ. ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಶ್ರೀಲಂಕಾ 145 ರನ್ ಕಲೆಹಾಕಿತು. ಈ ಗುರಿ ಬೆನ್ನಟ್ಟಿದ ಓಮನ್ ತಂಡ 5 ವಿಕೆಟ್ಗಳ ಗೆಲುವು ದಾಖಲಿಸಿದೆ.
ಭಾರತದೊಂದಿಗೆ ಟಿ20 ವಿಶ್ವಕಪ್ ಅನ್ನು ಜಂಟಿಯಾಗಿ ಆಯೋಜಿಸುತ್ತಿರುವ ಶ್ರೀಲಂಕಾ, ಮೊದಲ ಅಭ್ಯಾಸ ಪಂದ್ಯಕ್ಕೆ ತನ್ನ ಎ ತಂಡವನ್ನು ಕಣಕ್ಕಿಳಿಸಿತು. ಶ್ರೀಲಂಕಾಕ್ಕೂ ಮೊದಲು ಭಾರತ ಕೂಡ ಅಮೆರಿಕ ವಿರುದ್ಧದ ಮೊದಲ ಅಭ್ಯಾಸ ಪಂದ್ಯಕ್ಕೆ ಎ ತಂಡವನ್ನು ಕಣಕ್ಕಿಳಿಸಿತ್ತು. ಆ ಪಂದ್ಯದಲ್ಲಿ ಟೀಂ ಇಂಡಿಯಾ ಗೆಲುವು ಸಾಧಿಸಿದರೆ, ಈ ಪಂದ್ಯದಲ್ಲಿ ಶ್ರೀಲಂಕಾ ಸೋಲುಂಡಿದೆ.
145 ರನ್ ಕಲೆಹಾಕಿದ ಲಂಕಾ
ಶ್ರೀಲಂಕಾ ಎ ತಂಡದಲ್ಲಿ ಕೇವಲ ಇಬ್ಬರು ಆಟಗಾರರಿಗೆ ಅಂತರರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಸ್ವಲ್ಪ ಅನುಭವವಿದ್ದರೂ, ಅವರಲ್ಲಿ ಹೆಚ್ಚಿನವರು ದೇಶೀಯ ಕ್ರಿಕೆಟ್ನಲ್ಲಿ ಮತ್ತು ಶ್ರೀಲಂಕಾ ಎ ಪರ ವ್ಯಾಪಕವಾಗಿ ಆಡಿದ್ದರು. ಆದ್ದರಿಂದ, ಸೀಮಿತ ಸೌಲಭ್ಯಗಳನ್ನು ಹೊಂದಿರುವ ಓಮನಂತಹ ತಂಡದ ವಿರುದ್ಧ ಲಂಕಾ ತಂಡ ಉತ್ತಮ ಪ್ರದರ್ಶನ ನೀಡುವ ನಿರೀಕ್ಷೆಯಿತ್ತು. ಆದರೆ ಅದು ಸಂಭವಿಸಲಿಲ್ಲ. ಕೊಲಂಬೊದಲ್ಲಿ ನಡೆದ ಈ ಪಂದ್ಯದಲ್ಲಿ, ಶ್ರೀಲಂಕಾ ಎ ಮೊದಲು ಬ್ಯಾಟಿಂಗ್ ಮಾಡಿ 9 ವಿಕೆಟ್ಗಳನ್ನು ಕಳೆದುಕೊಂಡು ಕೇವಲ 145 ರನ್ ಕಲೆಹಾಕಿತು. ತಂಡದ ಪರ ವನುಜಾ ಸಹನ್ ಅತಿ ಹೆಚ್ಚು 29 ರನ್ಗಳ ಇನ್ನಿಂಗ್ಸ್ ಆಡಿದರೆ, ಓಮನ್ ಪರ ಶಾ ಫೈಸಲ್ ಮತ್ತು ಜೇ ಒಡೆದ್ರಾ ತಲಾ 2 ವಿಕೆಟ್ಗಳನ್ನು ಪಡೆದರು.
44 ವರ್ಷದ ಕಲೀಮ್ ಅದ್ಭುತ ಸಾಧನೆ
ಈ ಗುರಿ ಬೆನ್ನಟ್ಟಿದ ಓಮನ್ ಕೇವಲ 18 ಓವರ್ಗಳಲ್ಲಿ 5 ವಿಕೆಟ್ಗಳ ನಷ್ಟಕ್ಕೆ ಈ ಗುರಿಯನ್ನು ತಲುಪುವ ಮೂಲಕ ಎಲ್ಲರನ್ನೂ ಬೆರಗುಗೊಳಿಸಿತು. ಓಮನ್ ಗೆಲುವಿನಲ್ಲಿ ಆಮಿರ್ ಕಲೀಮ್ ಮತ್ತು ವಿನಾಯಕ್ ಶುಕ್ಲಾ ಪ್ರಮುಖ ಪಾತ್ರವಹಿಸಿದರು. 44 ವರ್ಷದ ಆರಂಭಿಕ ಆಟಗಾರ ಆಮಿರ್ ಕಲೀಮ್ ಕೇವಲ 47 ಎಸೆತಗಳಲ್ಲಿ 80 ರನ್ಗಳ ಸ್ಫೋಟಕ ಇನ್ನಿಂಗ್ಸ್ ಆಡಿದರು, ಇದರಲ್ಲಿ 8 ಬೌಂಡರಿಗಳು ಮತ್ತು 3 ಸಿಕ್ಸರ್ಗಳು ಸೇರಿದ್ದವು. ಕಲೀಮ್ ಅವರ ಸ್ಫೋಟಕ ಬ್ಯಾಟಿಂಗ್ನಿಂದಾಗಿ ತಂಡವು ಕೇವಲ 14 ಓವರ್ಗಳಲ್ಲಿ 110 ರನ್ಗಳ ಗಡಿ ದಾಟಿತು. ಇತ್ತ ವಿನಾಯಕ್ ಶುಕ್ಲಾ ಕೂಡ 24 ಎಸೆತಗಳಲ್ಲಿ ಅಜೇಯ 39 ರನ್ ಗಳಿಸಿ ತಂಡದ ಗೆಲುವಿಗೆ ಕೊಡುಗೆ ನೀಡಿದರು.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
