On This Day: ಏಕದಿನ ವಿಶ್ವಕಪ್​: ಕೇವಲ 45 ರನ್​ಗೆ ಆಲೌಟ್..!

ಜೂನ್ 14, 1979…ಇಂಗ್ಲೆಂಡ್​ನ ಓಲ್ಡ್​ ಟ್ರಾಫರ್ಡ್​ ಸ್ಟೇಡಿಯಂನಲ್ಲಿ ಕ್ರಿಕೆಟ್ ಪ್ರೇಮಿಗಳು ತುಂಬಿ ತುಳುಕುತ್ತಿದ್ದರು. ಏಕೆಂದರೆ ಅಂದು ವಿಶ್ವಕಪ್​ನ 8ನೇ ಪಂದ್ಯದಲ್ಲಿ ಆತಿಥೇಯ ಇಂಗ್ಲೆಂಡ್ ಹಾಗೂ ಕೆನಡಾ ತಂಡಗಳು ಮುಖಾಮುಖಿಯಾಗಿತ್ತು. ಭಾರೀ ಕುತೂಹಲಕ್ಕೆ ಕಾರಣವಾಗಿದ್ದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ಕೆನಡಾ ತಂಡದ ನಾಯಕ ಬ್ಯಾಟಿಂಗ್ ಆಯ್ದುಕೊಂಡಿದ್ದರು. ಅತ್ತ ಕೆನಡಾದಿಂದ ಬಂದಿದ್ದ ಕ್ರಿಕೆಟ್ ಭರ್ಜರಿ ಬ್ಯಾಟಿಂಗ್ ಅನ್ನು ನಿರೀಕ್ಷಿಸಿದ್ದರು. ಆದರೆ ಪಂದ್ಯದ ಮೊದಲ ಓವರ್​ನಲ್ಲೇ ವೇಗಿ ಹೆಂಡ್ರಿಕ್ ಇಂಗ್ಲೆಂಡ್ ತಂಡಕ್ಕೆ ಮೊದಲ ಯಶಸ್ಸು ತಂದುಕೊಟ್ಟರು. ಇದರ ಬೆನ್ನಲ್ಲೇ ಇಯಾನ್ ಬಾಥಂ ಎಸೆತದಲ್ಲಿ ಕ್ರಿಸ್ಟೊಫರ್ ಚಾಪೆಲ್​ ಎಲ್​ಬಿಡಬ್ಲ್ಯೂ ಆಗಿ ಹೊರನಡೆದರು. ಇದಾಗ್ಯೂ 60 ಓವರ್​ಗಳ ಪಂದ್ಯವಾಗಿದ್ದರಿಂದ ಕೆನಡಾ ತಂಡ ಸ್ಪರ್ಧಾತ್ಮಕ ಮೊತ್ತ ಪೇರಿಸಲಿದೆ ಎಂದೇ ಎಲ್ಲರೂ ಭಾವಿಸಿದ್ದರು.

ಆದರೆ ಇಂಗ್ಲೆಂಡ್ ಬೌಲರ್​ಗಳ ಮುಂದೆ ಕೆನಡಾ ಬ್ಯಾಟ್ಸ್​ಮನ್​ಗಳು ಕ್ರೀಸ್ ಕಚ್ಚಿ ನಿಲ್ಲಲು ಪರದಾಡಿದರು. ಒಬ್ಬರ ಹಿಂದೆ ಒಬ್ಬರಂತೆ ಪೆವಿಲಿಯನ್ ಪರೇಡ್ ನಡೆಸಲು ಆರಂಭಿಸಿದರು. ಇದಾಗ್ಯೂ ಮೂರನೇ ಕ್ರಮಾಂಕದಲ್ಲಿ ಆಡಿದ ಫ್ರಾಂಕ್ಲಿನ್ ಡೆನಿಸ್ ಮಾತ್ರ ಒಂದು ಬದಿಯಲ್ಲಿ ಬಂಡೆಯಂತೆ ನೆಲೆಯೂರಿದರು. ಪರಿಣಾಮ ಬರೋಬ್ಬರಿ 99 ಎಸೆತಗಳನ್ನು ಎದುರಿಸಿ ಕೇವಲ 21 ರನ್​ ಕಲೆಹಾಕಿದರು. ಆದರೆ ಮತ್ತೊಂದೆಡೆ ವಿಕೆಟ್ ಉರುಳುತ್ತಲೇ ಇತ್ತು. ಆದರೆ ಡೆನಿಸ್ ಮಾತ್ರ ರಕ್ಷಣಾತ್ಮಕ ಆಟಕ್ಕೆ ಒತ್ತು ನೀಡಿದರು.

ತಂಡದ ಮೊತ್ತ 41 ಆಗಿದ್ದ ವೇಳೆ ಡೆನಿಸ್ ಹಿಟ್ ವಿಕೆಟ್ ಆಗಿ ಔಟ್ ಆದರು. ಆದರೆ ಕ್ರೀಸ್ ಕಚ್ಚಿ ನಿಂತಿದ್ದ ಡೆನಿಸ್ ಅದಾಗಲೇ ಇಂಗ್ಲೆಂಡ್​ ಬೌಲರ್​ಗಳಿಂದ 40.3 ಓವರ್​ಗಳನ್ನು ಎಸೆಯುವಂತೆ ಮಾಡಿದ್ದರು. ಅಂತಿಮವಾಗಿ ಕೆನಡಾ ತಂಡವು ಕೇವಲ 45 ರನ್​ಗಳಿಗೆ ಆಲೌಟ್ ಆಯಿತು. ಇಂಗ್ಲೆಂಡ್ ಪರ ಬಾಬ್ ವಿಲ್ಲಿಸ್ ಹಾಗೂ ಕ್ರಿಸ್ ಓಲ್ಡ್ ತಲಾ 4 ವಿಕೆಟ್ ಪಡೆದು ಮಿಂಚಿದರು.

ಇದನ್ನೂ ಓದಿ

KL Rahul: ಗಾಯ ಗಂಭೀರವಲ್ಲ..ಜಿಮ್​ನಲ್ಲಿ ಕಾಣಿಸಿಕೊಂಡ ಕೆಎಲ್ ರಾಹುಲ್..!

Yash Next Movie: ಯಶ್ ಮುಂದಿನ ಚಿತ್ರಕ್ಕೆ ಸೌತ್ ಸುಂದರಿ ನಾಯಕಿ..?

Hardik Pandya: ದಿನೇಶ್ ಕಾರ್ತಿಕ್ ವಿರುದ್ದ ಸೇಡು ತೀರಿಸಿಕೊಂಡ್ರಾ ಹಾರ್ದಿಕ್ ಪಾಂಡ್ಯ?

Dinesh Karthik: ಟೀಮ್ ಇಂಡಿಯಾ ಪರ ಯಾರೂ ಮಾಡದ ದಾಖಲೆ ಬರೆದ ದಿನೇಶ್ ಕಾರ್ತಿಕ್

46 ರನ್​ಗಳ ಗುರಿ ಪಡೆದ ಇಂಗ್ಲೆಂಡ್ ತಂಡವು 2 ವಿಕೆಟ್ ನಷ್ಟಕ್ಕೆ 13.5 ಓವರ್​ನಲ್ಲಿ ಜಯ ಸಾಧಿಸಿತು. ಈ ಮೂಲಕ 277 ಎಸೆತಗಳನ್ನು ಉಳಿಸಿ ಗೆದ್ದು ಬೀಗಿತು. ಇತ್ತ ಇಂಗ್ಲೆಂಡ್ ತಂಡವು ಭರ್ಜರಿ ಜಯ ಸಾಧಿಸಿ ದಾಖಲೆ ಬರೆದರೆ, ಕೆನಡಾ ತಂಡವು 45 ರನ್​ಗಳಿಸಿ ಕಳಪೆ ದಾಖಲೆಯೊಂದನ್ನು ತನ್ನದಾಗಿಸಿಕೊಂಡಿತು. ಆ ಸಮಯದಲ್ಲಿ ಅದು ​ ವಿಶ್ವಕಪ್ ಪಂದ್ಯವೊಂದರಲ್ಲಿ ಅತ್ಯಂತ ಕಡಿಮೆ ಸ್ಕೋರ್ ಆಗಿತ್ತು. ಈ ಕೆಟ್ಟ ದಾಖಲೆಗೆ ಇಂದು 43 ವರ್ಷಗಳು ತುಂಬಿದೆ.

ಅಂದಹಾಗೆ ಈ ಕೆಟ್ಟ ದಾಖಲೆಯನ್ನು ಮುರಿದಿದ್ದು ಕೂಡ ಕೆನಡಾ ತಂಡವೇ ಎಂಬುದು ವಿಶೇಷ. ಅಂದರೆ 2003 ರ ವಿಶ್ವಕಪ್‌ನಲ್ಲಿ ಶ್ರೀಲಂಕಾ ವಿರುದ್ಧದ ಪರ್ಲ್‌ನಲ್ಲಿ ಕೆನಡಾ 36 ರನ್‌ಗಳಿಗೆ ಆಲೌಟ್ ಆಗಿತ್ತು. ಇದು ವಿಶ್ವಕಪ್‌ನಲ್ಲಿ ತಂಡವೊಂದರ ಅತ್ಯಂತ ಕಡಿಮೆ ಸ್ಕೋರ್ ಆಗಿದೆ. ಅಂದರೆ ತನ್ನದೇ 45 ರನ್​ಗಳ ಕೆಟ್ಟ ದಾಖಲೆಯನ್ನು ಕೇವಲ 36 ರನ್​ಗಳಿಸಿ ಆಲೌಟ್​ ಆಗುವ ಮೂಲಕ ಕೆನಡಾ ತಂಡವೇ ಅಳಿಸಿ ಹಾಕಿತು.

ಕ್ರಿಕೆಟ್​ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

Published On - 2:48 pm, Tue, 14 June 22