ಈ ಬುಮ್ರಾ-ಗಿಮ್ರಾ ಏನು ಮಾಡ್ತಾನೆ? RCB ಮಾಡಿದ ಅತೀ ದೊಡ್ಡ ಎಡವಟ್ಟು ಇದು!
2013ರಲ್ಲಿ ವಿರಾಟ್ ಕೊಹ್ಲಿ ಅವರ ವಿಕೆಟ್ ಪಡೆಯುವ ಮೂಲಕ ಐಪಿಎಲ್ ಜಗತ್ತಿಗೆ ಎಂಟ್ರಿ ಕೊಟ್ಟಿದ್ದ ಯುವ ವೇಗಿ ಜಸ್ಪ್ರೀತ್ ಬುಮ್ರಾ, 2014ರ ಮೆಗಾ ಹರಾಜಿನ ಪಟ್ಟಿಯಲ್ಲಿ ಕಾಣಿಸಿಕೊಂಡಾಗ ಹಲವು ಫ್ರಾಂಚೈಸಿಗಳಿಗೆ ಅವರ ಅಸಲಿ ಬೆಲೆ ಮತ್ತು ಪ್ರತಿಭೆ ಗೊತ್ತಿರಲಿಲ್ಲ. ಹಾಗಾಗಿಯೇ ಆರ್ಸಿಬಿ ಅವರನ್ನು ಅತ್ಯಂತ ಸುಲಭವಾಗಿ ತಿರಸ್ಕರಿಸಿತ್ತು. ಆದರೆ, ಹೀಗೆ ತಿರಸ್ಕರಿಸುವ ಮುನ್ನ ಆರ್ಸಿಬಿ ಮ್ಯಾನೇಜ್‌ಮೆಂಟ್ ಆಡಿದ್ದ ಆ ಆಘಾತಕಾರಿ ಮಾತುಗಳನ್ನು ಮಾಜಿ ಕ್ರಿಕೆಟಿಗ ಪಾರ್ಥಿವ್ ಪಟೇಲ್ ಈಗ ಬಿಚ್ಚಿಟ್ಟಿದ್ದಾರೆ.
ಇಂಡಿಯನ್ ಪ್ರೀಮಿಯರ್ ಲೀಗ್ ಇತಿಹಾಸದಲ್ಲಿ ಒಂದು ವೇಳೆ ಅಂದು ಆ ನಿರ್ಧಾರ ಬದಲಾಗಿದ್ದರೆ, ಇವತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಹಣೆಬರಹವೇ ಬದಲಾಗಿರುತ್ತಿತ್ತೇನೋ! ಇಂದು ವಿಶ್ವ ಕ್ರಿಕೆಟ್‌ನ ನಂಬರ್ 1 ವೇಗದ ಬೌಲರ್ ಆಗಿ ಮೆರೆಯುತ್ತಿರುವ ಜಸ್ಪ್ರೀತ್ ಬುಮ್ರಾ ಅವರನ್ನು ತನ್ನದಾಗಿಸಿಕೊಳ್ಳುವ ಸುವರ್ಣಾವಕಾಶವೊಂದು ಅಂದು ಆರ್ಸಿಬಿ ಮುಂದಿತ್ತು. ಆದರೆ, ಆರ್ಸಿಬಿ ಮ್ಯಾನೇಜ್‌ಮೆಂಟ್ ಮಾಡಿದ ಆ ಒಂದು ಅಜಾಗರೂಕತೆ ಇತಿಹಾಸದ ಅತಿ ದೊಡ್ಡ ಎಡವಟ್ಟಾಗಿ ಉಳಿದುಹೋಗಿದೆ. ಅಷ್ಟಕ್ಕೂ ಅಂದು ಹರಾಜಿನ ವೇಳೆ ನಡೆದಿದ್ದೇನು ಎಂಬುದನ್ನು ಮಾಜಿ ಕ್ರಿಕೆಟಿಗ ಪಾರ್ಥಿವ್ ಪಟೇಲ್ ಬಿಚ್ಚಿಟ್ಟಿದ್ದಾರೆ.
ಹರಾಜಿನ ದಿನ ನಡೆದಿದ್ದೇನು?
ಘಟನೆ ನಡೆದಿದ್ದು 2014ರ ಐಪಿಎಲ್ ಮೆಗಾ ಹರಾಜಿನ ಸಮಯದಲ್ಲಿ. ಹರಾಜಿನ ಮೊದಲ ದಿನದ ಮಧ್ಯಾಹ್ನದ ವೇಳೆಗೆ ಪಾರ್ಥಿವ್ ಪಟೇಲ್ ಅವರನ್ನು ಆರ್ಸಿಬಿ ತಂಡವು ಖರೀದಿಸಿತ್ತು. ತಂಡಕ್ಕೆ ಆಯ್ಕೆಯಾದ ಬೆನ್ನಲ್ಲೇ ಆರ್ಸಿಬಿ ಮ್ಯಾನೇಜ್‌ಮೆಂಟ್‌ನಿಂದ ಪಾರ್ಥಿವ್ ಅವರಿಗೆ ಒಂದು ಸಂದೇಶ ಬಂದಿತ್ತು. ಅದರಲ್ಲಿ, ದೇಶಿ ಕ್ರಿಕೆಟ್‌ನಲ್ಲಿ ಮಿಂಚುತ್ತಿರುವ ಯಾವುದೇ ಉತ್ತಮ ಆಟಗಾರರಿದ್ದರೆ ಸಲಹೆ ನೀಡುವಂತೆ ಕೇಳಲಾಗಿತ್ತು.
ತಮ್ಮ ಗುಜರಾತ್ ದೇಶಿ ತಂಡದ ಸಹ ಆಟಗಾರನಾಗಿದ್ದ ಯುವ ಬೌಲರ್ ಜಸ್ಪ್ರೀತ್ ಬುಮ್ರಾ ಅವರ ಪ್ರತಿಭೆಯನ್ನು ಹತ್ತಿರದಿಂದ ನೋಡಿದ್ದ ಪಾರ್ಥಿವ್, ತಕ್ಷಣವೇ ಆರ್ಸಿಬಿ ಮ್ಯಾನೇಜ್‌ಮೆಂಟ್‌ಗೆ ಬುಮ್ರಾ ಹೆಸರನ್ನು ಶಿಫಾರಸು ಮಾಡಿದರು. “ಈತನ ಮೇಲೆ ಕಣ್ಣಿಡಿ, ಅತ್ಯುತ್ತಮ ಬೌಲರ್ ಆಗಬಲ್ಲ ಸಾಮರ್ಥ್ಯ ಈತನಲ್ಲಿದೆ” ಎಂದು ಪಾರ್ಥಿವ್ ಹೇಳಿದ್ದರು.
‘ಈ ಬುಮ್ರಾ-ಗಿಮ್ರಾ ಏನು ಮಾಡ್ತಾನೆ?
ಪಾರ್ಥಿವ್ ಪಟೇಲ್ ನೀಡಿದ ಸಲಹೆಯನ್ನು ಕೇಳಿದ ಆರ್ಸಿಬಿ ಮ್ಯಾನೇಜ್‌ಮೆಂಟ್, ಬುಮ್ರಾ ಅವರನ್ನು ಗಂಭೀರವಾಗಿ ಪರಿಗಣಿಸಲೇ ಇಲ್ಲ. ಬದಲಿಗೆ ಅತ್ಯಂತ ಬೇಜವಾಬ್ದಾರಿಯಿಂದ, “ಈ ಬುಮ್ರಾ ಗಿಮ್ರಾ ಏನು ತಾನೇ ಮಾಡ್ತಾನೆ” ಎಂದು ಹೇಳಿ ವಿಷಯವನ್ನು ತಳ್ಳಿಹಾಕಿತು. ಅಂದು ಆರ್ಸಿಬಿ ಮ್ಯಾನೇಜ್‌ಮೆಂಟ್‌ಗೆ ಆ ಯುವಕನ ವಿಚಿತ್ರ ಬೌಲಿಂಗ್ ಆಕ್ಷನ್ ಮತ್ತು ಅದ್ಭುತ ಲೈನ್ ಅಂಡ್ ಲೆಂಥ್ ಹಿಂದಿದ್ದ ಜಾದೂ ಅರ್ಥವಾಗಲೇ ಇಲ್ಲ!
ಆರ್ಸಿಬಿ ತಪ್ಪು, ಮುಂಬೈಗೆ ವರ!
ಆರ್ಸಿಬಿ ಬಿಡ್ ಮಾಡಲು ನಿರಾಕರಿಸಿದ ಬೆನ್ನಲ್ಲೇ, ಮುಂಬೈ ಇಂಡಿಯನ್ಸ್ ತಂಡವು ಜಸ್ಪ್ರೀತ್ ಬುಮ್ರಾ ಅವರ ಮೇಲಿನ ನಂಬಿಕೆಯನ್ನು ಮುಂದುವರಿಸಿತು. 2014ರ ಹರಾಜಿನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ರಾಜಸ್ಥಾನ್ ರಾಯಲ್ಸ್ ತಂಡಗಳ ವಿರುದ್ಧ ತೀವ್ರ ಪೈಪೋಟಿ ನಡೆಸಿ, ಕೊನೆಗೆ ₹1.20 ಕೋಟಿ ನೀಡಿ ಬುಮ್ರಾ ಅವರನ್ನು ಮುಂಬೈ ತನ್ನದಾಗಿಸಿಕೊಂಡಿತು.
ಅಲ್ಲಿಂದ ಮುಂದೆ ನಡೆದದ್ದೆಲ್ಲವೂ ಇತಿಹಾಸ. ಮುಂಬೈ ಇಂಡಿಯನ್ಸ್ ತಂಡದ ಪ್ರಮುಖ ಅಸ್ತ್ರವಾಗಿ ಬೆಳೆದ ಬುಮ್ರಾ, ತಂಡವು 5 ಬಾರಿ ಐಪಿಎಲ್ ಟ್ರೋಫಿ ಗೆಲ್ಲುವಲ್ಲಿ ಪ್ರಮುಖ ಪಾತ್ರವಹಿಸಿದರು. ಇಂದು ಅವರು ಕೇವಲ ಮುಂಬೈಗಷ್ಟೇ ಅಲ್ಲ, ವಿಶ್ವ ಕ್ರಿಕೆಟ್‌ನ ಅತ್ಯಂತ ಕಂಟಕಪ್ರಾಯ ಡೆತ್-ಓವರ್ ಸ್ಪೆಷಲಿಸ್ಟ್ ಆಗಿ ರಾಜಿಸುತ್ತಿದ್ದಾರೆ.
ಇದನ್ನೂ ಓದಿ: ಚೆನ್ನೈ ಸೂಪರ್ ಕಿಂಗ್ಸ್ ತಂಡದಿಂದ ಮೈಕಲ್ ಹಸ್ಸಿ ಔಟ್!
ವಿರಾಟ್ ಕೊಹ್ಲಿಯೇ ಮೊದಲ ವಿಕೆಟ್!
ವಿಪರ್ಯಾಸವೆಂದರೆ, ಜಸ್ಪ್ರೀತ್ ಬುಮ್ರಾ 2013 ರಲ್ಲಿ ಮುಂಬೈ ಇಂಡಿಯನ್ಸ್ ಪರ ಐಪಿಎಲ್‌ಗೆ ಪಾದಾರ್ಪಣೆ ಮಾಡಿದಾಗ, ಅವರು ಪಡೆದ ಅತ್ಯಂತ ಮೊದಲ ಐಪಿಎಲ್ ವಿಕೆಟ್ ಮತ್ಯಾರದೂ ಅಲ್ಲ, ಅಂದಿನ ಆರ್ಸಿಬಿ ನಾಯಕ ವಿರಾಟ್ ಕೊಹ್ಲಿ ಅವರದ್ದಾಗಿತ್ತು!
- 2013 ರಲ್ಲಿ ಬುಮ್ರಾ ಮುಂಬೈ ಇಂಡಿಯನ್ಸ್ ಪರ ಆಡಿದ್ದು ಕೇವಲ 2 ಪಂದ್ಯ ಮಾತ್ರ
- 2014 ರಲ್ಲಿ ಬುಮ್ರಾ ಹರಾಜಿನಲ್ಲಿ ಕಾಣಿಸಿಕೊಂಡಿದ್ದರು. ಇದಾಗ್ಯೂ ಆರ್ಸಿಬಿ ಖರೀದಿಸಲು ಮುಂದಾಗಿರಲಿಲ್ಲ.
ಅಂದು ಕೊಹ್ಲಿ ವಿಕೆಟ್ ಪಡೆದು ಅಬ್ಬರಿಸಿದ್ದ ಬುಮ್ರಾರನ್ನು, 2014ರಲ್ಲಿ ತನ್ನ ತಂಡಕ್ಕೆ ಸೇರಿಸಿಕೊಳ್ಳಲು ಆರ್ಸಿಬಿ ನಿರಾಕರಿಸಿದ್ದು ಕ್ರಿಕೆಟ್ ಇತಿಹಾಸದ ಅತಿ ದೊಡ್ಡ ತಪ್ಪು ನಿರ್ಧಾರಗಳಲ್ಲಿ ಒಂದಾಗಿ ಇಂದಿಗೂ ಉಳಿದುಕೊಂಡಿದೆ. ಬಹುಶಃ ಅಂದು ಆರ್ಸಿಬಿ ಆ ತಪ್ಪು ಮಾಡದೇ ಹೋಗಿದ್ದರೆ, ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಟ್ರೋಫಿಯ ಬರ ಎಂದೋ ನೀಗುತ್ತಿತ್ತೇನೋ!