28 ವರ್ಷಗಳ ದಾಖಲೆ ಉಡೀಸ್: 9ನೇ ವಿಕೆಟ್​ಗೆ ಹೊಸ ಇತಿಹಾಸ!

ಡರ್ಬನ್‌ನ ಕಿಂಗ್ಸ್‌ಮೀಡ್ ಮೈದಾನದಲ್ಲಿ ನಡೆಯುತ್ತಿರುವ ಸೌತ್ ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್‌ನ ಎರಡನೇ ದಿನದಾಟದಲ್ಲಿ ಆಸ್ಟ್ರೇಲಿಯಾದ ಮ್ಯಾಟ್ ರೆನ್‌ಶಾ ಮತ್ತು ನಾಥನ್ ಲಿಯಾನ್ 9ನೇ ವಿಕೆಟ್‌ಗೆ 134 ರನ್‌ಗಳ ಬೃಹತ್ ಜೊತೆಯಾಟವಾಡಿ ಹೊಸ ಇತಿಹಾಸ ನಿರ್ಮಿಸಿದ್ದಾರೆ. ಈ ಭರ್ಜರಿ ಜೊತೆಯಾಟದೊಂದಿಗೆ ರೆನ್‌ಶಾ-ಲಿಯಾನ್ ಜೋಡಿ ವಿದೇಶಿ ಮಣ್ಣಿನಲ್ಲಿ 9ನೇ ವಿಕೆಟ್‌ಗೆ ಆಸ್ಟ್ರೇಲಿಯಾ ಪರ ಗರಿಷ್ಠ ರನ್ ಕಲೆಹಾಕಿದ ಸಾರ್ವಕಾಲಿಕ ದಾಖಲೆಯನ್ನು ತಮ್ಮದಾಗಿಸಿಕೊಂಡಿದ್ದಾರೆ.

ಒಂದು ಹಂತದಲ್ಲಿ 230 ರನ್‌ಗಳಿಗೆ 8 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ಆಸ್ಟ್ರೇಲಿಯಾ ತಂಡವನ್ನು ಈ ಜೋಡಿಯು ಅದ್ಭುತ ಬ್ಯಾಟಿಂಗ್ ಪ್ರದರ್ಶನದ ಮೂಲಕ ರಕ್ಷಿಸಿತು. ಇವರ ಸಾಹಸದಿಂದಾಗಿ ಆಸ್ಟ್ರೇಲಿಯಾ ತನ್ನ ಮೊದಲ ಇನಿಂಗ್ಸ್‌ನಲ್ಲಿ 390 ರನ್‌ಗಳ ಬೃಹತ್ ಮೊತ್ತ ಕಲೆಹಾಕಿತು.

ಭರ್ಜರಿ ದಾಖಲೆಗಳು:

28 ವರ್ಷಗಳ ಹಳೆಯ ದಾಖಲೆ ಉಡೀಸ್: ಈ ಜೋಡಿಯು 134 ರನ್‌ಗಳನ್ನು ಕಲೆಹಾಕುವ ಮೂಲಕ, ಡರ್ಬನ್ ಮೈದಾನದಲ್ಲಿ 1998ರಲ್ಲಿ ಸೌತ್ ಆಫ್ರಿಕಾದ ಮಾರ್ಕ್ ಬೌಷರ್ ಮತ್ತು ಫ್ಯಾನಿ ಡಿ ವಿಲಿಯರ್ಸ್ ಬರೆದಿದ್ದ 86 ರನ್‌ಗಳ 9ನೇ ವಿಕೆಟ್ ಜೊತೆಯಾಟದ ದಾಖಲೆಯನ್ನು ಮುರಿದರು.

ರೆನ್‌ಶಾ ಮ್ಯಾರಥಾನ್ ಇನಿಂಗ್ಸ್: ಮೊದಲ ದಿನದಾಟದಲ್ಲಿ 5ನೇ ಕ್ರಮಾಂಕದಲ್ಲಿ ಕ್ರೀಸ್​ಗೆ ಆಗಮಿಸಿದ ಎಡಗೈ ಬ್ಯಾಟ್ಸ್‌ಮನ್ ಮ್ಯಾಟ್ ರೆನ್‌ಶಾ, 397 ಎಸೆತಗಳನ್ನು ಎದುರಿಸಿ ಭರ್ಜರಿ 190 ರನ್ ಸಿಡಿಸಿದರು. ಇದು ಕಿಂಗ್ಸ್‌ಮೀಡ್ ಮೈದಾನದಲ್ಲಿ 5ನೇ ಕ್ರಮಾಂಕದ ಬ್ಯಾಟ್ಸ್‌ಮನ್ ಒಬ್ಬರು ಗಳಿಸಿದ ಗರಿಷ್ಠ ವೈಯಕ್ತಿಕ ಸ್ಕೋರ್ ಆಗಿದೆ.

ನಾಥನ್ ಲಿಯಾನ್ ಅದ್ಭುತ ಸಾಥ್: ಕೆಳಕ್ರಮಾಂಕದಲ್ಲಿ ರೆನ್‌ಶಾಗೆ ಅತ್ಯುತ್ತಮ ಬೆಂಬಲ ನೀಡಿದ ಸ್ಪಿನ್ನರ್ ನಾಥನ್ ಲಿಯಾನ್, 92 ಎಸೆತಗಳನ್ನು ಎದುರಿಸಿ 27 ರನ್ ಗಳಿಸಿದರು. ಮಾರ್ಕೊ ಯಾನ್ಸೆನ್ ಎಸೆತದಲ್ಲಿ ಎಲ್‌ಬಿಡಬ್ಲ್ಯೂ ಆಗುವ ಮುನ್ನ ಇವರು ಸೌತ್ ಆಫ್ರಿಕಾದ ಬೌಲರ್‌ಗಳನ್ನು ತೀವ್ರವಾಗಿ ಕಾಡಿದ್ದರು.

ಸಾರ್ವಕಾಲಿಕ 3ನೇ ಅತ್ಯುತ್ತಮ ಸಾಧನೆ: ಆಸ್ಟ್ರೇಲಿಯಾದ 149 ವರ್ಷಗಳ ಸುದೀರ್ಘ ಟೆಸ್ಟ್ ಇತಿಹಾಸದಲ್ಲೇ 9ನೇ ಅಥವಾ ಅದಕ್ಕಿಂತ ಕೆಳಗಿನ ವಿಕೆಟ್‌ಗೆ ದಾಖಲಾದ 3ನೇ ಅತಿ ದೊಡ್ಡ ಜೊತೆಯಾಟ ಇದಾಗಿದೆ.

ಇದನ್ನೂ ಓದಿ: ಕೆನಡಾ ತಂಡದ ವಿಶ್ವ ದಾಖಲೆ ಮುರಿದ ಟೀಮ್ ಇಂಡಿಯಾ

ಮೂರನೇ ದಿನದಾಟಕ್ಕೆ ಪಂದ್ಯ:

ಆಸ್ಟ್ರೇಲಿಯಾವನ್ನು 390 ರನ್‌ಗಳಿಗೆ ಆಲೌಟ್ ಮಾಡಿದ ಬಳಿಕ ತನ್ನ ಮೊದಲ ಇನಿಂಗ್ಸ್ ಆರಂಭಿಸಿದ ಸೌತ್ ಆಫ್ರಿಕಾ ತಂಡ, ಎರಡನೇ ದಿನದ ಆಟದ ಮುಕ್ತಾಯಕ್ಕೆ 1 ವಿಕೆಟ್ ನಷ್ಟಕ್ಕೆ 27 ರನ್ ಗಳಿಸಿದೆ. ಮಂದಬೆಳಕಿನ ಕಾರಣ ಪಂದ್ಯವನ್ನು ಬೇಗನೇ ನಿಲ್ಲಿಸಲಾಗಿದ್ದು, ಆತಿಥೇಯ ತಂಡ ಸದ್ಯ 363 ರನ್‌ಗಳ ಹಿನ್ನಡೆಯಲ್ಲಿದೆ.