Rishabh Pant: 2 ಕ್ಯಾಚ್ಗಳು, 2 ಶತಕಗಳು: ಆಂಗ್ಲರ ನಾಡಲ್ಲಿ ರಿಷಭ್ ಪಂತ್ಗೆ ಅನ್ಯಾಯ
India vs England Test: ರಿಷಭ್ ಟೆಸ್ಟ್ ಕ್ರಿಕೆಟ್ನಲ್ಲಿ ಎರಡೂ ಇನ್ನಿಂಗ್ಸ್ಗಳಲ್ಲಿ ಶತಕ ಗಳಿಸಿದ ಎರಡನೇ ವಿಕೆಟ್ ಕೀಪರ್ ಆಗಿದ್ದಾರೆ. ಇದಕ್ಕೂ ಮೊದಲು, ಜಿಂಬಾಬ್ವೆಯ ಆಂಡಿ ಫ್ಲವರ್ ಈ ಸಾಧನೆ ಮಾಡಿದ್ದರು. ಅದ್ಭುತ ಬ್ಯಾಟಿಂಗ್ ಜೊತೆಗೆ, ರಿಷಭ್ ಪಂತ್ 2 ಕ್ಯಾಚ್ಗಳನ್ನು ಕೂಡ ಹಿಡಿದರು.
Updated on:Jun 25, 2025 | 4:18 PM
ಬೆಂಗಳೂರು (ಜೂ. 25): ಮೊದಲ ಇನ್ನಿಂಗ್ಸ್ನಲ್ಲಿ 471 ರನ್ ಗಳಿಸಿದ ನಂತರ, ಟೀಮ್ ಇಂಡಿಯಾ (Team India) ಲೀಡ್ಸ್ ಟೆಸ್ಟ್ನಲ್ಲಿ ಸೋಲುತ್ತದೆ ಎಂದು ಯಾವುದೇ ಭಾರತೀಯ ಅಭಿಮಾನಿ ನಿರೀಕ್ಷಿಸಿರಲಿಲ್ಲ. ಆದರೆ, ಹೀಗಾಯಿತು. ಕೊನೆಯ ದಿನದ ಕೊನೆಯ ಸೆಷನ್ನಲ್ಲಿ ಹೆಡಿಂಗ್ಲಿಯಲ್ಲಿ ಆತಿಥೇಯ ಇಂಗ್ಲೆಂಡ್ ಶುಭ್ಮನ್ ಗಿಲ್ ನೇತೃತ್ವದ ಭಾರತೀಯ ಕ್ರಿಕೆಟ್ ತಂಡವನ್ನು 5 ವಿಕೆಟ್ಗಳಿಂದ ಸೋಲಿಸಿತು. ಟೀಮ್ ಇಂಡಿಯಾ ಇಂಗ್ಲೆಂಡ್ ಮುಂದೆ 371 ರನ್ಗಳ ದೊಡ್ಡ ಗುರಿಯನ್ನು ನಿಗದಿಪಡಿಸಿತ್ತು. ಬೆನ್ ಡಕೆಟ್ ಅವರ ಶತಕ, ಜ್ಯಾಕ್ ಕ್ರೌಲಿ ಮತ್ತು ಜೋ ರೂಟ್ ಅವರ ಅರ್ಧಶತಕಗಳಿಂದಾಗಿ ಇಂಗ್ಲೆಂಡ್ ಸುಲಭವಾಗಿ ಈ ಗುರಿಯನ್ನು ಸಾಧಿಸಿತು.
ಒಂದು ತಂಡದ ಆಟಗಾರರಯ ಟೆಸ್ಟ್ನಲ್ಲಿ 5 ಶತಕಗಳನ್ನು ಗಳಿಸಿದರೂ ಪಂದ್ಯವನ್ನು ಸೋತಿರುವುದು ಇದೇ ಮೊದಲು. ಇಂಗ್ಲೆಂಡ್ ಆರಂಭಿಕ ಬ್ಯಾಟ್ಸ್ಮನ್ ಡಕೆಟ್ ಮೊದಲ ಇನ್ನಿಂಗ್ಸ್ನಲ್ಲಿ 62 ರನ್ ಮತ್ತು ಎರಡನೇ ಇನ್ನಿಂಗ್ಸ್ನಲ್ಲಿ 149 ರನ್ ಗಳಿಸಿದರು. ಇದರಿಂದಾಗಿ, ಅವರು ಪಂದ್ಯಶ್ರೇಷ್ಠ ಪ್ರಶಸ್ತಿಯನ್ನೂ ಪಡೆದರು.
ರಿಷಭ್ ಪಂತ್ಗೆ ಅನ್ಯಾಯವಾಯಿತೇ?
ಭಾರತೀಯ ಕ್ರಿಕೆಟ್ ತಂಡದ ಅನುಭವಿ ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ ರಿಷಭ್ ಪಂತ್ ಲೀಡ್ಸ್ ಟೆಸ್ಟ್ನಲ್ಲಿ ಹಲವು ದಾಖಲೆಗಳನ್ನು ಮುರಿದರು. ಅವರು ಕೇವಲ ಒಂದು ಇನ್ನಿಂಗ್ಸ್ನಲ್ಲಿ ಅಲ್ಲ, ಎರಡೂ ಇನ್ನಿಂಗ್ಸ್ಗಳಲ್ಲಿ ಶತಕ ಗಳಿಸಿದರು. ಪಂತ್ ಮೊದಲ ಇನ್ನಿಂಗ್ಸ್ನಲ್ಲಿ 134 ರನ್ ಮತ್ತು ಎರಡನೇ ಇನ್ನಿಂಗ್ಸ್ನಲ್ಲಿ 118 ರನ್ ಗಳಿಸಿದರು. ರಿಷಭ್ ಟೆಸ್ಟ್ ಕ್ರಿಕೆಟ್ನಲ್ಲಿ ಎರಡೂ ಇನ್ನಿಂಗ್ಸ್ಗಳಲ್ಲಿ ಶತಕ ಗಳಿಸಿದ ಎರಡನೇ ವಿಕೆಟ್ ಕೀಪರ್ ಆಗಿದ್ದಾರೆ. ಇದಕ್ಕೂ ಮೊದಲು, ಜಿಂಬಾಬ್ವೆಯ ಆಂಡಿ ಫ್ಲವರ್ ಈ ಸಾಧನೆ ಮಾಡಿದ್ದರು. ಅದ್ಭುತ ಬ್ಯಾಟಿಂಗ್ ಜೊತೆಗೆ, ರಿಷಭ್ ಪಂತ್ 2 ಕ್ಯಾಚ್ಗಳನ್ನು ಕೂಡ ಹಿಡಿದರು.
ಇಷ್ಟೊಂದು ಅದ್ಭುತ ಪ್ರದರ್ಶನ ನೀಡಿದರೂ ಅವರಿಗೆ ಪಂದ್ಯಶ್ರೇಷ್ಠ ಪ್ರಶಸ್ತಿ ಸಿಗಲಿಲ್ಲ. ಸೋತ ತಂಡದ ಆಟಗಾರನೊಬ್ಬ ಉತ್ತಮ ಪ್ರದರ್ಶನ ನೀಡಿದ್ದಕ್ಕಾಗಿ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದಿರುವುದು ಈ ಹಿಂದೆ ಅನೇಕ ಬಾರಿ ಸಂಭವಿಸಿದೆ. ಆದರೆ, ಲೀಡ್ಸ್ ಟೆಸ್ಟ್ನಲ್ಲಿ ಪಂತ್ ವಿಷಯದಲ್ಲಿ ಇದು ಸಂಭವಿಸಲಿಲ್ಲ. ಇದು ಭಾರತೀಯರಿಗೆ ನೋವು ತರಿಸಿದೆ.
IND vs ENG 2nd Test: ಭಾರತ- ಇಂಗ್ಲೆಂಡ್ ದ್ವಿತೀಯ ಟೆಸ್ಟ್ ಯಾವಾಗ ಆರಂಭ?, ಎಲ್ಲಿ?
ಪಂದ್ಯ ಹೀಗಿತ್ತು
ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ಮೊದಲ ಇನ್ನಿಂಗ್ಸ್ನಲ್ಲಿ 471 ರನ್ ಗಳಿಸಿತು. ಇದಕ್ಕೆ ಪ್ರತಿಕ್ರಿಯೆಯಾಗಿ ಇಂಗ್ಲೆಂಡ್ 465 ರನ್ ಗಳಿಸಿತು. ಇದರ ನಂತರ, ಟೀಮ್ ಇಂಡಿಯಾ ಎರಡನೇ ಇನ್ನಿಂಗ್ಸ್ನಲ್ಲಿ 364 ರನ್ ಗಳಿಸಿ 371 ರನ್ಗಳ ಗುರಿಯನ್ನು ನೀಡಿತು. ಪಂದ್ಯದ ಕೊನೆಯ ದಿನದಂದು, ಇಂಗ್ಲೆಂಡ್ಗೆ 350 ರನ್ಗಳ ಅಗತ್ಯವಿತ್ತು, ಈ ಗುರಿಯನ್ನು ಆಂಗ್ಲರು ಆರಾಮವಾಗಿ ತಲುಪಿದರು.
ಎರಡನೇ ಟೆಸ್ಟ್ ಯಾವಾಗ?:
ಭಾರತ ಮತ್ತು ಇಂಗ್ಲೆಂಡ್ ನಡುವಿನ ಎರಡನೇ ಟೆಸ್ಟ್ ಪಂದ್ಯವು ಜುಲೈ 2 ರಿಂದ ಬರ್ಮಿಂಗ್ಹ್ಯಾಮ್ನ ಎಡ್ಜ್ಬಾಸ್ಟನ್ ಕ್ರಿಕೆಟ್ ಮೈದಾನದಲ್ಲಿ ಆರಂಭವಾಗಲಿದೆ. ಸದ್ಯ ಐದು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಮೊದಲ ಪಂದ್ಯ ಸೋತ ಕಾರಣ ಭಾರತ ಮತ್ತೆ ಪುಟಿದೇಳಬೇಕಿದೆ. ಬರ್ಮಿಂಗ್ಹ್ಯಾಮ್ನ ಎಡ್ಜ್ಬಾಸ್ಟನ್ನಲ್ಲಿ ನಡೆಯಲಿರುವ ಎರಡನೇ ಪಂದ್ಯಕ್ಕೆ ಆಂಗ್ಲರ ಬಾಜ್ಬಾಲ್ ತಂತ್ರವನ್ನು ಎದುರಿಸಲು ಒಂದು ವಾರಕ್ಕೂ ಹೆಚ್ಚು ವಿರಾಮ ಇದೆ.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 4:17 pm, Wed, 25 June 25
