ಬೌಲರ್​ಗಳ ತಪ್ಪಿಲ್ಲ… ಸೋಲಿನ ಬಳಿಕ ಶ್ರೇಯಸ್ ಅಯ್ಯರ್ ಹೇಳಿದ್ದೇನು?

ವೆಸ್ಟ್ ಇಂಡೀಸ್ ವಿರುದ್ಧದ 2ನೇ ಟಿ20 ಪಂದ್ಯದಲ್ಲಿ 249 ರನ್‌ಗಳ ಬೃಹತ್ ಮೊತ್ತ ಪೇರಿಸಿದರೂ ಟೀಮ್ ಇಂಡಿಯಾ ಸೋಲೊಪ್ಪಿಕೊಂಡಿರುವುದು ಅಭಿಮಾನಿಗಳಲ್ಲಿ ಭಾರಿ ನಿರಾಶೆ ಮೂಡಿಸಿದೆ. ಈ ಸೋಲಿನ ಬಳಿಕ ಮಾತನಾಡಿದ ಭಾರತ ತಂಡದ ನಾಯಕ ಶ್ರೇಯಸ್ ಅಯ್ಯರ್, ಪರಾಜಯಕ್ಕೆ ಪ್ರಮುಖ ಕಾರಣ ಇಬ್ಬನಿಯ ಪ್ರಭಾವ ಮತ್ತು ರಾಂಚಿ ಪಿಚ್‌ನ ಪರಿಸ್ಥಿತಿ ಎಂದು ಹೇಳಿದ್ದಾರೆ.

ಎಷ್ಟು ರನ್​ಗಳಿಸಿದರೂ ಸಾಕಾಗಲ್ಲ!

ಪಂದ್ಯದ ನಂತರ “ಗೆಲುವಿಗೆ ಎಷ್ಟು ರನ್ ಗಳಿಸಿದರೆ ಸಾಕು?” ಎಂಬ ಪ್ರಶ್ನೆಗೆ ಉತ್ತರಿಸಿದ ಶ್ರೇಯಸ್ ಅಯ್ಯರ್, “ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಟಿ20ಯಲ್ಲಿ ಇಂತಿಷ್ಟೇ ರನ್ ಸಾಕು ಎಂದು ಯಾವುದೇ ಸಂಖ್ಯೆಯನ್ನು ನಿಗದಿಪಡಿಸಲು ಸಾಧ್ಯವಿಲ್ಲ. ಏಕೆಂದರೆ ಪಂದ್ಯದ ವೇಳೆ ಇಬ್ಬನಿ ಇದ್ದಾಗ ಅದು ಪ್ರಮುಖ ಪಾತ್ರ ವಹಿಸುತ್ತದೆ. ನಾವು ಕಲೆಹಾಕಿದ್ದ 249 ರನ್‌ಗಳ ಬೃಹತ್ ಮೊತ್ತವನ್ನೇ ಅವರು ಇನ್ನು 9 ಎಸೆತಗಳು ಬಾಕಿ ಇರುವಂತೆಯೇ ಚೇಸ್ ಮಾಡಿ ಮುಗಿಸಿದರು. ಹಾಗಾಗಿ ಪಿಚ್ ಪರಿಸ್ಥಿತಿಯನ್ನು ಮೊದಲೇ ಊಹಿಸಿ ಇಷ್ಟೇ ರನ್ ಗಳಿಸಬೇಕೆಂದು ಟಾರ್ಗೆಟ್ ಇಟ್ಟುಕೊಳ್ಳುವುದು ಕಷ್ಟ” ಎಂದು ಇಬ್ಬನಿಯ ಭಾರಿ ಪ್ರಭಾವವನ್ನು ಒಪ್ಪಿಕೊಂಡಿದ್ದಾರೆ.

ಬೌಲರ್​ಗಳ ತಪ್ಪಿಲ್ಲ!

ಭಾರತೀಯ ಬೌಲರ್‌ಗಳ ವೈಫಲ್ಯದ ಬಗ್ಗೆ ಮಾತನಾಡಿದ ನಾಯಕ, “ಈ ಪಿಚ್‌ನಲ್ಲಿ ಬೌಲರ್‌ಗಳಿಗೆ ತಪ್ಪು ಮಾಡಲು ಅತ್ಯಂತ ಕನಿಷ್ಠ ಅವಕಾಶವಿತ್ತು. ಬೌಲರ್‌ಗಳು ರಣತಂತ್ರ ರೂಪಿಸಿ ಎಸೆಯುವಲ್ಲಿ ಸ್ವಲ್ಪವೇ ತಪ್ಪು ಮಾಡಿದರೂ ಚೆಂಡು ನೇರವಾಗಿ ಹೋಗಿ ಸ್ಟ್ಯಾಂಡ್ಸ್‌ನಲ್ಲಿ ಬೀಳುತ್ತಿತ್ತು. ವೆಸ್ಟ್ ಇಂಡೀಸ್ ಬ್ಯಾಟರ್‌ಗಳು ಅಸಾಧಾರಣವಾಗಿ ಬ್ಯಾಟ್ ಮಾಡಿದರು ಎಂಬುದನ್ನು ಒಪ್ಪಲೇಬೇಕು. ಮೈದಾನದಲ್ಲಿ ನಮ್ಮಿಂದ ಕೆಲವು ರನ್ ತಡೆಯುವ ಅವಕಾಶಗಳು ಕೈತಪ್ಪಿದವು, ಆದರೆ ಅದು ಆಟದ ಒಂದು ಭಾಗ. ಉತ್ತಮವಾಗಿ ಆಡಿದ ಅವರಿಗೆ ಸಂಪೂರ್ಣ ಕ್ರೆಡಿಟ್ ಸಲ್ಲಬೇಕು. ಅಲ್ಲದೆ ದ್ವಿತೀಯ ಇನಿಂಗ್ಸ್ ವೇಳೆ ಹೆಚ್ಚು ಇಬ್ಬನಿ ಇದ್ದುದ್ದರಿಂದ ಬೌಲರ್​ಗಳಿಗೆ ಚೆಂಡನ್ನು ಗ್ರಿಪ್ ಮಾಡಲು ಸಾಧ್ಯವಾಗುತ್ತಿರಲಿಲ್ಲ. ಹೀಗಾಗಿ ಈ ಸೋಲಿಗೆ ಬೌಲರ್​​ಗಳು ಕಾರಣ ಎಂದು ಹೇಳಲಾಗುವುದಿಲ್ಲ” ಎಂದು ಶ್ರೇಯಸ್ ಅಯ್ಯರ್ ತಿಳಿಸಿದರು.

ಟೀಮ್ ಇಂಡಿಯಾ ಪ್ರದರ್ಶನಕ್ಕೆ ಮೆಚ್ಚುಗೆ:

ಸೋಲಿನ ನಡುವೆಯೂ ಭಾರತದ ಯುವ ಆಟಗಾರರ ಪ್ರದರ್ಶನವನ್ನು ಅಯ್ಯರ್ ಮುಕ್ತಕಂಠದಿಂದ ಶ್ಲಾಘಿಸಿದರು. “ಸಂಜು ಸ್ಯಾಮ್ಸನ್ ಮತ್ತು ಅಭಿಷೇಕ್ ಶರ್ಮಾ ತಮ್ಮ ಜವಾಬ್ದಾರಿಯನ್ನು ಅರಿತು ಅದ್ಭುತವಾಗಿ ಬ್ಯಾಟ್ ಮಾಡಿದರು. ಇಬ್ಬರೂ ಸ್ಥಿರ ಪ್ರದರ್ಶನ ನೀಡುತ್ತಾ ತಂಡಕ್ಕೆ ವೇಗದ ಆರಂಭ ಒದಗಿಸಿಕೊಡುತ್ತಿದ್ದಾರೆ. ಇನ್ನು ಬೌಲಿಂಗ್‌ನಲ್ಲಿ ಮಯಾಂಕ್ ಯಾದವ್ ಅತ್ಯುತ್ತಮ ಪ್ರದರ್ಶನ ನೀಡಿದರು. ಅವರು ಪಡೆದ ಆ 3 ಪ್ರಮುಖ ವಿಕೆಟ್‌ಗಳು ನಮಗೆ ಪಂದ್ಯದ ಮಧ್ಯದಲ್ಲಿ ಲಯವನ್ನು ತಂದುಕೊಟ್ಟಿದ್ದವು. ಆದರೆ ಆ ಬಳಿಕ ಮೂಡಿ ಬಂದ ಹೋಪ್-ರದರ್‌ಫೋರ್ಡ್ ಜೊತೆಯಾಟ ಪಂದ್ಯದ ಸಂಪೂರ್ಣ ಮೊಮೆಂಟಮ್ ಅನ್ನು ನಮ್ಮ ಕೈಯಿಂದ ಕಸಿದುಕೊಂಡಿತು” ಎಂದು ಶ್ರೇಯಸ್ ಅಯ್ಯರ್ ಪಂದ್ಯದ ಸನ್ನಿವೇಶವನ್ನು ವಿಶ್ಲೇಷಿಸಿದ್ದಾರೆ.

ಇದನ್ನೂ ಓದಿ: ಭಾರತೀಯ ಪಿಚ್​ನಲ್ಲಿ ಹಿಂದೆಂದೂ ಕಂಡರಿಯದ ದಾಖಲೆ ಬರೆದ ಶಾಯ್ ಹೋಪ್

ಒಟ್ಟಾರೆಯಾಗಿ, ನಾಯಕ ಶ್ರೇಯಸ್ ಅಯ್ಯರ್ ಅವರ ಮಾತುಗಳು ಟೀಮ್ ಇಂಡಿಯಾ ಬೌಲರ್‌ಗಳ ಮೇಲಿನ ಒತ್ತಡವನ್ನು ಕಡಿಮೆ ಮಾಡಿವೆಯಾದರೂ, ಮುಂಬರುವ ಪಂದ್ಯಗಳಲ್ಲಿ ಇಬ್ಬನಿಯ ಸವಾಲನ್ನು ಹೇಗೆ ಎದುರಿಸಬೇಕೆಂಬುದರ ಬಗ್ಗೆ ತಂಡವು ಗಂಭೀರವಾಗಿ ಯೋಚಿಸಬೇಕಿದೆ. ಬ್ಯಾಟಿಂಗ್‌ನಲ್ಲಿ ಅಬ್ಬರಿಸಿದರೂ ಬೌಲಿಂಗ್ ಹಾಗೂ ಫೀಲ್ಡಿಂಗ್‌ನಲ್ಲಿನ ಸಣ್ಣಪುಟ್ಟ ತಪ್ಪುಗಳು ಪಂದ್ಯದ ಫಲಿತಾಂಶವನ್ನು ಬದಲಾಯಿಸಬಲ್ಲವು ಎಂಬುದಕ್ಕೆ ಈ ಸೋಲು ಅತ್ಯುತ್ತಮ ಉದಾಹರಣೆ. ಸರಣಿ ಈಗ 1-1 ರ ಸಮಬಲದಲ್ಲಿದ್ದು, ಮುಂದಿನ ಪಂದ್ಯಗಳಲ್ಲಿ ಭಾರತ ತಂಡ ಯಾವ ರೀತಿಯ ರಣತಂತ್ರದೊಂದಿಗೆ ಕಣಕ್ಕಿಳಿಯಲಿದೆ ಎಂಬುದನ್ನು ಕಾದು ನೋಡಬೇಕಿದೆ.