T20 Records: ಭರ್ಜರಿ ಜಯದೊಂದಿಗೆ ಟಿ20 ಕ್ರಿಕೆಟ್​ನಲ್ಲಿ ಹೊಸ ದಾಖಲೆ ಬರೆದ ತಾಂಜಾನಿಯಾ

ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್​ನಲ್ಲಿ ತಾಂಜಾನಿಯಾ ಮಹಿಳಾ ತಂಡ ಹೊಸ ವಿಶ್ವ ದಾಖಲೆ ಬರೆದಿದೆ. ಚುಟುಕು ಕ್ರಿಕೆಟ್​ನಲ್ಲಿ 200 ಅಥವಾ ಅದಕ್ಕಿಂತ ಹೆಚ್ಚು ರನ್ ಅಂತರದಿಂದ ಎರಡು ಬಾರಿ ಗೆದ್ದ ಮೊದಲ ಮಹಿಳಾ ತಂಡ ಎಂಬ ಹೆಗ್ಗಳಿಕೆಗೆ ತಾಂಜಾನಿಯಾ ತಂಡ ಪಾತ್ರವಾಗಿದೆ. ಟಿ20 ವಿಶ್ವಕಪ್ ಅರ್ಹತಾ ಸುತ್ತಿನಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ಮೊಜಾಂಬಿಕ್ ತಂಡ ಬೌಲಿಂಗ್ ಆಯ್ದುಕೊಂಡಿತು. ಅದರಂತೆ ಇನಿಂಗ್ಸ್​ ಆರಂಭಿಸಿದ ತಾಂಜಾನಿಯಾ ಬ್ಯಾಟರ್ ಫಾತುಮಾ ಕಿಬಾಸು 35 ಎಸೆತಗಳಲ್ಲಿ 62 ರನ್ ಬಾರಿಸಿ ತಂಡಕ್ಕೆ ಉತ್ತಮ ಆರಂಭ ಒದಗಿಸಿದರು. ಇನ್ನು ನಾಲ್ಕನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ಮಾವಡಿ ಸ್ವೀಡಿ 48 ಎಸೆತಗಳಲ್ಲಿ ಅಜೇಯ 87 ರನ್ ಗಳಿಸಿ ತಂಡದ ಮೊತ್ತವನ್ನು 4 ವಿಕೆಟ್ ನಷ್ಟಕ್ಕೆ 228 ರನ್​ಗೆ ತಂದು ನಿಲ್ಲಿಸಿದರು.

ತಾಂಜಾನಿಯಾ ನೀಡಿದ ಬೃಹತ್ ಗುರಿ ಬೆನ್ನತ್ತಿದ ಮೊಜಾಂಬಿಕ್ ತಂಡ ಆರಂಭದಿಂದಲೇ ಮುಗ್ಗರಿಸಿತು. ಇಡೀ ತಂಡ 12.5 ಓವರ್ ಗಳಲ್ಲಿ 28 ರನ್​ಗಳಿಸಿ ಆಲೌಟ್​ ಆಯಿತು. ತಂಡದ ಯಾವುದೇ ಆಟಗಾರ್ತಿ ಎರಡು ಅಂಕಿ ರನ್​ ಗಳಿಸಲಿಲ್ಲ. ಓಪನರ್ ಪಾಲ್ಮಿರಾ ಕುನಿಕಾ 6 ರನ್ ಗಳಿಸಿದ್ದು ಅತ್ಯಧಿಕ ವೈಯುಕ್ತಿಕ ಸ್ಕೋರ್. ತಾಂಜಾನಿಯಾ ಪರ ವೇಗದ ಬೌಲರ್ ಪಿರೈಸ್ ಕಮುನ್ಯ 6 ರನ್ ನೀಡಿ 3 ವಿಕೆಟ್ ಪಡೆದರು. ಇದಲ್ಲದೇ, ನಸ್ರಾ ಸೈದಿ ಮತ್ತು ಸೋಫಿಯಾ ಜೆರೋಮ್ ತಲಾ 2 ವಿಕೆಟ್ ಕಬಳಿಸಿದರು. ಅದರೊಂದಿಗೆ ತಾಂಜಾನಿಯಾ ತಂಡವು 200 ರನ್​ಗಳ ಬೃಹತ್ ವಿಜಯ ಸಾಧಿಸಿತು. ಈ ಮೂಲಕ ಟಿ20 ಕ್ರಿಕೆಟ್​ನಲ್ಲಿ 2 ಬಾರಿ 200 ಅಥವಾ ಅದಕ್ಕಿಂತ ಹೆಚ್ಚಿನ ಅಂತರದಿಂದ ಗೆಲುವು ದಾಖಲಿಸಿದ ತಂಡ ಎಂಬ ದಾಖಲೆ ಬರೆಯಿತು.

ಬೃಹತ್ ಅಂತರದ ಜಯದ ದಾಖಲೆ: ಮಹಿಳಾ ಕ್ರಿಕೆಟ್​ನಲ್ಲಿ ಒಂದು ತಂಡವು ಟಿ20 ಅಂತಾರಾಷ್ಟ್ರೀಯ ಪಂದ್ಯವನ್ನು 200 ಅಥವಾ ಅದಕ್ಕಿಂತ ಹೆಚ್ಚು ರನ್​ಗಳಿಸಿ ಗೆದ್ದಿರುವುದು ಇದು ಐದನೇ ಬಾರಿ. ತಾಂಜಾನಿಯ 2019 ರಲ್ಲಿ ಮಾಲಿ ತಂಡವನ್ನು 268 ರನ್ ಗಳಿಂದ ಸೋಲಿಸಿತ್ತು. ಇದೀಗ ಮೊಜಾಂಬಿಕ್ ತಂಡವನ್ನು 200 ರನ್​ಗಳಿಸಿ ಸೋಲಿಸಿ ವಿಶ್ವ ದಾಖಲೆ ಬರೆದಿದೆ. ಇನ್ನು ಬೃಹತ್ ಮೊತ್ತದ ಗೆಲುವಿನ ದಾಖಲೆಯನ್ನು ಉಗಾಂಡಾ ತಂಡ ಹೊಂದಿದೆ. 2019 ರಲ್ಲಿ ಮಾಲಿ ತಂಡವನ್ನು ಉಗಾಂಡಾ 304 ರನ್​ಗಳಿಂದ ಸೋಲಿಸಿ ಇತಿಹಾಸ ನಿರ್ಮಿಸಿತ್ತು. ಇದಲ್ಲದೇ, ಬಾಂಗ್ಲಾದೇಶವು ಮಾಲ್ಡೀವ್ಸ್ ವಿರುದ್ಧ 249 ರನ್​ಗಳ ಜಯ ಹಾಗೂ ಮತ್ತು ಮಾಲಿ ವಿರುದ್ದ ರುವಾಂಡಾ ತಂಡ 216 ರನ್​ಗಳ ವಿಜಯ ಸಾಧಿಸಿದೆ.

ಇದನ್ನೂ ಓದಿ: 16 ಸಿಕ್ಸರ್, 4 ಫೋರ್: ಒಂದೇ ಓವರ್​ನಲ್ಲಿ 6 ಸಿಕ್ಸ್ ಸಿಡಿಸಿ ವಿಶ್ವ ದಾಖಲೆ ಬರೆದ ಜಸ್ಕರನ್

ಇದನ್ನೂ ಓದಿ: Rashid Khan: ಟಿ20 ವಿಶ್ವಕಪ್​ಗೆ ಅಫ್ಘಾನ್ ತಂಡ ಪ್ರಕಟ: ನಾಯಕತ್ವಕ್ಕೆ ರಶೀದ್ ಖಾನ್ ರಾಜೀನಾಮೆ

ಇದನ್ನೂ ಓದಿ: Crime News: ಯುವತಿಗೆ ಡ್ರಾಪ್ ಕೊಡಲು ಬೈಕ್ ನಿಲ್ಲಿಸಿದ ಯುವಕ: ಆಮೇಲೆ ಆಗಿದ್ದೇ ಬೇರೆ!

ಇದನ್ನೂ ಓದಿ: Crime News: ತಾಯಿಗೆ ಅನೈತಿಕ ಸಂಬಂಧ: ಅದನ್ನೇ ಬಂಡವಾಳ ಮಾಡಿಕೊಂಡ ಮಗಳು

(Tanzania womens team beat Mozambique by 200 runs in t20)