ಆರ್‌ಸಿಬಿಗೆ ಶಾಕ್ ಕೊಟ್ಟ ಯುಪಿ; ಇಬ್ಬರು ಸ್ಟಾರ್ ಆಟಗಾರ್ತಿಯರ ಖರೀದಿ

ಮಹಿಳಾ ಪ್ರೀಮಿಯರ್ ಲೀಗ್‌ 2027ರ ಆಟಗಾರ್ತಿಯರ ಹರಾಜು ಬುಧವಾರ ಕೊಚ್ಚಿಯಲ್ಲಿ ನಡೆಯಿತು. ಈ ಮಿನಿ ಹರಾಜಿನಲ್ಲಿ ಆಸ್ಟ್ರೇಲಿಯಾದ ಆಲ್‌ರೌಂಡರ್ ಸೋಫಿ ಮೊಲಿನ್ಯೂ ಅವರನ್ನು ಯುಪಿ ವಾರಿಯರ್ಸ್ ತಂಡ 1.10 ಕೋಟಿ ರೂ. ನೀಡಿ ಖರೀದಿಸಿದೆ. ಇದೇ ವೇಳೆ, ಆಸ್ಟ್ರೇಲಿಯಾದ ಮತ್ತೊಬ್ಬ ಆಲ್‌ರೌಂಡರ್ ಗ್ರೇಸ್ ಹ್ಯಾರಿಸ್ ಅವರನ್ನು 30 ಲಕ್ಷ ರೂ. ನೀಡಿ ತಂಡಕ್ಕೆ ಸೇರಿಸಿಕೊಂಡಿದೆ. 2024ರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಚೊಚ್ಚಲ ಡಬ್ಲ್ಯುಪಿಎಲ್ ಪ್ರಶಸ್ತಿ ಗೆದ್ದಾಗ ಸೋಫಿ ಮೊಲಿನ್ಯೂ ತಂಡದ ಭಾಗವಾಗಿದ್ದರು. ಇದೀಗ ಅವರನ್ನು ಖರೀದಿಸಲು ಯುಪಿ ವಾರಿಯರ್ಸ್ ಮತ್ತು ಆರ್‌ಸಿಬಿ ನಡುವೆ ತೀವ್ರ ಪೈಪೋಟಿ ನಡೆಯಿತು. ಅಂತಿಮವಾಗಿ 1.10 ಕೋಟಿ ರೂ. ಬಿಡ್ ಮಾಡುವ ಮೂಲಕ ಯುಪಿ ವಾರಿಯರ್ಸ್ ಅವರನ್ನು ತನ್ನ ತೆಕ್ಕೆಗೆ ತೆಗೆದುಕೊಂಡಿತು.

1.10 ಕೋಟಿ ರೂ. ಪಡೆದ ಸೋಫಿ

ಯುಪಿ ವಾರಿಯರ್ಸ್ 50 ಲಕ್ಷ ರೂ. ಮೂಲ ಬೆಲೆಯೊಂದಿಗೆ ಬಿಡ್ಡಿಂಗ್ ಆರಂಭಿಸಿತು. ತಕ್ಷಣವೇ ಆರ್‌ಸಿಬಿ ಕೂಡ ಸ್ಪರ್ಧೆಗೆ ಇಳಿಯಿತು. ಕೆಲವೇ ಕ್ಷಣಗಳಲ್ಲಿ ಬಿಡ್ ಮೊತ್ತ 95 ಲಕ್ಷ ರೂ.ಗೆ ಏರಿಕೆಯಾಯಿತು. ಬಳಿಕ ಯುಪಿ ವಾರಿಯರ್ಸ್ 1 ಕೋಟಿ ರೂ. ಬಿಡ್ ಮಾಡಿದರೆ, ಆರ್‌ಸಿಬಿ 1.05 ಕೋಟಿ ರೂ.ಗೆ ಏರಿಸಿತು. ಕೊನೆಗೆ 1.10 ಕೋಟಿ ರೂ. ಬಿಡ್ ಮಾಡಿದ ಯುಪಿ ತಂಡ ಸೋಫಿ ಮೊಲಿನ್ಯೂ ಅವರನ್ನು ಖರೀದಿಸುವಲ್ಲಿ ಯಶಸ್ವಿಯಾಯಿತು.

ಯುಪಿ ಪಾಲಾದ ಗ್ರೇಸ್ ಹ್ಯಾರಿಸ್

ಇನ್ನು, ಆಸ್ಟ್ರೇಲಿಯಾದ ಆಲ್‌ರೌಂಡರ್ ಗ್ರೇಸ್ ಹ್ಯಾರಿಸ್ ಅವರನ್ನು ಯುಪಿ ವಾರಿಯರ್ಸ್ 30 ಲಕ್ಷ ರೂ. ಮೂಲ ಬೆಲೆಗೆ ಖರೀದಿಸಿದೆ. 2023, 2024 ಮತ್ತು 2025ರ ಆವೃತ್ತಿಗಳಲ್ಲಿ ಇದೇ ತಂಡದ ಪರ ಆಡಿದ್ದ ಹ್ಯಾರಿಸ್ ಅವರನ್ನು ಫ್ರಾಂಚೈಸಿ ಮತ್ತೆ ತಂಡಕ್ಕೆ ಸೇರಿಸಿಕೊಂಡಿದೆ. 2026ರಲ್ಲಿ ಆರ್‌ಸಿಬಿ ಪ್ರಶಸ್ತಿ ಗೆದ್ದಾಗ ಗ್ರೇಸ್ ಹ್ಯಾರಿಸ್ ತಂಡದಲ್ಲಿದ್ದರು. ಆದರೆ, ಎಲಿಸ್ ಪೆರ್ರಿ ತಂಡಕ್ಕೆ ಮರಳುವ ಹಿನ್ನೆಲೆಯಲ್ಲಿ ಬೆಂಗಳೂರು ಫ್ರಾಂಚೈಸಿ ಹ್ಯಾರಿಸ್ ಅವರನ್ನು ಹರಾಜಿಗೂ ಮುನ್ನ ಬಿಡುಗಡೆ ಮಾಡಿತ್ತು.

ಸ್ನೇಹಗೆ ಯುಪಿ ವಾರಿಯರ್ಸ್ ಮಣೆ

ಭಾರತದ ಆಲ್‌ರೌಂಡರ್ ಸ್ನೇಹ ರಾಣಾ ಅವರನ್ನು ಕೂಡ ಯುಪಿ ವಾರಿಯರ್ಸ್ 30 ಲಕ್ಷ ರೂ. ಮೂಲ ಬೆಲೆಗೆ ಖರೀದಿಸಿದೆ. ಈ ಹಿಂದೆ ಅವರು ಗುಜರಾತ್ ಜೈಂಟ್ಸ್, ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಆರ್‌ಸಿಬಿ ತಂಡಗಳನ್ನು ಪ್ರತಿನಿಧಿಸಿದ್ದರು. ಅವರಿಗಾಗಿ ಬೇರೆ ಯಾವುದೇ ತಂಡ ಬಿಡ್ ಮಾಡದ ಕಾರಣ, ಮೂಲ ಬೆಲೆಗೇ ಯುಪಿ ವಾರಿಯರ್ಸ್ ಪಾಲಾದರು.

ಗುಜರಾತ್​ಗೆ ಐರ್ಲೆಂಡ್ ಆಟಗಾರ್ತಿ ಸೇರ್ಪಡೆ

ಐರ್ಲೆಂಡ್‌ನ ಆಲ್‌ರೌಂಡರ್ ಓರ್ಲಾ ಪ್ರೆಂಡರ್‌ಗಾಸ್ಟ್ ಅವರನ್ನು ಗುಜರಾತ್ ಜೈಂಟ್ಸ್ ತಂಡ 30 ಲಕ್ಷ ರೂ. ನೀಡಿ ಖರೀದಿಸಿದೆ. ಈ ವರ್ಷ ಆಡಿರುವ 15 ಟಿ20 ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಅವರು 35ರ ಸರಾಸರಿಯಲ್ಲಿ 455 ರನ್ ಗಳಿಸಿದ್ದಾರೆ. ಅವರ ಸ್ಟ್ರೈಕ್‌ರೇಟ್ 128.89 ಆಗಿದೆ. ಜೊತೆಗೆ 15 ವಿಕೆಟ್‌ಗಳನ್ನು ಕಬಳಿಸಿದ್ದು, ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡರಲ್ಲೂ ಉತ್ತಮ ಪ್ರದರ್ಶನ ನೀಡಿದ್ದಾರೆ.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ