IPL 2022: ರಾಜಸ್ಥಾನ್ ರಾಯಲ್ಸ್ ಸೋತರೂ, ಗೆದ್ದ ಯುಜ್ವೇಂದ್ರ ಚಹಲ್

ರಾಜಸ್ಥಾನ್ ರಾಯಲ್ಸ್ ವಿರುದ್ದ್ ಆರ್​ಸಿಬಿ (RCB vs RR) ಗೆದ್ದಿರಬಹುದು. ಆದರೆ ಯುಜ್ವೇಂದ್ರ ಚಹಲ್ (yuzvendra chahal) ಮಾತ್ರ ಅದ್ಭುತವಾಗಿ ಬೌಲಿಂಗ್ ಮಾಡಿದ್ದರು. ತನ್ನ ಮಾಜಿ ತಂಡವಾದ ಆರ್​ಸಿಬಿ ವಿರುದ್ದವೇ ಚಹಲ್ ಭರ್ಜರಿ ಪ್ರದರ್ಶನ ನೀಡಿರುವುದು ವಿಶೇಷ. ಏಕೆಂದರೆ ಆರ್​ಸಿಬಿ ತಂಡದಲ್ಲೇ ಇರಬೇಕೆಂದು ಬಯಸಿದರೂ ಈ ಸಲ ಚಹಲ್ ಅವರನ್ನು ಆರ್​ಸಿಬಿ ಫ್ರಾಂಚೈಸಿ ತಂಡದಿಂದ ಕೈಬಿಟ್ಟಿತ್ತು. ಇದೀಗ ಆರ್​ಸಿಬಿ ವಿರುದ್ದದವೇ ಚಹಲ್ 4 ಓವರ್​ ಬೌಲಿಂಗ್ ಮಾಡಿ ಕೇವಲ 15 ರನ್​ ನೀಡಿ 2 ವಿಕೆಟ್ ಪಡೆದಿದ್ದಾರೆ. ಅಷ್ಟೇ ಅಲ್ಲದೆ ವಿರಾಟ್ ಕೊಹ್ಲಿಯನ್ನು ರನೌಟ್ ಮಾಡಿ ಮಿಂಚಿದ್ದಾರೆ. ಅಂದರೆ ಆರ್​ಸಿಬಿ ತಂಡದ ಎಲ್ಲಾ ಬೌಲರ್​ಗಳಿಂದ ಚಹಲ್ ಕಡಿಮೆ ರನ್ ನೀಡುವ ಮೂಲಕ ಚಹಲ್ ಆರ್​ಸಿಬಿ ಪ್ರಾಂಚೈಸಿಗೆ ತಕ್ಕ ಉತ್ತರ ನೀಡಿದ್ದಾರೆ.

ಏಕೆಂದರೆ ಈ ಪಂದ್ಯದಲ್ಲಿ ಅತ್ಯಂತ ಕಡಿಮೆ ನೀಡಿದ ಬೌಲರ್ ಚಹಲ್. ಅತ್ತ ಆರ್​ಸಿಬಿ ಆಯ್ಕೆ ಮಾಡಿದ ಸ್ಪಿನ್ನರ್ ವನಿಂದು ಹಸರಂಗ ನೀಡಿದ್ದು 32 ರನ್​ಗಳನ್ನು. ಚಹಲ್ ನೀಡಿದ್ದು ಕೇವಲ 15 ರನ್​. ಅಲ್ಲದೆ ಚಹಲ್ ಅವರ ಸ್ಪೆಲ್‌ನಲ್ಲಿ 12 ಬಾಲ್ ಡಾಟ್ ಹಾಕಿದ್ದರು. ಅಷ್ಟೇ ಯಾಕೆ ತಮ್ಮ ಓವರ್​ನಲ್ಲಿ ನೀಡಿದ್ದು ಕೇವಲ ಒಂದೇ ಒಂದು ಬೌಂಡರಿ ಮಾತ್ರ. ಆರ್​ಸಿಬಿ ವಿರುದ್ದ ಮಧ್ಯಮ ಓವರ್‌ಗಳಲ್ಲಿ ಚಹಲ್ ಅವರು ಸ್ಪಿನ್ ಮೋಡಿ ಮಾಡಿದ್ದರು.

ಮೊದಲ ಓವರ್​ನಲ್ಲಿ ಡುಪ್ಲೆಸಿಸ್​ ವಿಕೆಟ್ ಪಡೆದ ಚಹಲ್, 2ನೇ ಓವರ್​ನ ನಾಲ್ಕನೇ ಎಸೆತದಲ್ಲಿ ವಿರಾಟ್ ಕೊಹ್ಲಿಯನ್ನು ರನೌಟ್ ಮಾಡಿದ್ದರು. ಮರು ಎಸೆತದಲ್ಲೇ ಡೇವಿಡ್ ವಿಲ್ಲಿ ಅವರನ್ನು ಬೌಲ್ಡ್ ಮಾಡಿ ಮತ್ತೊಂದು ಯಶಸ್ಸು ತಂದುಕೊಟ್ಟಿದ್ದರು. ಈ ಮೂಲಕ ಆರ್‌ಸಿಬಿಗೆ ತಂಡಕ್ಕೆ ಬ್ಯಾಕ್ ಟು ಬ್ಯಾಕ್ ಶಾಕ್ ನೀಡಿದ್ದರು. ಅಲ್ಲದೆ ಒಂದು ಹಂತದಲ್ಲಿ ಇಡೀ ಪಂದ್ಯದ ಮೇಲೆ ನಿಯಂತ್ರಣ ಹೊಂದಿದ್ದರು. ಇನ್ನು ನಿರ್ಣಾಯಕ ಹಂತದಲ್ಲಿ 17ನೇ ಓವರ್ ಬೌಲ್ ಮಾಡಿದ್ದ ಚಹಲ್ ನೀಡಿದ್ದು ಕೇವಲ 4 ರನ್​ ಮಾತ್ರ. ಅಂದರೆ ಆರ್​ಸಿಬಿ ವಿರುದ್ದ ಎಲ್ಲಾ ರೀತಿಯಲ್ಲೂ ಮಿಂಚುವ ಮೂಲಕ ಯುಜ್ವೇಂದ್ರ ಚಹಲ್ ಗೆದ್ದಿದ್ದಾರೆ.

ಹೊಸ ತಂಡ ಭರ್ಜರಿ ಪ್ರದರ್ಶನ: ಐಪಿಎಲ್ 2022 ರ ಹರಾಜಿನಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡವು ಆರೂವರೆ ಕೋಟಿ ರೂ.ಗೆ ಚಹಲ್ ಅವರನ್ನು ಈ ಬಾರಿ ಖರೀದಿಸಿತು. ವಿಶೇಷ ಎಂದರೆ RCB ತಂಡವು ಚಹಲ್ ಅವರಿಗಾಗಿ ಬಿಡ್​ ಮಾಡಿರಲಿಲ್ಲ. ಈ ನೋವನ್ನು ಹಂಚಿಕೊಂಡಿದ್ದ ಚಹಲ್ ನನ್ನನ್ನು ಮೆಗಾ ಹರಾಜಿನ ಮೂಲಕ ಖರೀದಿಸುತ್ತೇವೆ ಎಂದು ಆರ್​ಸಿಬಿ ತಿಳಿಸಿತ್ತು. ನಾನು ಯಾವುದೇ ಮೊತ್ತಕ್ಕೆ ಡಿಮ್ಯಾಂಡ್ ಮಾಡಿರಲಿಲ್ಲ. ಇದಾಗ್ಯೂ ಅವರು ನನ್ನನ್ನು ಕೈಬಿಟ್ಟಿದ್ದು ತುಂಬಾ ನಿರಾಸೆಯಾಗಿತ್ತು ಎಂದು ತಿಳಿಸಿದ್ದರು. ಇದೀಗ ಆರ್​ಸಿಬಿ ಫ್ರಾಂಚೈಸಿಗೆ ಭರ್ಜರಿ ಪ್ರದರ್ಶನದ ಮೂಲಕ ಯುಜ್ವೇಂದ್ರ ಚಹಲ್ ಭರ್ಜರಿ ಉತ್ತರ ನೀಡಿದ್ದಾರೆ.

ಇದನ್ನೂ ಓದಿ: KL Rahul: ಟಿ20 ಕ್ರಿಕೆಟ್​ನಲ್ಲಿ ಮತ್ತೊಂದು ಸಾಧನೆ ಮಾಡಿದ ಕೆಎಲ್ ರಾಹುಲ್