2 ಬಾರಿ ಚೆಸ್ ವಿಶ್ವಕಪ್ ಗೆದ್ದಿದ್ದ ಗ್ರ್ಯಾಂಡ್ ಮಾಸ್ಟರ್ ವಿಶ್ವನಾಥನ್ ಆನಂದ್
Viswanathan Anand: ವಿಶ್ವನಾಥನ್ ಆನಂದ್ ಅವರ ಈ ಕ್ರಾಂತಿಯ ಹೊಸ ಅಧ್ಯಾಯದೊಂದಿಗೆ ಆರ್. ಪ್ರಜ್ಞಾನಂದ ಚದುರಂಗದಾಟದಲ್ಲಿ ಹೊಸ ಸಂಚಲನ ಸೃಷ್ಟಿಸುತ್ತಿದ್ದಾರೆ. ಅಲ್ಲದೆ ತಮ್ಮ 18ನೇ ವಯಸ್ಸಿನಲ್ಲೇ ಚೆಸ್ ವಿಶ್ವಕಪ್ನಲ್ಲಿ ಫೈನಲ್ಗೇರುವ ಮೂಲಕ ಹೊಸ ಇತಿಹಾಸ ನಿರ್ಮಿಸಿದ್ದಾರೆ.
Updated on: Aug 24, 2023 | 5:29 PM
ವಿಶ್ವ ಚಾಂಪಿಯನ್ ವಿಶ್ವನಾಥನ್ ಆನಂದ್…ಭಾರತದಲ್ಲಿ ಏಕಾಂಗಿಯಾಗಿ ಚೆಸ್ ಕ್ರಾಂತಿಯನ್ನು ಹುಟ್ಟುಹಾಕಿದ ಚದುರಂಗ ಚತುರ ಎಂದರೆ ತಪ್ಪಾಗಲಾರದು. ಏಕೆಂದರೆ ಚೆಸ್ ಅನ್ನು ಜಗತ್ತಿಗೆ ಪರಿಚಯಿಸಿದ ಭಾರತೀಯರಾದರೂ, ಚದುರಂಗದಾಟದಲ್ಲಿ ಜಾಣ್ಮೆಯ ನಡೆಯೊಂದಿಗೆ ಜಾಗತಿಕ ಮಟ್ಟದಲ್ಲಿ ಭಾರತದ ಕೀರ್ತಿ ಪಾತಾಕೆಯನ್ನು ಹಾರಿಸಿದ್ದು ವಿಶ್ವನಾಥನ್ ಆನಂದ್.
ವಿಶ್ವ ವಿಖ್ಯಾತ ಚದುರಂಗ ಚತುರರು ಎನಿಸಿಕೊಂಡಿದ್ದ ಉಕ್ರೇನ್ನ ರುಸ್ಲಾನ್ ಪೊನೊಮರಿವ್, ರಷ್ಯಾದ ವ್ಲಾಡಿಮಿರ್ ಬೊರಿಸೊವಿಚ್ ಕ್ರಾಮ್ನಿಕ್ ಅವರಿಗೆ ಸೋಲುಣಿಸುವ ಮೂಲಕ ವಿಶ್ವನಾಥನ್ ಆನಂದ್ ಹೊಸ ಅಧ್ಯಾಯಕ್ಕೆ ನಾಂದಿ ಹಾಡಿದ್ದರು. ಈ ಅಧ್ಯಾಯದ ಮುಂದುವರೆದ ಭಾಗ ಇದೀಗ 18ರ ಹರೆಯದ ರಮೇಶ್ಬಾಬು ಪ್ರಜ್ಞಾನಂದ ಅವರ ಫೈನಲ್ ಸಾಧನೆ.
ಆದರೆ ಆರ್. ಪ್ರಜ್ಞಾನಂದ ಚೆಸ್ ವಿಶ್ವಕಪ್ನಲ್ಲಿ ಫೈನಲ್ಗೇರುವ 20 ವರ್ಷಗಳ ಮುಂಚೆಯೇ ಗ್ರ್ಯಾಂಡ್ ಮಾಸ್ಟರ್ ವಿಶ್ವನಾಥನ್ ಆನಂದ್ 2 ಬಾರಿ ಚೆಸ್ ವಿಶ್ವಕಪ್ನಲ್ಲಿ ಚಾಂಪಿಯನ್ ಆಗಿದ್ದರು ಎಂಬುದು ಅನೇಕರಿಗೆ ತಿಳಿದಿಲ್ಲ.
2000 ರಲ್ಲಿ ಬೀಜಿಂಗ್ನಲ್ಲಿ ನಡೆದ ಮೊದಲ ಚೆಸ್ ವಿಶ್ವಕಪ್ನಲ್ಲಿ ಸೋವಿಯತ್ ಒಕ್ಕೂಟದ ಎವ್ಗೆನಿ ಬರೀವ್ ಅವರನ್ನು ಮಣಿಸುವ ಮೂಲಕ ವಿಶ್ವನಾಥನ್ ಆನಂದ್ ಚೊಚ್ಚಲ ವಿಶ್ವಕಪ್ ಗೆದ್ದಿದ್ದರು.
ಇನ್ನು 2002 ರಲ್ಲಿ ಹೈದರಾಬಾದ್ನಲ್ಲಿ ನಡೆದ ಚೆಸ್ ವಿಶ್ವಕಪ್ನಲ್ಲಿ ವಿಶ್ವನಾಥನ್ ಆನಂದ್ ಚಾಂಪಿಯನ್ ಪಟ್ಟದೊಂದಿಗೆ ಕಾಣಿಸಿಕೊಂಡಿದ್ದರು. ಅಲ್ಲದೆ ಫೈನಲ್ನಲ್ಲಿ ಸೋವಿಯತ್ ಒಕ್ಕೂಟ ಗ್ರ್ಯಾಂಡ್ ಮಾಸ್ಟರ್ ರುಸ್ತಮ್ ಕಾಸಿಮ್ಜಾನೋವ್ ಅವರಿಗೆ ಅನಿರೀಕ್ಷಿತ ಸೋಲುಣಿಸಿ 2ನೇ ಬಾರಿಗೆ ಚಾಂಪಿಯನ್ ಆಗಿ ಹೊರಹೊಮ್ಮಿದ್ದರು.
ಈ ಎರಡು ವಿಶ್ವ ಚಾಂಪಿಯನ್ ಪಟ್ಟಕ್ಕಿಂತಲೂ ಮುನ್ನ ವಿಶ್ವನಾಥನ್ ಆನಂದ್ 1998 ರಲ್ಲಿ ಏಷ್ಯನ್ ಚಾಂಪಿಯನ್ ಆಗಿದ್ದರು. ಹಾಗೆಯೇ ಚೆಸ್ ವಿಶ್ವಕಪ್ ಅಲ್ಲದೆ ವಿಶ್ವನಾಥನ್ ಆನಂದ್ ಅವರು 2007, 2008, 2010, 2012 ರಲ್ಲಿ ಕ್ಲಾಸಿಕ್ ವರ್ಲ್ಡ್ ಚಾಂಪಿಯನ್ಶಿಪ್ನಲ್ಲಿ 4 ಬಾರಿ ವಿಶ್ವ ಚಾಂಪಿಯನ್ ಆಗಿ ಹೊರಹೊಮ್ಮಿದ್ದರು.
ಇದೀಗ ಈ ಕ್ರಾಂತಿಯ ಹೊಸ ಅಧ್ಯಾಯದೊಂದಿಗೆ ಆರ್. ಪ್ರಜ್ಞಾನಂದ ಚದುರಂಗದಾಟದಲ್ಲಿ ಹೊಸ ಸಂಚಲನ ಸೃಷ್ಟಿಸುತ್ತಿದ್ದಾರೆ. ತಮ್ಮ 18ನೇ ವಯಸ್ಸಿನಲ್ಲೇ ಚೆಸ್ ವಿಶ್ವಕಪ್ನಲ್ಲಿ ಫೈನಲ್ಗೇರುವ ಮೂಲಕ ಹೊಸ ಇತಿಹಾಸ ನಿರ್ಮಿಸಿದ್ದಾರೆ.
ವಿಶ್ವ ಚೆಸ್ನಲ್ಲಿ ಭಾರತೀಯರ ಪಾರುಪತ್ಯ:
ಅಝರ್ಬೈಜಾನ್ನಲ್ಲಿ ನಡೆದ ಈ ಬಾರಿಯ ಚೆಸ್ ವಿಶ್ವಕಪ್ನ ಕ್ವಾರ್ಟರ್ಫೈನಲ್ನಲ್ಲಿ ನಾಲ್ವರು ಭಾರತೀಯರು ಕಾಣಿಸಿಕೊಂಡಿದ್ದರು ಎಂಬುದು ವಿಶೇಷ. ಡಿ ಗುಕೇಶ್ , ಅರ್ಜುನ್ ಎರಿಗೈಸಿ, ವಿದಿತ್ ಗುಜರಾತಿ ಮತ್ತು ಆರ್. ಪ್ರಜ್ಞಾನಂದ ಅತ್ಯುತ್ತಮ ಪ್ರದರ್ಶನದ ಮೂಲಕ ನಿರ್ಣಾಯಕ ಹಂತಕ್ಕೇರಿದ್ದರು. ಇವರಲ್ಲಿ ಜಾಣ ನಡೆಯೊಂದಿಗೆ ಎಲ್ಲಾ ಸವಾಲುಗಳನ್ನು ಮೆಟ್ಟಿ ನಿಂತ ಆರ್. ಪ್ರಜ್ಞಾನಂದ ವಿಶ್ವಕಪ್ ಫೈನಲ್ ಆಡಿದ್ದರು.
ಆದರೆ ಅಂತಿಮ ಹಣಾಹಣಿಯಲ್ಲಿ ಮ್ಯಾಗ್ನಸ್ ಕಾರ್ಲ್ಸೆನ್ ವಿರುದ್ದ ವಿರೋಚಿತವಾಗಿ ಸೋಲೊಪ್ಪಿಕೊಳ್ಳಬೇಕಾಯಿತು. ಇದಾಗ್ಯೂ ವಿಶ್ವನಾಥನ್ ಆನಂದ್ ಬಳಿಕ ಚೆಸ್ ವಿಶ್ವಕಪ್ನಲ್ಲಿ ಫೈನಲ್ ಪ್ರವೇಶಿಸಿದ 2ನೇ ಭಾರತೀಯ ಎಂಬ ಹೆಗ್ಗಳಿಕೆಗೆ ಆರ್. ಪ್ರಜ್ಞಾನಂದ ಪಾತ್ರರಾಗಿದ್ದಾರೆ.
