IND vs SL: ತಂಡವನ್ನು ಒಗ್ಗಟ್ಟಿನ್ನಲ್ಲಿಡುವುದು ಮುಖ್ಯ; ಕೋಚ್ ದ್ರಾವಿಡ್ ಹಾಗೂ ಯುವ ಆಟಗಾರರ ಬಗ್ಗೆ ನಾಯಕ ಧವನ್ ಹೇಳಿದಿಷ್ಟು

ಶ್ರೀಲಂಕಾ ಪ್ರವಾಸದಲ್ಲಿ (Sri Lanka tour) ಭಾರತ ತಂಡ ಏಕದಿನ ಮತ್ತು ಟಿ 20 ಸರಣಿಗೆ ಸಿದ್ಧವಾಗಿದೆ. ಏಕದಿನ ಸರಣಿಯು ಜುಲೈ 18 ರ ಭಾನುವಾರದಿಂದ ಪ್ರಾರಂಭವಾಗಲಿದೆ. ಇದರೊಂದಿಗೆ ಭಾರತದ ಅನೇಕ ಯುವ ಆಟಗಾರರಿಗೆ ಈ ಸರಣಿಯ ಮೂಲಕ ಅಂತರರಾಷ್ಟ್ರೀಯ ಕ್ರಿಕೆಟ್ ಅನುಭವವನ್ನು ಪಡೆಯುವ ಅವಕಾಶ ಸಿಗಲಿದೆ. ಈ ಆಟಗಾರರಿಗೆ ಇದು ವಿಶೇಷ ಸರಣಿಯಾಗಲಿದೆ. ಅದೇ ರೀತಿಯಲ್ಲಿ, ಈ ಸರಣಿಯು ತಂಡದ ಹಿರಿಯ ಬ್ಯಾಟ್ಸ್‌ಮನ್ ಶಿಖರ್ ಧವನ್‌ಗೆ (Shikhar Dhawan) ಬಹಳ ವಿಶೇಷವಾಗಿದೆ, ಏಕೆಂದರೆ ಅವರು ಮೊದಲ ಬಾರಿಗೆ ಭಾರತೀಯ ತಂಡದ ನಾಯಕತ್ವ ವಹಿಸಲಿದ್ದಾರೆ. ಅಂತಹ ಪರಿಸ್ಥಿತಿಯಲ್ಲಿ, ಅವರ ಗುರಿ ಸರಣಿಯನ್ನು ಗೆಲ್ಲುವುದು ಮಾತ್ರವಲ್ಲ, ಎಲ್ಲರನ್ನೂ ಒಂದುಗೂಡಿಸಿ ಉತ್ತಮ ಮಾನಸಿಕ ಸ್ಥಿತಿಯಲ್ಲಿಡುವುದು.

ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮಾ ಅವರ ಅನುಪಸ್ಥಿತಿಯಲ್ಲಿ ಎಡಗೈ ಓಪನರ್ ಶಿಖರ್ ಅವರಿಗೆ ಈ ಜವಾಬ್ದಾರಿಯನ್ನು ನೀಡಲಾಗಿದೆ. ಹಿರಿಯ ವೇಗದ ಬೌಲರ್ ಭುವನೇಶ್ವರ್ ಕುಮಾರ್ ಉಪನಾಯಕನಾಗಿ ಪ್ರವಾಸಕ್ಕೆ ಹೋಗುತ್ತಿದ್ದಾರೆ. ಧವನ್ ನಾಯಕತ್ವದಲ್ಲಿ, ಭಾರತ ತಂಡವು ಈ ಪ್ರವಾಸದಲ್ಲಿ ಆರು ಪಂದ್ಯಗಳು, 3 ಏಕದಿನ ಮತ್ತು 3 ಟಿ 20 ಐಗಳನ್ನು ಆಡಲಿದೆ. ಅಂತಹ ಪರಿಸ್ಥಿತಿಯಲ್ಲಿ, ಅನೇಕ ಹೊಸ ಆಟಗಾರರು ಇದರಲ್ಲಿ ತಮ್ಮ ಕೌಶಲ್ಯಗಳನ್ನು ತೋರಿಸಲು ಅವಕಾಶವನ್ನು ಪಡೆಯುತ್ತಾರೆ, ಆದರೆ ಇತರ ಕೆಲವು ಆಟಗಾರರು ಈ ಸರಣಿಯಿಂದಾಗಿ ತಂಡಕ್ಕೆ ಮರಳಲು ಅವಕಾಶ ಪಡೆಯುತ್ತಾರೆ.

ತಂಡವನ್ನು ಸಂತೋಷದಿಂದ ಮತ್ತು ಒಗ್ಗಟ್ಟಿನಿಂದ ಇಡುವುದು ಮುಖ್ಯ ಶಿಖರ್ ಧವನ್ ಈ ವಿಶೇಷ ಪ್ರವಾಸ ಮತ್ತು ಸವಾಲಿನ ಪಾತ್ರಕ್ಕೆ ಸಿದ್ಧರಾಗಿದ್ದಾರೆ. ಈ ಪ್ರವಾಸದಲ್ಲಿ ತಮ್ಮ ನಿಲುವು ಮತ್ತು ಗುರಿಯನ್ನು ಸ್ಪಷ್ಟಪಡಿಸಿದ್ದಾರೆ. ಸ್ಟಾರ್ ಸ್ಪೋರ್ಟ್ಸ್ ಕಾರ್ಯಕ್ರಮ ಫಾಲೋ ದಿ ಬ್ಲೂಸ್ ನಲ್ಲಿ ಧವನ್, ನಾನು ಭಾರತೀಯ ತಂಡದ ನಾಯಕನಾಗಿದ್ದೇನೆ ಎಂಬುದು ನನಗೆ ದೊಡ್ಡ ಸಾಧನೆಯಾಗಿದೆ. ನಾಯಕನಾಗಿ, ಎಲ್ಲರೂ ಒಗ್ಗೂಡಿ ಸಂತೋಷವಾಗಿರಬೇಕು ಎಂದು ನಾನು ಬಯಸುತ್ತೇನೆ – ಅದು ಅತ್ಯಂತ ಮುಖ್ಯ ವಿಷಯ. ನಮ್ಮಲ್ಲಿ ಉತ್ತಮ ತಂಡವಿದೆ, ಉತ್ತಮ ಬೆಂಬಲ ಸಿಬ್ಬಂದಿ ಇದ್ದಾರೆ ಮತ್ತು ನಾವು ಮೊದಲು ಒಟ್ಟಿಗೆ ಕೆಲಸ ಮಾಡಿದ್ದೇವೆ.

ಯುವ ಆಟಗಾರರ ಕನಸುಗಳು ನನಸಾಗುತ್ತಿವೆ ಈ ಪ್ರವಾಸದಲ್ಲಿ, ಇದುವರೆಗೆ ಅಂತರರಾಷ್ಟ್ರೀಯ ಪಂದ್ಯವನ್ನು ಆಡದ 6 ಹೊಸ ಆಟಗಾರರಿಗೆ ಭಾರತೀಯ ತಂಡದಲ್ಲಿ ಸ್ಥಾನ ಸಿಕ್ಕಿದೆ. ಅವರ ಬಗ್ಗೆ ಮಾತನಾಡಿದ ಧವನ್, ಈ ಆಟಗಾರರಿಗೆ ಸಂತೋಷವಾಗಿದೆ ಮತ್ತು ಅವಕಾಶ ನೀಡಿದಾಗ ಅವರು ಆಟವನ್ನು ಆನಂದಿಸಲು ಬಯಸುತ್ತಾರೆ ಎಂದು ಹೇಳಿದರು. ತಂಡದಲ್ಲಿ ಯುವಕರನ್ನು ಹೊಂದಲು ಮತ್ತು ಅವರ ಕನಸುಗಳು ನನಸಾಗಲು ನನಗೆ ಸಂತೋಷವಾಗಿದೆ. ಈ ಯುವಕರು ಕೆಲವು ಕನಸುಗಳೊಂದಿಗೆ ತಮ್ಮ ನಗರಗಳಿಂದ ಹೊರಬಂದಿದ್ದಾರೆ. ಇಂದು ಅವರ ಕನಸುಗಳು ಈಡೇರುತ್ತಿವೆ ಮತ್ತು ಈಗ ಅವರು ಟೀಮ್ ಇಂಡಿಯಾದಲ್ಲಿ ಸ್ಥಾನ ಪಡೆದ ಪ್ರಯಾಣವನ್ನು ಆನಂದಿಸಬೇಕು.

ಮೊದಲಿನಿಂದಲೂ ದ್ರಾವಿಡ್‌ ಅವರೊಂದಿಗೆ ಉತ್ತಮ ಸಂಬಂಧ ಈ ಪ್ರವಾಸವು ಧವನ್ ಅಥವಾ ಆಟಗಾರನಿಗೆ ಮಾತ್ರವಲ್ಲ, ರಾಹುಲ್ ದ್ರಾವಿಡ್ ತರಬೇತುದಾರನಾಗಿ ಕೂಡ ವಿಶೇಷವಾಗಿದೆ. ಹಿರಿಯ ತಂಡದ ಜವಾಬ್ದಾರಿಯನ್ನು ಅವರು ಮೊದಲ ಬಾರಿಗೆ ನಿರ್ವಹಿಸುತ್ತಿದ್ದಾರೆ. ಆದಾಗ್ಯೂ, ಅವರು ಈ ತಂಡದ ಅನೇಕ ಆಟಗಾರರೊಂದಿಗೆ ಜೂನಿಯರ್ ಮತ್ತು ಎ ತಂಡಗಳಲ್ಲಿ ಕೆಲಸ ಮಾಡಿದ್ದಾರೆ. ದ್ರಾವಿಡ್ ಬಗ್ಗೆ ಮಾತನಾಡಿದ ಧವನ್, ನನಗೆ ರಾಹುಲ್ ಭಾಯ್ ಅವರೊಂದಿಗೆ ಉತ್ತಮ ಸಂಬಂಧವಿದೆ. ನಾನು ರಣಜಿ ಟ್ರೋಫಿ ಆಡಲು ಪ್ರಾರಂಭಿಸಿದಾಗ, ನಾನು ಅವರ ವಿರುದ್ಧ ಆಡಿದ್ದೇನೆ ಮತ್ತು ಅಂದಿನಿಂದ ಅವರನ್ನು ತಿಳಿದಿದ್ದೇನೆ. ನಾನು ಇಂಡಿಯಾ ಎ ಪರ ಆಡಿದಾಗ, ನಾನು ಕ್ಯಾಪ್ಟನ್ ಮತ್ತು ಅವರು ಕೋಚ್ ಆಗಿದ್ದರಿಂದ ಮಾತುಕತೆ ನಡೆದಿತ್ತು. ಅವರು ಎನ್‌ಸಿಎ ನಿರ್ದೇಶಕರಾದಾಗ, ನಾವು ಸುಮಾರು 20 ದಿನಗಳ ಕಾಲ ಅಲ್ಲಿಗೆ ಹೋಗುತ್ತಿದ್ದೆವು, ಆದ್ದರಿಂದ ಸಾಕಷ್ಟು ಮಾತುಕತೆ ನಡೆದಿತ್ತು. ಈಗ ನಾವು ಆರು ಪಂದ್ಯಗಳನ್ನು ಒಟ್ಟಿಗೆ ಆಡುವ ಅವಕಾಶವನ್ನು ಪಡೆದುಕೊಂಡಿದ್ದೇವೆ ಆದ್ದರಿಂದ ಅದು ತುಂಬಾ ಖುಷಿ ನೀಡಿದೆ. ನಾವೆಲ್ಲರೂ ಒಟ್ಟಿಗೆ ಉತ್ತಮವಾಗಿ ಕಾರ್ಯನಿರ್ವಹಿಸುತ್ತೇವೆ ಎಂದು ನಾನು ಭಾವಿಸುತ್ತೇನೆ ಎಂದಿದ್ದಾರೆ.

ಇದನ್ನೂ ಓದಿ: IND vs SL: ಭಾರತ- ಶ್ರೀಲಂಕಾ ಸರಣಿಯ ನೂತನ ವೇಳಾಪಟ್ಟಿ ಪ್ರಕಟ; ಪಂದ್ಯ ಆರಂಭವಾಗುವ ಸಮಯವೂ ಬದಲಾಗಿದೆ