ಅಗ್ಗದ ಲೆಹೆಂಗಾ ಕಳಿಸಿದ ವರನ ಕುಟುಂಬ, ಈ ಮದುವೆಯೇ ಬೇಡವೆಂದ ವಧು

Viral : ಹಿರಿಯರು ನಿರ್ಧರಿಸಿದ ಮದುವೆ ಎಂದಮೇಲೆ ಎಲ್ಲವೂ ವಧುವರರ ಇಷ್ಟದಂತೆಯೇ ಆಗುತ್ತದೆ ಎಂದು ಹೇಳಲಾಗುವುದಿಲ್ಲ. ಅವರದೂ ಇಷ್ಟ ಇವರದೂ ಇಷ್ಟ ಅಂತ ಅಷ್ಟಷ್ಟೇ ಇಷ್ಟಕಷ್ಟಗಳ ನಡುವೆ ಮದುವೆ ತಯಾರಿ ನಡೆಯುತ್ತಿರುತ್ತದೆ. ಕೊನೆಗೆ ಹಾಗೂ ಹೀಗೂ ಆಗಿ ಅಂತೂ ಮದುವೆ ಎನ್ನುವುದೊಂದು ಆಗಿಯೇ ಬಿಡುತ್ತದೆ. ಆದರೆ ಮದುವೆಯೊಂದು ಮುರಿದು ಬೀಳುತ್ತದೆ ಎಂದರೆ ಅದಕ್ಕೆ ಇನ್ನೇನೋ ಗಂಭೀರ ಕಾರಣಗಳಿರುತ್ತವೆ ಎಂದರ್ಥ. ಆದರೆ ಇದೀಗ ವೈರಲ್ ಆಗುತ್ತಿರುವ ಈ ಸುದ್ದಿಯನ್ನು ಗಮನಿಸಿ. ವರನ ಮನೆಯವರು ಅಗ್ಗದ ಲೆಹೆಂಗಾ ಕಳಿಸಿದ್ದಾರೆಂಬ ಕಾರಣಕ್ಕೆ ವಧು ಈ ಮದುವೆಯೇ ಬೇಡವೆಂದು ತೀರ್ಮಾನಿಸಿದಳು.

ಮದುವೆಗೆ ಕೆಲ ದಿನಗಳಿರುವಾಗ ಲಕ್ನೋದಿಂದ ವರನ ತಂದೆತಾಯಿ ವಧುವಿಗೆಂದು ರೂ. 10,000 ಲೆಹೆಂಗಾ ಆರ್ಡರ್ ಮಾಡಿದರು. ಆದರೆ ಇದು ಅಗ್ಗದ ಲೆಹೆಂಗಾ ತನಗೆ ಇಷ್ಟವಾಗಿಲ್ಲ ಎಂದು ಆಕೆ ಅದನ್ನು ನಿರಾಕರಿಸಿದಳು. ಅಷ್ಟೇ ಅಲ್ಲ ಈ ಮದುವೆಯೇ ಬೇಡವೆಂದು ಹೇಳಿದಳು. ಉತ್ತರಾಖಾಂಡದ ಹಲ್ದಾನಿಯಲ್ಲಿ ವಧು ವಾಸವಾಗಿದ್ದಾಳೆ. ಈ ಮದುವೆ ಆಮಂತ್ರಣ ಪತ್ರಿಕೆಗಳು ಎಲ್ಲೆಡೆ ಹಂಚಿಯಾಗಿತ್ತು. ಜೂನ್​ನಲ್ಲಿ ಇಬ್ಬರೂ ನಿಶ್ಚಿತಾರ್ಥಕ್ಕೆ ಒಳಗಾಗಿದ್ದರು. ನವೆಂಬರ್ 5ರಂದು ಇವರಿಬ್ಬರ ಮದುವೆ ನಡೆಯಬೇಕಿತ್ತು. ಇದೀಗ ಪೊಲೀಸರು ಈ ಮದುವೆ ರದ್ದಾಗಿದೆ ಎಂದು ಹೇಳಿದ್ದಾರೆ.

ನಿಜವಾದ ಕಾರಣವೇನಿತ್ತೋ? ತಿಳಿದುಬಂದಿಲ್ಲ. ಆದರೆ ಲೆಹೆಂಗಾದ ವಿಷಯವಾಗಿ ಮದುವೆ ಬೇಡವೆನ್ನುವುದು ಅಷ್ಟು ಸಮಂಜಸವೂ ಎನ್ನಿಸುತ್ತಿಲ್ಲ. ಯಾರಿಗೆ ಗೊತ್ತು ಯಾರ ಮನಸು, ಸಂದರ್ಭ, ನಿರೀಕ್ಷೆ, ಗುರಿ ಏನೆಲ್ಲ ಇರುತ್ತದೆ ಎಂದು?

ಮತ್ತಷ್ಟು ವೈರಲ್​ ವಿಡಿಯೋಗಾಗಿ ಕ್ಲಿಕ್ ಮಾಡಿ