ಪ್ಲಾಸ್ಟಿಕ್ ಬಾಟಲಿಗಳನ್ನು ಕೊಟ್ಟರೆ ಬಸ್ನಲ್ಲಿ ಉಚಿತ ಪ್ರಯಾಣ, ಬಸ್ ನಿಲ್ದಾಣದಲ್ಲಿದೆ ಮಶಿನ್; ಈ ದೇಶದಲ್ಲೊಂದು ವಿನೂತನ ಆಫರ್ !
600 ಎಂಎಲ್ ಅಥವಾ ಅದಕ್ಕೂ ಕಡಿಮೆ ಅಳತೆಯ ಪ್ರತಿ ಬಾಟಲಿಗೂ ಒಂದು ಪಾಯಿಂಟ್ ಇರುತ್ತದೆ. ಹಾಗೇ, 600 ಎಂಎಲ್ ಮತ್ತು ಅದಕ್ಕೂ ದೊಡ್ಡದಾದ ಬಾಟಲಿಗಳಿಗೆ 2 ಪಾಯಿಂಟ್. ಅಂದರೆ ಪ್ರತಿ ಬಾಟಲಿಗೆ 2 ಪಾಯಿಂಟ್ ಪಡೆಯಬಹುದು.
Updated on:Mar 30, 2022 | 6:24 PM
ಯುನೈಟೆಡ್ ಅರಬ್ ಎಮಿರೇಟ್ಸ್ನಲ್ಲಿ ಸಾರ್ವಜನಿಕ ಬಸ್ಗಳಲ್ಲಿ ಉಚಿತವಾಗಿ ಪ್ರಯಾಣ ಮಾಡಬಹುದಾದ ಒಂದು ಅವಕಾಶವನ್ನು ಅಬು ಧಮಿ ಮುನ್ಸಿಪಲ್ಟೀಸ್ ಮತ್ತು ಸಾರಿಗೆ ಇಲಾಖೆಯ ಸಮಗ್ರ ಸಾರಿಗೆ ಕೇಂದ್ರ ಕಲ್ಪಿಸಿದೆ. ಆದರೆ ಉಚಿತವಾಗಿ ಅಂದರೆ ಯಾರು ಬೇಕಾದರೂ ಹೋಗಿ, ಸುಮ್ಮನೆ ಪ್ರಯಾಣ ಮಾಡುವಂತಿಲ್ಲ. ಅದಕ್ಕೊಂದು ಟಾಸ್ಕ್ ಇದೆ. ಮತ್ತೇನಲ್ಲ, ಖಾಲಿ ಪ್ಲಾಸ್ಟಿಕ್ ಬಾಟಲಿಗಳನ್ನು ಸಂಗ್ರಹಿಸಿ ತಂದು ಕೊಡಬೇಕು. ನೀರು, ತಂಪು ಪಾನೀಯ ಅಥವಾ ಇನ್ನೇನಾದರೂ ಕುಡಿದ ಬಳಿಕ ಪ್ಲಾಸ್ಟಿಕ್ ಬಾಟಲಿಗಳನ್ನು ಅಲ್ಲಲ್ಲೇ ಬಿಸಾಕುವುದು ಸಾಮಾನ್ಯವಾಗಿಬಿಟ್ಟಿದೆ. ಒಮ್ಮೆ ಡಸ್ಟ್ಬಿನ್ಗೆ ಹಾಕಿದರೂ ಕೂಡ ಅದು ಸಂಸ್ಕರಣೆಗೊಳ್ಳುವುದಿಲ್ಲ. ಎಲ್ಲೆಂದರಲ್ಲಿ ಈ ಪ್ಲಾಸ್ಟಿಕ್ ಬಿಸಾಡಿ ಉಂಟಾಗುವ ಮಾಲಿನ್ಯ ತಪ್ಪಿಸುವ ದೃಷ್ಟಿಯಿಂದ ಅಬುಧಾಬಿ ಸರ್ಕಾರ ಹೀಗೊಂದು ಭರ್ಜರಿ ಆಫರ್ ನೀಡಿದೆ.
ಅಬುಧಾಬಿ ಡಿಎಂಟಿ ಈ ಅಭಿಯಾನಕ್ಕೆ Points for Plastic: the Bus Tariff ಎಂದು ಹೆಸರಿಟ್ಟಿದೆ. ಅದರಡಿಯಲ್ಲಿ ಅಬುಧಾಬಿಯ ಮುಖ್ಯ ಬಸ್ ನಿಲ್ದಾಣದಲ್ಲಿ ಒಂದು ಪ್ಲಾಸ್ಟಿಕ್ ಡಿಪೋಸಿಟ್ (ಪ್ಲಾಸ್ಟಿಕ್ ಬಾಟಲಿಯನ್ನು ಠೇವಣಿ ಇಡುವ) ಮಶಿನ್ ಅಳವಡಿಸಲಾಗಿದೆ. ಯಾವುದೇ ಪ್ರಯಾಣಿಕ ಖಾಲಿ ಪ್ಲಾಸ್ಟಿಕ್ ಬಾಟಲಿಯನ್ನು ಅದರಲ್ಲಿ ಹಾಕಿದರೆ ಅದರ ಬದಲಿಗೆ ಅವರಿಗೆ ಪಾಯಿಂಟ್ ಸಿಗುತ್ತದೆ. ಹೀಗೆ ಪ್ಲಾಸ್ಟಿಕ್ ಬಾಟಲಿ ಕೊಟ್ಟು ಗಳಿಸಿದ ಪಾಯಿಂಟ್ಗಳನ್ನು ಬಸ್ ಪ್ರಯಾಣ ದರಕ್ಕೆ ಅನ್ವಯ ಮಾಡಿಕೊಳ್ಳಬಹುದು.
ಉದಾಹರಣೆಗೆ, 600 ಎಂಎಲ್ ಅಥವಾ ಅದಕ್ಕೂ ಕಡಿಮೆ ಅಳತೆಯ ಪ್ರತಿ ಬಾಟಲಿಗೂ ಒಂದು ಪಾಯಿಂಟ್ ಇರುತ್ತದೆ. ಹಾಗೇ, 600 ಎಂಎಲ್ ಮತ್ತು ಅದಕ್ಕೂ ದೊಡ್ಡದಾದ ಬಾಟಲಿಗಳಿಗೆ 2 ಪಾಯಿಂಟ್. ಅಂದರೆ ಪ್ರತಿ ಬಾಟಲಿಗೆ 2 ಪಾಯಿಂಟ್ ಪಡೆಯಬಹುದು. ಹೀಗೆ ಪ್ಲಾಸ್ಟಿಕ್ ಬಾಟಲಿಯಿಂದ ಗಳಿಸಿದ ಒಂದು ಪಾಯಿಂಟ್ 10 ಫಿಲ್ಸ್ಗಳಿಗೆ ಸಮ(ಫಿಲ್ಸ್ ಎಂದರೆ ಕರೆನ್ಸಿಯ ಘಟಕ. ಭಾರತದಲ್ಲಿ ರೂಪಾಯಿಗೆ ಪೈಸೆ ಘಟಕವಿದ್ದಂತೆ). ಹಾಗೇ 10 ಪಾಯಿಂಟ್ಗಳು 1 ದಿರ್ಹಾಮ್ಗೆ ಸರಿಸಮ( ದಿರ್ಹಾಮ್ ಎಂದರೆ ಯುನೈಟೆಡ್ ಅರಬ್ ಎಮಿರೇಟ್ಸ್ನ ಕರೆನ್ಸಿ). ಈ ಲೆಕ್ಕಾಚಾರದಲ್ಲಿ ಬಸ್ ದರವನ್ನು ಪರಿಗಣಿಸಿ, ಎಷ್ಟು ಹಣ ಆಗುತ್ತದೆಯೋ ಅಷ್ಟು ದೂರ ಉಚಿತ ಪ್ರಯಾಣ ಮಾಡಬಹುದಾಗಿದೆ.
ಪರಿಸರ ಸಂಸ್ಥೆ – ಅಬುಧಾಬಿ (ಇಎಡಿ), ಅಬುಧಾಬಿ ತ್ಯಾಜ್ಯ ನಿರ್ವಹಣಾ ಕೇಂದ್ರ (ತದ್ವೀರ್) ಮತ್ತು ಡಿ ಗ್ರೇಡ್ ಸಹಯೋಗದಲ್ಲಿ ಈ ಅಭಿಯಾನ ಶುರುವಾಗಿದೆ. ಅಂದರೆ ಜನರು ಮನೆಯಲ್ಲಿ ಸಂಗ್ರಹವಾದ ಪ್ಲಾಸ್ಟಿಕ್ ಬಾಟಲಿಗಳನ್ನು ಹೇಗೆ ಬೇಕಾದರೆ ಹಾಗೇ ಎಸೆದು, ಪರಿಸರ ಮಾಲಿನ್ಯ ಮಾಡದೆ, ಅದನ್ನು ತಂದುಕೊಡಬೇಕು. ಈ ಮೂಲಕ ಪ್ಲಾಸ್ಟಿಕ್ ತ್ಯಾಜ್ಯ ನಿರ್ವಹಣೆ ಸರಿಯಾಗಿ ಆಗಬೇಕು ಎಂಬುದು ಉದ್ದೇಶ.
ಇದನ್ನೂ ಓದಿ: ನಾನು ನನ್ನ ರಾಜಕಾರಣಿ ಎಂದು ನನ್ನ ಕರೆದುಕೊಳ್ಳಲ್ಲ, ನಾನು ಆಕಸ್ಮಿಕವಾಗಿ ಸಂಸದೆಯಾಗಿದ್ದೇನೆ: ಸಂಸದೆ ಸುಮಲತಾ
Published On - 6:23 pm, Wed, 30 March 22
