ಅನಾಥ ಚಿಂಪಾಂಜಿ ಮೊದಲ ಸಲ ಹೊಸ ಕುಟುಂಬ ಸೇರಿದಾಗಿನ ಕ್ಷಣಗಳು
Chimpanzee : ನನ್ನ ತಂದೆ ಕೂಡ ಹೀಗೆ ನನ್ನನ್ನು ಒಮ್ಮೆಯೂ ಪ್ರೀತಿಸಲಿಲ್ಲ ಎಂದು ಒಬ್ಬರು. ನಾವು ಕೂಡ ಹೀಗೇ ಇರಬೇಕು, ಯಾಕೆ ಹೀಗಿಲ್ಲ ಎಂದು ಇನ್ನೊಬ್ಬರು. ಒಟ್ಟಾರೆ ಈ ವಿಡಿಯೋ ನಿಮ್ಮನ್ನು ಇಡೀ ದಿನ ಕಾಡುವಲ್ಲಿ ಸಂಶಯವಿಲ್ಲ.
Updated on:Nov 26, 2022 | 5:12 PM
Viral Video : ಮೊದಲ ಸಲ! ಈ ಪದಪುಂಜವೇ ಪುಳಕ, ಅಚ್ಚರಿ ಮತ್ತು ಪದೇಪದೆ ನೆನಪನ್ನು ಅರಳಿಸುತ್ತ ಹೃದಯವನ್ನು ಬೆಚ್ಚಗಾಗಿಸಲು ಪ್ರೇರೇಪಿಸುವಂಥದ್ದು. ಇದೀಗ ವೈರಲ್ ಆಗಿರುವ ಈ ವಿಡಿಯೋದ ‘ಮೊದಲ ಸಲ’ ಮಾತ್ರ ನಿಮ್ಮ ಮನಸಿನಲ್ಲಿ ಸದಾ ಉಳಿಯುತ್ತದೆ. ಮನುಷ್ಯನಿಗೇ ಆಗಲಿ, ಪ್ರಾಣಿಪಕ್ಷಿಗಳಿಗೇ ಆಗಲಿ ತಾನು ತನ್ನವರು ಮತ್ತವರ ಸಾಮಿಪ್ಯ ಎನ್ನುವುದು ಅಪಾರ ಆತ್ಮವಿಶ್ವಾಸ, ಧೈರ್ಯ, ಭದ್ರತಾ ಭಾವ ಕೊಡುತ್ತದೆ. ಈಗ ವೈರಲ್ ಆಗಿರುವ ಈ ವಿಡಿಯೋದಲ್ಲಿ ಅನಾಥ ಚಿಂಪಾಂಜಿಯೊಂದು ಮೊದಲ ಸಲ ತನ್ನ ಹೊಸ ಕುಟುಂಬವನ್ನು ಸೇರಿದಾಗಿನ ಆಪ್ತಘಳಿಗೆಗಳನ್ನು ಅನುಭವಿಸಿರುವ ಪರಿ ನೋಡಿ.
ಈ ಚಿಂಪಾಂಜಿಯ ಹೆಸರು ಬೆಕ್ಲಿ. ಪಶ್ಚಿಮ ಆಫ್ರಿಕಾದ ಅಭಯಾರಣ್ಯದಲ್ಲಿ ಈ ಅನಾಥ ಚಿಂಪಾಂಜಿ ವಾಸವಾಗಿತ್ತು. ಹೇಗಾದರೂ ಮಾಡಿ ಇದನ್ನು ಒಂದು ಕುಟುಂಬಕ್ಕೆ ಸೇರಿಸಬೇಕೆನ್ನುವ ಅರಣ್ಯ ಸಿಬ್ಬಂದಿಯ ಆಶಯ ಇದೀಗ ಸಾಫಲ್ಯಗೊಂಡಿದೆ. ಈತನಕ ಈ ವಿಡಿಯೋ ಅನ್ನು 1.9 ಮಿಲಿಯನ್ ಜನರು ವೀಕ್ಷಿಸಿದ್ದಾರೆ. ಅನೇಕರು ಈ ವಿಡಿಯೋ ನೋಡಿ ಹರ್ಷಚಿತ್ತರಾಗಿದ್ದಾರೆ, ಹನಿಗಣ್ಣಾಗಿದ್ದಾರೆ. ಸಾವಿರಾರು ಜನ ಪ್ರತಿಕ್ರಿಯಿಸಿದ್ದಾರೆ.
ಈಗಿಲ್ಲಿ ಸಮಯ ಒಂಬತ್ತು ಗಂಟೆ. ಕಾಫಿ ಕಪ್ ಹಿಡಿದುಕೊಂಡು ಕುಳಿತಿದ್ದೇನೆ. ನನ್ನ ತಂದೆ ಕೂಡ ನನ್ನನ್ನು ಹೀಗೆ ಪ್ರೀತಿಸಿದ್ದಿಲ್ಲ. ಎಷ್ಟು ಅದ್ಭುತವಾಗಿದೆ ಈ ವಿಡಿಯೋ ಎಂದು ಒಬ್ಬರು ಹೇಳಿದ್ದಾರೆ. ಈ ಕುಟುಂಬದಲ್ಲಿರುವ ಒಂದು ಚಿಂಪಾಂಜಿಯು ಉಳಿದ ಸದಸ್ಯರಿಗೆ ಪರಿಚಯಿಸುವ ಆ ಪರಿ ಗಮನಿಸಿದ್ದೀರಾ ಎಂದು ಇನ್ನೊಬ್ಬರು ಹೇಳಿದ್ದಾರೆ. ಪರಸ್ಪರ ಅಪ್ಪಿಕೊಂಡು ಉರುಳಾಡುವ ಆ ಸಂಭ್ರಮ ನೋಡಿ, ಇದೇ ಅಲ್ಲವೇ ನಾವೆಲ್ಲ ಒಂದೇ ಎಂದು ಸೂಚಿಸುವ ನಡೆ ಎಂದಿದ್ದಾರೆ ಮತ್ತೂ ಒಬ್ಬರು. ಅಬ್ಬಾ ನಾನಂತೂ ಈ ವಿಡಿಯೋ ನೋಡುತ್ತಲೇ ಇದ್ದೇನೆ, ಹೇಗವನು ತಬ್ಬಿಕೊಂಡಿದ್ದಾನೆ! ಎಂದಿದ್ದಾರೆ ಒಬ್ಬರು. ನಾವೆಲ್ಲರೂ ಹೀಗೆ ಯಾಕೆ ಇಲ್ಲ, ಹೀಗೇ ಇರಬೇಕಲ್ಲವೆ? ಎಂದಿದ್ದಾರೆ ಇನ್ನೂ ಒಬ್ಬರು.
ಈ ವಿಡಿಯೋ ನೋಡಿದ ನಿಮ್ಮ ಅಭಿಪ್ರಾಯವೇನು?
ಮತ್ತಷ್ಟು ವೈರಲ್ ವಿಡಿಯೋಗಾಗಿ ಕ್ಲಿಕ್ ಮಾಡಿ
Published On - 5:02 pm, Sat, 26 November 22
