ಡಿಮೆನ್ಷಿಯಾದಿಂದ ಬಳಲುತ್ತಿರುವ ಮುತ್ತಜ್ಜಿ ಮರಿಮೊಮ್ಮಗನಿಗಾಗಿ ಲಾಲಿ ಹಾಡಿದಾಗ
Dementia : ಇದು ಒಳ್ಳೆಯ ಅವಕಾಶ, ಹೀಗೆ ಈ ಮಗುವಿನ ಒಡನಾಟದೊಂದಿಗೆ, ಹಾಡುತ್ತ ಹಾಡುತ್ತ ಅಜ್ಜಿಯ ಸ್ಮರಣಶಕ್ತಿ ವಾಪಾಸು ಬಂದರೂ ಬರಬಹುದೇನೋ ಎನ್ನುತ್ತಿದ್ದಾರೆ ನೆಟ್ಟಿಗರು.
Updated on:Jan 24, 2023 | 8:45 AM
Viral Video : ಸ್ಮೃತಿಯ ತಂತುಗಳನ್ನು ಸ್ಪರ್ಶಿಸಿ ಅರಳಿಸುವ ಅಗಾಧ ಚೈತನ್ಯ ಸಂಗೀತಕ್ಕಿದೆ ಮತ್ತು ಎಳೆಯ ಮಗುವಿಗಿದೆ. ಅಂದರೆ ಕಳೆದುದನ್ನು ಮರಳಿಸುವ ಶಕ್ತಿ ಈ ಎರಡಕ್ಕೂ ಇದೆ. ಡಿಮೆನ್ಷಿಯಾ ರೋಗದಿಂದ ಬಳಲುತ್ತಿರುವ ಮುತ್ತಜ್ಜಿಯೊಬ್ಬಳಿಗೆ ಮರಿಮೊಮ್ಮಗನಿಗಾಗಿ ಲಾಲಿ ಹಾಡಿದ್ದಾಳೆ. ಅವಳ ತೋಳೊಳಗೆ ಬೆಚ್ಚಗೆ ಮಲಗಿರುವ ಮಗು ಅಜ್ಜಿ ಹಾಡು ಮತ್ತು ಸ್ಪರ್ಶದಿಂದ ನಿದ್ದೆ ಜಾರುತ್ತಿದೆ. ಇದೀಗ ವೈರಲ್ ಆಗುತ್ತಿರುವ ಈ ವಿಡಿಯೋ ನೋಡಿ.
ಅಜ್ಜಿಯ ಮೆದುಳು ಜ್ಞಾಪಕ ಶಕ್ತಿಯನ್ನು ಕಳೆದುಕೊಂಡಿದ್ದರೂ ಈ ಹಾಡನ್ನು ಮಾತ್ರ ಹಾಗೇ ಹಿಡಿದಿಟ್ಟುಕೊಂಡಿದೆ. ಮೊಮ್ಮಗುವಿನ ಮುಖ ಆಕೆಯ ನೆನಪಿನ ಶಕ್ತಿಯನ್ನು ಹೀಗೆ ಕ್ಷಣಗಳ ಕಾಲದವರೆಗಾದರೂ ಮರಳಿಸಿದೆ. ಎಂಥ ಆಪ್ತವಾದ ವಿಡಿಯೋ ಅಲ್ವಾ ಇದು? ಈತನಕ ಈ ವಿಡಿಯೋ ಅನ್ನು ಸುಮಾರು 7,000 ಜನರು ನೋಡಿದ್ದಾರೆ. 500ಕ್ಕೂ ಹೆಚ್ಚು ಜನರು ಮೆಚ್ಚಿದ್ದಾರೆ. ಗ್ರೇಟ್ ಗ್ರ್ಯಾಂಡ್ಮಾ ಎಂದು ನೆಟ್ಟಿಗರು ಅಚ್ಚರಿ ವ್ಯಕ್ತಪಡಿಸುತ್ತಿದ್ದಾರೆ.
ಇದನ್ನೂ ಓದಿ : ಡಿಮೆನ್ಷಿಯಾದಿಂದ ನರಳುತ್ತಿರುವ ಈ ವೃದ್ಧೆ ನಾಯಿಯನ್ನು ಪ್ರೀತಿಸುವುದನ್ನು ಮಾತ್ರ ಮರೆತಿಲ್ಲ!
ನನಗೀಗ 40. ನನ್ನ ಅಜ್ಜಿ ನಾನು ಮಗುವಿದ್ಧಾಗ ಹಾಡುತ್ತಿದ್ದಳು. ಈ ವಿಡಿಯೋ ಅಜ್ಜಿಯನ್ನೂ ಮತ್ತು ಈ ಹಾಡನ್ನು ಮತ್ತೆ ನೆನಪಿಸಿತು. ಬಹಳ ಆಪ್ತವಾಗಿದೆ ಇದು ಎಂದಿದ್ದಾರೆ ಒಬ್ಬರು. ಇದು ಒಳ್ಳೆಯ ಅವಕಾಶ, ಹೀಗೆ ಮೊಮ್ಮಗುವಿನ ಒಡನಾಟದೊಂದಿಗೆ ಮತ್ತು ಸಂಗೀತದೊಂದಿಗೆ ನಿಮ್ಮ ಅಜ್ಜಿಯು ತನ್ನ ಸ್ಮರಣಶಕ್ತಿಯನ್ನು ವಾಪಾಸು ಪಡೆಯುವಂತೆ ಮಾಡಲು ಎಂದಿದ್ಧಾರೆ ಮತ್ತೊಬ್ಬರು. ಪರ್ವಾಗಿಲ್ಲ ಈ ಅಜ್ಜಿ ಹೀಗೆ ಹಾಡುತ್ತ ಅಳುತ್ತಿದ್ದರೆ… ಆಕೆಗೆ ಹೀಗಾದರೂ ಮತ್ತೆ ನೆನಪಿನ ಶಕ್ತಿ ವಾಪಾಸು ಬರಲಿ ಎಂದಿದ್ದಾರೆ ಮಗದೊಬ್ಬರು.
ಇದನ್ನೂ ಓದಿ : ಅಪ್ಪ ಅಮ್ಮ ಇಲ್ಲದಿದ್ರೆ ಸತ್ತೇ ಹೋಗ್ತಿದ್ವಿ; ಚಿರತೆಯಿಂದ ಕಾಪಾಡಿದ ಮುಳ್ಳುಹಂದಿಗಳ ವಿಡಿಯೋ ವೈರಲ್
ನನ್ನ ಮಗಳು ಹುಟ್ಟಿದಾಗ ನಾನು ಈ ಹಾಡನ್ನು ಹಾಡುತ್ತಿದ್ದೆ. ಈಗ ಅವಳಿಗೆ 45 ವರ್ಷ. ಈ ಹಾಡನ್ನು ನಾನು ಮರೆತಿದ್ದೆ. ನೆನಪಿಸಿದ್ದಕ್ಕೆ ಧನ್ಯವಾದ ಎಂದು ಒಬ್ಬರು ಪ್ರತಿಕ್ರಿಯಿಸಿದ್ಧಾರೆ. ಎಂಥಾ ಮಧುರವಾದ ಕ್ಷಣಗಳು ಅಭಿನಂದನೆ ಎಂದಿದ್ದಾರೆ ಮತ್ತೊಬ್ಬರು. ಇದು ಅತ್ಯಂತ ಹೃದಯಸ್ಪರ್ಶಿಯಾದ ವಿಡಿಯೋ ಎಂದಿದ್ಧಾರೆ ಮಗದೊಬ್ಬರು.
ಈ ವಿಡಿಯೋ ನೋಡಿದ ನಿಮ್ಮ ಅಭಿಪ್ರಾಯವೇನು?
ಮತ್ತಷ್ಟು ವೈರಲ್ ವಿಡಿಯೋಗಾಗಿ ಕ್ಲಿಕ್ ಮಾಡಿ
Published On - 8:38 am, Tue, 24 January 23
