‘ಅಮ್ಮ ನನ್ನ ಚಾಕೊಲೇಟ್​ ಕದ್ದು ಕೆನ್ನೆಗೆ ಹೊಡೆದಿದ್ದಾಳೆ, ಆಕೆಯನ್ನು ಜೈಲಿಗೆ ಹಾಕಿ’ ಪೊಲೀಸ್​ ಕಂಪ್ಲೆಂಟ್ ನೀಡಿದ 3 ವರ್ಷದ ಮಗು

Trending : ಮಾಧ್ಯಮ ಮತ್ತು ಪರಿಸರದ ಪ್ರಭಾವದಿಂದ ಮಕ್ಕಳು ಬಹಳೇ ಎಚ್ಚರ ಬೆಳೆಸಿಕೊಳ್ಳುತ್ತಿದ್ದಾರೆ, ಪ್ರಜ್ಞಾವಂತರಾಗುತ್ತಿದ್ದಾರೆ. ಅದರ ಪ್ರಯೋಗವೆಲ್ಲ ಮನೆಯೆಂಬ ಪಾಠಶಾಲೆಯಲ್ಲಿಯೇ ನಡೆಯುತ್ತಿದೆ!; ನನ್ನ ತಾಯಿ ನನ್ನ ಸಿಹಿತಿಂಡಿ ಕದ್ದಿದ್ದಲ್ಲದೆ ನನ್ನ ಕೆನ್ನೆಗೆ ಏಟು ಕೂಡ ಕೊಟ್ಟಿದ್ದಾಳೆ. ನಡಿ ಪಪ್ಪಾ ಅಮ್ಮನ ಬಗ್ಗೆ ಪೊಲೀಸ್ ಕಂಪ್ಲೆಂಟ್ ಕೊಡೋಣ’ ಎಂದು ಪೊಲೀಸ್​ ಠಾಣೆಗೆ ತನ್ನ ಅಪ್ಪನನ್ನು ಕರೆದೊಯ್ದಿದೆ ಮಧ್ಯಪ್ರದೇಶದ ಮೂರು ವರ್ಷದ ಈ ಗಂಡುಮಗು ಸದ್ದಾಂ. ಠಾಣೆಯಲ್ಲಿ, ‘ಯಾವಾಗಲೂ ಅಮ್ಮ ನನಗೆ ಸಿಹಿತಿಂಡಿಯನ್ನು ತಿನ್ನಬೇಡ ಎಂದು ಹೇಳುತ್ತಾಳೆ. ಹಾಗಾಗಿ ಅವಳನ್ನು ನೀವು ಬಂಧಿಸಲೇಬೇಕು’ ಎಂದು ಪಟ್ಟು ಹಿಡಿದಿದೆ.

ಬರ್ಹಾನ್​ಪುರದ ಈ ಮಗು ಸಬ್​ ಇನ್ಸ್​ಪೆಕ್ಟರ್ ಪ್ರಿಯಾಂಕಾ ನಾಯಕ್​ಗೆ, ‘ನನ್ನ ಅಮ್ಮ ನನ್ನ ಸಿಹಿತಿಂಡಿ ಕದ್ದಿದ್ದಾಳೆ. ಕೆನ್ನೆಗೆ ಹೊಡೆದಿದ್ದಾಳೆ. ತಕ್ಷಣವೇ ಅವಳನ್ನು ಜೈಲಿಗೆ ಹಾಕಲೇಬೇಕು ನೀವು’ ಎಂದು ಒತ್ತಾಯ ಮಾಡಿದೆ.

ಮಗುವಿನ ಮುಗ್ಧತನ, ಬಾಲಭಾಷೆ ಮತ್ತು ಅದು ಕೊಡುತ್ತಿರುವ ಕಂಪ್ಲೆಂಟ್​ ಎಲ್ಲವನ್ನೂ ಆಲಿಸಿದ ಪ್ರಿಯಾಂಕಾ ಅವರಿಗೆ ನಗು ಬಂದಿದೆ. ಆದರೂ ಗಂಭೀರವಾಗಿ ಪ್ರಕರಣವನ್ನು ದಾಖಲಿಸಿಕೊಳ್ಳುತ್ತಿರುವಂತೆ ನಟಿಸಿದ್ದಾರೆ. ನಂತರ ಕೊನೆಯಲ್ಲಿ ಮಗುವಿನಿಂದ ಸಹಿ ಮಾಡಿಸಿಕೊಂಡಿದ್ದಾರೆ. ಜೊತೆಗೆ ಆದಷ್ಟು ಬೇಗ ನಿನ್ನ ಅಮ್ಮನನ್ನು ಬಂಧಿಸಲಾಗುವುದು ಎಂದು ಭರವಸೆ ನೀಡಿ ಕಳುಹಿಸಿದ್ದಾರೆ.

ಅದಕ್ಕಿಂತ ಮೊದಲು, ಈ ವಿಷಯವಾಗಿ ಸದ್ದಾಂನ ತಂದೆ ಬಳಿ ವಿಚಾರಿಸಿದಾಗ, ‘ಸಿಹಿತಿಂಡಿ ಕೇಳಿದಾಗ ಸದ್ದಾಂನ ತಾಯಿ ಕೆನ್ನೆ ಹಿಡಿದು ಮುದ್ದು ಮಾಡಿದ್ದಾರೆ’ ಎಂದು ಪೊಲೀಸರಿಗೆ ಉತ್ತರಿಸಿದ್ದಾರೆ.

ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ ರಾಜ್ಯ ಗೃಹ ಸಚಿವ ನರೋತ್ತಮ್ ಮಿಶ್ರಾ, ಮಗುವಿಗೆ ವಿಡಿಯೋ ಕಾಲ್ ಮಾಡಿ, ‘ದೀಪಾವಳಿಯಂದು ಮಗುವಿಗೆ ಚಾಕೋಲೇಟ್​ ಮತ್ತು ಸೈಕಲ್​ ಕಳಿಸುವುದಾಗಿ ಭರವಸೆ ನೀಡಿದ್ದಾರೆ.’

ಇದನ್ನು ಓದಿದ ನಿಮಗೆ ಏನೆನ್ನಿಸಿತು?

ಮತ್ತಷ್ಟು ವೈರಲ್ ವಿಡಿಯೋಗಾಗಿ ಕ್ಲಿಕ್ ಮಾಡಿ