BBC: ಬಿಬಿಸಿ ದ್ವಂದ್ವ ನೀತಿ ಬಹಿರಂಗ; ಬ್ರಿಟನ್ ರಾಜಕೀಯ ಒತ್ತಡಕ್ಕೆ ವಾಹಿನಿಯ ಕಾರ್ಯಕ್ರಮಗಳು ರದ್ದು
David Attenborough | Gary Lineker: ನರೇಂದ್ರ ಮೋದಿ ಕುರಿತು ಬಿಬಿಸಿ ಮಾಡಿದ ಸಾಕ್ಷ್ಯಚಿತ್ರದ ಹಿಂದೆ ರಾಜಕೀಯದ ಕೈವಾಡ ಇಲ್ಲ ಎಂದು ವಾದಿಸಲಾಗಿತ್ತು. ಆದರೆ ಈಗ ನಡೆದಿರುವ ಬೆಳವಣಿಗೆಗಳು ವಾಹಿನಿಯ ದ್ವಂದ್ವ ನೀತಿಯನ್ನು ಬಯಲು ಮಾಡಿವೆ.
Updated on:Mar 12, 2023 | 10:10 AM
ಬಿಬಿಸಿ ವಾಹಿನಿಯ (BBC) ಆಂತರಿಕ ವಿಚಾರಗಳು ಈಗ ಬೀದಿಗೆ ಬಂದಿವೆ. ಫುಟ್ಬಾಲ್ ಕುರಿತ ‘ಮ್ಯಾಚ್ ಆಫ್ ದ ಡೇ’ ಕಾರ್ಯಕ್ರದ ನಿರೂಪಕ ಗ್ಯಾರಿ ಲಿನೇಕರ್ (Gary Lineker) ಅವರನ್ನು ತಾತ್ಕಾಲಿಕವಾಗಿ ವಾಹಿನಿಯಿಂದ ಹೊರಗುಳಿಯುವಂತೆ ಸೂಚಿಸಲಾಗಿದೆ. ರಾಜಕೀಯ ಕಾರಣಗಳಿಂದಾಗಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಹಾಗಾಗಿ ವಾಹಿನಿಯ ವಿರುದ್ಧ ಅದರ ಮುಖ್ಯ ಕಾರ್ಯಕ್ರಮಗಳ ಕೆಲವು ನಿರೂಪಕರೇ ತಿರುಗಿ ಬಿದ್ದಿದ್ದಾರೆ. ಅಭಿವ್ಯಕ್ತಿ ಸ್ವಾತಂತ್ರ್ಯಕ್ಕೆ ಧಕ್ಕೆ ಆಗಿದೆ ಎಂದು ಹಲವರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಕೆಲವು ವಾರಗಳ ಹಿಂದೆ ನರೇಂದ್ರ ಮೋದಿ (Narendra Modi) ಕುರಿತು ಬಿಬಿಸಿ ಮಾಡಿದ್ದ ಸಾಕ್ಷ್ಯಚಿತ್ರವು ಸಾಕಷ್ಟು ವಿವಾದ ಸೃಷ್ಟಿ ಮಾಡಿತ್ತು. ಆ ವಿಚಾರಕ್ಕೆ ಸಂಬಂಧಿಸಿದಂತೆ ತನ್ನ ಕಾರ್ಯಕ್ರಮಗಳಲ್ಲಿ ರಾಯಕೀಯ ಹಸ್ತಕ್ಷೇಪ ಇಲ್ಲ ಎಂದು ಬಿಬಿಸಿ ವಾದಿಸಿತ್ತು. ಆದರೆ ಈಗ ಬ್ರಿಟನ್ನಲ್ಲಿ ನಡೆಯುತ್ತಿರುವ ಘಟನೆಗಳಿಂದಾಗಿ ಬಿಬಿಸಿ ವಾಹಿನಿಯ ದ್ವಂದ್ವ ನೀತಿ ಬಯಲಾಗಿದೆ.
ಗ್ಯಾರಿ ಲಿನೇಕರ್ ಟ್ವೀಟ್ ವಿವಾದ:
ನಿರಾಶ್ರಿತರ ಕುರಿತಂತೆ ಬ್ರಿಟನ್ ಸರ್ಕಾರದ ನೀತಿಯನ್ನು ವಿರೋಧಿಸಿ ಅನೇಕರು ಧ್ವನಿ ಎತ್ತುತ್ತಿದ್ದಾರೆ. ಆ ಪೈಕಿ ಮಾಜಿ ಫುಟ್ಬಾಲ್ ಆಟಗಾರ ಹಾಗೂ ಬಿಸಿಸಿ ವಾಹಿನಿಯ ‘ಮ್ಯಾಚ್ ಆಫ್ ದ ಡೇ’ ಕಾರ್ಯಕ್ರಮದ ನಿರೂಪಕ ಗ್ಯಾರಿ ಲಿನೇಕರ್ ಕೂಡ ತಮ್ಮ ಅನಿಸಿಕೆಯನ್ನು ಹಂಚಿಕೊಂಡರು. ಸರ್ಕಾರದ ನೀತಿಯನ್ನು ವಿರೋಧಿಸಿ ಟ್ವೀಟ್ ಮಾಡಿದರು. ಸರ್ಕಾರವನ್ನು ಟೀಕಿಸಿದ್ದಕ್ಕಾಗಿ ಅವರು ‘ಮ್ಯಾಚ್ ಆಫ್ ದ ಡೇ’ ಕಾರ್ಯಕ್ರಮವನ್ನು ನಡೆಸಿಕೊಡಬಾರದು ಎಂದು ಬಿಸಿಸಿ ಸೂಚಿಸಿದೆ.
ಇದನ್ನೂ ಓದಿ: ಐಟಿ ಇಲಾಖೆಯಿಂದ ಪರಿಶೀಲನೆ; ನಾವು ಬಿಬಿಸಿ ಪರ ನಿಲ್ಲುತ್ತೇವೆ ಎಂದ ಬ್ರಿಟನ್ ಸರ್ಕಾರ
ಸೋಶಿಯಲ್ ಮೀಡಿಯಾ ಬಳಕೆಗೆ ಸಂಬಂಧಿಸಿದಂತೆ ಬಿಬಿಸಿಯ ನಿಯಮಗಳನ್ನು ಗ್ಯಾರಿ ಲಿನೇಕರ್ ಅವರು ಉಲ್ಲಂಘಿಸಿದ್ದಾರೆ ಎಂದು ಅವರನ್ನು ‘ಮ್ಯಾಚ್ ಆಫ್ ದ ಡೇ’ ಕಾರ್ಯಕ್ರಮದಿಂದ ಹೊರಗಿಡಲಾಗಿದೆ. ಅವರ ಟ್ವಿಟರ್ ಬಳಕೆ ಕುರಿತಂತೆ ವಾಹಿನಿಯು ಅಂತಿಮ ನಿರ್ಧಾರ ತೆಗೆದುಕೊಳ್ಳುವ ತನಕ ಅವರು ಕಾರ್ಯಕ್ರಮವನ್ನು ನಡೆಸಿಕೊಡುವಂತಿಲ್ಲ ಎಂದು ಸೂಚಿಸಿದೆ. ಇದನ್ನು ಖಂಡಿಸಿ ಇತರ ನಿರೂಪಕರು ಕೂಡ ತಮ್ಮ ಕಾರ್ಯಕ್ರಮಗಳನ್ನು ಬಹಿಷ್ಕರಿಸಿದ್ದಾರೆ.
ಇದನ್ನೂ ಓದಿ: ಮೋದಿ ಬಗ್ಗೆ ಬಿಬಿಸಿ ಸಾಕ್ಷ್ಯಚಿತ್ರ ಬಿಡುಗಡೆ ಮಾಡಿದ ಸಮಯ ಗಮನಿಸಿ, ಇದು ಆಕಸ್ಮಿಕ ಅಲ್ಲ, ರಾಜಕೀಯ: ಜೈಶಂಕರ್
ಡೇವಿಡ್ ಅಟೆನ್ಬರೋ ಸಂಚಿಕೆಯೂ ರದ್ದು:
ವನ್ಯಜೀವಿಗಳ ಕುರಿತಂತೆ ಸರ್ ಡೇವಿಡ್ ಅಟೆನ್ಬರೋ ಅವರು ಹೊಸ ಸರಣಿಯನ್ನು ನಿರೂಪಿಸಿದ್ದಾರೆ. ಅದರ ಒಂದು ಸಂಚಿಕೆಯನ್ನು ಪ್ರಸಾರ ಮಾಡಲು ಬಿಬಿಸಿ ಹಿಂದೇಟು ಹಾಕಿದೆ. ಈ ಎಪಿಸೋಡ್ನಲ್ಲಿ ಇರುವ ವಿಚಾರಗಳು ಸರ್ಕಾರಕ್ಕೆ ವಿರುದ್ಧವಾಗಿವೆ ಮತ್ತು ಬ್ರಿಟನ್ನ ಬಲಪಂಥೀಯರ ಕೆಂಗಣ್ಣಿಗೆ ಗುರಿಯಾಗುವಂತಿವೆ ಎಂಬ ಕಾರಣಕ್ಕೆ ಇದರ ಪ್ರಸಾರವನ್ನು ರದ್ದು ಮಾಡಲಾಗಿದೆ.
ಇದನ್ನೂ ಓದಿ: ಯಾರೂ ಕಾನೂನಿಗಿಂತ ಮೇಲಲ್ಲ: ಬಿಬಿಸಿ ಕಚೇರಿಯಲ್ಲಿ ಐಟಿ ಪರಿಶೀಲನೆ ಬಗ್ಗೆ ಕೇಂದ್ರ ಸಚಿವ ಅನುರಾಗ್ ಠಾಕೂರ್
ಗ್ಯಾರಿ ಲಿನೇಕರ್ ಅವರನ್ನು ‘ಮ್ಯಾಚ್ ಆಫ್ ದ ಡೇ’ ಕಾರ್ಯಕ್ರಮದಿಂದ ಹೊರಗಿಟ್ಟಿರುವುದು ಮತ್ತು ಡೇವಿಡ್ ಅಟೆನ್ಬರೋ ಅವರ ಕಾರ್ಯಕ್ರಮದ ಸಂಚಿಕೆಯನ್ನು ರದ್ದು ಮಾಡಿರುವುದು ವಿಶ್ವಾದ್ಯಂತ ಚರ್ಚೆಗೆ ಕಾರಣ ಆಗಿದೆ. ಬಿಬಿಸಿ ಸ್ವತಂತ್ರವಾಗಿ, ವಸ್ತುನಿಷ್ಠವಾಗಿ ಕೆಲಸ ಮಾಡುತ್ತಿಲ್ಲ ಹಾಗೂ ಅದರ ಮೇಲೆ ರಾಜಕೀಯದ ಹಸ್ತಕ್ಷೇಪ ಇದೆ ಎಂಬುದಕ್ಕೆ ಈ ಘಟನೆಗಳೇ ಸಾಕ್ಷಿ ಒದಗಿಸುತ್ತಿವೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 10:10 am, Sun, 12 March 23
