ವಿಶ್ವದ ಚೊಚ್ಚಲ ಬಸ್-ಟ್ರೈನ್ ಸಂಚಾರಕ್ಕೆ ಬಿಟ್ಟ ಜಪಾನ್: ಕಾರಣ ಕೇಳಿದರೆ ಹೆಮ್ಮೆ ಎನಿಸುತ್ತದೆ!
ಹಿರಿಯರ ಬಗ್ಗೆ ಅಪಾರ ಕಾಳಜಿ ವಹಿಸುವ ಜಪಾನ್ ಸರ್ಕಾರ, ತನ್ನ ಹಿರಿಯ ಜೀವಗಳಿಗೆ ಕೊಡುವ ಗೌರವ ಇದಾಗಿದೆ. ದೂರದ ಊರುಗಳಲ್ಲಿ ಹಿರಿಯರಿಗೆ ಊರುಗೋಲು ಆಗಲು ಈ ದ್ವಿ ಸಂಚಾರಿ ವಾಹನವನ್ನು ಬಿಡುಗಡೆ ಮಾಡಿದೆ. ಊರುಗಳಿಗೂ ಬಸ್ ರೂಪದಲ್ಲಿ ಈ ರೈಲು ಸಂಚರಿಸುತ್ತದೆ!
Updated on: Dec 25, 2021 | 12:27 PM
ಅನಿವಾರ್ಯವಾಗಿ, ಅತ್ಯಗತ್ಯವಾಗಿ, ಪ್ರಕೃತಿ ಸಹಜವಾಗಿ, ಪ್ರಕೃತಿಗೆ ಹತ್ತಿರವಾಗಿ ಬಾಳಿ ಬದುಕುವುದು ಜಪಾನ್ ದೇಶದವರ ಮೈಮನಗಳಲ್ಲಿ ಹಾಸುಹೊಕ್ಕಿದೆ. ಜಪಾನ್ನ ಕೈಯೋ ಪಟ್ಟಣದಲ್ಲಿ ಇಂದು ವಿಶೇಷ ಸಂಭ್ರಮ ಮನೆ ಮಾಡಿದೆ. ತಾಂತ್ರಿಕವಾಗಿ ಸದಾ ಮುಂಚೂಣಿಯಲ್ಲಿರ ಬಯಸುವ ಜಪಾನೀಯರು (Japan) ಕೈಯೋ (Kaiyo) ಪಟ್ಟಣದಲ್ಲಿಂದು ವಿಶ್ವದ ಮೊಟ್ಟಮೊದಲ ಬಸ್-ಟ್ರೈನ್ ಅನ್ನು (Bus Train Dual-Mode Vehicle) ಸಂಚಾರಕ್ಕೆ ಬಿಡಲಿದ್ದಾರೆ. ಈ ದ್ವಿರೂಪದ ಬಸ್-ಟ್ರೈನ್ ಸಾರಿಗೆ ವಾಹನ ಮಿನಿ ಬಸ್ ಮಾದರಿ ಇದ್ದು, ರಸ್ತೆಯಲ್ಲಿ ಸಂಚರಿಸುವಾಗ ರಬ್ಬರ್ ಟೈರ್ ಮೇಲೆಯೇ ಸಂಚರಿಸುತ್ತದೆ. ಅದೇ ರೈಲ್ವೆ ಹಳಿಯ ಮೇಲಕ್ಕೆ ಬಂದಾಗ ರೈಲಿನಂತೆ ಸಂಚರಿಸುತ್ತದೆ. ಬಸ್ನ ಕೆಳಗಿರುವ ಸ್ಟೀಲ್ ಗಾಲಿಗಳು ವಾಹನದಿಂದ ಇನ್ನೂ ಕೆಳಗಿಳಿದು ಹಳಿಗಳ ಮೇಲೆ ಬರುತ್ತವೆ. ಅದಾಗ ಟ್ರೈನ್ ಮಾದರಿ ಸಂಚರಿಸುತ್ತದೆ. ಕೈಯೋ ಅಂತಹ ಸಣ್ಣ ಸಣ್ಣ ಪಟ್ಟಣಗಳಲ್ಲಿಯೂ ಸಾರ್ವಜನಿಕ ಸಾರಿಗೆ ವ್ಯವಸ್ಥೆ ಕಲ್ಪಿಸುವುದು ಇದರ ಉದ್ದೇಶವಾಗಿದೆ.
ದ್ವಿರೂಪದ ಬಸ್-ಟ್ರೈನ್ ಸಾರಿಗೆ ವಾಹನ ಸಂಚಾರಕ್ಕೆ ಬಿಡುವ ಮೂಲಕ ಹಿರಿಯ ಜೀವಗಳಿಗೂ ಜಪಾನ್ ಮಣೆ ಹಾಕಿರುವುದು ಶ್ಲಾಘನಾರ್ಹ.
ಅದರಲ್ಲೂ ಜಪಾನ್ನಲ್ಲಿ ವೃದ್ಧರ ಸಂಖ್ಯೆ ಹೆಚ್ಚಾಗಿದೆ. ಜೊತೆಗೆ, ಸಣ್ಣಪುಟ್ಟ ಊರುಗಳಲ್ಲಿ ಜನಸಂಖ್ಯೆಯೂ ಕಡಿಮೆಯಾಗುತ್ತಿದೆ. ಹಿರಿಯರ ಬಗ್ಗೆ ಅಪಾರ ಕಾಳಜಿ ವಹಿಸುವ ಜಪಾನ್ ಸರ್ಕಾರ, ತನ್ನ ಹಿರಿಯ ಜೀವಗಳಿಗೆ ಕೊಡುವ ಗೌರವ ಇದಾಗಿದೆ. ದೂರದ ಊರುಗಳಲ್ಲಿ ಹಿರಿಯರಿಗೆ ಊರುಗೋಲು ಆಗಲು ಈ ದ್ವಿ ಸಂಚಾರಿ ವಾಹನವನ್ನು ಬಿಡುಗಡೆ ಮಾಡಿದೆ. ಊರುಗಳಿಗೂ ಬಸ್ ರೂಪದಲ್ಲಿ ಈ ರೈಲು ಸಂಚರಿಸುತ್ತದೆ! ಜೊತೆಗೆ ರೈಲು ಮಾದರಿಯಲ್ಲಿ ಕಾರ್ಯನಿರ್ವಹಿಸಿ ಸುಸೂತ್ರ ಜನ ಸಂಚಾರಕ್ಕೆ ನೆರವಾಗಲಿದೆ. ಕರ್ನಾಟಕ-ಭಾರತ ಸೇರಿದಂತೆ ಅನೇಕ ಕಡೆ ವೃದ್ಧರು-ಅಸಹಾಯಕರು ಹಾಗಿರಲಿ, ಮಾಮೂಲಿ ಜನ ಸಂಚಾರಕ್ಕೇ ಬಸ್ ವ್ಯವಸ್ಥೆ ಇರುವುದಿಲ್ಲ. ಅಂತಹುದರಲ್ಲಿ ಹಿರಿಯ ಜೀವಗಳಿಗೂ ಜಪಾನ್ ಮಣೆ ಹಾಕಿರುವುದು ಶ್ಲಾಘನಾರ್ಹ.
ಈ ಬಸ್-ಟ್ರೈನ್ ಸಾರಿಗೆ ವಾಹನ (Bus Train Dual-Mode Vehicle) 21 ಮಂದಿಯನ್ನು ಕರೆದೊಯ್ಯಬಲ್ಲದು. ಗಂಟೆಗೆ 60 ಕಿ ಮೀ ವೇಗದಲ್ಲಿ ಸಂಚರಿಸುತ್ತದೆ. ಉತ್ತಮವಾಗಿರುವ ರಸ್ತೆಗಳ ಮೇಲೆ 100 ಕಿ ಮೀ ವೇಗವನ್ನೂ ಕ್ರಮಿಸಬಲ್ಲದು. ಇದರಲ್ಲಿ ಡೀಸೆಲ್ ಇಂಧನ ಬಳಕೆಯಾಗಲಿದೆ. ಜಪಾನ್ನ ದಕ್ಷಿಣ ಭಾಗದಲ್ಲಿರುವ ಶಿಕೋಕು ದ್ವೀಪ ಪ್ರದೇಶಗಳಲ್ಲಿ ಈ ವಾಹನಗಳು ಇಂದಿನಿಂದ ಸಂಚರಿಸಲಿವೆ.
CPI ಕುದುರೆ ಸವಾರಿ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್|Police |TV9Kannada
