ಒಂದೇ ವರ್ಷದಲ್ಲಿ ಬಲಾಢ್ಯ ಇಸ್ರೇಲ್​ಗೆ ಎದುರಾಗಲಿದೆ ಮತ್ತೊಂದು ಕಂಟಕ!

ಜೆರುಸಲೆಂ/ಟೆಲ್​ ಅವೀವ್: ಜಗತ್ತಿನ ಬಲಾಢ್ಯ ರಾಷ್ಟ್ರವಾಗಿ ಮಾರ್ಪಡುತ್ತಿರುವ ಇಸ್ರೇಲ್ ಇತ್ತೀಚೆಗೆ ನಡೆದ ಚುನಾವಣೆಯಲ್ಲಿ ತ್ರಿಶಂಕು ಸ್ಥಿತಿ ತಲುಪಿದೆ. ಹಿಂದಿನ ಪ್ರಧಾನಿ ಬೆಂಝಮಿನ್​ ನೆತನ್ಯಾಹು ಅವರಾಗಲಿ ಅಥವಾ ಪ್ರಮುಖ ಪ್ರತಿಪಕ್ಷವಾದ ಬ್ಲ್ಯೂ ಅಂಟ್​ ವೈಟ್​ ಪಕ್ಷವಾಗಲಿ ಅಧಿಕಾರದ ಪೀಠಕ್ಕೆ ಹತ್ತಿರವಾಗಿ, ರಾಷ್ಟ್ರದ ಚುಕ್ಕಾಣಿ ಹಿಡಿಯುವಲ್ಲಿ ಮುಗ್ಗರಿಸಿದೆ. ಹೀಗಾಗಿ ಒಂದೇ ವರ್ಷದಲ್ಲಿ ಇಸ್ರೇಲ್ ಮೂರನೆಯ ಬಾರಿಗೆ ಮತ್ತೆ ಸಾರ್ವತ್ರಿಕ ಚುನಾವಣೆ ಎದುರಿಸುವುದು ಅನಿವಾರ್ಯವಾಗಿದೆ.

ಸೆಪ್ಟೆಂಬರ್​ 17 ರಂದು ನಡೆದು ಸಂಸದೀಯ ಚುನಾವಣೆಯಲ್ಲಿ ಅತಂತ್ರ ಫಲಿತಾಂಶ ಕಂಡುಬಂದಿದೆ. ಪರಿಸ್ಥಿತಿ ನಿಭಾಯಿಸಲು ಅಧ್ಯಕ್ಷ ರುವೆನ್​ ರವ್ಲೀನ್​ ಅವರು ಸರ್ಕಾರ ರಚಿಸುವುದಕ್ಕೆ 28 ದಿನಗಳ ಗಡುವು ವಿಧಿಸಿ, ನೆತನ್ಯಾಹುಗೆ ಆಹ್ವಾನ ನೀಡಿದ್ದರು. ಆ ಗಡುವು ಮುಗಿಯುತ್ತಾ ಬಂದಿದ್ದು, ನೆತನ್ಯಾಹು ಸುಗಮವಾಗಿ ಅಧಿಕಾರಕ್ಕೆ ಬರಲು ತೊಡಕಾಗಿದೆ.

ಸರ್ಕಾರ ರಚನೆಗೆ 120 ಸದಸ್ಯ ಬಲದ ಸಂಸತ್ತಿನಲ್ಲಿ ಮ್ಯಾಜಿಕ್​ ನಂಬರ್​ 61 ಆಗಿದೆ. ಬ್ಲ್ಯೂ ಅಂಟ್​ ವೈಟ್​ ಪಕ್ಷದ ಮಾಜಿ ಸೇನಾಧಿಕಾರಿ ಬೆನ್ನಿ ಗಂಝ್​ ಅವರಿಗೆ 54 ಸದಸ್ಯರ ಬೆಂಬಲ ಇದೆ. ಅದೇ ನೆತನ್ಯಾಹು ಪಕ್ಷಕ್ಕೆ 56 ಸದಸ್ಯರ ಬೆಂಬಲವಿದೆ. ಹಾಗಾಗಿ, ಅಧ್ಯಕ್ಷ ರುವೆನ್ ನೆತನ್ಯಾಹುಗೆ ಸರ್ಕಾರ ರಚನೆಗೆ ಸೂಚಿಸಿದ್ದರು.

ಆದ್ರೆ ಸರ್ಕಾರ ರಚನೆ ನಿಟ್ಟಿನಲ್ಲಿ ನೆತನ್ಯಾಹು, ಬೆನ್ನಿ ಗಂಝ್ ಬೆಂಬಲ ಗಳಿಸಲು ಯತ್ನಿಸಿದರಾದರೂ ಇದುವರೆಗೂ ಆ ಕಡೆಯಿಂದ ಸಕಾರಾತ್ಮಕ ಪ್ರತಿಕ್ರಿಯೆ ಬಂದಿಲ್ಲ. ಜೊತೆಗೆ ಬೆನ್ನಿ ಗಂಝ್, ನೆತನ್ಯಾಹು ಜೊತೆ ಕೈಜೋಡಿಸಲು ಸುತರಾಂ ಒಪ್ಪಿಲ್ಲ. ಹಾಗಾಗಿ ಅನಿವಾರ್ಯವಾಗಿ ಇಸ್ರೇಲ್​ ಒಂದೇ ವರ್ಷದಲ್ಲಿ ಮೂರನೆಯ ಬಾರಿಗೆ ಮತ್ತೆ ಸಾರ್ವತ್ರಿಕ ಚುನಾವಣೆ ಎದುರಿಸುವಂತಾಗಿದೆ.

Published On - 4:48 pm, Wed, 23 October 19