ಭಾರತಕ್ಕೆ ಬರಬೇಕಿದ್ದ ವಿಶ್ವಪರ್ಯಟನೆಯ ಹಡಗು ದಿಢೀರ್ ಸ್ಥಗಿತ: 2024ರಲ್ಲೇ ಹೊರಟಿದ್ದ ಹಡಗು, ಕಾಂಬೋಡಿಯಾದಲ್ಲಿ 200 ಪ್ರಯಾಣಿಕರು ಅತಂತ್ರ
ಮೂರು ವರ್ಷಗಳ ವಿಶ್ವಸುತ್ತಾಟಕ್ಕೆ ಹೊರಟಿದ್ದ ಐಷಾರಾಮಿ ಎಂವಿ ಒಡಿಸ್ಸಿ ಹಡಗು ಕಾಂಬೋಡಿಯಾದಲ್ಲಿ ದಿಢೀರ್ ಸ್ಥಗಿತಗೊಂಡಿದೆ. ಮಧ್ಯಪ್ರಾಚ್ಯ ಬಿಕ್ಕಟ್ಟಿನಿಂದ ಇಂಧನ ವೆಚ್ಚ ಹೆಚ್ಚಳವೇ ಇದಕ್ಕೆ ಕಾರಣ. ಸುಮಾರು 200 ಪ್ರಯಾಣಿಕರು ಅತಂತ್ರರಾಗಿದ್ದು, ಭಾರತಕ್ಕೆ ಬರಬೇಕಿದ್ದ ಹಡಗಿನ ಭವಿಷ್ಯ ಅನಿಶ್ಚಿತವಾಗಿದೆ. ಕ್ಯಾನ್ಸರ್ ರೋಗಿ ಸೇರಿದಂತೆ ಹಲವರು ಸಂಕಷ್ಟಕ್ಕೀಡಾಗಿದ್ದಾರೆ. ಕಂಪನಿಯು ಆರ್ಥಿಕ ಪುನರ್ರಚನೆಗೆ ಪ್ರಯತ್ನಿಸುತ್ತಿದೆ.
ಕಾಂಬೋಡಿಯಾ, ನವೆಂಬರ್ 02: ಮೂರು ವರ್ಷಗಳ ಕಾಲ ವಿಶ್ವದಾದ್ಯಂತ ಸಮುದ್ರಯಾನ ಮಾಡುವ ಕನಸಿನೊಂದಿಗೆ ಐಷಾರಾಮಿ ಹಡಗಿನಲ್ಲಿ ಪ್ರಯಾಣ ಆರಂಭಿಸಿದ್ದ ಸುಮಾರು 200 ಪ್ರಯಾಣಿಕರು ಇದೀಗ ಕಾಂಬೋಡಿಯಾದಲ್ಲಿ ಸಿಲುಕಿಕೊಂಡಿದ್ದಾರೆ. ಮಧ್ಯಪ್ರಾಚ್ಯ ಬಿಕ್ಕಟ್ಟಿನಿಂದಾಗಿ ಇಂಧನ ವೆಚ್ಚ ಹೆಚ್ಚಾಗಿದ್ದು, ನಿರ್ವಹಣಾ ವೆಚ್ಚ ಭರಿಸಲು ಸಾಧ್ಯವಾಗದ ಕಾರಣ ಅಮೆರಿಕ ಮೂಲದ ವಿಲ್ಲಾ ವೀ ರೆಸಿಡೆನ್ಸಸ್ ಕಂಪನಿ ತನ್ನ ಎಂವಿ ಒಡಿಸ್ಸಿ ಕ್ರೂಸ್ ಕಾರ್ಯಾಚರಣೆಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿದೆ. ಈ ಹಡಗು ಭಾರತಕ್ಕೂ ಭೇಟಿ ನೀಡಬೇಕಿತ್ತು. ಆದರೆ ಪ್ರಯಾಣ ಅರ್ಧದಲ್ಲೇ ಸ್ಥಗಿತಗೊಂಡಿರುವುದರಿಂದ ಭಾರತೀಯ ಬಂದರುಗಳಿಗೆ ಬರುವ ಯೋಜನೆಯೂ ಅನಿಶ್ಚಿತವಾಗಿದೆ.
ಮೂರು ವರ್ಷಗಳ ವಿಶ್ವಪರ್ಯಟನೆಗೆ ಹೊರಟಿದ್ದ ಹಡಗು
ಸುಮಾರು ನಾಲ್ಕು ತಿಂಗಳ ವಿಳಂಬದ ಬಳಿಕ 2024ರ ಅಕ್ಟೋಬರ್‌ನಲ್ಲಿ ಉತ್ತರ ಐರ್ಲೆಂಡ್‌ನ ಬೆಲ್‌ಫಾಸ್ಟ್‌ನಿಂದ MV ಒಡಿಸ್ಸಿ ತನ್ನ ವಿಶ್ವಪರ್ಯಟನೆಯನ್ನು ಆರಂಭಿಸಿತ್ತು. ಏಳು ಖಂಡಗಳ 400ಕ್ಕೂ ಹೆಚ್ಚು ಬಂದರುಗಳಿಗೆ ಭೇಟಿ ನೀಡುವ ಯೋಜನೆ ರೂಪಿಸಲಾಗಿತ್ತು. ಹಡಗಿನಲ್ಲಿ ಶಾಶ್ವತ ವಾಸ್ತವ್ಯಕ್ಕಾಗಿ ಐಷಾರಾಮಿ ಕ್ಯಾಬಿನ್‌ಗಳನ್ನು ಸುಮಾರು 1.20 ಲಕ್ಷ ಡಾಲರ್‌ನಿಂದ 4.40 ಲಕ್ಷ ಡಾಲರ್‌ವರೆಗೆ ಮಾರಾಟ ಮಾಡಲಾಗಿತ್ತು. ಇದರ ಜೊತೆಗೆ ಪ್ರಯಾಣಿಕರು ಪ್ರತಿ ತಿಂಗಳು ವಸತಿ ಮತ್ತು ನಿರ್ವಹಣಾ ಶುಲ್ಕವನ್ನೂ ಪಾವತಿಸುತ್ತಿದ್ದರು.
ಇಂಧನ ವೆಚ್ಚ ಹೆಚ್ಚಳವೇ ಸಂಕಷ್ಟಕ್ಕೆ ಕಾರಣ
ಮಧ್ಯಪ್ರಾಚ್ಯದಲ್ಲಿನ ಯುದ್ಧ ಮತ್ತು ಹಾರ್ಮುಜ್ ಜಲಸಂಧಿಗೆ ಸಂಬಂಧಿಸಿದ ಬಿಕ್ಕಟ್ಟಿನಿಂದ ಜಾಗತಿಕ ಇಂಧನ ಪೂರೈಕೆ ಹಾಗೂ ಬೆಲೆಗಳ ಮೇಲೆ ಪರಿಣಾಮ ಬೀರಿದೆ ಎಂದು ಕಂಪನಿ ತಿಳಿಸಿದೆ. ಇದರಿಂದ ಹಡಗಿನ ಇಂಧನ ವೆಚ್ಚ ಭಾರೀ ಪ್ರಮಾಣದಲ್ಲಿ ಹೆಚ್ಚಾಗಿದೆ. ಹಿಂದೆ ಒಂದು ಕ್ಯಾಬಿನ್‌ಗೆ ತಿಂಗಳಿಗೆ ಸುಮಾರು 1,800 ಡಾಲರ್ ಇದ್ದ ಇಂಧನ ವೆಚ್ಚ ಕೆಲವು ಏಷ್ಯನ್ ಪ್ರದೇಶಗಳಲ್ಲಿ 8,000 ಡಾಲರ್‌ಗೆ ಏರಿಕೆಯಾಗಿದೆ ಎಂದು ವರದಿಯಾಗಿದೆ. ಪ್ರಯಾಣಿಕರಿಂದ ಹೆಚ್ಚುವರಿಯಾಗಿ ತಿಂಗಳಿಗೆ 500 ಡಾಲರ್ ಇಂಧನ ಶುಲ್ಕ ಪಡೆಯುವ ಪ್ರಸ್ತಾಪವನ್ನೂ ಕಂಪನಿ ಮುಂದಿಟ್ಟಿತ್ತು. ಆದರೆ ಇದಕ್ಕೆ ಪ್ರಯಾಣಿಕರಿಂದ ವಿರೋಧ ವ್ಯಕ್ತವಾಗಿತ್ತು.
ಇದನ್ನೂ ಓದಿ: ಹಾರ್ಮುಜ್ ಜಲಸಂಧಿಯಲ್ಲಿ ಮುಳುಗಿದ ಹಡಗು; ಸಮುದ್ರದಲ್ಲಿ ತೇಲಾಡಿದ ಐಫೋನ್‌ಗಳು, ಐಷಾರಾಮಿ ಪರ್ಫ್ಯೂಮ್ ಬಾಟಲಿಗಳು!
ಭಾರತಕ್ಕೆ ಯಾವಾಗ ಬರಬೇಕಿತ್ತು?
ಕಾಂಬೋಡಿಯಾದಿಂದ ಮುಂದಿನ ಹಂತದಲ್ಲಿ ವಿಯೆಟ್ನಾಂ, ಸಿಂಗಾಪುರ, ಮಲೇಷ್ಯಾ ಮತ್ತು ಥೈಲ್ಯಾಂಡ್‌ಗೆ ತೆರಳಬೇಕಿದ್ದ ಹಡಗು ಬಳಿಕ ಭಾರತಕ್ಕೆ ಆಗಮಿಸುವ ಯೋಜನೆ ಹೊಂದಿತ್ತು.
– ನವೆಂಬರ್ 29ರಂದು ಕೋಲ್ಕತ್ತಾಗೆ ಆಗಮನ
– ಬಳಿಕ ವಿಶಾಖಪಟ್ಟಣ ಮತ್ತು ಚೆನ್ನೈಗೆ ಭೇಟಿ
– ಡಿಸೆಂಬರ್‌ನಲ್ಲಿ ಮಂಗಳೂರು, ಮುಂಬೈ, ಗೋವಾ ಮತ್ತು ಕೊಚ್ಚಿಗೆ ಪ್ರಯಾಣ
ಆದರೆ ಸದ್ಯ ಹಡಗಿನ ಕಾರ್ಯಾಚರಣೆ ಸ್ಥಗಿತಗೊಂಡಿರುವುದರಿಂದ ಈ ವೇಳಾಪಟ್ಟಿ ಜಾರಿಯಾಗುವುದೇ ಎಂಬುದು ಸ್ಪಷ್ಟವಾಗಿಲ್ಲ.
ಕ್ಯಾನ್ಸರ್ ರೋಗಿಗೂ ಸಂಕಷ್ಟ
ಹಡಗಿನಲ್ಲಿ ಪ್ರಯಾಣಿಸುತ್ತಿದ್ದ ರಾಂಡಿ ಕ್ಯಾಸಿಂಗ್ಹ್ಯಾಮ್ ಎಂಬ ಪ್ರಯಾಣಿಕರು ಕ್ಯಾನ್ಸರ್ ಚಿಕಿತ್ಸೆಗೆ ಒಳಗಾಗುತ್ತಿದ್ದಾರೆ. ಹಡಗಿನಲ್ಲಿ ವಾಸಿಸುತ್ತಿದ್ದಾಗ ಅಗತ್ಯವಿದ್ದಾಗ ತಮ್ಮ ಕೋಣೆಯಲ್ಲೇ ವಿಶ್ರಾಂತಿ ಪಡೆಯಲು ಸಾಧ್ಯವಾಗುತ್ತಿತ್ತು. ಆದರೆ ಈಗ ಹಡಗಿನಿಂದ ಇಳಿಯಬೇಕಾದ ಪರಿಸ್ಥಿತಿ ಎದುರಾಗಿದೆ. ಚಿಕಿತ್ಸೆ ಮುಂದುವರಿಸಲು ಅವರು ಥೈಲ್ಯಾಂಡ್‌ಗೆ ತೆರಳಲು ನಿರ್ಧರಿಸಿದ್ದಾರೆ. ಆದರೆ ಪ್ರಯಾಣಿಕರಿಗೆ ಹೋಟೆಲ್‌ಗಳ ಮಾಹಿತಿ ಅಥವಾ ವಸತಿ ವ್ಯವಸ್ಥೆ ಮಾಡಲು ಕಂಪನಿ ಸಾಕಷ್ಟು ನೆರವು ನೀಡಿಲ್ಲ ಎಂದು ಅವರು ಆರೋಪಿಸಿದ್ದಾರೆ.
ಕಂಪನಿ ಹೇಳಿದ್ದೇನು?
ಹಡಗಿನ ಸಂಸ್ಥಾಪಕ ಮೈಕೆಲ್ ಪೆಟರ್ಸನ್, ಕಂಪನಿ ಆರ್ಥಿಕ ಪುನರ್ರಚನೆಗೆ ಮುಂದಾಗಿದೆ ಮತ್ತು ಹೊಸ ಹೂಡಿಕೆದಾರರಿಂದ ಹಣ ಸಂಗ್ರಹಿಸಲು ಪ್ರಯತ್ನಿಸುತ್ತಿದೆ ಎಂದು ತಿಳಿಸಿದ್ದಾರೆ. ಪ್ರಯಾಣಿಕರು ಮತ್ತು ಸಿಬ್ಬಂದಿಗೆ ನೆರವು ನೀಡುವುದು ಈಗಿನ ಆದ್ಯತೆ ಎಂದೂ ಹೇಳಿದ್ದಾರೆ. ಪ್ರಯಾಣಿಕರು ಹಡಗಿನಿಂದ ಸುರಕ್ಷಿತವಾಗಿ ಇಳಿಯಲು ಮತ್ತು ತಾತ್ಕಾಲಿಕ ವಸತಿ ಹುಡುಕಲು ಸಹಕರಿಸುತ್ತಿರುವುದಾಗಿ ಕಂಪನಿ ಹೇಳಿದೆ. ಆದರೆ ಕಾಂಬೋಡಿಯಾದಿಂದ ತಮ್ಮ ಸ್ವಂತ ಊರಿಗೆ ಮರಳುವ ಪ್ರಯಾಣದ ವೆಚ್ಚವನ್ನು ಕಂಪನಿ ಭರಿಸುವುದಿಲ್ಲ ಎಂದು ವರದಿಯಾಗಿದೆ.
ಐಷಾರಾಮಿ ಸಮುದ್ರಯಾನದ ಕನಸಿನೊಂದಿಗೆ ಕೋಟ್ಯಂತರ ರೂಪಾಯಿ ಖರ್ಚು ಮಾಡಿ ಹಡಗಿನಲ್ಲಿ ವಾಸ ಆರಂಭಿಸಿದ್ದ ಪ್ರಯಾಣಿಕರು ಈಗ ಅನಿಶ್ಚಿತತೆಯಲ್ಲಿ ಸಿಲುಕಿದ್ದಾರೆ. ಹಡಗಿನ ಪ್ರಯಾಣ ಮತ್ತೆ ಯಾವಾಗ ಆರಂಭವಾಗಲಿದೆ ಎಂಬುದರ ಬಗ್ಗೆ ಇನ್ನೂ ಸ್ಪಷ್ಟತೆ ಇಲ್ಲ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ