ಪಾಕಿಸ್ತಾನ​ ಕೋರ್ಟ್​ ತೀರ್ಪು: ಡೇನಿಯಲ್ ಪರ್ಲ್ ಕೊಲೆ ಆರೋಪ ಎದುರಿಸುತ್ತಿದ್ದವನ ಬಿಡುಗಡೆ

ಇಸ್ಲಾಮಬಾದ್: ಅಮೆರಿಕಾದ ವಾಲ್​ಸ್ಟ್ರೀಟ್ ಜರ್ನಲ್ ವರದಿಗಾರ ಡೇನಿಯಲ್ ಪರ್ಲ್ ಎಂಬಾತನ ಅಪಹರಣ ಹಾಗೂ ಕೊಲೆ ಆರೋಪ ಎದುರಿಸುತ್ತಿದ್ದ ಉಗ್ರಗಾಮಿ ಅಹ್ಮದ್ ಓಮರ್ ಸಯೀದ್ ಶೇಖ್​ನನ್ನು ಬಿಡುಗಡೆಗೊಳಿಸಿ ಪಾಕಿಸ್ತಾನ ಕೋರ್ಟ್​ ಆದೇಶ ನೀಡಿದೆ.

2002ರಲ್ಲಿ ಈ ಪ್ರಕರಣ ನಡೆದಿತ್ತು. 47 ವರ್ಷದ ಅಹ್ಮದ್ ಓಮರ್ ಸಯೀದ್ ಶೇಖ್ ಈ ಪ್ರಕರಣದಲ್ಲಿ ಭಾಗಿಯಾದ ಬಗ್ಗೆ ಚರ್ಚೆಗಳು ಆರಂಭವಾಗಿದ್ದವು. ಇದೀಗ ಈ ಬಗ್ಗೆ ತೀರ್ಪು ನೀಡಿರುವ ಪಾಕ್ ನ್ಯಾಯಾಲಯ ಅಹ್ಮದ್ ಓಮರ್ ಸಯೀದ್ ಶೇಖ್​​ನನ್ನು ಬಿಡುಗಡೆ ಮಾಡಿದೆ.

ಕೊಲೆ ಸಂಚಿನಲ್ಲಿ ಅಪರಾಧಿ ಎಂದು ಘೋಷಿಸಿದ್ದ ನ್ಯಾಯಾಲಯವು 2002ರಲ್ಲಿ ಮರಣದಂಡನೆ ವಿಧಿಸಿ ತೀರ್ಪು ನೀಡಿತ್ತು. ಆದರೆ, ಜೈಲುವಾಸ ಅನುಭವಿಸುತ್ತಿದ್ದ ಆರೋಪಿಯ ಪರವಾಗಿ ಹಲವಾರು ಮಂದಿ ಮೇಲ್ಮನವಿ, ವಾದ ಮಂಡಿಸಿದ್ದರು. ತನಿಖೆಯ ಹಾದಿಯೂ ಕ್ರಮೇಣ ಬದಲಾಗಿತ್ತು.

ವಾಲ್​ಸ್ಟ್ರೀಟ್​ ಜರ್ನಲ್​ನ ದಕ್ಷಿಣ ಏಷ್ಯಾ ಬ್ಯೂರೊ ಮುಖ್ಯಸ್ಥನಾಗಿದ್ದ ವರದಿಗಾರ ಡೇನಿಯಲ್ ಪರ್ಲ್, ಅಲ್-ಖೈದಾ ಭಯೋತ್ಪಾದನಾ ಸಂಘಟನೆಯ ಬಗ್ಗೆ ದಕ್ಷಿಣ ಪಾಕಿಸ್ತಾನದ ಕರಾಚಿ ಪ್ರದೇಶದಲ್ಲಿ ತನಿಖೆ ನಡೆಸುತ್ತಿದ್ದ. 2002 ಜನವರಿಯಲ್ಲಿ ಕಣ್ಮರೆಯಾಗಿ, ಕೊಲೆಯಾಗಿದ್ದ.